ሮሜ 10
10
ኢስሬ̈ላ ኣሳን ጾ̈ሳ̇̇ ሂጊ̇ን ና̈ጋካ̇ይ ኣቲ̇ዴ
1ቴ ኢሺንታ̈ን! ቴ ቡ̈ዲን ጋርታ̇ ታ̈ብ ዎ ጴች̇ ኢኒ̇ንዲኬ ቴ ጾ̈ሳ̇ ዎ̈ሳ̈ዚንዳ ኢስሬ̈ላን ፋጻምፔ̈ኒዬ። 2ጾ̈ሳ̇̇̈ቦ ኦ̈ንዳቦ ጴች ኢና̇ ኢንታ̇ብ ዎን ቴ ቴ ቆሚ̇ን ኢንታ̇ብ ማርኪ̇ታ̈ሬ ዎቲናካሬ ኢንታ̇ ኢኒ̇ንዳ ኪንን ኤራሪ ጊዳካ̇ዬ። 3ጾ̈ሲ ኣስ ጺላ̇ ማሃዝ ጎይን ኢንቲ̇ ኤራካ̇ዮኮታ̈ቦ ፌ ኦ̈ሳባራ ጺላ̇ ማ̈ቂ̇̈ሬ ጌይዶ̇ኬ ጾ̈ሳ̇ ኣስ ጺላ̇ ማሃዝ ጎይን ኮያካ̇ዬ። 4ኣሲ ዎይ ኣማ̇ናባር ጺላ̇̇ምፔ̈ኒ ሂጋ̇ ኦ̈ሲንዳ ክርስቶ̈ሳባር ዉሪኔ።
ፋቲ ዎይ̈ቦ ማ̈ቂ̇ኔ
5ሂጋ̇ ና̈ጋር ዲጛዝ ጺሊቲን ጎይ ሙ̈ሶ ጻ̈ፊርዶሪ “ሂጊ̈ን ና̈ጊዝ ኣሲ ሼምፓባር ዶኢ̈ሬ” ጌይሬ። 6ኣማ̇ናባር ጺ̈ላ̇ ማ̈ቃ̇ዝ ጎይንኮን ጌ̈ሻ ማጻ̈ፋ ሶ̈ሊ̈ርዶሪ “ኔ ቡ̈ዳ ጋርታ ‘ፉዳ ኣፋ ኦ ኬስኪ̇̈ራ?’ ጋ̈ፔ፤ ዪ̈ዲ ክርስቶ̈ሲ ቢርት ኑ̈ብ ቶ̈ራ ሶ̈ቦ ጌንቴ̇። 7ዎይ “ኔ ቡ̈ዳባራ ‘ቶ̈ራ ዱ̈ፊ ጋርታ̇ ኦ ሶቢ̈ራ?’ ” ጋ̈ፔ። ዪዳ̇ሬ ክርስቶ̈ሳ ቢርት ዓይቃ ጋርታ̇ፖ ዲንዶ ጌንቴ̇።
8ዎቲናካሬ “ጾ̈ሳ̇ ቃ̈ላ ኔ ላ̈ፍ ዎ፤ ዪኒፓሬ ኣ̈ሪ ኔ ኖ̈ኒን ጋርታ̇ኬ ኔ ቡ̈ዲን ጋርታ̇ ዎ” ጋ̈ሪ ጻ̈ፊንቲ̇ኔ። ዪና̇ ቃ̈ሊንዳ ኑ ሳባ̇ካዝ ኣማ̇ና ቃ̈ሊንዶ።
9ዬሱ̈ሲ ጎድ ማ̈ቂ̇ኖን ኔ ኖ̈ኒንባር ማርኪቴጌዪንኬ ጾ̈ሲ̇ ኢያ ዓይቃ ጋርታ̇ፖ ዲንኖን ኔ ቡ̈ዲምባር ኣማ̇ኔጌዪን ፋጻ̈ሬ። 10ኣሲ ፌ ቡ̈ዳባር ኣማ̇ኔጌይን ጺሊ̇̈ሬ፤ ፌ ኖ̈ኒምባር ማርኪ̇ቴጌይን ፋጺ̈ሬ፤ 11ጌ̈ሻ̇ ማጻ̈ፋ ጋልዳ “ኢያ ኣማ̇ኒዝ ኣሲ ዎይ ዬልቂ̇ባ̈ሴ” ጋ̈ር ጻ̈ፊንቲ̇ኔ። 12ዪዚ ፔቲ̈ ጎዳ̈ዲ ዎይቦ ጎድ ማ̈ቂ̇ኖኮታ̇ቦ ኣይሁዳንብኬ ኣይሁድ ባዮ̇ ኣሳን ጊዳ̇ ኣባካር ፋጊቲ ባዬ̇፤ ኢያ ጼይጊዝ ኣሳንቦ ዎይ ኣንጃ ዎይሊሳር ኢሚ̇̈ሬ፤ 13“ጎዳ ሱምን ጼይጊዛ ዎይ ፋጺ̈ሬ” ጌይንቲ̇ኔ።
14ዎቲናካሬ ኢያ ኣማ̇ናካይዶ̈ሪ ዎዛ̈ርታ̇ር ኢያ ጼይጋንዳብ ዳንዳኢ̈ራ? ኢ ባዝ ሲስካካ̇ይዶሪ ዎዛርታ̇ር ኢያ ኣማ̇ኒ̈̇ራ? ታማ̈ሪሲዝ ኣሲ ባዪዶ̈ን ዎዛርታ̇ር ሲስካ̇ንዳብ ዳንዳ̇ኢራ? 15ታማ̈ርሲዝ ኣስ ኪታ̈ር ሚ̈ሻካይ ኣቴጌይን ዎዛርታ̈ር ኢንቲ̇ ቃ̈ሊን ታማ̈ርሳንዳብ ዳንዳኢራ? ዪና̇ሬ ጌ̈ሻ̇ ማ̈ጻ̈ፋ ጋልዳ “ኡፋይሳ̇ዝ ጾ̈ሳ̇ ቃ̈ሊ̈ን ኤሄይዝ ኣሳን ዬንቲ̇ንዳ ዎዛርፌ̈ን ኡፋይሳ̈ራ!” ጋ̈ሪ ጻ̈ፊንቲኖንዲፌ̈ኔ። 16ዎቲናካሬ ናባ̈ ኢሳ̈ሲ ጌይርዶሪ “ጎዳ̈ዶ! ኑ ሶ̈ሊኖ ቃ̈ሊን ኦ ኣማ̇ኔ?” ጋ̈ሪ ጻ̈ፊኖንዲፌ̈ኒ ዎይን ኡፋይሳ̇ዝ ጾ̈ሳ̇̈ ቃ̈ሊ̈ን ኣማ̇ናካ̇ይ ኣቲ̇ዴ። 17ዪ̈ኮታ̇ቦ ኣማ̇ኖ ቃ̈ሊን ሲስካ̇ዚን ጋርታ̇ፖ ቤንታ̇̈ሬ፤ ቃ̈ሊንዳ ክርስቶ̈ሳ ባዝ ሶ̈ላዚን ጋርታ̇ፖ ቤንታ̈̇ሬ። 18ቴ ዪንታ̇ ኦይጫ̇ስቶ፤ ዪዚ ኢንቲ̇ ቃ̈ሊን ሲስካ̇ካ̇ዬ ጋ̈ንዳብ ዳንዳኢ̈ራ? ጌ̈ሻ̇ ማጻ̈ፋ ጋልዳ፥
“ኢንታ ቆ̈̈ዲ ሳ̈ዝ ኤ̈ሻ̇ ዎይ ቤስ̇ ሲስኪንቲ̇ዴ፥
ኢንታ̈ ቃ̈ላ̈ዲ ሳ̈ዝ ቡጊዳፖ ቡጊድ ዬሊ̈ዴ”
ጋ̈ሪ ጻፊንቲኖንዲፌ̈ኒ ኢንቲ̇ ሲስኪ̇ኔ። 19ማ̈ ኢስሬ̈ላን ቃ̈ሊን ኤራካ̇ዬ ጋ̈ንዳ̇ብ ዳንዳኢ̈ራ? ዪ̈ፌን ጌይንታ̇ካፌ̈ን ሙ̈ሶ ቲ̈ኒታር ጌይርዶሪ፥
“ታ̈ኒ ሌቂንቲ̇ኖ ዎርዣባራ ቴ ዪንታ̇̈ ቃና̇ኢሳንዳ̇፤
ቆፊ̈ ባዮ ዎርዣ ማራ̇ጻራ ዪንታ̇ ዛልቂ̇ሳንዳ” ጌይኔ።
20ኢሳ̈ሳሬ፥
“ታ̈ና ኮያካ̇ዮ ኣሳንባር ቴ ቤንታ̇ዴ፤
‘ጾ̈ሲ ዎይዲ ዎ?’ ጋ̈ሪ
ታ̈ና ኦይጫካ̇ዮ ኣሳንቦ ቴ ታ̈ና ቤይሳዴ”
ጋ̈ሪ ኢ̈ጫካ̇ይ ሶ̈ሊኔ። 21ዎቲናካር ኢስሬ̈ላን ባዝ ኢ ሶ̈ሊ̈ርዶሪ፥
“ኪ̈ቲንቲ̇ባ̈ሶዳኬ ዉጪቲ̈ዝ ዎርዣን ታ̈ክ ዬምፔ̈ን
ጋላሲ̇ን ዎይ ኢንታ ና̈ጋዴ” ጌይሬ።
Tans Gekies:
ሮሜ 10: ኦጫ̈ቃማ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
