མེ་ཐིའུ་ལེའུ་ 22

གཉེན་གྱི་ཚོགས་སྟོན་གྱི་དཔེ་གཏམ།

1ཡེ་ཤུ་གིས་ད་རུང་ཁོང་ལུ་དཔེ་གཏམ་གྱི་ཐོག་ལས་ཨ་ནི་བཟུམ་སྦེ་གསུངས་ཏེ། 2ཞིང་ཁམས་ཀྱི་རྒྱལ་སྲིད་དེ་ རྒྱལཔོ་གཅིག་གིས་ ཁོ་རང་གི་བུ་གི་གཉེན་གྱི་ ཚོགས་སྟོན་གྱི་བཅའ་སྒྲིག་རྐྱབ་མི་དང་འདྲ།

3རྒྱལཔོ་གིས་ཁོ་རང་གི་གཡོགཔོ་ཚུ་ལུ་ ཧེ་མ་བརྡ་སླབ་མིའི་མགྱོནམ་དེ་ཚུ་ལུ་འབོ་པ་བཏང་ནུག་ དེ་འབདཝ་ད་ ཁོང་གིས་འོང་མ་བཏུབ་པས། 4ཁོ་གིས་ད་རུང་གཡོགཔོ་གཞན་ཚུ་ལུ་ ཁོང་ཧེ་མ་བརྡ་སླབ་མི་མགྱོནམ་ཚུ་ལུ་ གླང་དང་བོའུ་ཅུང་རྒྱགས་ཏོ་རིལ་རི་དེ་ཚུ་བསད་དེ་ ཚོགས་སྟོན་བཞེས་སྒོ་ག་ར་གྲ་སྒྲིག་བརྐྱབས་ཚར་ཡི་ གཉེན་གྱི་ཚོགས་སྟོན་ན་ཤོག་ཟེར་སླབ་སོང་ཟེར་གཏང་ནུག 5དེ་འབདཝ་ད་ མགྱོནམ་ཆ་ཁྱབ་ཀྱིས་ རྣ་བ་ར་མ་ཉན་པར་ རང་རང་སོ་སོ་གི་ལཱ་གཡོག་ནང་ཡར་སོང་ནུག་ གཅིག་གིས་ ཁོ་རང་གི་ཞིང་ལཱ་འབད་བ་ཡར་སོང་ནུག་ གཅིག་གིས་ ཁོ་རང་གི་ཚོང་ལཱ་འབད་བ་ཡར་སོང་ནུག 6ལ་ལུ་གིས་ བརྡ་སླབ་མི་གཡོགཔོ་ཚུ་ལུ་བཟུང་སྟེ་ ངོ་ཚ་སི་སི་བཟོ་སྦེ་ཁོང་ལུ་བསད་ནུག

7དེ་གིས་རྒྱལཔོ་གནམ་མེད་ས་མེད་དགོངསམ་ཁྲེལ་ཏེ་ ཁོ་རང་གི་དམག་མི་དེ་ཚུ་བཏང་སྟེ་ དམར་བསད་འབད་མི་དེ་ཚུ་བསདཔ་མ་ཚད་ ཁོང་གི་ཁྲོམ་ཡང་མེ་སྤར་ཏེ་རྩ་མེད་བཏང་ནུག 8དེ་གི་ཤུལ་ལས་ད་རུང་རྒྱལཔོ་གིས་གཡོགཔོ་ཚུ་ལུ་ གཉེན་གྱི་ཚོགས་སྟོན་དེ་གྲ་སྒྲིག་བརྐྱབས་ཚར་ཡི་ དེ་འབདཝ་ད་ ང་གིས་ཧེ་མ་འབོ་མིའི་མགྱོནམ་དེ་ཚུ་ ངེ་གི་གཉེན་གྱི་ཚོགས་སྟོན་ལུ་ འོང་ནི་གི་འོས་འབབ་མིན་འདུག 9དེ་འབདཝ་ལས་ ཁྱེད་ཀྱིས་གཞུང་ལམ་ནང་སོང་ཞིནམ་ད་ མི་ག་མཐོང་རུང་ དེ་ཚུ་ལུ་གཉེན་གྱི་ཚོགས་སྟོན་ནང་འབོ་སྟེ་ འཁྱིད་ཤོག་ཟེར་བཀའ་གནང་ནུག 10དེ་བཟུམ་སྦེ་རང་གཡོགཔོ་ཚུ་གིས་ལམ་ཁར་སོང་སྟེ་ ཁོང་གིས་མི་མཐོང་རེ་མཐོང་ཚད་ ལེགས་ཤོམ་དང་ཟོགཔོ་གཉིས་ཆ་རང་འབོ་འཁྱིད་འོངས་ཏེ་ ཁོང་གི་ཚོགས་སྟོན་གྱི་མགྲོན་ཁང་ལྟེམ་ལྟེ་སྦེ་གང་ནུག

11དེ་ལས་རྒྱལཔོ་མགྲོན་ཁང་ནང་མགྱོནམ་ཚུ་ལུ་གཟིགས་པ་འབྱོནམ་ད་ གཉེན་གྱི་ཚོགས་སྟོན་གྱི་བཟང་བགོ་མ་གྱོན་མི་མགྱོནམ་གཅིག་ལུ་གཟིགས་ཏེ། 12རྒྱལཔོ་གིས་མི་དེ་ལུ་ དབའེ་ ལྟོ་ཚང་ཁྱོད་ཀྱིས་གཉེན་གྱི་ཚོགས་སྟོན་ནང་ བཟང་བགོ་མ་གྱོན་པར་ག་དེ་སྦེ་འོངམ་སྨོ་ཟེར་གསུངསམ་ད་ མི་དེ་གིས་ལན་ག་ནི་ཡང་ཞུ་མ་ཚུགས་པས།#༢༢:༡༢། ཡ་ཧུ་ད་པའི་ལུགས་སྲོལ་ལུ་ གཉེན་གྱི་ཚོགས་སྟོན་ནང་ བཟང་བགོ་མ་གྱོན་པར་འགྱོ་མ་བཏུབ་ཨིན་མས། 13དེ་ལས་རྒྱལཔོ་གིས་ཁོ་གི་ཕྱག་ཞུ་མི་ཚུ་ལུ་ ཁོ་གི་ལགཔ་དང་རྐངམ་བཅིངས་ཏེ་ ཕྱི་ཁར་གནག་དུང་དུ་ནང་བཀོག་ དེ་ལས་ཁོ་ དེ་ཁར་ལུ་སྔུ་སྟེ་སོ་བརྡར་སྡོད་འོང་ཟེར་གསུངས་ནུག 14མདོར་བསྡུས་ཏེ་སླབ་པ་ཅིན་ མི་ལེ་ཤ་ལུ་འབོ་རུང་ བཙག་འཐུ་མི་དེ་ ཨ་ཙི་གཅིག་རང་ཨིན་ཟེར་གསུངས་ནུག།

རྒྱལཔོ་ ཀེ་སཱར་ལུ་ཁྲལ་སྤྲོད་དགོ་པའི་སྐོར།

15དེ་ལས་ ཕ་རུ་ཤི་པ་ཚུ་འདི་ནང་ལས་ཐོན་སྦེ་གཅིག་ཁར་འཛོམས་ཏེ་ ཡེ་ཤུ་གིས་གསུངས་མིའི་བློ་ནང་ལས་ག་དེ་སྦེ་སྐྱོན་བཏག་ཚུགས་ག་ཟེར་ ཁོང་རང་ནང་འཁོད་ལུ་བསྟུན་གྲོས་བརྐྱབས་ཏེ། 16ཁོང་གིས་ཁོང་རང་གི་སློབ་མ་ཚུ་དང་ ཧེ་རཱོད་ཀྱི་མི་ཚུ་ ཡེ་ཤུ་བཞུགས་སར་བཏང་སྟེ་ ཁོང་གིས་ཡེ་ཤུ་ལུ་ སློབ་དཔོན་ལགས་ ནཱ་མི་ཕྲངམ་དང་ དཀོན་མཆོག་གི་ལམ་གྱི་སྐོར་ལས་ ཕྲང་སྟེ་ཆོས་སྟོན་གནངམ་ཨིནམ་ ང་བཅས་ཀྱིས་ཤེས་ ནཱ་གིས་མི་ཚུ་གིས་ག་ཅི་སླབ་འོང་ག་ཟེར་ཐུགས་ལུ་ཚ་གྱང་མི་ལང་ ག་ཅི་སྨོ་ཟེར་བ་ཅིན་ ནཱ་མིའི་ངོ་སོ་ལུ་མི་གཟིགས། 17ད་ནཱ་གིས་འབད་བ་ཅིན་ རྒྱལཔོ་ ཀེ་སཱར་ལུ་ཁྲལ་སྤྲོད་དགོཔ་འདི་ ཀྲིག་ཀྲི་ཨིན་ན་མེན་ན་ ང་བཅས་ལུ་གསུངས་གནང་ཟེར་ཞུཝ་ད།

18ཡེ་ཤུ་གིས་ཁོང་གིས་མནོ་བསམ་ངན་པ་བཏང་མི་འདི་མཁྱེན་ཏེ་ཁོང་ལུ་ ཨ་ཁའི་ ཁྱེད་ཁ་ཆོས་འབད་མི་ཚུ་ ང་ལུ་ག་ཅི་འབད་ཚོད་བལྟཝ་སྨོ། 19ཁྲལ་སྦེ་སྤྲོད་མིའི་ཏི་རུ་དེ་ ང་ལུ་སྟོན་ཞིག་ཟེར་གསུངསམ་ད་ ཁོང་གིས་ ཏི་རུ་ དེ་ན་རི་གཅིག་ཁོ་ལུ་ཕུལཝ་ད། 20དེ་གུ་ཡོད་མི་སྐུ་པར་དང་མཚན་འདི་ ག་གི་སྨོ་ཟེར་གསུངས་ནུག 21ཁོང་གིས་དེ་ རྒྱལཔོ་ ཀེ་སཱར་གྱི་ཨིན་མས་ཟེར་ཞུཝ་ད་ ཡེ་ཤུ་གིས་རྒྱལཔོ་ ཀེ་སཱར་ལུ་ཕུལ་དགོ་མི་འདི་ རྒྱལཔོ་ལུ་རང་ཕུལ་ དེ་ལས་དཀོན་མཆོག་ལུ་ཕུལ་དགོ་མི་འདི་ དཀོན་མཆོག་ལུ་རང་ཕུལ་ཟེར་གསུངས་ནུག 22ལོ་རྒྱུས་འདི་གོཝ་ད་ ཁོང་གནམ་མེད་ས་མེད་ཧ་ལས་ཏེ་ ཁོ་ལུ་བཞག་སྦེ་ཡར་སོང་ནུག།

ཤི་ས་ལས་གསོན་པོ་སྦེ་ལོང་ནིའི་དུས་ཀྱི་སྐོར།

23ཉིནམ་དེ་ལུ་རང་ ས་དུ་ཀི་པ་ཟེར་མི་ཆོས་ལུགས་ཀྱི་ མཐའན་མཇུག་ལུ་ག་ར་ཤི་ས་ལས་གསོན་པོ་སྦེ་ལོང་ནི་མེད་ཟེར་སླབ་མི་ཚུ་གིས་ ཡེ་ཤུ་གི་སྐུ་མདུན་ལུ་བཅར་ཏེ་ཞུ་ནུག 24ཁོང་གིས་ཡེ་ཤུ་ལུ་ སློབ་དཔོན་ལགས་ མོ་སཱེས་ཀྱི་བཀའ་ཁྲིམས་ནང་ལུ་མི་གཅིག་བུ་གཞི་མེད་པར་ཤི་སོང་པ་ཅིན་ ཁོ་གི་སྤུན་ཆ་གཅིག་གིས་ཨམ་སྲུ་དེ་ལུ་གཉེན་བརྐྱབས་ཏེ་ སྤུན་ཆ་ཤི་མི་དེ་གི་དོན་ལུ་བུ་གཞི་སྐྱེ་བཅུག་དགོ་ཟེརཝ་ཨིན་མས། 25ག་དེམ་ཅིག་སྦེ་ང་བཅས་ཀྱི་སྦུག་ལུ་ སྤུན་ཆ་བདུན་ཡོད་ས་ལས་ ཕོ་རྒནམ་སྦོམ་ཤོས་དེ་གཉེན་བརྐྱབས་ཏེ་ ཨ་ལོ་མེད་པར་ཤི་བ་ཅིན་ ཁོ་གི་ཨམ་སྲུ་དེ་ལུ་ ནུ་གཅུང་གཉིས་པ་དེ་གིས་གཉེན་བརྐྱབ་འོང་། 26ཕོ་རྒནམ་སྦོམ་ཤོས་འདི་བཟུམ་སྦེ་རང་ ནུ་གཅུང་གཉིས་པ་ཤི་སྟེ་ གསུམ་པ་འདི་བཟུམ་སྦེ་རང་ རིམ་པ་བཞིན་དུ་སྤུན་ཆ་བདུན་ག་ར་ བུ་གཞི་མེད་པར་ཤི་སོངམ་མ་ཚད། 27མཐའན་མཇུག་ལུ་ཨམ་སྲུ་མོ་རང་ཡང་ཤི་སོང་པ་ཅིན། 28ཨམ་སྲུ་དེ་ སྤུན་ཆ་བདུན་ག་ར་གི་ཨམ་སྲུ་འབད་ནི་དེ་གིས་ ཁོང་ག་ར་ མཐའན་མཇུག་ལུ་ཤི་ས་ལས་གསོན་པོ་སྦེ་ལོང་པའི་དུས་ལུ་ མོ་ག་གིས་ཨམ་སྲུ་འབད་ནི་སྨོ་ཟེར་དྲི་བ་ཞུ་ནུག

29དེའི་ལན་ལུ་ཡེ་ཤུ་གིས་ ཁྱེད་ལུ་འཛོལ་བ་འདུག་ ག་ཅི་སྨོ་ཟེར་བ་ཅིན་ ཁྱེད་ཀྱིས་གསུང་རབ་མ་ཤེསཔ་མ་ཚད་ དཀོན་མཆོག་གི་དབང་ཤུགས་དེ་ལུ་ཡང་མི་ཤེས་པས། 30མཐའན་མཇུག་ལུ་ཤི་ས་ལས་གསོན་པོ་སྦེ་ལོང་པའི་དུས་ལུ་ གཉེན་བརྐྱབ་ནི་དང་མནའ་མ་གཏང་ལེན་འབད་ནི་མེད་ ཁོང་ཞིང་ཁམས་ཀྱི་ཕོ་ཉ་བཟུམ་སྦེ་འགྱུར་འོང་། 31དེ་འབདཝ་ད་ ཤི་ས་ལས་གསོན་པོ་སྦེ་ལོང་པའི་དུས་ཀྱི་སྐོར་ལས་ དཀོན་མཆོག་གིས་གསུང་རབ་ནང་ ཁྱེད་ཀྱི་དོན་ལུ་གསུངས་བཞག་མི་དེ་ ཁྱེད་ཀྱིས་མ་ལྷག་ག། 32ང་བཅས་ཀྱི་ཕ་བརྒྱུད་ཚུ་གྱོངས་ཚར་ཏེ་ གསུང་རབ་ནང་།

ང་ ཨབ་ར་ཧམ་དང་ ཨི་སག་ དེ་ལས་ ཡ་ཀོབ་ཀྱི་དཀོན་མཆོག་ཨིན་ཟེར་#༢༢:༣༢། ཨེཀས་སོ་དཱས་ ༣:༦།

གསུངས་མི་དེ་ ཁོ་ཤི་སོང་མི་ཚུ་གི་དཀོན་མཆོག་མེན་པར་ གསོན་པོ་ཡོད་མི་ཚུ་གི་དཀོན་མཆོག་ཨིན་ཟེར་གསུངས་ནུག#༢༢:༣༢། གསོན་པོ་ཡོད་མི་ཚུ་གི་དཀོན་མཆོག་ཨིན་ཟེར་སླབ་མིའི་དོན་དག་འདི་ ད་ལྟོ་ང་བཅས་གསོན་པོ་སྦེ་སྡོད་མི་ཚུ་གི་སྐོར་ལས་ཨིནམ་མ་ཚད་ ཁོང་ཤི་ཚར་ཏེ་ ཤུལ་ལས་ཤི་ས་ལས་ལྷོང་སྟེ་ གསོན་པོ་སྦེ་ལོང་པའི་དུས་ཀྱི་སྐོར་ལས་ཡང་སླབ་ཨིན་ཟེར་ཞུ་ནི་ཨིན། 33མི་དམངས་ཀྱིས་དེ་གོཝ་ད་ ཁོ་གིས་སྟོན་མིའི་ཆོས་ལུ་བལྟ་སྟེ་ ཁོང་གནམ་མེད་ས་མེད་ཧ་ལས་ནུག།

བཀའ་ཁྲིམས་ག་ར་ལས་སྦོམ་ཤོས་ཀྱི་སྐོར།

34ཡེ་ཤུ་གིས་ ས་དུ་ཀི་པ་དེ་ཚུ་ལུ་ལན་ག་ནི་ཡང་སླབ་མ་ཚུགས་བཟོ་དཔ་ ཕ་རུ་ཤི་པ་ཚུ་གིས་གོཝ་ད་ ཁོང་ཡེ་ཤུ་བཞུགས་ས་ལུ་འཛོམས་ཏེ། 35ཁོང་གི་གྲལ་ཁ་ལས་ བཀའ་ཁྲིམས་ཀྱི་སློབ་དཔོན་གཅིག་གིས་ ཁོ་གི་ཐུགས་ཚོད་བལྟ་ནི་སྦེ་ཨ་ནི་དྲི་བ་དེ་ཞུ་ནུག 36སློབ་དཔོན་ལགས་ བཀའ་ཁྲིམས་ག་ར་ནང་ལས་སྦོམ་ཤོས་དེ་ ག་འདི་ཨིན་ན་ཟེར་ཞུཝ་ད། 37དེའི་ལན་ལུ་ཡེ་ཤུ་གིས།

ཁྱོད་ཀྱིས་ རང་གི་གཙོ་བོ་དཀོན་མཆོག་ལུ་ དམ་ཚིག་བསྟེན་ཏེ་ སྙིང་ག་ར་དང་ སེམས་ག་ར་དང་ དྲན་པ་ག་ར་གིས་ བྱམས་པ་འབད་དགོ།#༢༢:༣༧། དུ་ཏེ་རོ་ནོ་མི་ ༦:༥། 38ཨ་ནི་བཀའ་ཁྲིམས་འདི་ ཁག་ཆེ་ཤོས་དང་སྦོམ་ཤོས་དེ་ཨིན། 39བཀའ་ཁྲིམས་གཉིས་པ་འདི་ཡང་ འདི་བཟུམ་སྦེ་རང་ཁག་ཆེ་ཤོས་གཅིག་ཨིན།

ཁྱིམ་ཚང་ལུ་རང་དང་འདྲཝ་འབད་བྱམས་པ་འབད་དགོ།#༢༢:༣༩། ལེ་བི་ཏི་ཀཱས་ ༡༩:༡༨། 40བཀའ་ཁྲིམས་དང་ལུང་སྟོན་པ་གི་དེབ་ནང་ སྟོན་བཞག་མི་ཆོས་ག་ར་ ཨ་ནི་བཀའ་ཁྲིམས་གཉིས་ལུ་བརྟེན་ཏེ་ཨིན་ཟེར་ ཡེ་ཤུ་གིས་གསུངས་ནུག།

ཁིརཱིས་འདི་ག་གི་བུ་བརྒྱུད་ཨིན་ན་ཟེར་བའི་སྐོར།

41ཕ་རུ་ཤི་པ་ཚུ་ག་ར་གཅིག་ཁར་འཛོམས་ཏེ་སྡོད་པའི་བསྒང་ ཡེ་ཤུ་གིས་ཁོང་ལུ་དྲི་བ་གསུངས་ཏེ། 42ཁྱེད་ཀྱིས་ དཀོན་མཆོག་གིས་བཙག་འཐུ་མཛད་མི་ཁིརཱིས་ཀྱི་སྐོར་ལས་ ག་དེ་སྦེ་མནོ་བསམ་གཏངམ་སྨོ་ ཁྱེད་ཀྱིས་འབད་བ་ཅིན་ ཁོ་ག་གི་བུ་བརྒྱུད་ཨིན་སྨོ་ཟེར་གསུངསམ་ད་ ཁོང་གིས་རྒྱལཔོ་ ད་བིད་ཀྱི་བུ་བརྒྱུད་ཨིན་ཟེར་ཞུ་ནུག 43ཡེ་ཤུ་གིས་ཁོང་ལུ་ ཁོ་ ད་བིད་ཀྱི་བུ་བརྒྱུད་ཨིན་པ་ཅིན་ ད་བིད་འདི་ཐུགས་ཉིད་ཀྱིས་ཁྱབ་སྟེ་ ཁོ་ལུ་ག་དེ་སྦེ་གཙོ་བོ་ཟེར་ཞུ་ཞུཝ་སྨོ་ ག་ཅི་སྨོ་ཟེར་བ་ཅིན་ ད་བིད་ཀྱིས་ཧེ་མ་གསུང་རབ་ནང་།

44གཙོ་བོ་དཀོན་མཆོག་གིས་ངེ་གི་གཙོ་བོ་ལུ་ ང་གིས་ཁྱོད་ཀྱིས་དགྲ་བྱང་ཕྱད་ཚུ་ ཁྱོད་ཀྱི་དབང་ཚད་འོག་ལུ་ མ་བཙུགས་ཚུན་ཚོད་ ཁྱོད་ངེ་གི་གཡས་ཁ་ཐུག་སྡོད་ཟེར་གསུངས་ནུག#༢༢:༤༤། མགུར་མ་ ༡༡༠:༡། 45ད་བིད་ཀྱིས་ཁོ་ལུ་ གཙོ་བོ་ཟེར་ཞུ་བ་ཅིན་ ཁིརཱིས་འདི་ ག་དེ་སྦེ་ ད་བིད་ཀྱི་བུ་བརྒྱུད་ཨིན་ཟེར་སླབ་ཚུགས་ནི་སྨོ་ཟེར་གསུངསམ་ད། 46མི་གཅིག་གིས་ཡང་ ཁོ་གིས་དྲི་བ་གི་ལན་སླབ་མ་ཚུགསཔ་མ་ཚད་ ཉིནམ་དེ་ལས་ཕར་ མི་གཅིག་གིས་ཡང་ ཁོ་ལུ་དྲི་བ་ཞུ་མ་ནུས་པས།།

Tans Gekies:

མེ་ཐིའུ་ལེའུ་ 22: dzoD

Kleurmerk

Deel

Kopieer