युहन्ना 9
9
डीन्न्हाङ न मीमीक माडाङ्चकी गेपाक्च
1येशू होटै व्हाचै नुङ्नाङ, काट जना डीन्न्हाङ न मीमीक माडाङ्च अन्धा भर्मीकी डाङा। 2होसकुङ चेलाकै होसकोकी गीना, “गुरु, सुये पाप जाटा? इसे भर्मीये की इच्यो मोइ-बोये, र इसे डीन्न्हाङ न मीमीक माडाङ्च अन्धा डीन्हा?” 3येशूये जवाफ याहा, “इच्यो लहो पापै र होइन, मेन मोइ-बोयो पापै र होइन, टर परमेश्वरौ शक्तियो काम इसे भर्मीयो जीवनाङ डाङ्ख्यो डेयार न इसे अन्धा छान्च हो। 4ङाकी बीर्न्हकाचौ कामको कानै डीन लेनाङ न जाट्की पर्ले। हीजैडेनाङ नाबीक छान्च पछी सुयेर काम जाट्की माय्होक्ले। 5जब सम्म ङा संसाराङ छान्ले टब सम्म ङा संसारुङ ज्योति हो।”
6येशूये इसे कुरा डेमभ्यारखीङ झाङ मेठोक ठोका, अनी झा झ्योवार झौ लेप खासार होसे अन्ढौ मीमीकाङ मोल्न्ह याहा। 7अनी येशूये होसकी डेया, “नुङ्ना, सीलोआमौ पोखरीयाङ नुङार हुरो। (सीलोआमौ अर्थ चहीँ ‘बीर्न्हकाच’ हो।)” होसे भर्मीये पोखरीयाङ नुङार हुरा, र होसे मीमीक डाङ्च छानार ल्हेसा।
8होसे अन्धा भर्मीयो छीमेकीको र होसकी पहीला भीख ङेम्ह ङुच डाङ्चकै, “ही इसे होसे भीख ङेम्ह ङुच न होइन र?” डेयार गीना। 9कुडीक जनै डेया, “इसे भर्मी होसे न हो।” टर अरु भर्मीकै डेया, “इसे च होइन, इसे भर्मीकी होसे ङेम्ह ङुच भर्मी ल्याक्च मट्टै डाङ्ले।” होसे ङेछ भर्मीये डेया, “हो, ङा होसे भर्मी न हो।” 10भर्मीकै होसकी गीना, “नुओ मीमीक कुटजाट्न डाङ्च छाना ट?” 11होचे डेया, “येशू डेच काट जना भर्मीये झा झ्योवार झौ लेप खासार ङौ मीमीकाङ मोल्न्ह याहार ङाकी डेया, ‘सीलोआमुङ पोखरीयाङ नुङार हुरो।’ ङा नुङार हुरा, अनी ङा मीमीक डाङ्की य्होक्च छाना।” 12होखुरीकै होसकी डेया, “होसे कुला ले ट?” होचे डेया, “ङाकी थाहा माले।”
13होटै न्हुइङ होसे मीमीक डाङ्की य्होक्च छान्च भर्मीकी होखुरीकै फरीसीको लेठाङ आल्हा। 14हीजैडेनाङ येशूये झा झ्योवार झौ लेप खासार होच्यो मीमीकाङ मोल्न्ह याहार डाङ्च खास्च डीन चहीँ म्हुङ बाट्च डीन लेया। 15फरीसीकै र होसे भर्मीकी गीना, “नाङ कुटजाट्न मीमीक डाङ्की य्होक्च छाना?” होचे होखुरीककी डेया, “होसकै झा झ्योवार झौ लेप खासार ङौ मीमीकाङ मोल्न्ह याहा, अनी ङै हुरा र डाङ्की य्होक्च छाना।” 16कुडीक जना फरीसीकै डेया, “होसे भर्मी परमेश्वरलकीङ राछ होइन, हीजैडेनाङ होचे म्हुङ बाट्च डीनाङ काम जाट्की माछान्ने डेच नीयमकी मामन्डीले।” टर अरुकै डेया, “पापी भर्मीये याङ्च अचम्मौ चीन्हओ काम जाट्की य्होक्ले र?” इटजाट्न होखुरीक मीघ्याङ फाटो छाना।
17फरीसीकै फेरी होसे पहीला अन्धा लेच भर्मीकी गीना, “होसे भर्मीये नुओ मीमीक डाङ्च खासार गेपाका, अनी नुओ बीचाराङ होसे भर्मी सु हो ट?” होचे डेया, “होसको अगमवक्ता हो।”
18यहूदी अगुवाकै होसे साँच्ची न मीमीक माडाङ्च अन्धा लेया र अब डाङ्की य्होक्च छान्नने डेच कुरा मापट्डीया। होटबाटै होखुरीकै होच्यौ मोइ-बोइकी आर्घा, 19र होखुरीकै गीना, “ही इसे नाखुरीकुङ लेन्जा मीजा डीन्न्हाङ न अन्धा लेया डेयार नाखुरीक डेले? अनी इसे कुटजाट्न डाङ्की य्होक्च छाना ट?” 20होच्यौ मोइ बोये डेया, “हो, इसे कानुङ मीजा हो, इसे डीन्न्हाङ न मीमीक माडाङ्च अन्धा लेया। 21टर अब इचे कुटजाट्न मीमीक डाङ्की य्होक्च छाना, र सुये इच्यो मीमीक डाङ्की य्होक्च खासा, होसे चहीँ कान माव्हारले। नाखुरीकै न इसकी गीन्नी, अब इच्यो उमेर ओल्न्हने लोहो बारेयाङ मेल्है न डेकी य्होक्ले।” 22होच्यौ मोइ बोइ यहूदी अगुवाको खाटा बीर्हीछ बाटै मीजौ बारेयाङ होट डेच हो। हीजैडेनाङ सु-सुये येशूकी मुक्ति याछ ख्रीष्ट डेयार स्वीकार जाट्ले होखुरीककी सभाङुच इमलकीङ छ्युक्की पर्ले डेम यहूदी अगुवाकै अगाडी न सल्ल्हा जाट्न भ्यामन्या। 23होटबाटै होच्यौ मोइ बोये “इच्यो उमेर ओल्न्हने, इसकी न गीन्नी” डेच हो।
24यहूदी अगुवाकै होसकी फेरी अर्को खेप र आर्घार डेया, “परमेश्वरौ अगाडी सत्य कुरा ङाक्ले डेयार प्रतिज्ञा जाटो। कानकी थाहा ले, होसे भर्मी चहीँ पक्कै पापी हो।”
25होचे डेया, “होसको पापी होकी होइन, ङा मावार्ल्हे। ङा काट कुरा मट्टै वार्ल्हे ङा मीमीक माडाङ्च अन्धा लेया, टर चाहाँ डाङ्की य्होक्च छान्नने।”
26यहूदी अगुवाकै फेरी होसकी डेया, “होचे नाङ्की ही जाटा? अनी नुओ मीमीक कुटजाट्न डाङ्की य्होक्च खासा?”
27होचे डेया, “ङै नाखुरीककी अघी न डेमभ्यामने, टर नाखुरीकै मासेया। हीजै फेरी होसे न कुरा गीन्च? ही नाखुरीक र होसकुङ चेला छान्च मीमन ले की य्हाले?”
28याङ्च कुरा सेयार यहूदी अगुवाको होसकी च्याक्चै डेया, “नाङ टी होसे भर्मीयो चेला हो ट, कान च मोशौ चेला हो। 29कानकी थाहा ले, मोशाखाटा परमेश्वर ङाक्नन्या, टर होसे भर्मी चहीँ कुटै राछ हो, इसे कुरा कानकी थाहा माले।”
30टब होचे डेया, “कुङ्च अचम्मौ कुरा! होसको कुटै राछ हो नाखुरीककी थाहा माले, टर होसकै ङा मीमीक माडाङ्च अन्धाकी डाङ्की य्होक्च खासा। 31कान पट्टकी थाहा ले, परमेश्वरै पापीकुङ कुरा मासेले, टर परमेश्वरकी आडार जाट्च र होसकुङ इच्छाङ काम जाट्च भर्मीकुङ मट्टै कुरा सेले। 32संसार सुरु छान्च लकीङ चाँहा सम्म डीन्न्हाङ न मीमीक माडाङ्च अन्धाकी डाङ्च खास्च सेन्र मासेमने। 33इडीक होसको परमेश्वरलकीङ राछ होइन लेनाङ होसकै हीर जाट्की माय्होक्च लेया।”
34होटै यहूदी अगुवाको मीरीस ख्योव्हार होसकी, “नाङ च पापाङ न डीन्छ हो, अब नीये कानकी पाहाक्की पाले?” डेचै होखुरीकै होसकी सभा ङुच इमलकीङ बाहीर छ्युक्ङ याहा।
आट्मीकी अन्धा
35यहूदी अगुवाकै होसकी बाहीर छ्युक्ङ याहा डेच कुरा येशूये सेया, अनी येशूये होसकी डुपार डेया, “ही नाङ भर्मीयो मीजा मीटाक विश्वास जाट्ले?”
36होचे डेया, “गुरुज्यु, होसको सु हो? इडीक नाकै ङाकी डेम याहा डेनाङ ङा होसको मीटाक विश्वास जाट्ले।”
37येशूये होसकी डेया, “नीये होसकी डाङ्ङने, अनी नाङ खाटा ङाक्ङ न लेच होसे न हो।”
38टब होचे डेया, “प्रभु, ङा नाको मीटाक विश्वास जाट्ले” अनी होचे होसकुङ प्रशंसा जाटा।
39होटै येशूये डेया, “मीमीक माडाङ्च अन्धा भर्मीकै डाङ्की य्होक्ख्यौ र डाङ्की य्होक्ले डेचको अन्धा छान्ख्यौ डेम ङा इसे संसाराङ न्याय जाट्की राछ हो।”
40इसे कुरा सेयार होसको खेरेप लेच फरीसीको मढ्याङ कुडीकै डेया, “ही कान र अन्धा हो ट?”
41येशूये होखुरीककी डेया, “इडीक नाखुरीक साँच्ची न अन्धा लेनाङ च पापौ दोषी माठहरीस्च लेया, टर नाखुरीक डेले ‘कान डाङ्ले’ होटबाटै नाखुरीकुङ पाप ङुम ङुले।”
Tans Gekies:
युहन्ना 9: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
