ሮሜ 9
9
ጾ̈ሳ̇̇̈ዲ ኢሲሬ̈ላ ዎርዣ ማራ̇ጺዴ
1ክርስቶ̈ሲ ታ ማርካ̇ ቴ ኪንን ሶ̈ላ̈ሬ፤ ማቃ̇ባሴ፤ ታ ማቃ̇ባሶን ቴ ቡ̈ዲንዳ ጌ̈ሻ̇ ኣያ̇ናባር ታ̈ብ ማርኪ̇ታ̈ሬ። 2-3ቴ ዜርን ኣይሁዳን ጊሽ̇ ታ̈ቦ ጴች ኣዛናኬ ታ ጋልዳፖ̇ ፋኪባ̈ሶ ቆፊ ቴ ቡ̈ዲን ጋርታ ዎ። ታ̈ኒ ኢንታ̇ ጊሻ̇ቦ ጋ̈ራ ክርስቶ̈ሳ ጋልዳፖ̇ ፋጊንታ̇ራ ጾ̈ሳ̇ ጎይላ ታ ጋልዳ ዬ̈ይርካር ቴ ዶሳርዶ̈ን። 4ኢንቲ̇ ኢስሬ̈ላ ዜር፤ ጾ̈ሲ ኢንታ̇ ፌ ናኢ ማሂኔ፤ ፌ ቦንቺ̇ን ኢንታ̇ብ ቤይሲኔ፤ ኢንታ̇ባር ቃ̈ላ ጌሊኔ፤ ኢንታ̇ብ ሂጋ̇ ኢሚ̇ኔ፤ ጾ̈ሳ̇ዳ ኪንባር ጎሽታ̇ዝ ጎይን ኢንታ̇ ቤይሲኔ፤ ታስፋ ቃ̈ላ ኢንታ̇ብ ኢሚ̇ኔ። 5ኢንቲ̇ ሚኖ ኢስሬ̈ላንቦ ባ̈ቢንታ̇ ማ̈ቂ̇ኖን ጋልዳፖ ዬሊንቲ̇ኔ፤ ክርስቶ̈ሳር ኢንታ̇ ዜር ጋርታ̇ፖ ዬሊንቲ̇ኔ፤ ኢ ዎይፖ ሾክ ጌይኖ̈ዳ፤ ማ ኢ ሜናብ ኣንጂንቲ̇ኖ ጾ̈ሴ̇። ኣሚንኤ!
6ማ̈ቂኔካሬ ጾ̈ሳ̇ ቃ̈ላዲ ኣቲ̇ኔ ጌንት ጊዳካ̇ዬ፥ ኢስሬ̈ላ ዜር ዎይ ኪን ኢስሬ̈ላ ጊዳካ̇ዬ። 7ዪና̇ ኢዝፌ̈ኒ ኣብራሃ̈ማ ዜር ዎይ ኣብራ̈ሃማቦ ናኤ ጌንት ጊዳካ̇ዬ፤ ጾ̈ሲ̇ ኣብራሃ̈ማኮ “ኔ̈ብ ዜር ኬስኪ̇ዛዲ ዪሳ̈ቃ ጋርታፖ̇” ጌይኔ። 8ዪና̇ ጌዪንቲ̇ኖንዳ ኣሳ ቆፊፌ̈ን ዬሊንቲኖን ጾ̈ሳ̇ብ ናኢ ጊዳካ̇ዬ፤ ዎቲናካሬ ኣብራሃ̈ማ ዜር ማ̈ቂ̇ ፋይዲንቲ̇ዛን ጾ̈ሲ ኢሚ̇ኖ ታስፋ ቃ̈ሊምባራ ዬሊንቲ̇ኖ ናኣን። 9ዪ̈ዳሬ ጾ̈ሲ ኢማ̇ንዳ ጌዪ ሶ̈ሊኖ ታስፋ ቃ̈ሊንዳ “ጊዴቤር ኬ̈ል ዓኖ̇ ቴ ዬ̈ንዳ፤ ሳ̈ራሬ ኣቲና ናኢ ዬላ̈ሬ” ዪዝ ጌይዝ ቃ̈ላ።
10ዪ̈ ሙታ̇ ጊዳካ̇ይዶን ኢርቢቃ ኑ ባ̈ባ̈ ዪሳ̈ቃ ጋልዳ ሜንቲ ናኣን ዎዳጻ̇ዴ። 11-12ጾ̈ሲ ኣስ ማራ̇ጺዛዲ ኣሳ ኦ̈ሳባር ጊዳካ̇ይዶን ጾ̈ሳ̇ዲ ፌ ኮዪኖንዲፌ̈ኒ ጼይጋዚን ኣሳብ ኤሪንታ̇ምፔ̈ን ናኣን ሜንታ̇ን ዬሊንታ̇ካ̇ይዶ̈ንኬ ኢ̈ት ባዚ ዎይ ኮሽ ባዝ ኦ̈ናፖ̇ ቲ̈ን፥ ጾ̈ሳ̇ዲ ኢርቢቂኮ “ኢሻ̈ዲ ጌ̈ዳ̈ቦ ኪ̈ቲንቲ̈ሬ” ጌይዴ። 13ዪ̈ዳሬ ጌ̈ሻ ማጻ̈ፋ ጋልዳ “ታ̈ኒ ዓይቆ̈ባ ካዴ፤ ኤ̈ሳ̇ ኢጻ̇ዴ” ጋ̈ሪ ጻ̈ፊንቲ̇ኖንዲፌ̈ኔ።
14ዪዚ ኑ ዎዛር ጋ̈ኔ? ጾ̈ሲ ኣስ ዎልፌ̈ን ቤቂ̇ባ̈ሴ ጋ̈ንዳብ ዳንዳኢ̈ራ? ጾ̈ሳ̇̇̈ ኣስ ዎልፌ̈ን ቤቂ̇ባ̈ሴ ጋ̈ንዳብ ዉርሲ ዳንዳኢባ̈ሴ። 15ጾ̈ሳ̇̇̈ዲ ሙ̈ሳኮ “ታ̈ኒ ማ̈ራንዳብ ኮዪኖ ማ̈ራ̈ሬ፤ ቴ ሚጪንታ̇ንዳብ ኮይኖ̈ቦ ሚጪንታ̇̈ሬ” ጌይኔ። 16ዪ̈ኮታ̇ቦ ጾ̈ሳ̇ ኣስ ማራ̇ጺዛዲ ኣሲ ኮዪኖዲፌ̈ንኬ ኣሳ ኦ̈ሳባር ጊዳካ̇ይዶን ጾ̈ሳ̇ ፌ ማ̈ሪቲባር ኣስ ማራ̇ጺ̈ሬ። 17ጌ̈ሻ ማጻፋ ጋልዳ ጊብጻ ካ̈ታ ፋ̈ሮ̈ናኮ “ታ̈ኒ ኔባራ ቴ ዎሊቂን ቤይሳንዳ̇ብኬ ቴ ሱምንዳ ኣላማ ጋልዳ ዎይ ኤሪንታ̇ምፔ̈ኒ ቴ ኔ̈ና ካዉቲሲኔ” ጌይዝ ቃ̈ላ ጻ̈ፊንቲ̇ኔ። 18ዪ̈ኮታ̇ቦ ጾ̈ሲ ፌ ኮዪኖ ኣስ ማ̈ሪ̈ሬ ማ ፌ ኮዪኖ ኣሳን ቡዲን ዛቢሲ̈ሬ።
ጾ̈ሳ̇ ጎይላ̈ዲኬ ጾ̈ሳ̇ ማ̈ሪቲ̈ዲክ
19ዪ̈ኮታ̇ቦ “ጾ̈ሲ̇ ፔቲ̇ ባዝ ኦ̈ንዳ ጌዬጌይን ‘ዪ̈ ማ̈ቂ̇ባ̈ሴ’ ጋ̈ሪ ኢያ ካዪዝ ኣሲ ባዬ̇፤ ዓት ዪ̈ዶኮ ኢ ዓኒ ማ̈ቃ̇ሪ ‘ኔ ዪኖ̇ ኣባብ ዪስታካ̇ይ ኣቲ̇ዬ?’ ጋ̈ሪ ኣባብ ኦይጪ̇̈ራ?” ጋ̈ራ ኔ ታ̈ና ኦይጫ̇ዝዳ። 20ኣን ና̈ሳ ዓ̈ዶ! ጾ̈ሳ̇̇ባር ዋጫንዳብ ኔ ኦ̈ኖ? ኦቲ ፌ̈ና ኮቺ̇ኖ ና̈ሳ̈ኮ “ኔ ኣባብ ዓኒ̈ፌን ዎታር ታ̈ና̈ ኮቺ̇?” ጋ̈ንዳብ ዳንዳኢ̈ራ? 21ኦት ኮቺ̇ዝ ናሳ̈ዲ̇ ፌ ቶቅሊንዶ ፌ ኮይኖ ባዝ፥ ዶካ̇ን ቦንች ባዛቦ ማ ዶ̈ካን ጊ̈ላ̇ ፋባ̈ሶ ኦ̈ሳቦ ማ̈ቃ̇ምፔ̈ኒ ማሃር ኦ̈ንዳብ ዳንዳኢባ̈ሳ?
22ጾ̈ሳ̇̈ ፌ ጎ̇ይላ ቤይሳንዳብኬ̇ ፌ ዎልቂ̈ን ኤርሳንዳብ ኮያሪ ያብኬ ጾ̈ሳ̇̇ ጎይላብ ጊ̈ጊንቲ̇ኖ ኣሳን ኢንታ̇ ዎይሊን ጋርዣር ዳንዳኢናካር ኔ ዎይዲ ኤራ̈ራ? 23ኢ ዪ̈ኖ̇ ዎቲ̇ኖ̈ንዳ ኢ ቲ̈ኒ̈ታር ፌ ቦንቺ̇ን ኢንታ̇ብ ኢማ̇ንዳቦ ጊ̈ጊሲኖ ማ̈ሪቲ ዲጛንዳብ ኮሺ̇ዝ ኣሳንቦ ፌ ቦንቺ̇ን ዎይሊንን ቤይሳንዳቦ። 24ኢ ኑ̈ና ማ̈ሪ̇ቲ̈ብ ኮቺ̇ኖ ኣሳን ኣይሁዳን ጋርታ̈ፖ̈ ሙታ̈ ጊዳካይዶን ኣይሁድ ባዮ̇ንር ጼይጊ̈ኔ።
25ጾ̈ሲ ናባ̈ ሆ̈ሳኢባር ማ̈ቃ̇ር ሶ̈ሊ̈ርዶሪ፤
“ታ̈ኒ ቴ ዎርዣ ጊዳካዮን ‘ቴ ዎርዣ’ ጌያ ጼይጋንዳ፤
ካንቲ̈ባሶ ዎርዣን ‘ካንቲ̈ኖን’ ጌያ ጼጋ̈ንዳ፤
26ኢንቲ ‘ቴ ዎርዣ ጊዳካ̇ዬ’ ጌይኖ ቤስ̇ ጋልዳ
‘ዓይቂ̇ባ̈ስ ሼምፓባር ዶኢዝ ጾ̈ሳ̇̇ ና̈ኣን’ ጌዪ ጼይጊንቲ̇̈ሬ” ጌይኔ።
27ናባ̈ ኢሳ̈ሲ ኢስሬ̈ላ ኣሳን ባዝ ሶ̈ሊ̈ርዶሪ ፌ ቆ̈ ሾክ̇ ዎታሪ
“ኢስሬ̈ላ ና̈ኣን ሜላ ኣቲ̈ን ባሃራ ጋርቶ ሻ̇ማ̈ፌ̈ን ዎይሊናካሬ፥
ኢንታ̈ ጋርታ̈ፖ ፋጺዛን ጊላ̇።
28ኣባ ጌዪን ጎዳ̈ዲ
ሳዛ ጋልዳ ዎ ኣሳ ዎይ ጋልዳ ኤሊር ውርሲ ፊርዲ̈ሬ” ጌይኔ።
29ዪ̈ዳሬ ናባ̈ ኢሳ̈ሲ ቲ̈ኒታር
“ዎይቦ ጎዳ̈ዲ ኑ̈ቦ ዜር ኣሻካ̇ይፌንኮ ዎን፤
ኑ̈ኒ ሶ̈ዳ̇ማ ካታሚንዲፌ̈ንኬ
ጋሞ̈ራ ካታሚንዲፌ̈ን ዪ̈ርዶ̈ን”
ጋ̈ሪ ሶ̈ሊኔ።
30ዪዚ ኑ ዎዛር ጋ̈ኔ? ጺ̈ሊ̇ቲ ኮያካ̇ዮ ኣይሁድ ዜር ባዮ̇ ኣሳን ኣማ̇ናባር ቤንታ̈̇ዝ ጺሊ̇ቲን ዲጚዴ። 31ዎቲናካሬ ጺላ̇ ማሃዝ ሂጊ̇ን ኮዪሙታ̇ ዎ ኢስሬ̈ላን ጺላ̇ ማ̈ቃ̇ንዳብ ዳንዳኣካ̇ዬ። 32“ኢንቲ̇ ኣባቦ ጺላ̇ ማ̈ቃ̇ንዳብ ዳንዳኣካ̇ይ ኣቴ̈?” ጌይን ኢንቲ̇ ጺሊ̇ቲ ዲጛንዳብ ኮዪኖንዳ ኣማ̇ናባር ጊዳካ̇ይዶን ኦ̈ሳባራ ማ̈ቂ̇ኖንኮታ̇ቦ ፊ ሹቺ̈ምባር ብንቲ̇ዴ። 33ዪና̇ሬ፥
“ቤቂ̇ብቴ! ኣስ ብዝ ሹች̇ ጺዮ̈ና ካታሚን ጋርታ ጋዳ̇ንዳ፤
ዪ ሹቻ̈ዲ ኣስ ብሪ ቶጚዝ ሹቼ̇፤
ዎቲናካር ኢያ ኣማ̇ኒዝ ኣሲ ዬ̈ልቂ̇ባ̈ሴ”
ጋ̈ሪ ጌ̈ሻ ማጻ̈ፋ ጋልዳ ጻ̈ፊንቲ̇ኖንዲፌ̈ኔ።
Tans Gekies:
ሮሜ 9: ኦጫ̈ቃማ
Kleurmerk
Deel
Kopieer

Wil jy jou kleurmerke oor al jou toestelle gestoor hê? Teken in of teken aan