ወንጌል ዘማቴዎስ 12

ምዕራፍ 12

ዘከመ ኀለፈ እግዚእ ኢየሱስ በሰንበት ማእከለ ገራውህ

1 # ማር. 2፥23-25፤ ሉቃ. 6፥1-5። ወበውእቱ መዋዕል ኀለፈ እግዚእ ኢየሱስ በሰንበት እንተ መንገለ ገራውህ ወአርዳኢሁሰ ርኅቡ ወአኀዙ ይምሐዉ ሰዊተ ወይብልዑ። 2#ዘፀ. 20፥10። ወርእዮሙ ፈሪሳውያን ይቤልዎ ናሁ ርኢ አርዳኢከ ዘይገብሩ ዘኢይከውን ገቢረ በሰንበት። 3#1ሳሙ. 21፥7። ወይቤሎሙ ኢያንበብክሙኑ ዘገብረ ዳዊት አመ ርኅበ ውእቱኒ ወእለ ምስሌሁ። 4#ዘሌ. 24፥9። ዘከመ ቦአ ቤቶ ለእግዚአብሔር ወበልዐ ኀባውዘ ቍርባን ዘኢይከውኖ ለበሊዕ ወኢ ለእለ ምስሌሁ ዘእንበለ ለካህናት ለባሕቲቶሙ። 5#ዘኍ. 28፥9። ወኢያንበብክሙኑ ዘሀሎ ውስተ ኦሪት ከመ ካህናት እለ ውስተ ቤተ መቅደስ ያረኵስዋ ለሰንበት ወኢይከውኖሙ ጌጋየ። 6ወአነሂ እብለክሙ ከመ ዘየዐቢ እምቤተ መቅደስ ሀሎ ዝየ። 7#9፥13፤ ሆሴ. 6፥6። ሶበሰ ተአምሩ ምንት ውእቱ ዘይቤ «ምጽዋተ አበድር እመሥዋዕት»#ቦ ዘይቤ «ምሕረተ እፈቅድ ወአኮ መሥዋዕተ» እምኢኰነንክምዎሙ ለእለ ኢአበሱ። 8#ማር. 2፥28። እስመ ወልደ ዕጓለ እመሕያው ለሊሁ ውእቱ እግዚኣ ለሰንበት።

በእንተ ዘየብሰት እዴሁ

9 # ማር. 3፥1-7፤ ሉቃ. 6፥8-11። ወፈሊሶ እግዚእ ኢየሱስ እምህየ ቦአ ውስተ ምኵራቦሙ። 10#ሉቃ. 14፥3። ወናሁ ብእሲ ዘየብሰት እዴሁ ወተስእልዎ እንዘ ይብሉ ይከውንኑ በሰንበት ፈውሶ ከመ ያስተዋድይዎ። 11ወይቤሎሙ መኑ እምውስቴትክሙ ብእሲ ዘቦ አሐዱ በግዕ ወእመ ወድቆ በሰንበት ውስተ ግብ አኮኑ ይእኅዞ ወያነሥኦ። 12እፎ እንከ ፈድፋደ ይኄይስ ሰብእ እምነ በግዕ ይከውንኬ በሰንበት ገቢረ ሠናይ። 13ወእምዝ ይቤሎ ለውእቱ ብእሲ ስፋሕ እዴከ ወሰፍሐ እዴሁ ወሐይወት ሶቤሃ ወኮነት ከመ ካልእታ። 14#ዮሐ. 5፥17። ወወፂኦሙ ፈሪሳውያን ተማከሩ በእንቲኣሁ ከመ ይቅትልዎ። 15ወአእሚሮ እግዚእ ኢየሱስ ተግኅሠ እምህየ ወተለውዎ ብዙኃን ሕዝብ ወአሕየዎሙ ለኵሎሙ። 16#8፥4፤ ማር. 3፥7-12። ወገሠጾሙ ከመ ኢያግህድዎ። 17#ኢሳ. 42፥1-4። ከመ ይትፈጸም ዘተብህለ በኢሳይያስ ነቢይ እንዘ ይብል። 18#3፥17። «ናሁ ወልድየ ዘኀረይኩ ፍቁርየ ዘሠምረቶ ነፍስየ ወአነብር መንፈስየ ላዕሌሁ ውእቱ ይነግር ፍትሕየ ወኵነኔየ ለአሕዛብ። 19ኢይደምፅ ወኢይጸርሕ ወአልቦ ዘይሰምዕ ቃሎ እንዘ ይሜህር በምኵራብ። 20ብርዐ ቅጥቁጠ ኢይሰብር ወሱዐኒ ዘይጠይስ ኢያጠፍእ እስከ ያገብእ ፍትሐ መዊኦቱ። 21#ኢሳ. 42፥1-4። ወበስመ ዚኣሁ አሕዛብ ይትአመኑ።»

በእንተ ዘጋኔን ዕዉር፥ ወጽሙም፥ ወበሃም

22 # ሉቃ. 11፥14-28። ወእምዝ አምጽኡ ሎቱ ዘጋኔን ዕዉረ ወጽሙመ ወበሃመ ወፈወሶ እስከ ውእቱ ዕዉር ወጽሙም ወበሃም ነበበሂ ወርእየሂ ወሰምዐሂ። 23ወይዴመሙ ኵሎሙ አሕዛብ ወይቤሉ አኮኑ ዝንቱ ወልደ ዳዊት። 24#9፥34፤ ማር. 3፥22፤ 2ነገ. 1፥2፤ 3፥1። ወፈሪሳውያንሰ ሰሚዖሙ ይቤሉ ዝንቱሰ ኢያወፅእ አጋንንተ ዘእንበለ በብዔል ዜቡል መልአኮሙ ለአጋንንት። 25ወአእሚሮ እግዚእ ኢየሱስ ኅሊናሆሙ ይቤሎሙ ኵላ መንግሥት እንተ ትትናፈቅ በበይናቲሃ ትማስን ወኢትቀውም ወኵላ ሀገር ወእመሂ ቤት እንተ ትትናፈቅ በበይናቲሃ ኢትቀውም። 26ወእመሰ ሰይጣን ለሰይጣን ያወፅኦ ተናፈቀኬ በበይናቲሁ እፎ እንከ ትቀውም መንግሥቱ። 27ወእመሰ አነ በብዔል ዜቡል አወፅኦሙ ለአጋንንት ውሉድክሙ በምንት ያወፅእዎሙ ወበእንተዝ እሙንቱ ፈታሕተ ይከውኑክሙ። 28#1ዮሐ. 3፥8። ወእመሰ አነ በመንፈሰ እግዚአብሔር አወፅኦሙ ለአጋንንት ዮጊኬ በጽሐት ላዕሌክሙ መንግሥተ እግዚአብሔር። 29#ኢሳ. 49፥24-25። ወአልቦ ዘይክል መኑሂ በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ቤቶ ይበረብር። 30#ማር. 9፥40። ዘኢኮነ ምስሌየ ዕድውየ ውእቱ ወዘኢይትጋባእ ምስሌየ ይዘርወኒ#ቦ ዘይቤ «ወዘኢያስተጋብእ ምስሌየ ይዘሩ» 31#ዕብ. 6፥1-6፤ 10፥27፤ 1ዮሐ. 5፥17። በእንተዝ እብለክሙ ኵሉ ኀጢአት ወፅርፈት ይትኀደግ ለሰብእ ወዘሰ ፀረፈ ላዕለ መንፈስ ቅዱስ ኢይትኀደግ ሎቱ። 32#ማር. 3፥28-29፤ ሉቃ. 12፥10፤ 1ጢሞ. 1፥13፤ 1ጴጥ. 4፥6። ወዘሰ ነበበ ቃለ ላዕለ ወልደ ዕጓለ እመሕያው ይትኀደግ ሎቱ ወዘሰ ነበበ ላዕለ መንፈስ ቅዱስ ኢይትኀደግ ሎቱ ኢበ ዝ ዓለም ወኢ በዘይመጽእ። 33#7፥17። እመ አኮ ግበሩ ዕፀ ሠናየ ወፍሬሁኒ ሠናየ ወእመ አኮ ግበሩ ዕፀ እኩየ ወፍሬሁኒ እኩየ እስመ እምፍሬሁ ይትዐወቅ ዕፅ። 34#ኢሳ. 59፥13። ኦ ትውልደ አራዊተ ምድር በእፎ ትክሉ ሠናየ ተናግሮ እንዘ እኩያን አንትሙ እስመ እምተረፈ ልብ ይነብብ አፍ። 35ኄር ብእሲ እምሠናይ መዝገበ ልቡ ያውፅኣ ለሠናያት ወእኩይሰ ብእሲ እምእኩይ መዝገበ ልቡ ያወፅኣ ለእኪት። 36አንሰ እብለክሙ ኵሉ ሰብእ ዘይነብብ ንባበ ፅሩዐ ያገብኡ ሎቱ ቃለ በዕለተ ደይን። 37እስመ እምቃልከ ትጸድቅ ወእምቃልከ ትትኴነን።

በእንተ እለ ሰአሉ ትእምርተ

38 # 16፥1። ወአሜሃ መጽኡ ሰብእ እምጸሐፍት ወእምፈሪሳውያን ወይቤልዎ ሊቅ ንፈቅድ እምኀቤከ ትእምርተ ንርአይ። 39#ኢሳ. 57፥3፤ ሉቃ. 11፥29። ወአውሥአ እግዚእ ኢየሱስ ወይቤሎሙ ትውልድ ዕሉት ዐማፂት ወዘማዊት ትእምርተ ተኀሥሥ ወትእምርትሰ ኢይትወሀባ ዘእንበለ ትእምርተ ዮናስ ነቢይ። 40#16፥21፤ ዮናስ 2፥1-2፤ ኤፌ. 4፥9። እስመ በከመ ነበረ ዮናስ ውስተ ከርሠ ዐንበሪ ሠሉሰ መዋዕለ ወሠሉሰ ለያልየ ከማሁ ይነብር ወልደ ዕጓለ እመሕያው ውስተ ልበ ምድር ሠሉሰ መዋዕለ ወሠሉሰ ለያልየ። 41#11፥16፤ ዮናስ 3፥5። ሰብአ ነነዌ ይትነሥኡ አመ ዕለተ ደይን ወይትፋትሕዋ ለዛቲ ትውልድ ወያስተኀፍርዋ እስመ ነስሑ በስብከተ ዮናስ ወናሁ ዘየዐቢ እምዮናስ ሀሎ ዝየ። 42#1ነገ. 10፥1-10። ንግሥተ አዜብ ትትነሣእ አመ ዕለተ ደይን ወትትፋታሕ ምስለ ዛ ትውልድ ወታስተኀፍራ እስመ መጽአት እምአጽናፈ ምድር ትስማዕ ጥበቢሁ ለሰሎሞን ወናሁ ዘየዐቢ እምሰሎሞን ሀሎ ዝየ።

በእንተ መናፍስት ርኩሳን

43ወእምከመ ወፅአ መንፈስ ርኩስ እምሰብእ የዐውድ በድወ ኀበ አልቦ ማይ እንዘ የኀሥሥ ዕረፍተ ወየኀጥእ። 44ወእምዝ ይብል እገብእ እንከሰ ውስተ ቤትየ እምኀበ ወፃእኩ ወመጺኦ ይረክቦ እንዘ ያስተራክብ እዳወ ዕሩቀ ወኵስቱረ ወምሩገ።#ቦ ዘኢይጽሕፍ «ዕሩቀ ወኵስቱረ ወምሩገ» 45#2ጴጥ. 2፥20። ወእምዝ የሐውር ወያመጽእ ምስሌሁ ካልኣነ ሰብዐተ አጋንንተ እለ የአክዩ እምኔሁ ወበዊኦሙ የኀድሩ ህየ ወይከውን ደኃሪቱ ለውእቱ ብእሲ ዘየአኪ እምቀዳሚቱ ከማሁ ይከውና ለዛቲ ትውልድ እኪት። 46#13፥55፤ ማር. 3፥31-35፤ ሉቃ. 8፥17-21። ወእንዘ ይነግሮሙ ዘንተ ለሕዝብ ናሁ እሙ ወአኀዊሁ ይቀውሙ አፍኣ እንዘ ይፈቅዱ ይትናገርዎ። 47ወመጽአ አሐዱ እምአርዳኢሁ ወይቤሎ ናሁ እምከ ወአኀዊከ አፍኣ ይቀውሙ ወየኀሥሡ ይትናገሩከ። 48#ሉቃ. 2፥9። ወአውሥአ ወይቤሎ ለዘነገሮ መኑ ይእቲ እምየ ወእለ መኑ እሙንቱ አኀውየ። 49ወሰፍሐ እዴሁ ወአመረ#ቦ ዘኢይጽሕፍ «ወአመረ» ኀበ አርዳኢሁ ወይቤ ነዮሙ እምየ ወአኀውየ። 50#ሮሜ 8፥29። እስመ ኵሉ ዘይገብር ፈቃዶ ለአቡየ ዘበሰማያት ውእቱ እኁየኒ ወእኅትየኒ ወእምየኒ ውእቱ።

Tans Gekies:

ወንጌል ዘማቴዎስ 12: ሐኪግ

Kleurmerk

Deel

Kopieer