Mata 15

Kaŋ keeya ge Yahuɗ ma baŋ ma way ma

Mrk 7.1-23

1Guwa̰ swag, Farisi mage nda ge hate eeya ge Moyiz ne a̰me ma ɗege ge suwal ga̰a̰l Jerusalem ya ndwa seɗ Zeso. Sok ge àa dee ya, àa ele ne go: 2Ge dape, mo nda ge ame hateya ma wa ka mboya ge nè baŋ ma kaŋ keeya ma pagal to de? Ge dape, àa wa ka zam kaŋ be usi maa tok ma de? 3Ɗaŋɗe, gwan ge num janna go: Ge dape, ḛ sḛ ma wa ka hele wa yuwaleya ge Dok ne ma pagal ndwa kee kaŋ keeya ge ḛ baŋ ma way ma de? 4Ago, Dok ho na wa go: «Ho̰ mo ba mage mo na̰ hormo, ndu ge mbo sal na ba koo na na̰ ya, a ngaɗ go àa hṵṵ ne gezi.»#Waz 20.12.#Waz 21.17. 5Kaɗɗa ge ḛ sḛ ma ɗe, ḛ hate nda go, ndu ge pool jan na ba koo na na̰ go: Kaŋ ge mbi tok go, ge mbi ɓyare mbaa ḛ ge ne, mbi mbege ne ya gezi ge Dok pe. 6Mbi daa gwan hee ne mbaa mbi ba koo mbi na̰ to. Go mbe no, ḛ gul go fare ge Dok ne ma ndwa kee kaŋ keeya ge ḛ baŋ ma way ma.

7Ḛ ge mbuɗi nda ndwa ma! Ezay jin̰a fare ge ka̰a̰l ge nda ge zwagre Dok wa ma way mbe ḛ pagal tem, sok ge jin̰a go: 8Dok jin̰a go:

«Pe rusu mbe uware mbi ge na wa wala boo,

Ɗaŋɗe, ne dul wa kaal ge mbi.

9Àa uware mbi bàŋ kay,

Ago, àa hate eeya ge nda duwana ma way ma,

Dinna ge mojo̰o̰ num mbi wa yuwaleya ma ne go.»#Eza 29.13.

Kaŋ ge haɗ ndu duwana seŋre ge Dok ndwa se

10Guwa̰, Zeso tol ɓase ma ya, jan num go: Ḛ peɗ ḛ za̰a̰ mbi, ḛ kuwa fare mbe no gezi kwaɗa. 11Kaŋ ge haɗ ndu duwana seŋre ge Dok ndwa se, a be kaŋ ge waɗ ge ne wa zì to, ɗaŋɗe, a fare ge ndage no ge ne wa zì ya zum. 12Sok mbe go, ne nda ge ame hateya ma gwan ta ya ne ta zì, àa jan ne go: Mo ge kuwaya go, fare ge mo jin̰a mbe kê Farisi ma yal to de? 13Gwan ge num janna go: Mbi Ba ge no pḭḭ ma zì yà mbo mbugi ɔwara ge diige ge na ɗḭḭ ne to gezi. 14Ḛ n̰a num: Àa ge mojo̰o̰ ɓaal ge ɓyare wan maa ka̰a̰m ɓaal ge ɗogle ma ɔwara go! Sok ge ɓaal wan na kon ɓaal ɔwara, num sḛ ma jwàg gaa deɗ tugul se.

15Guwa̰, Piyer hee fare, ele ne go: Mà kaɗ ge go mo wan i fare sḭḭ mbe pe zum nde de. 16Zeso gwan ge num janna go: Ḛ sḛ ma puy, ḛ wan fare mbe pe zane to no me de? 17Ḛ gale wan pe go, kaŋ ge waɗ ndu wa zì, mbo ne laa zì, seŋe ya njoo to de? 18Ɗaŋɗe, fare ge ndage ge ndu wa zì ya, a fare ge mbo no ge ne dul wa zì ya ne, a ne ge haɗ ndu seŋre ne ge Dok ndwa se. 19Ago, dwaɗɗa ge sone mbe ge ee ndu hun swày, ee ndu kee zina, ee ndu kaɗ gwale ge zam tene, chel kaŋ, kee sayda ge hày mage jan fare ge sone kakatag ma ge ta pagal, mbo ge ndu dul wa zì ya. 20Kaŋ keeya ge sone mbe ma no peɗ haɗ ndu duwana seŋre ne ge Dok ndwa se. Ɗaŋɗe, zam kaŋ be usi tok haɗ ndu seŋre Dok ndwa se to.

Gwale ge dwag ge ho fareba Zeso ta

Mrk 7.24-30

21Guwa̰, Zeso ɗege ge sok mbe go, ɔwabe tene mbo ge suwa ge Tir mage Sido̰ ne yà. 22Gwale ge dwag mbe ge no rusu ge Kana ma way zì, ge kaa no suwa mbe go, mbo ya Zeso ta. Ɗege ka oy ne go: Bagezok ge gan ga̰a̰l Daviɗ Baŋ, kuwa mbi a̰se nde! Mbi van ge gwale ge on̰om ge sone ge na zì, za̰a̰ ne yal gḛḛ! 23Ɗaŋɗe, gwan ge ne fare a̰me janna ɗu to. Ne nda ge ame hateya ma gwan ta ya ne ta zì, àa ka gwarge ta jan ne go: Yin̰a ne, ne mbo, ago kee kṵwa̰ gḛḛ sok kàre nè pe go. 24Ɗaŋɗe, Zeso gwan ge ne fare janna go: Dok teme mbi ya ɗeŋew ge Izrayel van ge dḭḭ ge tame ge ba̰a̰ go ma pe. 25Ge fare mbe no pagal, gwale mbe mbo ya guu na ko ge ne ndwa se, jan ne go: Bagezok chiya mbi kṵwa̰ nde. 26Gwan ge ne janna go: Be kee kwaɗa ge àa hee kaŋ zam ge nda jabso way, àa dol juu van ma ne to. 27Gwale mbe jan ne go: A fareba Bagezok, go no puy, juu ma zam kaŋ pe ge deɗ ge maa ba ma taabul digi ma zam. 28Sok mbe go, Zeso jan ne go: Gwale! Mbi kuwa ya go fareba hoɗɗa ge amo mbiya mbyaɗ tab. Dok ho̰ mo kaŋ ge mo ɓyare ne. Sok mbe go gaw, ne van ge gwale mbe seɗ zonna.

Zonna ge nda ge kee tuguɗi pe hini-hini ma way

Mrk 7.31-37

29Zeso ɗege ge sok mbe go, mbo ge mangaɗam ga̰a̰l ge Galile ne wa yà, ndee ge njal sok a̰me ge haal digi, kaɗ na pe se. 30Nda mbo ya ɓase nɔnɔg, àa gene giɗi ma, ɓaal ma, gisil ge ɗel taɗɗa ma, nda ge ko looɗeya mage nda ge kee tuguɗi ge ɗogle ma ya gḛḛ-gḛḛ ge ne ta, ne sḛ zon num me. 31Sok ge ɓase ma kuwa gisil ge ɗel taɗɗa ma faa wa, giɗi ma seɗ zonna, nda ge ko looɗeya ma mbo vin̰a, ɓaal ma kuwa sok, àa kee ajab, àa ɗege sale Dok ge Izrayel ma way me.

Walla ge Zeso wuwa ɓase ma ge ndwa zi

Mrk 8.1-10; Mat 14.25-31

32Guwa̰, Zeso tol na nda ge ame hateya ma ya ge na ta, jan num go: Mbi ɓyare ngay kuwa a̰se ge ambi ge ɓase mbe ma ta, ge dape, màno àa kee ya dwam taa ge mbi ziya be a̰me zam. Mbi n̰a num gwan diŋ ge camal to, num ndwa mà haɗ piibi num ge vin̰a zì. 33Ne nda ge ame hateya ma ele ne go: Nda mbe ma no ɗem, i seɗ kaŋ zam ge mbyaɗ num mà ge dii, ge sok babur mbe no go de? 34Zeso ele num go: Ḛ go ge dupḛ ma gyana ga de? Àa gwan ge ne janna go: I go ge dupḛ ma ɓỳala, sini zaaso a̰me ma kwaɗa lag me. 35Sok mbe go, Zeso hoɗ ɓase ma na wa go, num kaa maa pe suwa se. 36Guwa̰, hee dupḛ ge ɓỳala mage sini zaaso mbe ma, kee mersi hon Dok, siɗi num se, hon na nda ge ame hateya ma num, àa gaa vaa ɓase ma. 37Àa peɗ, àa zam kaŋ mbyaɗɗa, ne nda ma kwate kaŋ zam pe ge gaa ma gwal pul ɓỳala. 38Ge nda ge zâ kaŋ ma buwal zì, nda soɗob kaa dudubu ndà, be isi nda zaab mage nda jabso ya zì. 39Guwa̰ ge n̰a ɓase ma mboya go, ndee faa go, mbo ge suwa ge Magadan ne yà.

Tans Gekies:

Mata 15: kiaGRB

Kleurmerk

Deel

Kopieer