GÉNESIS 8
8
1Taita Diosca, Noé runatapash, huambuna jatun huasipi tiyaj tucui animalcunatapash llaquishpami, Taita Diosca, cai pachaman huairata cachamurca. Chai huairahuanmi yacucunaca, asha asha chaquishpa catirca. 2Shinallata, manllanai ucu yacu pugyucunapash, jahua pacha facchacunapashmi vicharirca. Shinallata, jahua pachamanda tamiapashmi jarcarirca. 3Shinami yacucunaca, cai pachamanda asha asha chaquirijurca. Patsaj picha chunga punlla tucujpica, yacucunaca ña tucurishpami catirca. 4Shinallata, huambuna jatun huasica, canchis quilla, chunga canchis punllapimi, Ararat shuti urcu jahuacunapi saquirirca. 5Yacucunaca, chunga quillacamanmi chaquishpa catijurca. Chunga quillapaj callari punllapimi, urcu pundacunaca ricurirca.
6Chai jipaca, ña chuscu chunga punlla tucujpimi, Noé runaca, huambuna jatun huasipi ventanata pascarca. 7Shina pascashpami, cuervo angata cacharirca. Chai animalca, alpa jahuapi yacucuna chaquingacamanmi, shamushpa cutin tigrajurca. 8Cai pachapi yacucuna chaquishcata ali yachangapami, shuj palomatapash cacharirca. 9Chai palomaca, cai pachapi yacucuna nara chaquishca cajpimi, maipi shayaritapash na ushashpa, huambuna jatun huasimanllata, Noé runapajman tigrarca. Shina tigrajpimi Noé runaca japishpa, huambuna jatun huasi ucuman churarca.
10Cutin, shuj canchis punllatapash shuyashpami, palomataca, huambuna jatun huasimanda cacharirca. 11Chai palomaca ña chishajpimi, shuj olivo fangata shimipi apashpa, Noé runapajman tigrarca. Chaita ricushpami Noé runaca, cai pachamanda yacucunaca ña chaquishca cajta ali yacharca. 12Shuj canchis punllatapash shuyashpami, palomataca cutin cacharirca. Chai palomaca, cutinga na paipajman tigrarcachu.
13Noé runa, sucta patsaj shuj huatata charijpi, chai huatapaj callari quillapaj punda punllapimi, cai pachapi yacucunaca chaquirca. Noé runaca huambuna jatun huasi jahua quilpashcata pascashpami, cai pacha alpaca ña chaquishcata ricurca. 14Ishcai quilla, ishcai chunga canchis punllapimi, alpaca ña chaquishca carca. 15Shina cajpimi, Taita Diosca, Noé runataca cashna nirca: 16“Huambuna jatun huasimandaca, cambash, cambaj huarmipash, cambaj churicunapash, cambaj churicunapaj huarmicunapash llujshichilla. 17Shinallata, canhuan chaipi caj tucui animalcunata, alasyu animalcunata, sacha animalcunata, alpata llucashpa purij tucui animalcunatapash llujchinguilla. Chai animalcunaca, tucui cai pachata rishpami, cai pachapica ninanda mirashpa jundanajunga” nircami.
18Shina nijpimi, Noepash, paipaj huarmipash, paipaj churicunapash, paipaj churicunapaj huarmicunapash, paihuan llujshirca. 19Shinallata, tucui animalcuna, llucashpa purij animalcuna, alasyu animalcuna, cai pachapi causaita charij animalcunapash, imashna cashpapash paipurallami, huambuna jatun huasimandaca llujshinajurca. 20Chai jipami Noeca, Mandaj Diosman shuj altarta rurashpa, mapa illaj animalcunamandapash, mapa illaj alasyu animalcunamandapash shujta agllashpa, Diosman cushpa tucuillata rupachijurca. 21Chaitaca Mandaj Diosca, juyailla ashnajujpimi chasquirca. Chaimandami, Mandaj Diosca, cashnata yarirca: “Cai pachataca, runapaj jahuaca cutinga na llaquichishachu. Runaca, chairalla viñaimandapachami, na alitalla ruranata shungupi yarishpa causan. Causaita tucui charijcunatapash, cutinga na chashna llaquichishpa tucuchishachu. 22Cai pacha tiyashcacamanga, tarpuipash, cozechaipash, chiripash, rupaipash, rupai quillacunapash, tamia quillacunapash, punllapash, tutapash na tucuringachu” yajurcami.
Tans Gekies:
GÉNESIS 8: QVI16
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
