Tutura Rasul 4
4
Petrus pade Yohanes i tingoo to Pobotuhi Agama
1Bulara Petrus pade Yohanes nojarita hi todea, ngkali narataramo bahangkua dua imam, kapala to nampodoo Hou Alatala pade bahangkua dua to Saduki#4:1 To Saduki ee mai hangu kahiromua agama Yahudi to momara namparahaya ane naria katuwua nculi to mate. Hira ee mai wule namparahaya napa to laitulihi rara alima buku Musa. Moma laitarimara buku-buku ntanina rara Buku to Nagaha pade moma mui laitarimara atura ada to moma laitulihi to laitambaira to Farisi.. 2Nahodo mpuura hi Petrus pade Yohanes apa laipatudura todea ane Yesus natuwu nculimi lako kamatea-Na, pade patudura lauria nampahiloi ane to mate kana matuwu nculi. 3Laihokora Petrus hante Yohanes pade laipahuara i tarungku duu kanailena, apa tempo ee nalimaumi. 4Naupawee todea to nangepe patudura ee mai, nadeara neparahaya, hampena natetambaiki kadeara nawali ba maria alima ncobu dua balailo.
5Kanailena to pangkeni-to pangkeni to Yahudi hante totua-totua ngata to Yahudi pade to nataualu buku Taurat nolibu i Yerusalem 6hante Imam Bohe Hanas pade Kayafas, Yohanes pade Aleksander hante humawee to ntanina lako muli Imam Bohe. 7Petrus pade Yohanes laikeni i rara polibua ee mai, pade laipekune iwei, “Hante baraka napa pade hante hanga hema komi nobabei humawee ee mai?”
8Petrus to naponu hante Inoha to Nagaha nampahonoira, “Tuama-tuama to pangkeni todea pade totua-totua ngata, 9ane welau ei kana rapareha kami habana nampatulungi tauna to napungku pade kana mopandola hi komi hante baraka napa tauna ee mai laipakauri, 10kana mincani pura, komi to naria ei pade humawee to Israel, tauna ei nauri pade naroho pokangkorena i tingoomi habana baraka Yesus Kristus to Nazaret. Yesus Kristus ee mai to laisalibmi hampe namate, naupawee laipakatuwu nculi Alatala. 11#Mzm. 118:22 Yesus eemile watu to laiuli rara Buku to Nagaha iwei,
‘Watu to laitadira tuka hou,
watu ee laumi to nawali koro watu pondasi.’
Komimi tuka ee mai. 12Pade kahalamaa moma naria hi hema-hema. Kahalamaa ee naria hi Yesus aga, habana i une langi ei mai, moma naria to ntanina to laiwaika Alatala baraka mampakahalama manuhia.”
13Naherara to nolibu ee mai nampahilo kabiara Petrus pade Yohanes, apa laincanira ane hira ee mai todea biaha motora to moma nohikola. Laincanira ane Petrus pade Yohanes ee mai to naharo nampodohe Yesus. 14Naupawee apa laihilora tauna to laipakaurira ee mai nokangkore i humpiira Petrus pade Yohanes, momami napa iulira. 15Laitudura rasul eera mai mehuwu lako polibuara. Napu ee mai nolibuki nculi muira, 16iulira, “Napa to kana tababeikara tauna ee rau? Apa humawee tauna i Yerusalem laincanira purami ane hira nobabei tanda to nepakahera. Napa to laibabeira ee mai moma'i namala laihapuakata. 17Naupawee bona nemo maluoki potolelena hi todea napa to nadupa ei mai, agina tapararai pade tatagira bona nemorapa mampojarita nangkambelai Yesus hi tauna.”
18Hangka laikio nculirapa Petrus pade Yohanes nehua, laiulikaramo bona nemo mpuurapa mojarita ba mopatudu tauna nangkambelai Yesus. 19Naupawee Petrus pade Yohanes nampahonoira, “Botuhi motomo komi uma to nakono i tingoo Alatala, matundu hi komidi ba matundu hi Alataladi. 20Apa moma kami mamala mentuu manguli napa to lainaa kami pade to laiepe kami.”
21Moma naria dalara mampahuku Petrus pade Yohanes. Aji, laipararaikira rodua rasul ee pade laibakahara, apa naekara nemo mei mogehora todea. Apa todea ee mai nampaune Alatala habana nampahilo napa to nadupa. 22Apa tauna to laipakaurira hante nepakahera ee mai, umuruna opo mpulu mpae labimi.
Hambaya jumaa
23Laibakaharapa Petrus pade Yohanes, nanculiramo rau nampotomuka dohera to hangu kaparahayaa. Laituturara hi dohera humawee to laiulira imam-imam to i matana pade totua-totua ngata to Yahudi. 24Pangepera dohera jarita ee mai, humaweera nohambaya hi Alatala, iulira, “Oo Pue, Ikomi to nopajadi langi bo dunia, tahi hante humawee ihina. 25#Mzm. 2:1-2Hante Inoha-Mu to Nagaha nololitamo-Ko hi batua-Mu, tumpuloko kami Magau Daud, iuli-Mu:
‘Napa pade nahodora tauna to moma nangincani Alatala,
napa pade tauna nampoliwoi to moma naria bununa?
26Magau-magau dunia nahadiaramo rau mohiwali,
pade totua-totua ngata nahintuwu
mampaewa Pue pade Magau to Pepakahalama to laitipa-Na.’
27Apa i rara ngata ei mai nahintuwuramo Herodes pade Pontius Pilatus hante tauna to moma Yahudi pade to Israel nampaewa Yesus, Batua-Mu to nagaha, to laiongko-Mu nawali Magau to Pepakahalama. 28Nohangu rarara nobabei hangu hangaa, to laipakatantu-Mu amimi ane ee mai kana madupa. Laipakatantu-Mu ee mai mantuku baraka pade dota-Mu moto. 29Welau ei Pue, hilo bewara nampararai kami. Waika kami batua-Mu ei, kabiaa mampotolele lolita-Mu. 30Pahiloi kami baraka-Mu Pue, bona tauna to nadua mamalara mauri. Babeimi tanda-tanda pade to mepakahera rara hanga Yesus, Batua-Mu to nagaha.”
31Napurapa nohambaya, nolengkami hou kahiromuara ee mai, pade humaweera naponu Inoha to Nagaha. Lauparia nabiaramo nangkarebai lolita Alatala.
Tau-tauna to neparahaya nonepaganai kaparalua
32Humawee tauna to neparahaya ee mai, natuwu nohangu rara pade nohangu pekiri. Moma naria haduaa to nanguli ane napa to ikamina wuwu hia tumpuna, naupawee humawee to naria hi hia, hira pura tumpuna. 33Pade hante baraka to nabohe rasul-rasul nohabi nangkambelai katuwu nculi Pue Yesus lako kamatea, pade humaweera natuwu rara towe bohe Alatala to neliu pelabina. 34Humaweera ee mai moma hema haduaa nakakuraa, apa hema tauna to naria tana ba houra, laipobalurami, pade doina laikenira 35bo laijujura i tingoora rasul. Napu ee doi ee laitiraka hi humawee tauna toto kaparaluara.
36Wee mui Yusuf to Lewi lako Siprus, to laikahangaira rasul ee Barnabas. Batua hanga ee “to nampakaroho rara.” 37Laipobaluna pampana, laikenina doina pade laijujuna i tingoora rasul.
Tans Gekies:
Tutura Rasul 4: MYL
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
