युहन्ना 7
7
येशू र होसकुङ भाइको
1होटै न्हुइङ येशू गालील क्षेत्राङ छेर्हाम व्हा। होसको यहूदियाङ नुङ्की मीमन माजाटा, हीजैडेनाङ यहूदी अगुवाकै होसकोकी साट्की पामन्या। 2होडीक बेला यहूदीकुङ छाप्रो खासार मन्डीच चाड राखी पामन्या। 3होटबाटै येशूओ भाइकै होसकोकी डेया, “इसे ठाउँ डासार यहूदियाङ नुङ्नी र नाकै जाट्न न लेच काम होला र नाकुङ चेलाकै डाङ्ख्यो। 4कुसे भर्मीये लहो म्यार्मीन क्योसाक्की मीमन जाट्ले, होचे आर्च्युहार काम माजाट्ले। नाको र इसे कामको जाट्न न ले, अब इसे अचम्मौ काम संसाराङ पट्टकी थाहा छान्ख्यो।” 5हीजैडेनाङ होसकुङ भाइकै समेट होसकोमीटाक विश्वास माजाट्नन्या।
6येशूये होखुरीककी डेया, “ङौ लागी ठीक समय अझै मार्हामने टर नाखुरीकुङ लागी च पट्ट न समय ठीक न ले। 7संसारुङ भर्मीकै नाखुरीककी घृणा जाट्की माय्होक्ले, टर ङाकी च घृणा जाट्ले, हीजैडेनाङ ङा होखुरीकै जाट्च कामको खराब ले डेयार टान्हाक्ङ याल्हे। 8नाखुरीक चाड मन्डीकी नुङ्नी। ङा चहीँ चाहाँ मानुङ्ले, हीजैडेनाङ ङौ समय अझै पुरा माछान्नने।” 9होखुरीककी इट डेयार येशू गालीलाङ न ङुवा।
छाप्रो बासौ चाड
10टर येशू लहो भाइको चाडाङ नुङ्ङ भ्यारखीङ मेखोल्हा र सुयेर थाहा माढीन्छ जाट्न यरूशलेमाङ नुङा। 11चाडाङ यहूदी अगुवाकै होसकोकी पाचै, “येशू कुला ले?” डेम गीन्न न लेया। 12भीडाङ वास्टै भर्मीकै येशूओ बारेयाङ कुरा जाट्की ठाला। कुडीकै डेमन्या, “होसे भर्मी सेछ ले।” टर अरुकै डेमन्या, “होइन, होचे च भर्मीकोलाक भरमाङ पार्न न ले।” 13टर यहूदी अगुवाको खाटा बीर्हीछ बाटै सुयेर येशूओ कुरा खुल्लमखुल्ला जाट्च आट माजाटा।
14येशू चाडौ समय आढा छान्की पानाङ परमेश्वरौ मन्दिराङ नुङार शिक्षा याखी ठाला। 15अनी होसकै याछ शिक्षा सेयार यहूदी अगुवाको अचम्म मन्डीचै डेया, “कानुङ गुरुको खाटा मापाम्हन इसे भर्मी कुटजाट्न इडीक वास्टै वार्छ छाना?” 16येशूये होखुरीककी डेया, “ङै पाहाक्च शिक्षा ङौ होइन, टर ङाकी बीर्न्हकाच परमेश्वर लकीङ राछ हो। 17परमेश्वरौ इच्छा लकीङ काम जाट्चकै चहीँ इसे शिक्षा परमेश्वरलकीङ राछ हो की ङौ लहो इच्छा लकीङ राछ हो डेयार होचे थाहा डीन्ल्हे। 18लहो बीचार लकीङ ङाक्चये चहीँ लहो न आदर पाले, टर लाहाकी बीर्न्हकाचौ आदर पाच भर्मी चहीँ सत्य हो, होसे खाटा छल माछान्ले। 19ही मोशै नाखुरीककी व्यवस्था याछ होइन र? टर नाखुरीक सुयेर होसे व्यवस्थाकी मामन्डीले। अनी हीजै नाखुरीक ङाकी साट्की पाले?”
20भीडाङ लेच भर्मीकै येशूकी डेया, “नाङ्की भूत लक्डीस्ने! सुये नाङ्की साट्की पामने र?” 21येशूये डेया, “ङै काट अचम्मौ काम जाट्नाङ नाखुरीक पट्टको अचम्म मन्डीले। 22मोशै नाखुरीकुङ लेन्जा मीजाकुङ खतना जाट्च आज्ञा याहा। साँच्ची न मोशालकीङ न इसे काम सुरु छान्च च होइन, टर नाखुरीकुङ बोइ-बाज्युको लकीङ सुरु छान्न राछ हो। होटबाटै म्हुङ बाट्च डीनाङ र नाखुरीक लहो लेन्जा मीजाकुङ खतना जाट्ले।#7:22 मोशौ ब्यावस्ठै डेले जब यहूदिकुङ लेन्जा मीजा डीन्ल्हे होखुरीकै साट डीन न्हुइङ होच्यो खटना जाट्की पर्ले होसे चहीँ म्हुङ बाट्च डीनाङ र पर्की य्होक्ले। 23मोशौ व्यवस्था भङ्ग माछान्ख्यो डेयार इडीक कुसेर लेन्जा जजौ म्हुङ बाट्चनीक खट्ना जाट्ले डेनाङ, ङै काट जना भर्मीकी म्हुङ बाट्चनीक पुरै गेपाका डेयार ही नाखुरीक ङाखाटा मीरीस ख्योल्हे? 24बाहीर मीटाहा ङोसार न्याय माजाट्नी, टर ठीकखाटा न्याय जाट्नी।”
मुक्ति याछ राजा
25यरूशलेमुङ भर्मीको मढ्याङ कोइ-कोये डेया, “ही इसे न होइन होखुरीकै साट्की पाच भर्मी? 26ङोस्नी, इसे च खुल्ला खाटा ङाक्ङन ले, टर होखुरीकै इसकी हीर माडेले! ही इसे न मुक्ति याछ ख्रीष्ट हो डेयार कानुङ अगुवाकै थाहा डीन्हा की य्हाले? 27इसे भर्मी कुटै राछ हो काल्हा पट्टकी थाहा ले। टर मुक्ति याछ ख्रीष्ट रान्हाङ च होसको कुटै राछ हो डेयार सुकीर थाहा माछान्ले।”
28अब येशूये चाहाँ सम्म र परमेश्वरौ मन्दिराङ पाहाक्ङ न लेया होसकै पट्टकै सेच जाट्न बाड्को सोराङ डेया, “नाखुरीकै ङाकी चीन्डीले, र ङा कुटै राछ हो, होसे र नाखुरीककी थाहा ले। ङा ङाल्हौ न इच्छै राछ होइन, टर ङाकी बीर्न्हकाच चहीँ सत्य ले। नाखुरीक होसकोकी माचीन्डीले, 29टर ङा होसकोकी चीन्डीले, हीजैडेनाङ ङा होसको लकीङ न राछ हो, अनी होसकै न ङाकी बीर्न्हकाच हो।”
30येशूकी यहूदी अगुवाकै घोकी पा, टर सुयेर होसकोकी मीहुट काकी माय्होका, हीजैडेनाङ होसकुङ समय अझै मार्हामन्या। 31होसे भीडाङ लेच भर्मीको वास्टै जनै येशूकी विश्वास जाटा अनी होखुरीकै डेया, “जब मुक्ति याछ ख्रीष्ट राल्हे, ही होसकै इसे भर्मीये डेनाङ वास्टै शक्तिशाली कामको जाट्ले र?”
येशूकी घोकी पाच
32येशूओ बारेयाङ भीडाङ लेच भर्मीकै खास्याक खुसुक ङाक्चै जाट्च फरीसीकै सेया। टब मुख्य पुजाहारीको र फरीसीको खाटार होसकोकी घोकी परमेश्वरौ मन्दिर रुङ्च सीपाहीकोलाक बीर्न्हका।
33टर येशूये डेया, “ङा अझै र नाखुरीक खाटा काटछीन ङुले होटै न्हुइङ ङाकी बीर्न्हकाच लेठाङ ङा ल्हेसार नुङ्ले। 34टब नाखुरीकै ङाकी पाले, टर माडुप्ले हीजैडेनाङ ङा नुङ्च ठावाङ नाखुरीक राखी माय्होक्ले।”
35इसे सेयार यहूदी अगुवाकै मेखुरीक-मेखुरीक डेकी ठाला, “इसे भर्मी कुला नुङ्की पामने र, ‘नाखुरीकै ङाकी माडुप्ले’ डेले? ही इसको गीरीककुङ मीघ्याङ इलाक आलाक छरपस्ट छान्न ङुच यहूदीको लेठाङ नुङार ग्रीककोलाक पाहाक्की मीमन जाट्नने की य्हाले? 36‘नाखुरीकै ङाकी पाले टर माडुप्ले हीजैडेनाङ ङा नुङ्च ठावाङ नाखुरीक राखी माय्होक्ले’ येशूये डेले। इसे ही डेच हो, छेना?”
जीउँडो डी
37चाडौ अन्टीम र पट्ट डेनाङ मुख्य डीनाङ येशूये टोङ्हार पट्टकै सेच जाट्न डेया, “इडीक नाखुरीक मढ्याङ सुर डी सोन्हा डेनाङ होसे ङा लेठाङ राहार डी गाख्यौ। 38धर्मशास्त्रये डेच लेखान सुये ङा मीटाक विश्वास जाट्ले, ‘होच्यो भीत्री रीडयलकीङ जीवन याछ जीउँडो डीयो खोलाको जोक्ङ ख्योल्हे।’#लेवी २३:३६” 39इसे कुरा चहीँ येशूये पवित्र आट्मौ बारेयाङ डेमन्या, होसको मीटाक विश्वास जाट्चकै जटी होसे पवित्र आत्मा डुप्की पामन्या। पवित्र आत्मा चाँहा सम्म माय्हामन्या, हीजैडेनाङ चाँहा सम्म येशू लहो महीमाङ स्वर्गाङ माल्हेस्नन्या।
भर्मीकुङ फाटो
40येशूओ कुरा सेयार भीडुङ कुडीक जना भर्मीकै डेया, “इसे च साँच्ची न राखी पर्च अगमवक्ता न हो लेसा।” 41अनी अरुये डेया, “होसको च मुक्ति याछ ख्रीष्ट न हो।” टर कुडीकै डेया, “ही मुक्ति याछ ख्रीष्ट गालीललकीङ राल्हे र? 42मुक्ति याछ ख्रीष्ट च राजा दाउदौ सन्टान लकीङ र दाउदौ न लाङ्घा बेथलेहेम#7:42 बेथलेहेम ढेरै जना यहूदिकोलाक चहीँ येशू ख्रीष्ट बेथलेहेमाङ डीन्छ हो डेयार थाहा मालेया। येशू ख्रीष्ट गालीलाङ न होर्च बाटै होखुरीकै होसको गालीलाङ न डीन्छ हो डेम आर्मीट्नन्या।लकीङ राल्हे डेयार ही धर्मशास्त्राङ मारीक्ने र?”#२ समूएल ७:१२; मीका ५:२ 43इटजाट्न येशूओ कारनै भर्मीकुङ मीघ्याङ फाटो छाना। 44कुडीक जनै होसकोकी घोकी मीमन जाटा, टर सुयेर होसको मीटाक मीहुट माका।
यहूदी अगुवाकुङ अविश्वास
45येशूकी घोकी नुङ्च मन्दिरुङ सीपाहीको होट न ल्हेसार राहा। अनी फरीसी र मुख्य पुजाहारीकै होखुरीककी गीना, “खै, नाखुरीकै येशूकी हीजै माराक्च?” 46सीपाहीकै जवाफ याहा, “होसे भर्मीये ङाक्च लेखा च कानै चाहाँसम्म सुयेर ङाक्च मासेमने।” 47फरीसीकै होखुरीककी डेया, “ही नाखुरीककी र होचे झुक्डीया की य्हाले? 48ही कानुङ अगुवाको र फरीसीको मढ्याङ सुयेर होसे मीटाक विश्वास जाट्ने? 49इसे भीडाङ लेच भर्मीकै मोशौ व्यवस्था माव्हार्ले होटबाटै होखुरीक मीटाक परमेश्वरौ सराप पर्न भ्यामने।”
50होला लेच फरीसीको मढ्याङ काट जना निकोदेमस होसे अगाडी काट पल्ट नाबीक येशूकी डुप्की राम्हन्या, होचे डेया, 51“ही कानुङ व्यवस्था अनुसार दोष लैडीच भर्मीयो कुरा मासेमन र होचे ही जाट्च हो होसे पट्टा मालैडीम होसकी दोषी ठहरीकी खाट्ले र?” 52टर होखुरीकै होसकी डेया, “ही नाङ र गालीली होकी य्हाले? धर्मशास्त्र सेम्ह परेसो अनी नीये वार्ल्हे, की गालील लकीङ कुसेर अगमवक्ता मार्हाले।”
53[होटै पट्ट न भर्मीको लाहा-लहो इमाङ नुङा।
Tans Gekies:
युहन्ना 7: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
