Genesis 13:8-18

Toe sê Abram vir Lot: Laat daar tog geen twis wees tussen my en jou en tussen my veewagters en jou veewagters nie; want ons is broeders. Is die hele land nie voor jou nie? Skei jou tog van my af; as jy die linkerhand wil neem, dan sal ek regs gaan; of as jy na regterhand wyk, dan sal ek na links gaan. Toe slaan Lot sy oë op en sien die hele Jordaanvlakte dat dit oral goed natgemaak is, voordat die HERE Sodom en Gomorra vernietig het, soos die tuin van die HERE, soos Egipteland, soos jy by Soar kom. Toe het Lot vir hom die hele Jordaanvlakte gekies; en Lot het na die ooste weggetrek, en hulle het die een van die ander geskei. Abram het in die land Kanaän gewoon, en Lot het in die stede van die vlakte gewoon en sy tent opgeslaan in die rigting van Sodom. Maar die manne van Sodom was buitengewoon goddeloos en sondaars voor die aangesig van die HERE. Toe sê die HERE vir Abram, nadat Lot van hom geskei is: Slaan tog jou oë op en kyk van die plek waar jy is, noord en suid, en oos en wes. Want die hele land wat jy sien, sal Ek aan jou gee en aan jou nageslag vir ewig. En Ek sal jou nageslag maak soos die stof van die aarde, sodat as iemand die stof van die aarde kan tel, jou nageslag ook getel sal word. Staan op, loop deur die land in sy lengte en in sy breedte; want Ek sal dit aan jou gee. Toe het Abram sy tent opgeslaan en gekom en gaan woon in die vlakte van Mamre wat in Hebron is, en daar 'n altaar vir die HERE gebou.