Kikia 8
8
1Sɔɔl déem ma na ba na ke tei ba go Stiiven to, ye o sɛ ba keim dem.
Yezu nɔɔna bam nɛ yaara
Dɛ dem konto ne Yezu kɔgɔ kom nɔɔna balo na wo Jerusalem ne to laam ma bobo se ba na yaara dedɛ nɔɔna tei ne. Ba maama ma jage ba duri ba zo teene delo maama na wo Judea de Samaria ne to wone. Ko daare Yezu totoŋa nakwa bam yerane mo wo tɔge ba duri. 2Nɔɔna badwonna na kɔre Wɛ to ma kwei Stiiven yera yam ba suli, ye ba daare ba keeri‑o lanyerane. 3Sɔɔl ma kwaane se o chɔge Yezu kɔgɔ kom maama. O maa yeini o tole sam dem wone o jaane balo na tɔge Yezu to o vei o ke peena diga ne, baara de kaana maama.#Kikia 22:4; 26:9-11
Wɛ kwor-ywoŋa kam jage
4Yezu nɔɔna balo na duri ba jage to maa yeini ba vei jei maama ba tɔɔle Wɛ kwor-ywoŋa kam. 5Filipi ma zaŋe o vo Samaria teo kodwoŋi o ta Wɛ Dam Tu Krista taane o bere nɔɔna bam.#Kikia 6:5 6Nɔn-kɔgɔ kom ma seene ba yia ba cheigi Filipi na ŋɔɔne kolo to. Ba maama déem cheigi o taane dem ye ba kwori ba na wo-kenkagela yalo o na ke to. 7Ba ma na chichiri na yage nɔɔna dedɛ ye se chwoosi baŋa baŋa. Gwaaro dedɛ, de gwane de ma na yazura. 8Konto ŋwaane wopwolo déem maa tiini ko wora Samaria tiina bam tei ne.
9Teo kom konto ne nɔɔno déem ya wora, o yere mo Simon. O maa pae se Samaria tiina bam ye yaau o liri kikia baŋa ne. O déem bere o tete we o ye nɔn-kamunu mo. 10Teo kom nɔɔna maama ma kwaane ba cheigi‑o lanyerane, dedɛɛra de nabwona maama. Ba maa pae se Wɛ dam mo wo o tei ne, ye ba jege‑o ba bwoi we ‘Dam-fɔrɔ tu’. 11O déem ya pɛ se ba ye yaau de o liri sem taa, se ko dáane dedɛ. Konto ŋwaane mo ba déem seene ba yia ba cheigi‑o lanyerane.
12Filipi laam ma ba o da Yezu Krista yere dem ŋwaane o tɔɔle Wɛ paare dem kwor-ywoŋa kam. Nɔɔna bam ma sɛ o taane dem. Ba ma jwoŋi sɛɛm Yezu ŋwaane, baara de kaana de. 13Simon tete de ma sɛ ye o daare o jwoŋi sɛɛm. O ma tɔge dedaane Filipi ye o na wo-kenkagela de maana yalo o na ke ye ya bere Wɛ dam to. O na nɛ-ya to, ko ma ke‑o yaau.
14Yezu totoŋa nakwa bam na wo Jerusalem ne to ma ni we Samaria tiina bam tu ba sɛ Wɛ taane dem. Ba ma toŋe Piita de Jɔn se ba vo ba nii. 15Ba na vei ba yi da to, ba ma lwoori Wɛ ba pa balo na sɛ Yezu to, se ba wane ba jwoŋi Wɛ Sin-laao kom. 16Kolo ŋwaane Wɛ Sin-laao kom daa ta wo tu banto wolowolo tei. Ba na jwoŋi sɛɛm to déem ye dé Teiru Yezu yere ŋwaane yerane mo. 17Piita de Jɔn laam ma daŋe ba jea ba baŋa ne pa ba jwoŋi Wɛ Sin-laao kom ba bochara ne.
18Yezu totoŋa nakwa bam na daŋe ba jea nɔɔna bam baŋa ne pa ba jwoŋi Wɛ Sin-laao kom konto to, Simon ma na ko na ke tei to. O ma kwei sabu o ma lwoori Piita de Jɔn o we, 19“Amo lage se á pa amo de taa jege dam dento dwoŋi se, amo ná kwei a je a daŋe nɔɔno wolo baŋa ne, se konto tu jwoŋi Wɛ Sin-laao kom.” 20Piita ma leiri‑o o we, “Wɛ wó chɔge nmo, de n sabu kom maama, nmo na boŋe we n wó wane n ma n sabu n yeigi Wɛ pɛɛre to ŋwaane. 21Nmo bochare ba tɔge chega Wɛ yiga ne. Konto to, n bá‑n na chwoŋa se n tɔge de debam n toŋe Wɛ totoŋa yam. 22Nam leiri n wo se n yage wo-lwanno telo nmo na boŋe se n ke to, se n daare n lwoori dé Teiru Wɛ we, o ná sɛ, se o yage-te o ma chɛ‑m. 23Kokuri amo nɛ we n jege puseŋa dedɛ, ye wɛleera jege‑m ya dam kuri ne.” 24Simon ma leiri o we, “Nam lwoori-na Wɛ á pa-ne se wonnu telo maama á na tage amo baŋa ne to yé ba te chɔge-ne.”
25Piita de Jɔn déem ma ta Yezu chega kam ba bere nɔɔna bam ye ba kwori ba ŋɔɔne Baŋa Wɛ kwora kam. Ba laam ma jwoori ba maa vei Jerusalem. Ba na maa jwoori to, ba ma tole Samaria te-nia yam wone ba tɔɔle Wɛ kwor-ywoŋa kam.
Filipi pɛ dedɛɛro ni Wɛ taane kuri
26Baŋa Wɛ maleka laam ma ba Filipi tei ka ta ded‑o ka we, “Zaŋe wea tetare ne n vo n tɔge chwoŋa kalo na zege Jerusalem ne ka vei Gaza to.” Chwoŋa kam konto tɔge kagoa wo mo ka via.
27Filipi ma zaŋe o kɛ. Etiopia tu de déem maa wo chwoŋa kam ne o maa vei sɔŋɔ. Wonto mo ye dedɛɛro ye o toŋe o pae o teo kom ka-pɛ wom ba na bwoi we ‘Kandake’ to. O maa nii o jejegero tem maama baŋa ne. O déem ya vei Jerusalem mo se o ware Wɛ, 28ye o laam maa jwoori o vei sɔŋɔ de toroko kolo siseiŋa na vaŋe to. O toroko kom na maa dura konto to, o maa jei o gare tɔnɔ kolo Wɛ sampwora Izaya na popone faŋa faŋa to. 29Wɛ Sin-laao kom ma bere Filipi ko we, “Véi n ta‑n tɔge toroko kom.” 30O ma duri o vo o yi nɔɔno wom tei. O ma ni nɔɔno wom na jege Wɛ sampwora Izaya tɔnɔ kom o gara. O ma bwei‑o o we, “Nmo wó wane n ni n na jege kolo n gare to kuri na?” 31O ma leiri o we, “Amo nam wó ke tɛ mo a lɔre ko kuri ye nɔɔn-nɔɔno wo maŋe-ko o bere ne?” O laam ma pa se Filipi di toroko kom baŋa o jeini o tei ne. 32O na wora o gare wonnu telo tɔnɔ kom wone to mo tento:
“Wonto déem mo nye de pia ba na vaŋe ba ja ba vo se ba go to.
O ta nye de pipeila kalo ba na fane ka koro ye ka wo ke sɔɔ to.
Konto dwoŋi mo o wo puri o ni o ta kolokolo.
33Nɔɔna maa jege‑o ba gwoona.
Ba wo mɛ chega ba di o taane.
Nɔɔn-nɔɔno daa tera o na wó ŋɔɔne o dwi dem taane,
kolo ŋwaane o dwi ti logo baŋa ne.”#Izaya 53:7-8
34Dedɛɛro wom ma ta de Filipi o we, “A lage a bwei a nii, wɔ taane mo Wɛ sampwora kam tɛa, o tete mo o tɛ naa nɔɔno wodwoŋi mo?” 35Filipi ma jwoori o bobo nɔɔno wom na gage mɛ to o bere‑o ko kuri, ye o daare o ta Yezu kwor-ywoŋa kam maama o bere‑o. 36Ba na tɔge chwoŋa kam ba maa vei konto to, ba ma vo ba yi buga. Dedɛɛro wom ma ta o we, “Nii, na wora ywo-seeni. Amo bá wane a jwoŋi sɛɛm na?” [37Filipi ma leiri‑o o we, “Nmo ná sɛ Wɛ chega kam de n wo maama, nmo wó wane n jwoŋi sɛɛm.”]
38Dedɛɛro wom laam ma pa se toroko kom zege. Ba maama ma tu tega ba vo ba zo na bam wo. Filipi ma pa‑o sɛɛm Yezu ŋwaane. 39Ba ma nwoŋi na bam wone. Ba na nwoŋi to, dé Teiru wom Sin-laao kom ma chaale Filipi ko ja viiri. Dedɛɛro wom ma daa wo nɛ‑o. O ma jwoori o kwei chwoŋa o maa kɛa, ye o tiini o jege wopwolo dedɛ. 40Filipi ma na we o tu o wo Azota ne mo. O ma tole teene maama o tɔɔle Wɛ kwor-ywoŋa kam taa, o vo o yi Kazaria.
Tans Gekies:
Kikia 8: KBG
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Ghana Institute of Linguistics, Literacy and Bible Translation (GILLBT)
