ወንጌል ዘማቴዎስ 11

ምዕራፍ 11

በእንተ እለ ተፈነዉ እምኀበ ዮሐንስ

1 # ሉቃ. 7፥18-35። ወሶበ ፈጸመ እግዚእ ኢየሱስ አዝዞቶሙ ለዐሠርቱ ወክልኤቱ አርዳኢሁ ኀለፈ እምህየ ከመ ይምሀር ወይስብክ ውስተ አህጉሪሆሙ። 2#14፥3። ወሰሚዖ ዮሐንስ ምግባሮ ለክርስቶስ እንዘ ሀሎ በቤተ ሞቅሕ ፈነወ ኀቤሁ ክልኤተ እምአርዳኢሁ። 3#ዘዳ. 18፥15፤ ዮሐ. 1፥34። ወይቤሎ አንተኑ ዘይመጽእ ወቦኑ ካልእ ዘንሴፎ። 4ወአውሥአ እግዚእ ኢየሱስ ወይቤሎሙ ሐዊረክሙ ዜንውዎ ለዮሐንስ ዘርኢክሙ ወዘሰማዕክሙ። 5#ኢሳ. 35፥5፤ 61፥1። ዕዉራን ይሬእዩ ወሐንካሳን የሐውሩ እለ ለምጽ ይነጽሑ ወጽሙማን ይሰምዑ ሙታን ይትነሥኡ ወነዳያን ይዜነዉ። 6#ሉቃ. 11፥27-29። ወብፁዕ ውእቱ ዘኢተዐቅፈ ብየ።

ዘከመ ወደሶ እግዚእ ኢየሱስ ለዮሐንስ መጥምቅ

7 # 3፥1፤ ዮሐ. 5፥35። ወእምድኅረ ኀለፉ ላእካነ ዮሐንስ አኀዘ እግዚእ ኢየሱስ ይበሎሙ ለሕዝብ በእንተ ዮሐንስ መጥምቅ ምንተኑመ ወፃእክሙ ገዳመ ትርአዩ ብርዐኑ ዘይትሐወስ እምነፋስ። 8ወምንተኑመ ወፃእክሙ ትርአዩ ብእሴኑ ዘርሡይ በቀጠንተ አልባስ እለሰ ቀጠንተ ይለብሱ ናሁ ውስተ አብያተ ነገሥት ሀለዉ። 9#ሉቃ. 1፥76። ወምንተኑመ ወፃእክሙ ትርአዩ ነቢየኑ እወ እብለክሙ ውእቱ ፈድፋደ የዐቢ እምነቢያት። 10#ሚል. 3፥1። እስመ ዝንቱ ውእቱ ዘበእንቲኣሁ ተጽሕፈ «ናሁ አነ እፌኑ መልአክየ ቅድመ ገጽከ ዘይጸይሕ ፍኖተከ በቅድሜከ።» 11#13፥16፤ ዘካ. 12፥8። አማን እብለክሙ ኢተንሥአ እምትውልደ አንስት ዘየዐቢ እምዮሐንስ መጥምቅ ወበመንግሥተ ሰማያትሰ ዘይንእሶ የዐብዮ። 12#ሉቃ. 16፥17-24። ወእመዋዕለ ዮሐንስ መጥምቅ እስከ ይእዜ ትትገፋዕ መንግሥተ ሰማያት ወግፉዓን ይትማሠጥዋ። 13እስመ ኵሎሙ ኦሪት ወነቢያት እስከ ዮሐንስ ተነበዩ። 14#17፥10-14፤ ሚል. 4፥5። ወእመሰ ትፈቅዱ ትትወከፍዎ ዝ ውእቱ ኤልያስ ዘሀለዎ ይምጻእ፤ 15ዘቦ እዝን ሰሚዐ ለይስማዕ፤ 16በመኑ አስተማስሎሙ ለሰብአ ዛቲ ትውልድ ይመስሉ ደቂቀ እለ ይነብሩ ውስተ ምሥያጥ ወይጼውዑ ቢጾሙ። 17ወይብልዎሙ ሐለይነ ለክሙ ወኢዘፈንክሙ አስቈቀውነሂ ለክሙ ወኢበከይክሙ። 18#3፥4። እስመ መጽአ ዮሐንስ እንዘ ኢይበልዕ ወኢይሰቲ ወይቤልዎ ጋኔን ቦቱ። 19#ሉቃ. 11፥49። ወመጽአ ወልደ ዕጓለ እመሕያው እንዘ ይበልዕ ወይሰቲ ወይቤልዎ ነዋ ብእሲ በላዒ ወሰታዬ ወይን ዐርከ መጸብሓን ወኃጥኣን። ወጸድቀት ጥበብ እምደቂቃ ወእምግባራ።#ቦ ዘኢይጽሕፍ «ወእምግባራ»

ዘከመ ኄሶን ለአህጉር ኢነሳሕያት

20 # ሉቃ. 10፥13-15። ወእምዝ አኀዘ እግዚእ ኢየሱስ ይኂሶን ለአህጉር እለ በውስቴቶን ገብረ ኀይለ ብዙኀ እስመ ኢነስሓ። 21#ዮናስ 3፥6። ወይቤሎን አሌ ለኪ ኰራዚ አሌ ለኪ ቤተ ሰይዳ ሶበሁ በጢሮስ ወበሲዶና ተገብረ ኀይል ዘተገብረ በውስቴትክን በሠቅ ወበሐመድ እምነስሓ። 22ወባሕቱ እብለክን ጢሮስ ወሲዶና ይረክባ ሣኅተ አመ ዕለተ ደይን ፈድፋደ እምኔክን። 23#ኢሳ. 14፥12-15፤ ሕዝ. 16፥48፤ 4፥13። ወአንቲኒ ቅፍርናሆም ለእመ እስከ ሰማይ ትትሌዐሊ ሀለወኪ እስከ ሲኦል ትረዲ ሶበሁ በሰዶም ተገብረ ኀይል ዘተገብረ በውስቴትኪ እምሀለወት እስከ ዮም። 24#10፥15። ወባሕቱ እብለኪ ከመ ምድረ ሰዶም ትረክብ ሣኅተ በዕለተ ደይን እምኔኪ። 25#ሉቃ. 10፥21-22። ወይእተ ጊዜ አውሥአ እግዚእ ኢየሱስ ወይቤ አአምነከ አባ እግዚአ ሰማያት ወምድር እስመ ኀባእኮ ለዝንቱ እምጠቢባን ወእማእምራን ወከሠትኮ ለሕፃናት። 26እወ አባ እስመ ከማሁ ኮነ ሥምረትከ በቅድሜከ። 27#28፥18፤ ዮሐ. 3፥35፤ ፊልጵ. 2፥9። ኵሉ ተውህበኒ እምኀበ አቡየ ወአልቦ ዘየአምሮ ለወልድ ዘእንበለ አብ ወለአብኒ አልቦ ዘየአምሮ ዘእንበለ ወልድ ወለዘፈቀደ ወልድ ይከሥት ሎቱ። 28#ኢሳ. 45፥22፤ ኤር. 31፥25። ንዑ ኀቤየ ኵልክሙ ስሩሓን ወክቡዳነ ጾር ወአነ አዐርፈክሙ። 29#ኤር. 6፥16። ንሥኡ አርዑትየ ላዕሌክሙ ወተመሀሩ እምኔየ ወአእምሩ እስመ የዋህ አነ ወትሑት ልብየ ወትረክቡ ዕረፍተ ለነፍስክሙ። 30#1ዮሐ. 5፥3። እስመ አርዑትየኒ ሠናይ ወጾርየኒ ቀሊል ውእቱ።

Tans Gekies:

ወንጌል ዘማቴዎስ 11: ሐኪግ

Kleurmerk

Deel

Kopieer