Mata 14

Swày ge Yohana ba ge kee nda baptem ne

Mrk 6.14-29; Luk 9.7, 9

1Ge zaman mbe go, Heroɗ kaa gan ga̰a̰l ne ge suwa ge Galile ne pagal. Sok ge za̰a̰ fare ge kaŋ ajab ge Zeso ka kee num ma go, 2jan na nda ma go: Ndu mbe kaɗ mà se Yohana ba ge kee nda baptem ne! A ne ta̰a̰ ne ge nda ge swày ma buwal zì ya, a ge pe, see pool ge kee kaŋ ajab mbe ma no.

3Gan ga̰a̰l Heroɗ duwa fare mbe no ge dape, dee wal, wa̰a̰ Yohana, ba ge kee nda baptem, fee ne ge zul no, doo ne ge daŋay zì no, ge na na̰ van Filib gwale ge wal Herodiyaɗ fare pe, 4ndwa go, Yohana ka jan ne go: Eeya ge Yahuɗ ma way be hon vin̰a go, mo kaa zok ge mo na̰ van gwale to, teg ge ne sḛ gale no go ge na ndwa. 5Ge fare mbe no pe, gan ga̰a̰l ka ɓyare vin̰a go, àa hṵṵ Yohana gezi, ɗaŋɗe, ka chiya ɓase ma voo, ge dape, àa kuwa kuwa go, Yohana ndu ge zwagre Dok wa ne.

6Deɗ-ɗa go, ge vḛḛso ge dwam tolla ge gan ga̰a̰l Heroɗ ne go, Herodiyaɗ van ge gwale zuu ya ndal kaŋ ge nda ge àa too num ya ge vḛḛso pe ma ndwa go no. Ne kaŋ ndalla mbe mbo ya kee gan ga̰a̰l Heroɗ sḛ tii gḛḛ. 7Ge sok mbe go, guni tene sok kee wa tii go go, kaŋ a̰me ge van gwale mbe ma ele na ne ya, na mà hon ne ne. 8Ge fare ge ne na̰ yuwale ne ya pagal, van gwale mbe mbo ya jan gan ga̰a̰l go: Mbi ɓyare go, mo ho̰ mbi ya ge sego Yohana ba ge kee nda baptem pagal ge bugur go. 9Sok ge za̰a̰ fare mbe go, gan ga̰a̰l mbo ya wan kiimi. Ɗaŋɗe, ge ne gunin̰a ge guni tene ge nda ge na too num ya ma ndwa go pe ɗe, hoɗ na asagar ma na wa go: Ḛ ke kaŋ ge van gwale ele ne mbe avun cab, 10ḛ mbo daŋay zì yà, ḛ vyan Yohana pagal ya. 11Àa mbo, àa kee mbe go tem. Àa gene ne pagal ya ge bugur go, àa hon van gwale ne, ame ne mbo hon na na̰. 12Nda ge ame hateya ge Yohana ne ma mbo ya hee Yohana duul, àa mbo mbul ne. Guwa̰, àa mbo wuwage Zeso fare ge ne swày ne.

Walla ge Zeso wuwa ɓase ma

Mrk 6.30-44; Luk 9.10-17; Yoh 6.1-14

13Sok ge Zeso za̰a̰ fare mbe go, ɗege yalaŋ ge sok mbe go, ndee faa ga̰a̰l go mbo ge sok ge ndu no go yà to. Ɗaŋɗe, sok ge nda kuwa go num ɓyan-na zum yà, àa ɗege ge maa suwal ma ya kàre num pe, àa ka kereya ge mam wa go me. 14Sok ge Zeso ndee ge faa se ya digi, kuwa ɓase ma tabeya didib, kuwa num a̰se. Ge sok mbe go, zon nda ge ka kee tuguɗi ge num buwal zige ma me. 15Sok yan gasamal, ne nda ge ame hateya ma mbo ya ne ta, àa jan ne go: Sok kale ya go, ndu ge sok mbe go to, n̰a ɓase ma mbo ge suwal van ge jiyale guguwa ma yà yaɗ maa kaŋ zam ma. 16Zeso gwan ge num janna go: Be kee kwaɗa ge go àa n̰a num mboya to. Ḛ sḛ ma ɓyare num kaŋ zam ne. 17Àa gwan ge ne janna go: Ge no i tok go fyalag, a dupḛ ma nuwan̰, sini suwaya ma zi me. 18Gwan ge num janna go: Ḛ gene mbi num ya. 19Guwa̰ go, hoɗ ɓase ma na wa go, num kaa se ge sugu tɔgwal pagal. Ɔwabe dupḛ ge nuwan̰ mage sini ge zi mbe ma, hee na ndwa pḭḭ digi kee mersi hon Dok, siɗi dupḛ ma se hon na nda ge ame hateya ma, àa gene num mbo vaa ɓase ma. 20Ndu ge diige zam kaŋ huriya. Àa ɔwabe kaŋ zam pe ge gaa ma gwal wol pɔgwa zi. 21Ge nda ge zâ kaŋ ma buwal zì, nda soɗob kaa guwa mbo dudubu nuwan̰ go, be isi nda zaab mage nda jabso ya zì.

Mboya ge Zeso ne ge mam pagal go

Mrk 6.45-56; Yoh 6.15-21

22Fare mbe guwa̰ gaw, Zeso terse na nda ge ame hateya ma go, num ndee faa go haa mbo mam wa lee gene, ge na ndwa zḛḛ yà, guwa̰, na wa gaa n̰a ɓase ma mboya. 23Guwa̰ ge n̰a ɓase ma mboya go, mbo ge njal pagal digi ndwa mbo kee kaɗeya. Sok ge ɗaal wuwa ya se, a ne sḛ gaa sok mbe go ne hini ɗu. 24Zane no ɗe, faa ga̰a̰l ge ne nda ge ame hateya ma ndee go, deɗ-ɗa ge mam tuwal zum yà kaal ge wa kal, sḭ̀ḭl wa ya ka poɗ ne lee gene me-lee gene me, ge dape, sa̰a̰m ka kwal-la ge num ndwa zì. 25Lee aaram pagal, sok mbo ge na nda ge ame hateya ma ta yà, Zeso ka mboya ge mam pagal. 26Sok ge àa kuwa ne ya mboya mam pagal go, voo wan num, àa ɗege oyya digi batraŋ, àa ka janna go: A kḭḭ a̰me ne! 27Ge sok mbe go gaw, Zeso jan num go: A mbi ne, ḛ ee ḛ dul wa se, ḛ chiya voo to. 28Piyer hee fare, jan ne go: Bagezok-goo, kaɗɗa na mo sḛ ne, ho mo wa go, mbi mbo mo ta yà ge mam pagal. 29Jan Piyer go, ne mbo ya na ta! Piyer kan na ko ge faa go, ɗege mbo ge Zeso ndwa zì yà ge mam pagal go. 30Ɗaŋɗe, sok ge ndi sok na ziya, kuwa sḭ̀ḭl ge sa̰a̰m labreya ka mbeɗe ne, voo wan ne, ɗege tḭḭn̰a, oy Bagezok ge ka̰a̰l ndaal go: Mo̰o̰ mbi! 31Zeso paa na tok avun cab, wan ne, jan ne go: Ge dape, mo wa ka tumri tene go de! Ndu ge hoɗ fareba hoɗege guwa! 32Sok mbe go, àa ndee faa go, sa̰a̰m mḛḛ be kwalla. 33Nda ge ame hateya ge kaa faa go ma mbo ya guu maa ko se uware Zeso, àa jan ne go: Fareba mo Dok Van ne.

Zeso zo̰o̰ nda ge ka kee tuguɗi ma gḛḛ ge suwa Jenezareɗ go

34Sok ge Zeso mage na nda ge ame hateya ma dee ya ge mangaɗam ga̰a̰l wa lee gene go, àa mbo ya yabe maa faa ge suwa Jenezareɗ wa kal se. 35Nda ge suwal mbe diŋ-ge ma, sok ge àa kuwa go ne Zeso ne, àa ee tèmel mbo wuwage nda ge maa ziya ge ma, àa gene ne nda ge ka kee tuguɗi ma ya kakaɗag. 36Nda ge kaa tuguɗi ma fyal ge Zeso ta go, ne mà kaɗ ge go ne n̰a maa taɗ na ba̰a̰ wa go nde de. Num peɗ ge ka taɗ ne ba̰a̰ wa ma ka seɗ zonna.

Tans Gekies:

Mata 14: kiaGRB

Kleurmerk

Deel

Kopieer