ማቲወስት ወንጌል 7
7
ፈወነ 7
ላጥ እቂል ፊርደነው ጥውሻው ኣቐጘ
(ሉቃ. 6፡37-42)
1«ክታግልም ፊርድሻይየጘ ክትንም ኣውማውትልቅ ፊርድትርነ። 2ላጢል ፊርድርነው ፍርዲዝጘ ክታግልም ፊርድሽጡ፤ ሚክትርነው ሚክረነይዝም ክታጭስ ቈሽ ሚክርሽጡ።#ማር. 4፡24። 3ክእሊል ፅበው ግንድድየንት ቓሊጝቀ ኣወሽተ ክዝኒዝ እሊል ፅበው ንገቨድየንት ቓልዳ? 4ቈሽስ ክእሊል ግንድ ፅባ ወረጘ የጝ ክዝንት፦ ‹ክእሊል ፅበው ንገቨድ ፊስጨር ለው› ይረውድ? 5እፈ ተክዘረ ክተ! በዊል ክእሊል ፅበው ግንድድ ፊሽ፤ ጝዝግረ ክዝንት እሊል ፅበው ንገቨድ ፊስተ ማጥን ዊር ሽር ቓልትር።
6«ዋጥርጝ ክታቕምት ዃይጘጘ ቀድስሽተውድየንት ግፅጚዝ ይውትርነ፤ ጝታልኲዝ ደዳይጘጘም ክታእቍድየንት ጅቪዝ በዊል ማልትርነ።»
ፃልየነው ጥውሸው ኣቐጘ
(ሉቃ. 11፡9-13)
7«ጨውጥን! ነይሽትጡ፤ ደምዝጥን! ችጝትርንቅ፤ ቢለድ ኳኳ ሽጥን! ቢትጡ። 8ጨወውቅ ለምረኵ፤ ደምዘውም ችጘኵ፤ ቢለ ኳኳ ሸውዝም ቢተኵ። 9ክታማኽሊስ ጝዅርድ ኻበሸ ጨዋን ቕርጘ ይወው ኣይር እኩመ? 10ዊንስ ኻዘ ጨዋን ሲቭረ ይወው ዊንጡመ? 11እደስለ ክትን ጭቕ ኣቕርን ፅብርና ክታቝርስ ቀሰው ይውት ይወነው ኣርቕርነውዝየ ሲመይ ፅበው ክታይርድሰ ጝት ጨወቊዝ ኣወሽ ቀሰው ይውትድ ኒቒስ ይዋው? 12ነስየ እቅ ክታጭስ ፃቭጥጘ በንርነውድየንትቅ ክትንም ጘጝት ፃቭጥን፤ ወሪትቱ ኽጊዝመ ነቭያታኒዝም ይጘውድ እኒንት የጝ።»#ሉቃ. 6፡31።
ኣፀው ሚረዝመ ፈራቐው ሚረዝቍዝ
(ሉቃ. 13፡24)
13«ኣፅረይ ሚረየንስ ጥውጥን፤ ድዘሪዝጐ ፊሰው ጒደነድ ኽየው፣ ሚረድም ፈራቐው የጝ፤ ጝግል ጥወቍ እቅድም ንቕፀቍ ጛይ። 14ርዅየይል ድውሰው ሚረድ ኣፀው፣ ጒደነድም ሲው የው የጝ፤ ጝግል ጥወቍ እቅድም ዊትቍ ጭቝ ጛይ።»#የር. 21፡8፤ ዘዳ. 30፡19።
ኻሽወጥ ነቭያታኒስ ጣጝቅቅሸነው
(ሉቃ. 6፡43-44)
15«ጝታጊዝው ኣቒድ ናጥቀቍ ተኵልጥ ኣቕጝ ፅብጛ ቢቅ ተክጝ ክታማኽሊል ጥወቍ ኻሽወጥ ነቭያታኒስ ጣጝቅቅጭጥን።#ኽዝ. 22፡27። 16ጛትም ጝታሰቪዝ ኣርቕትርንቅ፤ ኣሚዙ ቍጥቋጠይስ ወይንዙ ፍረ፣ ኣቀቅመይስስ በለስዙ ፍረ ሊቅምሽጡመ? 17እኒዝጘም ቀሰው ዘፍድቅ ቀሰው ፍረ ፍርዘኵ፤ ጭቓ ዘፍድ ግን ጭቓ ፍረ ፍርዘኵ። 18ቀሰው ዘፍ ጭቓ ፍረ ፍርዝጠ ቸላውም፤ ጭቓ ዘፍም ቀሰው ፍረ ፍርዝጠ ቸላውም። 19ቀሰው ፍረ ፍርዛው ዘፍድቅ ቀቭሽት ልየይል ማልሽትጡ።#ማቲ. 3፡10፤ ሉቃ. 3፡9። 20ኣቓንስቅም ኻሽወጥ ነቭያታንድዛት ጝታሰቪዝ ኣርቕትርንቅ።#ማቲ. 12፡33።
21«ሲመይ ፅበው ይርት ፍቃድድየንት ፋፅመውድ የጝ ምጝግስተሰማያት ጥወውድጚ ይት፦ ‹ኣደረወ! ኣደረወ!› የውድቅ ምጝግስተሰማያት ጥዋውም። 22ኣይንት ግርየይዝ ንቕፀቍ እቅ ይት፦ ‹ኣደረወ! ኣደረወ! ውረ ክሽⶔዝ ትንቪት ዊግቲነቅመ? ክሽⶔዝስ ጋኒናን ፊሲነቅመ? ክሽⶔዝስ ንቕፀቍ ታምራን ፃቪነቅመ?› ይጥቍ። 23ያንም ኣይንድ፦ ‹እፈ ጭቕ እቅ ክታትርነ! ክታት ስሪስቅ ኣርቒቀርም፤ ይበዊስ እለ ፊጥን!› ይጭር።»#መዝ. 6፡8።
ጝን ተሰጥ ኻጝ እጅርዝመ ብልኽ እጅርዝ ተከድ
(ሉቃ. 6፡47-49)
24«ነስየ እኒን ይቃልድየንት ወሽ ፋፅመው እጅርድቅ ጝጝንድየንት ፃፀይል ሚስርት ተሰው ብልኽ እጅር ተከኵ። 25ኻይሉ ስወ ሊቩ፤ ኵረም ኵርዱ፤ ፊግየም ፊጊሩ፤ እድየን ጝንድየንትም ትክቩ፤ ኣነጚ ጝንድየን ፃፀይል ሚስርትሽ ተሲታንስቅ ሊቪየውም። 26እኒን ይቃልድየንት ወሽ ፋፅማው እጅርድ ቈሽ ጝጝንድየንት ሽነል ሚስርት ተሰው እጅር ተከኵ። 27ኻይሉ ስወ ሊቩ፤ ኵረም ኵርዱ፤ ፊግየም ፊጊሩ፤ እድየን ጝንድየንትም ትክቩ፤ ጝንድየንም በውዝ ሊቩ፤ ጝሊቭንድም ኣየት ኣቑ።»
28«እየሱስም እኒንት ክንስ ኻታንድ ኽዝቭድ ጝክንስኒዝ ዲንቅሹ። 29ምላንሰንድም ጝታወሪትት ኽግ ክንሰጢዝጘ ኣዪጝቀ ስልጣን ጕርየዝጘ ፃቭ ክንሳ ዊናንስቅ የጝ።»#ማር. 1፡22፤ ሉቃ. 4፡32፤ ማር. 1፡22፤ ሉቃ. 4፡32።
Tans Gekies:
ማቲወስት ወንጌል 7: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
