2 Kronieke 17:2-19

En hy het leër opgestel in al die omheinde stede van Juda en wagposte opgestel in die land van Juda en in die stede van Efraim wat sy vader Asa ingeneem het. En die HERE was met Jósafat, omdat hy in die eerste weë van sy vader Dawid gewandel het en die Baäls nie gesoek het nie; maar die HERE, die God van sy vader, gesoek en in sy gebooie gewandel en nie volgens die handelinge van Israel nie. Daarom het die HERE die koninkryk in sy hand bevestig; en die hele Juda het vir Jósafat geskenke gebring; en hy het rykdom en eer in oorvloed gehad. En sy hart was verheug in die weë van die HERE, en Hy het ook die hoogtes en die heilige boomstamme uit Juda weggeneem. Ook in die derde jaar van sy regering het hy na sy vorste gestuur, na Benhail en Obádja en Sagaria en Netáneël en Migaja, om in die stede van Juda te onderrig. En hy het Leviete saam met hulle gestuur, Semaja en Netánja en Sebadja en Asahel en Semíramot en Jonatan en Adónia en Tobia en Tobadónia, Leviete; en saam met hulle Elisama en Joram, priesters. En hulle het in Juda geleer en die wetboek van die HERE by hulle gehad en deur al die stede van Juda rondgetrek en die volk geleer. En die vrees van die HERE het geval op al die koninkryke van die lande wat rondom Juda was, sodat hulle teen Jósafat geen oorlog gevoer het nie. Ook van die Filistyne het vir Jósafat geskenke en belastingsilwer gebring; en die Arabiere het vir hom kleinvee gebring, sewe duisend sewe honderd ramme en sewe duisend sewe honderd bokke. En Jósafat het uitermate groot geword; en hy het in Juda kastele en skatstede gebou. En hy het baie sake gehad in die stede van Juda, en die krygsmanne, dapper helde, was in Jerusalem. En dit is hulle getalle volgens die huis van hulle vaders: van Juda, die owerstes oor duisend; Adna, die owerste, en saam met hom drie honderd duisend dapper helde. En langs hom was Johanan, die owerste, en saam met hom twee honderd en tagtig duisend. En naas hom was Amásia, die seun van Sigri, wat hom gewillig aan die HERE geoffer het; en saam met hom twee honderd duisend dapper helde en van Benjamin; Eljada, 'n dapper held, en saam met hom tweehonderdduisend gewapende manne met boog en skild. En naas hom was Jósabad, en saam met hom honderd en tagtig duisend gereed vir die oorlog. Hulle het op die koning gewag, behalwe dié wat die koning in die omheinde stede in die hele Juda geplaas het.

Gratis leesplanne en oordenkings oor 2 Kronieke 17:2-19