मत्ती 13

केवल अच्छा वोटेन फल पेड़उ गा घागल

(मरकुस 4:1-9; लूका 8:4-8)

1डीका दिनेन यीशु उरा टे ओटजे डो गलील समुद्र गा धुरान ओलेडो सुबान्जे। 2एठा दियगा मेरान एगो भेबाव कुरकू गा गर्दी डाएन कि देटेन डोंगा लिजेन पेळेन, एठा कुरकू गा पूरा गर्दी समुद्र गा धुरानका टेगेनके डा। 3एठा डीचनी दिकुके उदाहरणेन घोनेचका बातो मंडीके, डोगे, “म्या खिटी बिबीट मिठाच बीजो बिबीट लज्जे। 4बिबीट टेमो अदा बीजो कोरा धुरान बोचोयेन एठा भूरिकुनी हेके डो डीके कालम्जे।

5अदा बीजो पाठा वोटेन लिंजेन बोचोयेन, देडेन दिजेन घोनेच कासा बान घाटाडुका, चोयाकी कासा घोनेच बाऊ डा इनिघल्जी डो कोम्बो ओटजे डो जुलजे, 6चोयाकी डेगा जळी इटान बान सेंडुका इनिघल्जी डेगा कोम्बो ळोखोळजे। 7अदा बीजो एगो जगान जानोम बाळातिन्जू लक्के डा, एठा जानोम नी खाटजे डो डीके दबातिंजकेनेच। 8पेनो अदा अच्छा वोटेन बोचोयेन, एठा फल साले, अदा सौ गुना, अदा साठो गुना, अदा तीसो गुना। 9जेकाभी जो इनी बातो के आजुमबा होय जो इन्जा मंडीवा, डीके सामझातिन्जू गा कोशिश डाए।”

उदाहरण गा घागल

(मरकुस 4:10-12; लूका 8:9-10)

10एठा चेलाकू दिया मेरान हेन डो कोम्बाराके, “उदाहरण गा चोच मतलब होय?” 11डीचनी जवाब जीके, “कि आपेके परमेश्वर नी हेजा राज्य गा बारेन सच्चाई गा समझातिंजू गा जिले होय, पेनो दिकुके बाने। 12चोयाकी दियागा तालान समझातिंजू गा इच्छा तक होय, परमेश्वर डीचके एठाभी समझातिंजे गा जेबा। मेटेनी इनी समझातिंजू गा इच्छा बान दोडो, कि इंज चोच इथूलक्के होय, डो दियागा मेरान जो समजा होय, परमेश्वर दियाटे डी भी सेगेवा।

13इंज दिकुके उदाहरणेन इनिघल्जी बातो लक्के डा, दिकु दोडो गेन डोके एठा दिकुन दोडुका एठा मिठाच आजुमे एठा बान समजातिन्जदुका।” 14एठा दिकु बारेन यशायाह परमेश्वर कोंटे मंडीमिठाच गा येनेन भविष्यवाणी पूराऊवा होय, “आपे लुटूर टे नी आजोम्बा, पेनो सामझातिन्जू बने, एठा मेट टे दोडोवा, पेनो आपेके बान सुजातिंजू। 15चोयाकी इनी कुरकू गा दिल जिद्दोएन होय। दिकु इकुगा लुटूर टे आजुम्बा बान चहता होय, एठा दिकुनी इकुगा मेट जफीटके होय। बनकी दिकु इकुगा मेट टे दोडोवा, एठा इकुगा लुटूर आजुम्बा, इकुगा दिल टे समझातिंजटे मन बदलाएवा, मेटे इंज दिकुके सजाकुवा।”

16“पेनो धन्य होय आपेगा मेट, कि डी दोडोवा होय, एठा आपेगा लुटूर कि डी आजुम्बा होय।” 17चोयाकी इंज आपेटे साच्चो मंडीवाकी, कि घोनेच्का परमेश्वर गा कोनेटे मंडीमिठाच एठा धर्मीकु नी देटेन कि जो मंडी आपे दोडोवा होय, डी डोगे पेनो बान डूगु, एठा जो मंडी आपे आजुम्बा, दिकु आजुमे पेनो दिकु बान आजुमडूका।

अच्छा वोटे गा उदाहरण गा व्याख्या

(मरकुस 4:13-20; लूका 8:11-15)

18“मेटे खिटी बिबीट मिठाच गा उदाहरण आजुमे, 19जेकाभी परमेश्वर राज्य गा वचन गा खाबोर आजुमटे बान सामझातिन्जू, दियागा मानेन जो चोचकाभी बिटके डा, डीके डीच शैतान हेजेवा डो चुरेवा होय। इनी डीका होय, जो कोरा गा धुरान बिटके डा। 20एठा अदा कुरकू डेका रेंगो डी बीजो टे डायेबा होय जो मोरोम जगान बिटके डा, एटेन डी होय, जो वचन आजोम टे तुरुटो खुशी गा सेंग्गोन मनातिंजेवा होय।

21पेनो इकुनका जळी बान दोडो गा कारान देटेन थोडाका दिन गा थंदळवा होय, एठा वचन गा कारान ससातातिंज या परेशानी डाऊवा होय, मेटे तुरुटो खेडा जोम्बा होय। 22अदा कुरकू रोंगो डी दाना टे डाएवा जो झाळीन तालान बिटके डा, येटेन डीका होय, जो वचन के आजोम्बा होय, पेनो इनी संसार गा चिंता एठा डामाके धोका परमेश्वर गा वचन के दबातिंजेबा होय, एठा देटेन जाऊ बाने होय। 23अदा कुरकू रोंगो डी कोरो गेल्ला डाके जो अच्छा ओटेन बिटके होय, एटेन डीका होय, जो वचन के आजुमटे सामझातिंजेवा होय, एठा फल सेगेवा होय, तुनिका सौ गुना, तुनिका साठो गुना, तुनिका तीसो गुना।”

गुं एठा डोंगोर बीजो गा उदाहरण

24यीशु नी दिकुके एठा म्या उदाहरण घाल्के, “स्वर्ग गा राज्य डी इनी रोंगो टे होय, म्या खिटी कोरो डीचनी हेजा खिटी गेन अच्छा बीजो बिटके। 25पेनो जब कुरकू गिटीच लक्के डा, मेटे दियागा दुश्मान हेंडो खिटी गेन डीका जगान डोंगोरा गा बीजो बिटके डो ओले मेना। 26जब कोम्बो ओटजे एठा जौऊ लज्जे, मेटे खिटी मिंकुगा नौकर कुनी डोंगोरा बीजो टे ओटके मिनी ईली भी डोके।

27येने लिंजेन खिटी कोरो गा भाग्यकु नी हेंडो डीचके मंडीके, ‘हे स्वामी, चोच अमा नी अमागा खिटीन अच्छा बीजो बान बिटडूका डा? एठा डोंगोर दाना गा बीजो गा कोम्बो तुंगाटे हेन?’ 28खिटी मिठाच नी दियाटे मंडीके, ‘येटेन नी तुनिका दुश्मान गा कामाय होय।’ भाग्यकु नी डीचके मंडीके, ‘चोच अमा इच्छा होय, कि आले सेनेवा डो डोंगोर गा बीजो खातिंजा?’ 29खिटी मिठाच मंडीके, ‘बाने, येनोगो बाकी डाऊ कि डोंगोर गा दाना गा कोम्बो खातीन्जे लठ्ठाका आपे सेंग्गोन गुं भी ठुठकी। 30हिर टाएन बाएराके भी म्या सेंग्गोन बडाटिंज डाए एठा हिरगा टेमोन इंज मुंजरीकूके हुकूम जेबा, पेला डोंगोर गा दाना गा कोम्बो खातिंजटे जुजूल घल्जी डेगा गाठी ठोलकी, एठा गुं के इंजा गोमटान जमाकी।’”

राई गा बीजो गा उदाहरण

(मरकुस 4:30-32; लूका 13:18-19)

31यीशु नी दिकुगा सम्मान म्या उदाहरण घल्के मेना, “परमेश्वर गा राज्यन राई गा सनी बीजो गा रोंगो होय डीके म्या कोरोनी हेजा खिटीन बिटके। 32पेनो जब बीजो टे सानी डा, मेटे खिटीन वोटजेडो खाटबेळे सिंज आरोएन, डेगा एगो खापेट डांगोल वोटजे, बदळा भूरिकु भी डेगा सहलीन थंदळ मिंकू डांगोलेन दिकुगा बुदिली हारोए सकतावा होय।”

सोडा गा उदाहरण

(लूका 13:20-21)

33यीशु नी दिकुगा सम्मान म्या उदाहरण घाल्के मेना, “स्वर्ग गा राज्य खामीर गा रोंगो होय, डीके तुनिका जापाएनी साटे तीन सेर कोलोम (पैली गा तीन मापो बारबोर) साटे लोखाके एठा डाऊ टाएन देटेन सेबाई खामीर आरायेन होय।”

उदाहरण गा दडा गा उपाय

(मरकुस 4:33-34)

34इनी सेबाई बातो यीशु नी उदाहरण गेन कुरकू के मंडीके, डीच गर्दी बस उदाहरण वोजीटे का इथू डा। 35जो वचन परमेश्वर गा कोनेटे मंडीमिठाच गा वोजीटे मंडीके डा, देटेन पुरायु। “इंज उदाहरण गघाल इंजा चभू खुल्लाएबा इंज डी बातो के जो दुनिया गा ओटटे पेला टे उखु थंदळके होय, घाल्टे डायेबा।”#13:35 भाजन संहिता 78:2

गुं एठा डोंगोर बीजो गा उदाहरण गा व्याख्या

36मेटे देटेन गर्दी के आराटे उरान हेन, एठा दियागा चेलाकूनी दिया मेरान हेंडो मंडीके, “खिटी गा डोंगोर दाना गा उदाहरण आलेके सामझातिंज्केमी।” 37यीशु उदहारण गा अर्थ इनी रोंगो घाल्के, “अच्छा बीजो गा बिबीट खिटी कोरो गा कोण गा जीमू डाए लज्जे होय। 38खिटी नी संसार कुरकू होय अच्छा बीजो परमेश्वर गा राज्यन गा कुरकू, एठा डोंगोर बीजो शैतान गा राज्य गा कुरकू होय।

39दुश्मान, जे डीके बिटके होय, डीच शैतान होय। हिर इनी संसार गा आखरी टेमो के दर्शातिंजेवा होय, एठा हिरमिठाच स्वर्गदूत होय। 40इनिघल्जी डेनोगोका डोंगोर दाना गा कोम्बो खातींजेवा होय एठा जुलेबा होय, डेनोगोका संसार गा आखरी अंत डाऊवा। 41इंज जो कोरो गा कोण होय इंजगा स्वर्गदूत के कुलेच्बा, एठा दिकु दियागा राज्य गा टे सेबाई खेडा कारान पापो एठा बुरा कामय दडामिंकू के म्याधेळेन कुवा। 42एठा स्वर्गदूतकु नी सिंगेल गा कुंडीन येंडाकोम्बा एठा देटेन कासु गा वोजीटे जाम एठा तिळींज रीरिगीट होंगा। 43डी टेमो धर्मी कुरकू इकुगा स्वर्ग बाटे गा राज्यन सूर्य गा रोंगो चमकातिन्जूबा, जेकाभी जो इनी बातो के आजुमबा होय जो इन्जा मंडीवा, डीके सामझातिन्जू गा कोशिश डाए।”

उखु डामा

44“स्वर्ग गा राज्य म्या खजाना रोंगो होय, डीके म्या कोरोनी म्या खिटीन उखुके खिजा खजाना रोंगो घाटाएन। डाबोलटे डीचनी कुशोटे हेजा सेबाई ओटे किजीटे डी खिटीके मोलाटे सैय्ये।”

किमती मोती

45“एठा स्वर्ग गा राज्य म्या धंधा कुरकू रोंगो होय, जो अच्छा मोती के घगाटा डा। 46मेटे दियेन म्या ठायका किमती मोती घाटाएन मेटे डीचनी ओलेडो आपना सेबाईका किजीके एठा मोती मोलाटे सावे।”

जाल गा शिक्षा

47“स्वर्ग गा राज्य, काकू उठामिनी जाली रोंगो होय, जो समुद्रन येंडाएवा, एठा सेबाई जाटो गा काकूकु उठाएकु। 48एठा मेटे जाली भेटटेन, मेटे डीके काकू उठामिंकू धुरान ओळटे साले, एठा सुबानजेडो अच्छा-अच्छा काकू बर्तनेन जमाके एठा खराबो काकूके टेप्पाके। 49संसार गा आखरीन येनोगोका डाऊवा, स्वर्गदूत हेजेवा डो बुरा कुरकू धर्मी कुरकू टे अलग्गोकुवा, 50एठा बुरा कुरकू सिंगेल गा कुंडीन येंडाकुबा। देटेन कासु गा वोजीटे जाम एठा तिळींज रीरिगीट होंगा।”

उनाई एठा जुना इथू गा जारूरी

51यीशु नी दिकुटे मंडीके, “चोच आपेन नका इनी सेबाई बातो सामझातिन्जे?” चेलाकूनी जवाब जीके, “हा प्रभु।” 52डाबोलटे यीशु नी दिकुटे मंडीके, “इनिघल्जी हार म्या मूसा गा नियम इथूमिठाच जो परमेश्वर गा चेलाकू आरोएन होय एठा स्वर्ग गा राज्यके भी समझातिंजेवा होय, डीच डी कोरो रोंगो होय दियागा उरान म्या भण्डार होय। देटेन जुना एठा उनाई बरी भी खिजा किमती चीजो के सम्मान सेगेवा होय।”

यीशु के नासरत डेन डबोला टे हेजे

(मरकुस 6:1-6; लूका 4:16-30)

53मेटे यीशु इनी सेबाई उदाहरण मंडीकेका डा, मेटे देटे टे ओले। 54एठा हेजा पुरान हेंडो दिकुगा आराधना जगान कुरकू के इथू लज्जे। एने लिंजेन दिकु ठायका अचम्बोयेन डो इकु-इकुका मंडी लज्जे, “इनीजेन इनी रोंगो ज्ञान एठा इनी रोंगो खाट अचम्बो कामय तुंगा घाटाएन मेना? 55चोच येटेन बढाई गा कोणटे बाऊ? एठा चोच इनिज आंटे जीमू मरियम इनिजगा डाईटे टाकु जीमू याकूब, यूसुफ, शमौन, एठा यहूदा बाने? 56चोच दियागा सानी बोकोजाईटे येटेन आलेगा तालान बान थांदळ? डाबोलटे इनीजेन इनी सेबाई तूनगाटे घाटाएन होय?” 57दिकुनी इनी रोंगो यीशु गा बारेन खिजोटे भेट्टेन। पेनो यीशु नी दिकुके मंडीके, “परमेश्वर गा कोनेटे मंडीमिठाच गा अमा पूरा एठा अमा सगाकु आलवा एठा तुगनकाभी आपमना बान डाऊ।” 58कुरकू गा बान विश्वास वोजीटे यीशु नी हेजा पुरान एठाभी अचम्बो कामय बान दडुका।

Tans Gekies:

मत्ती 13: GOKNT

Kleurmerk

Deel

Kopieer