GÉNESIS 9
9
Taita Diosca, Noé runahuan tucuita pactachingapa ari nishcamanda
1Taita Diosca, Noé runatapash, paipaj churicunatapash, cashna nishpami bendiciarca: “Huahuacunata charishpa, ninanda mirashpa, cai pachapi jundanguichi. 2Tucui cai pachapi tiyashca animalcunami, cangunataca ninanda manllanga. Jahuata rij alasyu tucui animalcunatapash, cai pachapi causaita charij tucui animalcunatapash, mama cuchapi tiyaj tucui pijicunatapashmi, cangunapaj maquipi saquini. 3Causaita charij tucuitami canguna micuchun cuni. Shinallata, micuna jihuacunatapash, yuracunatapash canguna micuchunmi tucuita cuni. 4Ashtahuangarin, yahuarpi causai tiyashcamandami, yahuarndi aichataca, napacha micuna canguichi. 5Causaita charij gentecunata huañuchishca yahuarmandaca, Ñucami chashnallata llaquichisha. Ima animal cajpipash, maijan runa cajpipash, genteta huañuchijpica, Ñucami chashnallata llaquichisha. Maijan cashpapash, paipaj huauquita huañuchijpica, paitapashmi chashnallata llaquichisha.
6Pi cashpapash huañuchishpa yahuarta jichashcamandaca, paipash runapaj maquipillatami yahuarta jichai tucushpa huañunga. Runataca, Taita Diosman rijchajta rurashcamandami, chashna canga.
7Ashtahuangarin, cangunaca, huahuacunata charishpa ninanda miranguichilla. Cai pachapica, ashtaca huahuacunata charishpa, ninanda miranguichilla” nijurcami.
8Taita Diosca, Noetapash, paipaj churicunatapash cashnami nirca: 9“Ricuichi, ñuca ari nijushcataca, cangunahuambash, cangunapaj jipa miraicunahuambash pactachingapami callarichini. 10Cai pachapi causaita charij alasyu animalcunahuambash, cangunahuan causanajuj animalcunahuambash, cai pachapi shuj animalcunahuambashmi ari nigrini. Huambuna jatun huasimanda, tucuilla llujshijcunamanda callarishpaca, cai pachapi causaj tucui animalcunahuanmi ari nigrini. 11Ñuca ari nijushcata cangunahuan pactachishpa callarishpaca, ninan tamia yacucunahuanga na ashtahuan tucuchishachu. Cai pachata tucuchingapaca, na cutinga ninanda tamiachishachu” nircami. 12Taita Diosca, cashnatapashmi nirca: “Ñuca ari nijushcataca, cangunahuambash, cai pachapi causaita charij tucui animalcunahuambash, causaita causaicaman ari nishcata pactachingapami, shuj ricuchinata churagrini. 13Ñucami: Shuj cuichita, fuyucunapi churani. Chai cuichimi, Ñucahuan, cai pachapi causajcunahuan ari nishcata ricuchijunga. 14Alpaman fuyucunata cachamujpimi, Ñuca churashca cuichica, chai fuyucunapi ricurijunga. 15Chaita ricushpami, Ñucahuan, cangunahuan, causaita tucui charijcunahuan, ari nijushcataca yarijusha. Chaimandami, causaita tucui charijcunataca, cutinga na ninan tamiahuan tucuchisha. 16Fuyucunapi cuichita ricushpami, Ñucahuan, causaita tucui charijcunahuan, cai pachapi tucui causajcunahuan, causaita causaicaman ari nijushcataca yarisha” nijurcami. 17Taita Diosca, Noetaca cashnami nirca: “Ñuca ari nishcata, cai pachapi tucui causajcunahuan pactachishpa callarichinataca, cai cuichimi ricuchijun” nircami.
Noé runa machashcamanda
18Huambuna jatun huasimanda llujshishca Noé runapaj churicunaca: Sem, Cam, Jafet, shuticunami carca. Cam shuti runaca, Canaanbaj taitami carca. 19Cai quimsacunami, Noepaj churicuna carca. Paicunamandami, tucui cai pachapica, mirashpa jundanajurca.
20Chai jipami Noé runaca, alpapi tarpui callarishpaca, uvacunata tarpurca. 21Uva vinota ufiashpa machashpami, paipaj carpa chaupi ucupi lluchulla sirijurca. 22Canaán runapaj taita Cam shuti runaca, paipaj taita lluchulla sirijujta ricushpami, canllapi paipaj ishcai huauquicunaman villagrirca. 23Shina villajpimi, Sem shuti runapash, Jafet shuti runapash, churajunata japishpa, paicunapaj rigrapi churashpaca, huashallahuan rishpa, paicunapaj taita lluchulla sirijujta quilpachinajurca. Paicunaca, chashna cashpami, paicunapaj taita lluchulla sirijujtaca, na ricunajurca.
24Noé runa machashca puñujushpa rijcharishpaca, paipaj jipa churi imata rurashcata yachashpami, 25cashna nirca:
“Canaanga, ninanda na alicachi tucushca cachun.
Paica, paipaj huauquicunapajta rurashpa causachun” nircami.
26Ashtahuan cashnatapashmi nijurca:
“Sem shuti runataca, ñucata Mandaj Taita Dios bendiciapachun, Canaanga, paipajta ruraj cachun.
27Jafet shuti runataca, Taita Diosllata jatun llactata rurachun.
Paica, Sem shuti runapaj carpacunapi causachun,
ashtahuangarin Canaanga, paipajta ruraj cachun” nijurcami.
28Ninanda tamiashca jipamandapash Noé runaca, quimsa patsaj picha chunga huatatami causarca. 29Noé runaca, tucuimandaca, iscun patsaj picha chunga huatata causashpami huañurca.
Tans Gekies:
GÉNESIS 9: QVI16
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.
