ሮሜ 8

ጌ̈ሻ ኣያ̇ና ኮይዛዲፌ̈ን ዶኢ

1ዪ̈ኮታ̇ቦ ዬሱ̈ስ ክርስቶ̈ሳ ኣማ̇ኒኖ ኣሳን ዓት ጾ̈ሳ̇ ፊርዳ ኢንታ ጋልዳ ባዬ̇። 2ዬሱ̈ስ ክርስቶ̈ሳ ጎይባራ ቤንቲ̇ዝ ሼምፓ ኢሚ̇ዛ ጌ̈ሻ̇ ኣያ̇ና ሂጋ̇̈ዲ ናጋራ ጋልዳፔኬ ዓይቃ ሂጋ̇ ጋልዳፖ̇ ታ̈ና ናጻ ኬሲ̇ኔ። 3ኣሲ ሂጊ̇ን ና̈ጊ ፎታ̇ንዳቦ ዎልቃ ባ̇ዮኮታ̇ቦ፥ ሂጊ̇ንዳ ኦ̈ ፎታንዳ̇ብ ዳንዳኣካ̇ዮ ባዚንዶ ጾ̈ሲ ኦ̈ኔ፤ ኢ ፌ ናኣ̈ ጌ̈ታ ናጋራንቻ̇ ኣስፌ̈ን ማይጺሳሪ ኣሳ ናጋራ ጊሻ̈ብ ኪ̈ቲ̇ ሚሺን ኢ ኣሳ ጋርታ ዎ ናጋራ ጋልዳ ፊርዲ̇ዴ። 4ዪኖ̈ ኢ ዎቲኖንዳ ናጋራንቻ̇ ኣሲቲ ኮዪኖንዲፌ̈ን ጊዳካ̇ይዶ̈ን ጌ̈ሻ ኣያ̇ና ኮዪኖንዲፌ̈ን ዶኢዛን ኑባራ ኪን ሂጋ̇ ኪታ̇ ፎቲ̇ንታ̇ምፔ̈ኔ።

5ፌ ኮዪኖንዲፌ̈ን ዶኢዛን ፌ ኮዪኖ ባዝ ቆፒ̇̈ሬ፤ ጌ̈ሻ̇ ኣያ̇ና ኮያዚንዲፌ̈ን ዶኢዛን ኣያ̇ና ባዝ ቆፒ̇̈ሬ። 6ኔ ኣሲቲን ኔ̈ክ ጋ̈ዝ ባዚምቦ ሙታ̇ ቆፓ̇ዚንዳ ኔ̈ክ ዓይቃ ኤካ̇ ዬ̈ሬ፤ ጌ̈ሻ̇ ኣያ̇ና ባዝ ቆፓ̇ዚንዳ ሼምፓኬ ሳሪቲ ኢማ̈̇ሬ። 7ኢ ኣሲቲን ኢ̈ክ ጋ̈ዝ ባዚምቦ ሙታ̇ ቆፒ̇ዝ ኣሲ ጾ̈ሳ̇ ሂጋ̇ቦ ኪ̈ቲ̇ንቲባሶኮታ̇ብኬ ኪ̈ቲ̇ንታንዳቦ ዳንዳኢባ̈ሶኮታ̇ቦ ኢ ጾ̈ሳ̇̇̈ቦ ጻላታ። 8ኢንታ ኣሲቲን ኢንታ̇ክ ጋ̈ዝ ባዚምቦ ኪቲ̇ንቲዝ ኣሳን ጾ̈ሳ̇ ኡፋይሳ̇ንዳብ ዳንዳኢባ̈ሴ።

9ዎቲናካሬ ዪንቲ̇ ጾ̈ሳ̇ ኣያ̇ና ዪንታ̇ ጋርታ ዎኮታ̇ቦ ጾ̈ሳ̇̇ ኣያ̇ና ኮያዚንዲፌ̈ንዶኬ ዪንታ̇ ኣሲቲ̇ን ኮያዚንዲፌ̈ን ዶኢባ̈ሴ። ክርስቶ̈ሳ ኣያ̇ና ኢ̈ብ ባዮ̇ ኣሲ ኢ ክርስቶ̈ሳይ ጊዳካ̇ዬ። 10ክርስቶ̈ሲ ዪንታ̇ ጋርታ̇ ዎኮ ዪንታ̇ ኣሲቲንዳ ናጋራ ጊሽ̇ ዓይቂ̇ዝ ባዝ ማ̈ቂ̇ናካሬ፥ ጾ̈ሲ ዪንታ̇ ጺላ̇ ማሂኖኮታ̇ቦ ዪንታ̇ ኣያ̇ና̈ዲ ፋ ዎ። 11ዬሱ̈ሳ ዓይቃ ጋርታፖ ዲንኖ ጾ̈ሳ̇ ኣያ̇ና ዪንታ̇ ጋርታ ዎኮ፥ ዬሱ̈ስ ክርስቶ̈ሳ ዓይቃ ጋርታፖ ዲንኖ ጾ̈ሳ̇ዲ ዪንታ̇ ጋርታ ዶኢዝ ፌ ኣያ̇ና ጎይባራ ዓይቃ̇ዝ ዪንታ̇ ኣሲቲምቦ ሼምፓ ኢሚ̇̈ሬ።

12ዪ̈ኮታ̇ቦ ቴ ኢሺንታን! ኑ̈ብ ኣጫ ዎ፤ ኑ̈ብ ዎ ኣጪንዳ ኑ̈ኒ ኑ ናጋራንቻ ኣሲቲን ጋ̈ዚንዲፌ̈ን ዶኣንዳ̇ቦ ጊዳካ̇ዬ። 13ዪንታ̇ ናጋራንቻ ኣሲቲን ጋ̈ዚንዲፌ̈ን ዶኤጌይን ዪንቲ̇ ዓይቂ̇̈ሬ፤ ጌ̈ሻ̇ ኣያ̇ና ዎልቃባራ ዪንታ̇ ኣሲቲ ኦ̈ሲ̇ን ዎጌይን ዪንቲ̇ ሼምፓባር ዶኢ̈ሬ። 14ጾ̈ሳ̇ ኣያ̇ናባር ቲ̈ኒንቲ̇ዛን ዎይ ጾ̈ሳ̇ ናኤ። 15ዪንቲ̇ “ኣባ̈ቦ̇! ኑ ባ̈ባ̈ዶ!” ጋ̈ሪ ጼ̈ይጋንዳ̇ብ ኢ̈ብ ናኢ ማ̈ሂዝ ኣያ̇ና ኤኪ̇ዶ̇ኬ፥ ኢ̈ች̇ባር ዶኣንዳ̇ቦ ዪንታ̇ ኣይላ ማሂዝ ኣያ̇ና ኤካካ̇ዬ። 16ጾ̈ሳ̇ ኣያ̇ና̈ዲ ኑ ኣያ̇ናባር ዎልኣ ማ̈ቃ̇ሪ ኑ̈ኒ ጾ̈ሳ̇ ናኢ ማ̈ቂ̇ኖን ኑ̈ብ ማርኪ̇ቲ̈ሬ። 17ዪዚ ኑ̈ኒ ጾ̈ሳ̇ ናኢ ማ̈ቄ̇ጌዪን ጾ̈ሳ̇̇̈ቦ ዎን ኑ̈ናር ኤኪ̈ሬ፤ ክርስቶ̈ሳባር ዎልኣ ኤኪ̇ሬ፤ ዓት ኑ̈ኒ ክርስቶ̈ሲ ኤኪ̇ዝ ሜቲን ኤኪ̇ዛን ማ̈ቄጌይን ዎሃ ኢ ቦንቺ̇ንዳር ኤኪ̇ዛን ማ̈ቂ̇̈ሬ።

18ኑ ዓት ኤኪ̇ዝ ሜታ̇ን ጊዳክ ኑ ዲጛዝ ቦንቺ̇ምባር ካሚሳምባራ ኣባካር ጌዪን ዎልኣ ዬላ̇ንዳብ ዳንዳኢባ̈ሴ ጌያ ፋይዳ̈ሬ። 19ጾ̈ሲ ኮቺ̇ኖ ባዚ ዎይ ጾ̈ሳ̇̇ ናኣን ኬስካ̇ር ቤንታ̇ዝ ጋላሲ̇ን ጴች ሹ̈ናባር ና̈ጊ̈ሬ። 20ጾ̈ሲ ኮቺ̇ኖ ባዚ ዎይ ሜላ̇ ፋባ̈ሶ ባዝ ማ̈ቃ̇ር ኣታ̇ምፔ̈ኒ ጾ̈ሳ̇ዲ ፊርዲ̇ኔ፤ ዪ̈ዳሬ፥ ኮቺንቲ̇ ዎይ ሜላ̇ ፋባ̈ሶ ባዝ ማ̈ቃ̇ር ኣቲ̇ኖ̈ዲ ኢንቲ̇ ታስፋባር ናጋምፔ̈ን ኢንታ̇ ዎቲኖ ጾ̈ሳ̇̇̈ ቆፊባርዶኬ ፌ̈ብ ኮያር ጊዳካ̇ዬ። 21ዪና̇ ጾ̈ሳ̇̇ ኢሚ̇ኖ ታስፊንዳ ኢ ኮቺ̇ኖ ኮቺ̇ንቲ ዓይቂ̇ ዎ̈ቃ̇ር ኣታ̇ዚን ጋርታ̇ፖ̇ ናጻ ኬስካ̇ሪ ጾ̈ሳ̇ ናኣንባራ ዎልኣ ቦንች ኤካ̇ምፔ̈ኔ።

22ኮቺ̇ንቲ ዎይ ዓኖ̇ ዬላ̇ር ማጮ̇ ዬላብ ጋርስ ቂንቲዛ̈ዲፌ̈ን ማ̈ቃ̇ሪ ኢንጺጽ ጋልዳ ዎን ኑ ኤሪ̈ሬ። 23ኢንጺጺሙታ̇ ዎን ጾ̈ሲ ኮቺ̇ኖ ኮቺንታ̇ን ሙታ̇ ጊዳካ̇ይዶን ዎይ ባዛፖ̇ ቲ̈ን ኢሚ̇ንቲ̇ዝ ኪልሳ፥ ጌ̈ሻ̇ ኣያ̇ና፥ ኤኪ̇ኖን ኑ̈ናሬ ጾ̈ሳ̇̇̈ብ ናኢ ማ̈ቃ̇ዚንዲኬ ኢ ኑ̈ና ናጻ ኬሳ̇ዚን ታስፋባር ና̈ጊሙታ̇ ኢንጺጽ ጋልዳ ዎ። 24ኑ̈ኒ ፋጺኖንዳ ዪና̇ ታስፊንባራ። ዎቲናካሬ ኑ ታስፋ ጋዲ̇ኖንዳ ኣ̈ፍባር ቤንቲ̇ዝ ባዝ ጋልዳ ማ̈ቄ̇ጌዪን ኢዛ ታስፋ ማ̈ቃ̇ዚን ኣታ̇̈ሬ። ኣባ ጌይን ኣ̈ፍባር ቤንቲ̇ዝ ባዝ ኦ̈ናካር ታስፋባር ና̈ጊባ̈ሴ። 25ኑ̈ብ ኣፍባር ቤንታ̇ንዳብ ዳንዳኢባ̈ሶ ባዝ ጋልዳ ታስፋ ጋዴ̇ጌይንዶ ኑ ኢዞ ጋርዣር ናጊ̈ሬ።

26ዪና̇ ኢዝፌ̈ኒ ኑ̈ኒ ዎዛርፌ̈ን ዎ̈ሳ̇ንዳብ ኮሺ̇̈ርኮ ኤሪባ̈ሶኮታ̇ቦ ጌ̈ሻ̇ ኣያ̇ና̈ዲ ኑ ዳቡርሲ̇ን ጋርታ̇ ኑ̈ና ማዲ̇̈ሬ። ኣሳብ ዓኖ̇ ጋ̈ር ሶ̈ላንዳ̇ብ ዳንዳኢባ̈ሶ ጎይባራ ኑ̈ብ ጌሺ̈ሬ። 27ጌ̈ሻ̇ ኣያ̇ና̈ዲ ኣማ̇ኒኖ ኣሳ ጊሽ ጾ̈ሳ̇̇ ቆፊንዲፌ̈ኒ ጌ̈ሺ̇ዛኮታ̇ቦ ኣሳ ቡ̈ዳ ቤቂ̇ዝ ጾ̈ሳ̇̇̈ዲ ጌ̈ሻ̇ ኣያ̇ና ቆፊን ኣብዝኮ ኤሪ̈ሬ።

ጾ̈ሳ̇̈̇ ካንን ጋልዳፖ ኑ̈ና ፋጊዝ ባዚ ባዬ

28ጾ̈ሳ̇̇̈ ካዛንብኬ ኢ ቆፊንዲፌ̈ን ጼይጊንቲ̇ኖ ኣሳንቦ ጾ̈ሳ̇̇̈ዲ ዎይ ባዝ ኢንታ̇ብ ኮሻ̇ብ ኦ̈ዚን ኑ ኤሪ̈ሬ። 29ኣባ ጌይን ጾ̈ሲ ቲ̈ን ኢንታ̇ ኤሪኖ ኣሳን ጾ̈ሳ̇ ናኣ ማይጻምፔ̈ንኬ ናኣ̈ዳሬ ዎይሊን ኢሺንታን ጋርታፖ̇ ኡስ̇ ማ̈ቃ̇ምፔ̈ን ጾ̈ሲ ቲ̈ኒታር ዎሳ̇ኒኔ። 30ኢ ቲ̈ኒታር ዎሳ̇ኒኖን ጼይጊዴ፤ ጼጊኖን ጺላ̇ ማሂዴ፤ ጺላ̇ ማሂኖን ቦንቺ̇ዴ።

31ዪዚ ባዝ ዓኒኮታ̇ ኑ ኣብዝ ጋ̈ኔ? ጾ̈ሲ ኑባር ማ̈ቄ̇ጌዪን ኦ ኑ̈ና ጋማንዳ ዳንዳኢ̈ራ? 32ጾ̈ሲ ፌ ናኣ ፔታ̇ና ኢ̈ብ ሚጪንታ̇ካይዶር ኑ ዎይንኮታ̇ቦ ኢያ ኣ̈ ኢሚ̇ኖ̈ዲ ሜላ ባዝ ዎይ ዎዛርፌ̈ን ሜላ̇ ኑ̈ብ ኢሚ̇ባ̈ሳ? 33ጾ̈ሲ ማራ̇ጺኖን ኦ̈ ኢንታ̇ ሞ̈ታንዳብ ዳንዳኢ̈ራ? ኢንታ̇ ጺላ̇ ማሂዛ̈ዲ ጾ̈ሳ̇̇ ኢያ። 34ኢንታ̇ ጋልዳ ፊርዲ̇ዛ ኦ̈ኖ? ኑ ጊሻ̇ብ ዓይቂ̇ኖዲ፣ ዓይቃ ጋርታ̇ፖ̇ ዲንዲኖ̈ዲ፣ ጾ̈ሳ̇ ባ̈ባ̈ቦ ኡሻች ጎይ ዶኢኖ̈ዲ ኢ ኑ ጊሻ̇ብ ጪጛሽ ማ̈ቃ̇ር ጌሺ̈ሬ። 35ክርስቶ̈ሲ ኑ̈ና ካዚን ጋልዳፖ̇ ኦ ኑ̈ና ፋጋንዳብ ዳንዳኢ̈ራ? ሜ̈ታቤ ዎይ ዋ̈ያ? ዳስ̇ቤ ዎይ ጋፋ? ዎይ ካሊቲቤ? ቆፓ̇ካ̇ይ ዬሊ̇ዝ ኢ̈ታ ሜታቤ ዎይ ማሻ̇ባር ዓይቃ? 36ዪ̈ዳሬ፥

“ኑ̈ኒ ኔ ጊሻ̇ቦ ጋ̈ሪ ዎይ ጋላስ ዓይቃብ ዬልዝ ባዚ ኑ̈ና ዬሊ̈̇ሬ፤

ኑ̈ኒ ሹ̈ካ̇ንዳብ ኤጚዝ ዶሪፌ̈ን ፋይዲንቲ̇ኔ”

ጋ̈ሪ ጻ̈ፊንቲ̇ኖንዲፌ̈ኒዬ። 37ዪዚ ኑ̈ኒ ኑ̈ና ካኖ ክርስቶ̈ሳባራ ባዛን ዪን ዎይ ጋማሪ ጋሚ̇ዝ ኣሳንፖ̇ ሺ̈ሬ። 38ዪ̈ኮታ̇ቦ ዓይቃር ማ̈ቆ̇፣ ሼምፓባር ዶኣዚንዳር ማ̈ቆ̇፣ ኣፎ ኪ̈ታንቻ̇ንር ማ̈ቆ̇፣ ኢ̈ታ ኣያ̇ናንር ማ̈ቆ̇፣ ዓት ዎዳር ማ̈ቆ̇፣ ቢርት ጊዳክ ዬይዛ̈ዳር ማ̈ቆ̇፣ ዎልቃባሮ ባዛንር ማ̈ቆ̇፣ 39ኣፋ ሾክ ጌይኖ ቤሳ̇ር ማ̈ቂ̇ን፣ ሳ̈ዳ̇ ሳ̈ዝ ጻናር ማ̈ቂ̇ን፣ ጾ̈ሲ̇ ኮቺ̇ኖ ባዝ ዎይዳር ማ̈ቂ̇ን ኑ ኑ ጎዳ ዬሱ̈ስ ክርስቶ̈ሳባር ዲጚኖ ጾ̈ሳ̇ ካንን ጋልዳፖ̇ ኑ̈ና ፋጋንዳብ ዳንዳ̇ኢዝ ባዚ ኣባካር ባዮ̇ን ታ̈ኒ ኮሺንቻ̇ ኤሪኔ።

Tans Gekies:

ሮሜ 8: ኦጫ̈ቃማ

Kleurmerk

Deel

Kopieer