Kikia 7
7
Stiiven na tole o kwora tei to
1Juu tiina kaanem yuu tu wom ma zaŋe o bwei Stiiven o we, “Wonnu telo ba na tage ba pa nmo to ye chega mo naa vwa mo?” 2Stiiven laam ma leiri o we:
“A nu-bia de a kwoa bam, cheigi-na amo. Faŋa faŋa to Nenɔŋ-fɔrɔ Tu Baŋa Wɛ mo tu o veere o tete debam nabaaro Abaraham tei ne. Konto maŋa kam ne Abaraham déem ta zoore Mesopotamia ne mo. O daa ta wo vei se o taa zoore Haran ne. 3Wɛ déem ma ta ded‑o o we, o yage o tete teo kom de o sɔŋɔ tiina, se o daare o vo jei selo omo na wó bere‑o to.#Pulim 12:1 4O ma seene o zaŋe o nwoŋi Chaladea tiina teo kom o vo o yi Haran o zoore da. O na wo dáane to, o kwo ma te. Wɛ ma pa se o daa nwoŋi o fɔɔre o vo o yi teo konto mɛ abam na zoore zem to. 5Wɛ nam wo pɛ Abaraham tega ywo-seeni se o taa tei, de fenfee de o wo pɛ‑o. Wɛ nam pwooli mo we, omo wó pa‑o tega kanto se o taa tei, ye o ná tega o daare, se o dwi tiina ta taa tei-ka. Wɛ tiŋi o ni dem konto ye Abaraham ta ba jege bu.#Pulim 13:14-15 6Wɛ na tage kolo ded‑o to mo tento: ‘Abaraham, nmo dwi tiina wó vo ba taa zoore sa-teo ne. Ba wó taa ye kabɛ mo teo kom konto ne, pa se nɔɔna bɛɛse-ba taa, bena bia yana (400). 7Amo Wɛ nam wó pa se teo kolo nɔɔna na fe-ba se ba toŋe kabɛ totoŋa to na waarem. Konto kwaga ne ba laam wó nwoŋi teo kom konto ne ba ba ba taa zuli amo jei sento ne.’ 8Wɛ ma daare o gwoni ni de Abaraham. O ma pa se Abaraham dwi tiina taa gwoni ba peina se ko bere we ba sɛ o ni dem konto.#Pulim 17:10; 21:4 Abaraham ma ba o lo Izaak. Da nana dɛ ne o ma gwoni o peini. Izaak de déem ma ba o lo Jakob. Jakob ma lo dé nabaara fuga-balei bam.
9Nabaara bam dedoa yere mo Josɛf. O chorro tem maa jege puseŋa ded‑o. Konto ŋwaane mo ba jaane‑o ba yeigi ba pa o vo Ejipti se o taa ye kabaa.#Pulim 37:11, 28 Wɛ ta maa wo o tei ne. 10O ma pa se o nwoŋi cham maama wone de yazura. Josɛf na tu o zege Ejipti Pa-faro wom yiga ne to mo Wɛ pɛ‑o swa pa se o kikia su Pɛ wom yi lanyerane. Pɛ wom ma pa se o ji o sɔŋɔ kom tu de Ejipti teo kom maama yuu tu.
11Kana déem ma ba ka wora Ejipti de Kanaan teene dem maama ne. Ko ma tiini ko chɛ ba yera ne. Dé nabaara bam déem maa ware se ba na wodiu ba di. 12Jakob déem ma ni we wodiu wo Ejipti ne. O ma toŋe dé nabaara bam pa se ba vo ba nii. 13Konto kwaga ne, ba daa ma jwoori ba vo ba ke belei. Josɛf laam ma pa se o chorro tem lɔre‑o. Ejipti Pa-faro wom de laam ma ba o lɔre Josɛf sɔŋɔ tiina bam. 14Josɛf ma daare o toŋe ni o pa o kwo Jakob se o de o sɔŋɔ tiina bam maama ba o tei Ejipti ne. Ba maama déem ye nɔɔna fuserepɛ-banu (75) mo. 15Jakob ma seene o zaŋe o vo Ejipti. Dáane mo wonto tega. Dé nabaara bam de ma ba ba te. 16Ba ma ja ba yera yam ba jwoori ba vo Sɛkɛm ba suli-ba yibeeli delo ne Abaraham déem na yeigi de sabu Hamora bia bam tei ne to.
17Maŋa kam ma twɛ se Wɛ ke o su o na pwooli de Abaraham se o ke kolo to. Maŋa kam konto ne debam nɔɔna balo na wo Ejipti ne to maa tiini ba wora ba pula dedɛ. 18Pa-faro wodwoŋi de daa ma zaŋe se o taa tei Ejipti. O maa yeiri Josɛf ni ne. 19O déem maa jege debam nabaara bam o bɛɛsa. Swa mo o kea ye o fe-ba se ba kwei ba bu-sese ba yage pwooni yiga ne se ko pa ba te.#Nwoŋim 1:7-22
20Konto maŋa kam ne mo ba loge Moses. O déem maa ye bu-laao chekke Wɛ yiga ne. Ba maa jege‑o ba kɔna o kwo sɔŋɔ ne chane setɔ. 21Ba laam ma ja‑o ba nwoŋi ba tiŋi pwooni ne. Pa-faro wom bukɔ ma kwei‑o o jege o nia, ne o ye o tete bu mo tei. 22Ba ma bere Moses Ejipti tiina yi-poro kom maama. O ma ji nɔn-babea o ni taane de o kikia maama baŋa ne.#Nwoŋim 2:3-10
23Moses déem na yi bena finna to, o ma boŋe se o vo o nii o dwonna Isarele tiina bam na ye tei. 24O na vei to, o ma na Ejipti tu wodwoŋi na jege Isarele tu o maga. Moses ma vo se o woli o tete dwi tu wom jara yam wone. O ma mage Ejipti tu wom o go. 25O déem ya boŋe we o tete dwi tiina bam wó lɔre we Wɛ lage o pa se wonto mo jwoŋi-ba Ejipti tiina bam jeŋa ne o yage. Ba ma ware se ba lɔre konto. 26Tega na poore to, o daa ma na Isarele tiina balei na jege daane. O ma kwaane se o lwɛ-ba ye o ta de-ba o we, ‘Amo nɔɔna bam, abam ye chorro mo daane. Bɛ mo ke ye abam jege daane konto?’
27O na tage de-ba konto to, wolo wom na dana to ma yigi Moses o yage dáa ne. O ma bwei Moses o we, ‘Wɔ mo pɛ nmo chwoŋa se n ta‑n ye debam yuu tu, se n daare n ŋɔɔne debam taane? 28Nmo nam boŋe se n go amo mo, ne n diim na go Ejipti tu wom tei to na?’ 29Moses na nigi konto to, o laam ma duri o nwoŋi Ejipti ne o vo o zoore Midian teo ne. Dáane mo o di kaane ye ba lo bia balei.#Nwoŋim 2:11-14
30Bena finna déem na kɛ to, Wɛ maleka ma ba ka nwoŋi Moses yiga ne. Ko déem ye kagoa yuu ne mo Moses wora, ko bwola de Sinayi peo kom. O ma na min-vogo na jege sabare ko di, ye maleka kam wo dáane.#Nwoŋim 3:2 31Moses yera ma sɔɔre de o na nɛ kolo to. O ma fɔɔre o yi mini dem se o nii. O laam ma ni Baŋa Wɛ kwora ye ka we, 32‘Amo mo ye nmo nabaara bam Wɛ wom. Amo mo ye Abaraham Wɛ, de Izaak, de Jakob Wɛ.’ Foone ma ja Moses ye o ware se o daa nii. 33Baŋa Wɛ ma ta ded‑o o we, o le o natera yam se jei selo o na zege da to ye omo tete nyem mo. 34Wɛ daa ma ta o we, ‘Amo nɛ a nɔɔna bam na wo Ejipti ne ye ba yaare tei to. A ma kwori a ni ba na kona tei to. Amo laam tu ba tei mo se a jwoŋi-ba a yage. Nii ywo, a lage a toŋe‑m se n jwoori Ejipti.’ ”
35Stiiven ta ma ta o we, “Moses déem ye wolo Isarele tiina bam na ve‑o to. Ba déem bwei‑o ba we, ‘Wɔ mo pɛ nmo chwoŋa se n ta‑n ye debam yuu tu se n daare n ŋɔɔne debam taane?’ Moses nam ta mo ye wolo Wɛ na toŋe‑o se o taa tei o nɔɔna bam, se o daare o jwoŋi-ba o yage to. Wɛ ma toŋe maleka ye ka nwoŋi o yiga ne sabare wone ka bere‑o konto. 36Moses déem ma ke wo-kenkagela de maana Ejipti ne, pa se o wane o ja Wɛ nɔɔna bam o nwoŋi. Ba ma tɔge Nane-soŋo kom ba bɛ ba daare ba beeri kagoa kam wone taa, bena finna, ye Moses ta ke wo-kenkagela dedɛ ba tei ne. 37Moses ta mo ye wolo na tage de Isarele dwi tiina bam o we, ‘Wɛ wó toŋe o ni-jwoŋinu abam tei ne, ne o na toŋe amo Moses tei to. Wonto wó nwoŋi abam tete dwi dem wone mo.’#Nia Gulim 18:15 38Moses mo ye wolo na tɔge o wo Isarele dwi tiina kɔgɔ kom wone kagoa kam yuu ne to. O maa tɔge o wora dedaane dé nabaara bam, de maleka kalo na ŋɔɔne ded‑o Sinayi peo kom yuu ne to. Wonto mo jwoŋi Wɛ botare selo na pae ŋwea to se o ke debam jeŋa ne.
39De konto maama, dé nabaara bam ma ve se ba sɛ Moses ni. Ba ma yigi‑o ba yage dáa ne, ye ba daare ba boŋe se ba jwoori ba vo Ejipti. 40Ba ma ta de Aron ba we, ‘Mɔ jwona n pa debam se ya taa tɔge dé yiga. Ko nam ná ye Moses wolo na jaane debam o nwoŋi Ejipti teo ne to, dé yeiri woŋo kolo na yi‑o to.’#Nwoŋim 32:1 41Maŋa kam konto ne ba ma seene ba mɔ kamɔgɔ pa ko nye de na-mɔra, ye ba pa ko ye ba jwoni. Ba maa jege-de ba kaana. Ba ma daare ba ke kuri ba pa ba tete de ba na mɛ ba jea ba mɔ kolo to. 42Ba na kaane jwoni dem konto to, mo Wɛ mɛ o kwaga o ya-ba. O ma yage-ba se ba taa zuli chalechwe selo na wo wɛyuu ne to. Ko ke nenɛɛne ko na maŋe ko popone Wɛ sampwori sem tɔnɔ kom ne we:
‘Isarele dwi tiina bam, á déem na wo kagoa kam wone bena finna
ye á kwei vara de pɛɛra dwi dwi á ma á ke kaanem to,
ko dae amo mo á kaane á pa konto.
43Ko nam ye Moleka jwoni dem wara-vwei mo abam zeŋe,
dedaane chalechoa kalo na ye abam jwoni Refana to.
Tento maama nam ye kamwaro telo á na ke
se á ta‑á zuli-te mo.
Konto ŋwaane amo wó ja abam a nwoŋi á teo kom wone
a kale a vo jei selo na gaale Babilon to.’#Amosi 5:25-27
44Debam nabaara bam na beeri kagoa kam wone to, ba déem jege Wɛ wara-vwei dem ba via. Wɛ déem ya bere Moses o na wó ke tei o pu vwei dem to. Ba déem seene ba ke-de ne Wɛ na tage tei to. 45Ko kwaga seeni to, dé nabaara bam mo jwoŋi vwei dem ba kwoa tei ne ba zeŋe-de ba ja ba tɔge Josua. Ba ma vo ba wane teene delo Wɛ na lage o pa-ba se ba taa zoore da to. Wɛ déem zeili tega kam konto nɔɔna bam o yage ba yiga ne. Vwei dem maa wora taa, se ko ba ko yi David na zaŋe o ji pɛ maŋa kalo to. 46O kikia ma su Wɛ yi ye o lwoori Wɛ se o pa‑o chwoŋa se o lɔ diga o ma leiri vwei dem yuu ne, se Wɛ taa zoore da Jakob dwi tiina bam tetare ne. 47Ko nam ye David bu Solomon mo lɔge diga o pa Wɛ. 48Yuu-tu Baŋa Wɛ wom nam ba zoore di selo nabiina na lɔge to wone. Wɛ sampwora dedoa déem tage o we:
49‘Baŋa Wɛ kwora mo tento:
Wɛyuu kom mo ye amo paare yituŋu.
Ko daare tega baŋa kam maa ye amo na chwi a nɛ mɛ to.
Abam wó ke tɛ mo á lɔ diga á pa-ne?
Jeiga kɔ mo amo wó vo a peini da a sii?
50Ko dae amo tete je mo
a mɛ a ke wonnu tento maama na?’ #Izaya 66:1-2
51Abam jege yi-dɛɛre dedɛ. Á bochara de nye de balo na ba tɔge Wɛ to bochara. Abam zwa mo kwareme ye á ba ni Wɛ kwora kam. Abam de á nabaara bam kikia maama ye bedwe mo. Abam ba sɛ Wɛ Sin-laao kom na bere chega kalo to. 52Wɛ sampwori sem wolowolo tera abam nabaara bam na wo zeili kotu. Ba déem go balo na wuuri ba ta we Wɛ wó toŋe Wo-pwoŋo Tu wom se o ba to. Leile konto abam nam mo kwei wonto á ke nɔɔna jeŋa ne pa ba go‑o.#2 Tigisim 36:16 53Abam ye balo na jwoŋi Wɛ nia yalo o na tɔge malese jeŋa o pa abam to mo. De konto de, á ta wo sɛ-ya.”
54Stiiven na tage konto o ti to, ko ma pa se Juu tiina nakwa bam bane fuli dedɛ o baŋa ne, ye ba done ba yeila o ŋwaane. 55Wɛ Sin-laao kom maa wo Stiiven tei ne lanyerane. O ma kwoni o yuu wɛɛne o yɔɔre o nii Wɛ telaao seeni o na Wɛ nenɔŋ-fɔrɔ na daga tei to. O ma daare o nii o na Yezu na zege Baŋa Wɛ jazem seeni tei to. 56O laam ma ta o we, “Nii-na! Amo nɛ Wɛ telaao ni na pore, ye Nabiin-bu wom zege Wɛ jazem seeni.”
57Nɔɔna bam na nigi konto to, ba ma laare baŋa baŋa de kwor-dɛa, ye ba pu ba zwa se ba daa yé taa ni o taane dem. Ba maama ma duri bedwe baŋa ne ba vo ba zi‑o. 58Ba ma zeili-o pa o nwoŋi da teo kom wone. Ba laam ma daare ba jege‑o ba dola de kandwa se ba go. Balo na wora to ma le ba gwaaro ba pa nɔn-doŋo kodwoŋi se o taa nia. Nɔɔno wom yere mo Sɔɔl. 59Ba na jege Stiiven ba dola konto to, o ma lwoori Wɛ o we, “Amo Teiru Yezu, jwoŋi amo jworo.”#Luka 23:46
60O laam ma kuni dwoona tega ne o laare de kwor-dɛa o we, “Amo Teiru, nam yé kwei banto keim-lwanno tem n ke n boboŋa ne.” O déem tage konto mo ye o daare o te.
Tans Gekies:
Kikia 7: KBG
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2020, Ghana Institute of Linguistics, Literacy and Bible Translation (GILLBT)
