युहन्ना 8
8
व्यभिचारी मास्टो र येशू
1टर येशू जैटुन डाँडाङ नुङा।
2पीउर्हाक लेखो गोराक येशू फेरी परमेश्वरौ मन्दिराङ ल्हेस्न राहा। अनी पट्ट न भर्मीको होसकुङ वरीपरी भेला छानार येशूये ङुवार भर्मीकोलाक शिक्षा याहा।
3धर्मगुरु र फरीसीकै व्यभिचार जाट्न ङुच अवस्ठाङ डुपार घोच काट मास्टोकी राकार पट्टओ अगाडी टोङ्हाका, 4र होखुरीकै येशूकी डेया, “गुरु, इसे मास्टो व्यभिचार जाट्न न लेनाङ घोच हो। 5कानुङ व्यवस्थाङ मोशै याङ्च मास्टोकी ल्हुङै ङापार साट्की पर्ले डेम आज्ञा याम्हने।#लेवी २०:१०; व्यवस्था २२:२२-२४ नाको चहीँ ही डेले ट?” 6होखुरीकै होसकोकी दोष लैडीच मौका डुप्ले की डेयार इटजाट्न गीन्नन्या। टर येशूये घुकुरुक छानार झाङ औलै रीका। 7होखुरीकै होसकोकी घरीघरी गीन्न न ङुवा। होटबाटै येशू टोङ्हा र होखुरीककी डेया, “सुये सेन्र पाप माजाट्नने, होचे न पट्ट डेनाङ पहीला इसे मास्टोकी ल्हुङै ङाप्ख्यो।” 8अनी फेरी येशूये घुकुरुक छानार झाङ रीका। 9जब इसे कुरा सेया, टब बाड्सोको लकीङ सुरु जाटार मामार्जा सम्म काट-काट जाट्चै होटै व्हा। अन्टीमाङ येशू र होसे मास्टो मट्टै छाना। 10येशूये होसकी टोङ्हार डेया, “खोइ ट, नाङ्की दोष लैडीच भर्मीको कुला नुङा ट? सुयेर नाङ्की दण्ड माय्हा?” 11होसे मास्टोये डेया, “माय्हा हजुर।” येशूये डेया, “होटडेनाङ ङा र नाङ्की दण्ड माय्हाले। अब नाङ नुङ्ना, टर फेरी पाप माजाटो।”]#8:11 इसे बाड्को कोस्ट भीट्री लेच सब्डको चहीँ कोइ-कोइ सोरोट बाइबलाङ माले।
संसारुङ ज्योति येशू
12येशूये फेरी भर्मीकोलाक डेया, “संसारुङ ज्योति ङा न हो। ङाकी डुट्चये सेन्र छुम्ठाङ व्हाकी मापर्ले, टर होचे जीवन याछ ज्योति डुप्ले।”
13टब फरीसीकै होसकोकी डेया, “नाको च लहो न बारेयाङ गबाही याम्हन ले। होटबाटै नाकुङ गबाही सत्य माले।”
14येशूये होखुरीककी जवाफ याहा, “ङै ङाल्हौ न बारेयाङ गबाही यान्हाङ र ङै डेच कुरा सत्य हो, हीजैडेनाङ ङा कुटै राछ हो अनी कुला नुङ्ङ न ले, होसे ङाकी थाहा ले। टर नाखुरीककी चहीँ इसे कुरा थाहा माले। 15नाखुरीक च भर्मीकुङ बीचार अनुसार न्याय जाट्ले। टर ङा चहीँ सुकीर न्याय माजाट्ले। 16इडीक ङै न्याय जाटा डेनाङ र ङै जाट्च न्याय चहीँ सत्य ठहरीस्ले। हीजैडेनाङ ङा ङाल्हा काटै न न्याय माजाट्ले टर ङाकी बीर्न्हकाच बोइ ङा खाटा ले। 17नाखुरीकुङ व्यवस्थाङ र नीस जना भर्मीये याछ गबाही खाटा डेनाङ होसे सत्य छान्ले डेयार रीक्ङने। 18ङौ बारेयाङ गबाही याछ काट गबाही ङा न हो, र अर्को गबाही चहीँ ङाकी बीर्न्हकाच बोइ हो।#व्यवस्था १९:१५”
19टब येशूकी होखुरीकै गीना, “नाकुङ बोइ चहीँ कुला ले ट?”
येशूये होखुरीककी जवाफ याहा, “नाखुरीक न ट ङाकी चीन्डीले न ट ङौ बोइकी न चीन्डीले। इडीक नाखुरीकै ङाकी चीन्डी च लेनाङ ङौ बोइकी र चीन्डी च लेया।”
20येशूये इसे कुराको परमेश्वरौ मन्दिराङ शिक्षा यान्हाङ भेटी काच बाकसौ छेवाङ डेच हो। टर सुयेर होसकोकी माघोवा, हीजैडेनाङ होसकुङ समय माटार्हामन्या।
येशू इसे संसारुङ होइन
21येशूये फेरी होखुरीककी डेया, “ङा इटै नुङ्की क्योट्ले। अनी नाखुरीकै ङाकी पाले, टर नाखुरीक लहो न पापाङ सीले। हीजैडेनाङ ङा कुला नुङ्ले, नाखुरीक होला राखी माय्होक्ले।”
22यहूदी अगुवाकै इसे कुरा सेयार मेखुरीक-मेखुरीक डेया, “इसे च आत्मा हट्या टी जाट्की पामे की य्हाले? हीजैडेनाङ इचे ‘ङा कुला नुङ्ले होला नाखुरीक राखी माय्होक्ले’ डेले।”
23येशूये होखुरीककी डेया, “नाखुरीक इला म्हाकुङ हो, ङा चहीँ ढेनामीङ राछ हो। नाखुरीक इसे संसारुङ हो, टर ङा इसे संसारुङ होइन। 24होटबाटै ङै ‘नाखुरीक लोहो पापाङ सीले’ डेच हो। इडीक नाखुरीकै ‘ङा सु हो होसे न हो’#8:24 ङा सु हो होसे न होयहूदिकै एकडम पवित्र परमेश्वरौ म्यार्मीन चहीँ “याहवे” डेमन्या। होच्यो अर्थ चहीँ “ङा हो” डेच लेया। युहन्नौ सेछ समाचाराङ र “ङा हो” डेमने होचे चहीँ साच्चीँ न ङा होसे न हो डेम टान्हाक्ले। डेयार नाखुरीकै ङाकी विश्वास माजाटा डेनाङ नाखुरीक लहो पापाङ सीले।”
25होखुरीकै येशूकी गीना, “नाको सु हो ट?” अनी येशूये होखुरीककी डेया, “ङै नाखुरीककी सुरुलकीङ ही डेम राम्हने ङा होसे न हो। 26नाखुरीकुङ बारेयाङ ङै वास्टै कुराको डेकी ले र नाखुरीककी न्याय जाट्की ले। टर ङाकी बीर्न्हकाच सत्य ले, र होसको लकीङ ही सेया होसे कुरा मट्टै ङा संसारकी डेले।”
27येशूये परमेश्वर बोयो बारेयाङ डेच हो डेयार होसे भर्मीकै माबुझडीसा। 28होटबाटै येशूये डेया, “जब नाखुरीकै भर्मीयो मीजाकी ढेनाम क्रूसाङ टङ्गडीयार गाराङ्ले, टब ङा सु हो होसे न हो डेम नाखुरीकै थाहा डीन्ल्हे। ङा ङाल्हौ अधिकारै हीर काम माजाट्ले, टर बोये ङाकी पाहाक्च कुराको मट्टै जाट्ले डेच कुरा र नाखुरीकै वार्ल्हे। 29ङाकी बीर्न्हकाच ङा खाटा न ले, होसकै ङाकी ङाल्हा काट न माडास्नने, हीजैडेनाङ ङा सढैँ होसकोकी खुसी पार्च काम जाट्ले।” 30येशूये डेच इसे कुराको सेयार वास्टै भर्मीकै होसको मीटाक विश्वास जाटा।
अब्राहामौ सन्टानको
31येशूये लाहा मीटाक विश्वास जाट्च यहूदीकोलाक डेया, “ङौ शिक्षाकी मन्डीम ङुवा डेनाङ नाखुरीक साँच्ची न ङौ चेला हो। 32टब नाखुरीकै सत्यकी चीन्डीले र सत्यै नाखुरीककी छुटकारा याल्हे।”
33होखुरीकै डेया, “कान अब्राहामौ सन्टानको हो, र कान चाहाँसम्म सुओर कमारा माछान्नने। कानकी छुटकारा याल्हे डेच चहीँ ही हो ट?”
34येशूये होखुरीककी जवाफ याहा, “साँच्ची न, ङा नाखुरीककी डेले, पाप जाट्चको पट्ट न पापौ कमारा हो। 35कमारा सधैँभरी इमुङ जाहान माछान्ने, टर मीजा चहीँ सढैँभरी इमुङ जाहान छान्ले। 36इडीक परमेश्वरौ मीजै नाखुरीककी छुटकरा याहा डेनाङ नाखुरीक साँच्ची न स्वतन्त्र छान्ले। 37ङाकी थाहा ले, नाखुरीक अब्राहामौ सन्टानको हो। टर नाखुरीक ङाकी साट्की पाले, हीजैडेनाङ ङौ बचनौ लागी नाखुरीकुङ रीडयाङ ठाउँ माले। 38ङा बोइखाटा लेनाङ ही कुरा डाङा, होसे न कुरा नाखुरीककी डेले। टर नाखुरीक चहीँ नाखुरीकुङ बोइ लकीङ सेच कुराको न जाट्ले।”
39होखुरीकै येशूकी डेया, “कानुङ बोइ च अब्राहाम हो।”
येशूये होखुरीककी डेया, “साँच्ची न नाखुरीक अब्राहामौ सन्टानको लेनाङ च, अब्राहामै ही काम जाटा होसे न जाट्च लेया। 40ङै परमेश्वरलकीङ सेच सत्य कुरा नाखुरीककी सेटाक्नाङ च नाखुरीक ङाकी साट्की पाले। टर अब्राहामै च याङ्च काम माजाटा! 41नाखुरीकुङ बोये ही काम जाटा नाखुरीक र होसे न काम जाट्ले।”
होखुरीकै येशूकी डेया, “कान व्यभिचार लकीङ जन्मडीस्च होइन! कानुङ बोइ काट मट्टै ले, होसको परमेश्वर हो।”
42येशूये होखुरीककी डेया, “इडीक परमेश्वर नाखुरीकुङ बोइ हो डेनाङ च नाखुरीकै ङाकी माया जाट्च लेया, हीजैडेनाङ ङा परमेश्वर लकीङ राछ हो। ङाल्हौ इच्छाङ राछ होइन, होसकै न ङाकी बीर्न्हकाच हो। 43ङै ङाक्च कुरा नाखुरीकै हीजै माबुझडीस्ले? हीजैडेनाङ नाखुरीकै ङौ बचन सेकी मीमन माजाट्ले। 44नाखुरीक च नाखुरीकुङ बोइ शैतानौ सन्टानको हो, र नाखुरीकुङ बोयो इच्छा पुरा जाट्च नाखुरीकुङ मीमन ले। होसे च सुरुलकीङ न ज्यानमारा हो। र होचे सत्यकी घृणा जाट्ले, हीजैडेनाङ होसखाटा हीर सत्य माले। होचे मेन न स्वभाव अनुसार झुटो ङाक्ले। होसे झुटो हो र झुटौ न बोइ हो। 45टर हीजैडेनाङ ङा सत्य कुरा ङाक्ले, नाखुरीकै ङाकी विश्वास माजाट्ले। 46नाखुरीक मढ्याङ सुये ङै पाप जाट्नने डेयार टान्हाक्की य्होक्ले? इडीक ङै सत्य ङाक्ले डेनाङ, हीजै नाखुरीक ङा मीटाक विश्वास माजाट्ले? 47सु परमेश्वरौ सन्टानको हो, होचे परमेश्वरौ कुरा सेले। टर नाखुरीक परमेश्वरौ सन्टान होइन, होटबाटै नाखुरीकै परमेश्वरौ कुरा मासेले।”
अब्राहाम डेनाङ येशू महान
48यहूदी अगुवाकै येशूकी डेया, “कानै डेच ठीक न हो, ही नाङ सामरी हो र नाङ्की भूत लग्डीस्नने?”
49येशूये जवाफ याहा, “ङाकी भूत मालक्डीस्नने, ङा ङौ बोइकी आदर जाट्ले, टर नाखुरीक ङाकी आदर माजाट्ले। 50ङा लाहा न ङाल्हौ आदर मापाले, टर काट जना ले होसकै ङौ आदर जाट्की पाले र ठीक खाटा न्याय जाट्ले। 51ङा नाखुरीककी साँच्ची न डेले, ङौ शिक्षा मन्डीचको चहीँ सेन्र मासीले।”
52यहूदी अगुवाकै डेया, “अब कानकी पक्का थाहा छाना, नाङ्की भूत लक्डीस्च न हो। अब्राहाम सीया, अगमवक्ताको र सीया, टर नाङ डेले, ‘ङौ शिक्षा मन्डीचको सेन्र सीकी मापर्ले।’ 53ही नाङ सीम नुङ्च कानुङ पुर्खा अब्राहाम र अगमवक्ताको डेनाङ र कर्हाङ्छ हो? नाङ लाहाकी सु हो डेम आर्मीट्ले हँ?”
54येशूये डेया, “इडीक ङै ङाल्हौ न आदर जाटा डेनाङ ङौ आदर ब्यार्ठ छान्ने। ङाकी आदर जाट्की पाच ङौ बोइ ले, होसकोकी नाखुरीकै ‘होसको कानुङ परमेश्वर हो’ डेले। 55नाखुरीकै होसकोकी माचीन्डीमने, टर ङा चहीँ होसकोकी चीन्डीले। इडीक ङै होसकोकी माचीन्डीले डेले डेनाङ ङा र नाखुरीक लेखा न झुटो ठहरीस्ले। टर ङा होसकोकी चीन्डीले, र होसकै डेच कुरा मन्डीले। 56नाखुरीकुङ पुर्खा अब्राहामै ङा राछ डीन डाङ्की खुब मीमन जाट्नन्या। होचे डाङार खुब मार्हाङा।”
57यहूदी अगुवाकै येशूकी डेया, “नाङ पचास वर्ष र माटाहाम्हने, टब कुटजाट्न नीये कानुङ पुर्खा अब्राहामकी डाङा?”
58टब येशूये होखुरीककी डेया, “साँच्ची न ङा नाखुरीककी डेले, अब्राहाम जन्मडीस्की डेनाङ अगाडी लकीङ न ङा लेमै ले।”
59होटै न्हुइङ येशूकी ङाप्की डेम होखुरीकै ल्हुङको ढुमा, टर होसको आर्च्युहार मन्दिरलकीङ बाहीर ख्योहार नुङा।
Tans Gekies:
युहन्ना 8: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
