ማቲወስት ወንጌል 8
8
ፈወነ 8
እየሱስ ለምፃም እጅር ቓዘጘ
1እየሱስም ኣበይስ ጊማንድ ንቕፀው ኽዝቭ ጝት ቲክኑ። 2ኣይንድ ላው ለምፃም#8፡2 ለምፅ፦ መፃፍ ቅዱሲዝ ለምፅ የው ቃልድ ሰውነቲዝ ዲጊል ፈው ከረከረው እጝቅ ፅውዘድየንትቅ ቓሊሰው የጝ። እጅር እየሱስትል ኣልት ጝበዊል ግርቨቭሽ፦ «ኣደረወ! ክት ፊቅድረውዝየ ይት ቓዝተ ቸልደኵ» ዩ። 3እየሱስም ጝናንድ ዘርጋቕ ዳቕ በር፦ «ፊቅጠኵን ቓጭ!» ዩ። ኣይንድም እጅርድ በውዝ ጝለምፂስ ቓዱ። 4እየሱስም እጅርድየንት፦ «እኒን ዊገድየንት ኣውማውስቅ ድቍረር ጣጝቅቅጭ፤ ዊገድ ግን ፊትር ክለምፂስ ቓድረጘ ክቕምት ካኽንዝ ቓሊሽ፤ እቂዝቅ ሚዝር ኣቓንስም ሙሴ ኣዘው ሚቨድ ኣልሽ» ዩ።#ዘሊ. 14፡1-32።
እየሱስ ላዝ ኻልቀይዝ ኣገልጋይድየንት ቓዘጘ
(ሉቃ. 7፡1-10)
5እየሱስም ቅፍርናዀም ኻትመይል ጥዋንድ ላው ላዝ ኻልቀ እጅር ጝጐ ኣልት፦ 6«ኣደረወ! ይኣገልጋይድ ድውይ ኣቕ ጭቕጘ ተሰቃይሻ ጝኒል ኽርይኩ» ዩ። 7እየሱስም፦ «ያን ተጥ ቓዝጭር» ዩ። 8ላዝ ኻልቀድ ግን፦ «ኣደረወ! ክት ይጝን ኣቒል ጥውራንስ ያን በቃቐርም ኣይቀር፤ ዊገድ ግን ላይ ቃልት ጭቝ ዊግጭ፤ ይኣገልጋይድም ቓድጡ። 9ያን ይቕምም ላጥዝ ኣዚጠር የጝ፤ ይጭስ ኣዚተቍ ይሳትቍ ዊተድርም እኵ፤ ጛጊስ ላውድ፦ ‹ፊጥ› ያንድ ፊረኵ፤ ‹ለው› ያንድ ቈሽ ተረኵ፤ ይኣገልጋይድም ያን፦ ‹እኒንት ሰራጭ› ያንድ ሰራሸኵ» ዩ።
10እየሱስም ጝዊሰይዝ ዲንቅሽ ጝት ቲክንጛ ዊነቍ እቂዝ፦ «እማንዝ የኵን፤ እስራየላኒስ እኳ እነየው ኽየው እምንት ችጚቀርም። 11እማንዝ የኵን፤ ንቕፀቍ እቅ ምስራቂስ ምራቪስም ተርጥቍ፤ ምጝግስተሰማያትስም ኣቭርኻም ጅቅ፣ ይሳቅ ጅቅ፣ ያይቈቭ ጅቅ፣ ላብጠ መድል ጐይጥቍ። 12እኒን ምጝግስትድ ዊርስጥጘ ጥውሸቍ ዊነቍድ ግን ቢዘይዙ ጥመይል ማልሽትጥቍ፤ ጝግልም ሊዝዝመ እርቍጣን ገጫዘው ሚከረዝ ኣጡ» ዩ።#እሳ. 49፡12፤ 59፡19፤ ምል. 1፡11፤ መዝ. 107፡3፤ ማቲ. 22፡13፤ 25፡30፤ ሉቃ. 13፡28። 13እየሱስም ላዝ ኻልቀድየንት፦ «ፊጥ፤ ክእምንቲዝጘ ኣነ» ዩ። ጝኣገልጋይድየንም ኣይንድ ቓዱ።
እየሱስ ንቕፀቍ ፅውዝጅንጥ ቓዘጘ
(ማር. 1፡29-34፤ ሉቃ. 4፡38-41)
14እየሱስም ቢጥሮስት ጝን ፊራንድ ቢጥሮስት ጣስን ብርዘው ፅውዘ ፅዊትር ኽርይር ዊንች። 15ጘጝም ጝርናንድየንት ዳቑ፤ ጝርፅውዘድም በውዝ ሊቁ፤ ጚይም ጕር ጛት ኣቭንውዝተ ኪርምች።
16ጘጝ ኵኑዊዝም ጋኒናንዝ ፃይሸቍ ንቕፀቍ እቅ ጝጐ ነስ፤ እየሱስም ጋኒናንድዛት ጝቃሊዝ ዊግተነውዝ ፊሱ፤ ፅውዝጅንጥድዛትም እጝቅትቅ ቓዙ። 17እንዝም ነቭይ ይሳያስ
«ጘጝ ይናደውየድየንት ለምሩ፤
ይናፅውዘድየንትም መውሩ»
የው ዊግተው ትንቪትድ ፋፅምሹ። #እሳ. 53፡4።
እየሱስት ቲክነናንድ ተረው ፊተነድ
(ሉቃ. 9፡57-62)
18እየሱስም ንቕፀቍ እቅ ጝጐ ኣኽቭሽጝ ቓላንድ ባኽሪዝ እጂል ከርጛንስ ኣዙ። 19ኣይንድም ላው ወሪትት ኽግ ክንሰተ እየሱስ ትጐ ኣልት፦ «ክንሰተወ! ክት ፊትረዊዝጐቅ ቲክንጭር» ዩ። 20እየሱስም፦ «ቘፅልድ ቢ ፃየቍ ጛይ፤ ሲመይዝ ቢረቍ ዚልቅድም ጕጂ ፃየቍ ጛይ፤ እጅር ዅር ግን ጝቕምት ኣልሰነ ስፍረ እጀውም» የው ዊሱ።
21ጝክንደተ ኣቐው ላየ እጅር ቈሽ፦ «ኣደረወ! በዊል ፊጥ ይርት ዲቭ ተጨር ፊቅጭ» ዩ። 22እየሱስም፦ «ክረቍድ ጝታክረቍድዛት ዲቭጝነ፤ ክት ኣራንድ ይት ቲክን» ዩ።
እየሱስ ማቨልድየንት ችብሰጘ
(ማር. 4፡35-41፤ ሉቃ. 8፡22-25)
23እንዝ ግረ እየሱስ ታጝኰይል ጥዉ፤ ጝክንደጥድም ጝት ቲክንጝ ጥውጝ ፊር። 24ኣይንድም ኽየው ማቨል ባኽሪል ጕ ታጝኰድየንት ስርጢስቅ ኻውኩ፤ እየሱስ ግን ኽርይ ዊኑ። 25ጝክንደጥድም ጝጐ ኣልትጝ ጒስነ፦ «እፈ ኣደረወ! ድዝኑና፤ እኒስ ቓዝ» ይ። 26ጘጝም፦ «እፈ እምንት ጒድልድርነቅ ክታትርነ! ውርቃጥ እንቝጠ ጐውትርና?» ዩ። እንዝ ግረ ጕ ፊግየይዝመ ባኽሪዝ ጋስፁ፤ ኽየው ፀጥተም ኣቑ። 27እቅድም፦ «ፊግየዝመ ባኽርዝ እኳ ጝጭስ ኣዚተቍ ኣወየው እጅርፈ?» ይጛ ጊርምሽ።
እየሱስ ጋኒናንዝ ፃይሸቍ ሊጘ እቅ ቓዘጘ
(ማር. 5፡1-20፤ ሉቃ. 8፡26-39)
28እየሱስም ባኽርድየንት ከር ገርገሲኑን የነው ኻግሪል ችጛንድ ጋኒናንዝ ፃይሸቍ ሊጘ እቅ መቃቭሪስ ፍጝ ጝት ዲምቅሽ፤ ጛይም ጭቕጘ ኻይልቍ ጭቕ ኣጛንስቅ ኣውማው እጅርቅ ጘጝ ጒደነይዝ ዲቍጠ ቸላውም ዊኑ። 29ጛይም፦ «እደረት ዅርወ! ይናጅቅ ውርት ውላ ፃይረር? ግርየድ ችጚጝቀመ ይናት ኣሰቃይዝተ ተትሩ?» ይጛ ቓፅ።#መሳ. 11፡12፤ 2ሳሙ. 16፡10። 30ጛጊስ ዊቱ እክልድ የው ችጝሸው ስፍረይልም ንቕፀው ኣሰመዙ መጝገ ውላቕ ዊኑ። 31ጋኒናንድም እየሱስት፦ «እንዛይ እቂስ ፊስረር ኣረውዝየ ኣለቀይ እድየን ኣሰመ መጝገይል ጥውነር ፊቅጭ» ይጝ ጨው። 32እየሱስም፦ «ፊጥን!» ዩ፤ ጋኒናንድም እቂስ ፍጝ ጘጝ ኣሰመ መጝገይል ፊርጝ ጥው፤ ኣሰመድም እጝቅቅ ውጥያ በዘይዝ ቍልቍለ ተጣድፍሻ ባኽሪል ጥው ክሩ። 33ኣሰመ መጝገይዝ ምቕድም ሰይጝ ኻትመይዝጐ ጥውጝ ዊገድየንት፣ ጋኒናንዝ ፃይሸቍ እቂዝ ኣቐውድየንትም እጝቅትቅ ጂጝዝ። 34እንዝ ግረ ኻትመይዙ ኽዝቭድቅ እየሱስት ቓልጠ ጝጐ ተሩ፤ ጝት ቓልጛንድም ጝታኻግርድየንት ሊቅ ፊራንስ ጨው።
Tans Gekies:
ማቲወስት ወንጌል 8: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
