Met 43
43
Dulu baa bobenyañ be Yôsep
(Met 42:29-38; 44:24-34)
1Mfumbale zaé a nga tu'a nen e Kanaan. 2Eyoñe be maneya di fôn be nga soo je Ejipte, Yakob a nga jô bone bé na: Bula'an, kusane bia abe bidi. 3Yuda a nga yalane na: Môt ate a nga tu'a ve bia ayemé na: Mia ye bo te beta yen asu dam, vengevenge ve monyoñe wônan a ne a mia. 4Nge wo kômbô ñhe lôme mojañe wongan e nsamba wongan, bia ye siliki a bia ye kuse wo bidi. 5Ve nge ô nji kômbô lôme nye, bia ye bo te siliki amu môt ate a nga jô bia na: Mia ye bo te beta yen asu dam, vengevenge ve mia be monyoñ mi ne nsamba. 6Ane Israél a nga jô na: Amu jé mi nga bo ma *abé éyoñe mi nga kate môt ate na mi bili fe monyañ' 7Be nga yalane na: Môt ate a nga sili bia minsili a ñyemetan ôse, ajô dangan a di bôte be latane bia, a jô'ô na: Ye ésoo wônan a ngenan a vee? Ye mi bili monyañ? A bi nga yalane minsili mite. Ye bi mbe nguleya yeme na a ye jô na: Bo'one na monyoñe wônan a siliki'
8Yuda a nga jô ésaa wé Israél na: Jôké'é bia mongô bi ke. Bia ye kôlô si, bia ye ke a nalé ate bia ye bo nguleya nyiñ ayap teke wu: Wo, bone bangan a biabebien. 9Ma ma be'e mbe'e wé; wo ye sili nye e mo mam. Nge me boo te bulane nye be wo a nge me boo te beta tooé nye e vôm ô né, ma ye be'e mekua be wo nnôm éto. 10Yeme na, nge bi nji ye bo njiñelan, ve éyoñe ji, bi biya afôla ya bulan biyoñe bibaé.
11Esaa wop Israél a nga jô be na: Mbôlô e ntoo nalé, bo'one ñhe jame di: Nyôñan, e mimbe'e mienan été, biôme ya Kanaan bia jemban Ejipte, mi ke ve bie môt ate mvaka, meyemete bilé me ne mbamba menyum a wôé, bityita'a, ladanôm, tye'e ôwôndô a mvin. 12Nyoñane moné tañe mebime mebaé, bula'ane fe nyô be nga futi e menyu minkuta mienan, ndô'ôtô e mfu'an. 13Nyôñane monyoñe wônan a kôla'ane si mi bulan e be môt ate. 14Zambe a ne Ngul Ese a bo'o na môt ate a mvamane mia, a a jôké'é na mia be monyoñ a Bényamin mi bulan! Mfa'a wom, nge bone bam ba yiane jembane ma, me tabe'e nalé tee be.
Bobenyañ be Yôsep ba kee Bényamin nsamba
(Rm 12:19-21; 1 Tes 5:15)
15Bôte bete be nga nyoñe mvaka; be nga nyoñe moné tañe biyoñe bibaé, nalé fe Bényamin; be nga kôlô si a ke Ejipte a ke yené asu be Yôsep. 16Eyoñe Yôsep a nga yene Bényamin nsamba wop, a nga jô mba'ale akume wé na: Nyiñeli'i bôte bete e *nda été, wôék éyem a yamek je, amu bôte bete ba ye di be ma e zañe *môs. 17Môt ate a nga bo ane Yôsep a nga jô, a kee bôte bete e ndaa Yôsep. 18Be nga ko woñ éyoñe be nga kee be e ndaa Yôsep a be nga jô na: Ba kee bia amu moné be nga bulane bia éyoñ ôsu e mimbe'e miañ été; asu ya kubu bia yôp, asu ya bi bia, a bi bia be bijakase biangan ane alo. 19Be nga subu mba'ale akum ya *nda Yôsep bebé a kobô nye anyiine *mbé. 20Be nga jô na: bia sili *njaman! A masa, bi tameya zu éyoñe jia vana asu ya kuse bidi. 21Wôna, éyoñe bi kuiya vôme bi nga bômbô, bi nga yoé mimbe'e miangan, a koone, môt ase, moné wé anyu mbe'e wé, abim adite fo'o ya moné wongan. Bia te soo nye. 22Bia te fe soo bemoné befe, asu ya kuse bidi. Bi nji yeme za a nga bulane moné wongan e mimbe'e miangan été.
23A nga yalane be na: Taba'ane *mvo'é a te koone woñ! Zambe wônan, e Zambe ésoo wônan, e nye a nga ve mia akum e mimbe'e mienan été. E moné wônan a nga kui be ma. A a nga kuli Siméoñ atan a ke koone be.
24Môt ate a nga nyiñeli be ndaa Yôsep; a nga ve be mendim, be nga sôbe mebo; a nga ve fe bijakase biap bidi. 25Be nga kômesane mvaka jap, nté be mbe be yange'e Yôsep na a zu zañe môs; amu be nga wô'ô njôane na ba ye di valé. 26Eyoñe Yôsep a nga suane *nda, be nga ve nye e mvaka be mbe be bili e *nda été valé, a be nga kute meboñe si asu dé. 27A nga yemelan ajô *mvo'é jap, a jô na: Ye nnôm ésoo mi nga jô wô ô ne *mvo'é valé? Ye a ngenan a vee' 28Be nga yalane na: Mbo ésaé wôé, ésaa wongan, a ne mvo'é; a ngenan a vee. Be nga kumbu a kute meboñe si. 29Yôsep a nga bete mis, a éyoñ a yeneya Bényamin monyañe wé, a nga jô na: Ye monyoñ wônan a ne mongô nye nyô? A nga beta jô na: Zambe a mvama'ane wo, a mone wom! 30Yôsep a nga tyi'i nkobô étun, amu *nlem ô mbe ô di'i nye amu nye'ane monyañ, a mbe a kômbô'ô yôn; a nga nyiin étune *nda jé a yi été wé. 31Eyoñ a maneya sôb asu, a nga beta kui atan, a a va'a nguleya mine du, a nga jô na: Za'ane bidi! 32Be nga ve nye bidi mfa'a wé, bobenyañe ke mfa'a wop, bôte y'Ejipte baa be be be mbe be ja'ak fe mfa'a wop, amu bôte y'Ejipte be nji bo nguleya di baa be Beébre. Amu bôte y'Ejipte ba wô'ô jame te angôndô. 33Bobenyañe be Yôsep be nga tabe vôm a né, ntôl ane éto ntôle jé é né, a nyô a dañe mongô, ane abialé mongô dé e né; a môt ase a mbe a kate nyô mbok nsemane wé. 34Yôsep a nga bo be na be to'é mengabe ya bidi bi mbe ôsu vié, a ngabe Bényamin é mbe mengabe mabe mese tañe biyoñe bitan. Baa be nye be nga nyu be bili fe nya mbilan.
Tans Gekies:
Met 43: BDCB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bible en langue Bulu © L'Alliance Biblique du Cameroun, 2007, 2015.
