LUKAS 20
20
Itun Ratnan Lalud Tuhan Yésus
(Mat 21.23–27; Mrk 11.27–33)
1Bang seaco kareb Yésus nemada' nelun mula' bang Ruma' Allah, idi nemada' Bala luk Do', idi imam-imam rayeh idi guru-guru Ukum dengan lun rayeh pana' nacing iné' Neneh, 2kebaladeh, “Mala kuan kai dengan lalud anunké Iko nganau' kekamen ini? Idéké luk nemaré lalud ini kuanMu?”
3Kebala Yésus nedeh, “Ui pana' sikal ngitun nemuyuh. Mada' Negku, 4rereb Yahya ineh punneh rat surgaké, kian ratnan lemulun lek?”
5Idi ideh pegayam seburur dengan seburur, keburi'deh, “Kudeng tau mala, ‘Rata surga,’ Ieh miak pebala, “Ngudehké muyuh na manu neneh?’ 6Iamo' kudeng tau mala, ‘Ratnan lemulun,’ kali' rungen amung-amung pupu miak mitung netau ku batu; ngaceku amung-amungdeh manu ku Yahya ini seburur nabi.” 7Idi kebaladeh, “Kai na kali' rat iapeh punneh.”
8Idi kebala Yésus nedeh, “Ui pana' na sikal mala kuan muyuh dengan lalud idéké Ui nganau' kekamen ini.”
Pinginud Lemulun Luk Ngacam Kabun Anggur
(Mat 21.33–46; Mrk 12.1–12)
9 #
Yes 5.1
Idi Yésus nemada' aceh luk pinginud kuan lun mula', “Inan seburur lemulun luk nenganau' aceh kabun anggur; idi ieh nemaré kabun ineh uen tuda'-tuda' lun matar kabun ngacam. Idi ieh nenalan tuda'-tuda' io bang bawang baken. 10Idi kareb macing karebneh kebua', idi ieh nengecuk seburur demulunneh amé' ngalap sebabpat bua' anggur ineh rat nelun matar kabun ineh. Iamo' lun matar kabun ineh nemebal neneh idi nengecuk neneh muli' dengan na uang. 11Idi ieh nengecuk seburur demulunneh luk baken teh, idi demulun ineh pana' bibaldeh, idi ideh nengigu' neneh idi nengecuk neneh muli' dengan na uang. 12Muci ieh nengecuk demulunneh luk keteluh, iamo' demulun ineh pana' inuratdeh idi tila'deh. 13Idi kebala tuan kabun anggur ineh, ‘Anunké luk miak ruenku? Do' ui ngecuk anakku luk inanku mawa; kian, ideh miak ngedita neneh lek.’ 14Iamo' kareb lun matar kabun nenier anakneh ineh, idi ideh nepegayam seburur dengan seburur, keburi'deh, ‘Ini inulneh, do' tau ngaté neneh, pad babpatneh mangun ku binaweh tau.’ 15Idi ideh nenala' neneh rat bang kabun ineh idi nengaté neneh.
“Nekini anunké luk ruen tuan kabun anggur ineh kuan lun matar kabun ineh? 16Kali' rungen ieh macing sikal ngaté amung-amung lun matar kabun ineh idi maré kabun anggur ineh kuan lun baken teh.”
Kareb ideh neninger bala luk kudeng ineh, idi ideh nepebala, “Na tu kudeng ineh!”
17 #
Nani 118.22
Iamo' Yésus nenier nedeh idi nepebala, “Anunké ilung ayat luk inayud bang Surat Tuhan ini,
‘Batu luk tila' lun luk mudut ruma',
pangeh mangun ku batu lidung.’
18Idi anid-anid lemulun luk mebpeh luun batu ineh, miak mareg peh, iamo' lemulun luk ritapin batu ini, miak mekareg.”
Ratnan Maré Pupuk Kuan Raca' Rum
(Mat 22.15–22; Mrk 12.13–17)
19Guru-guru Ukum idi imam-imam rayeh nakap dalan sikal ngakem Yésus, iamo' ideh matot nan pupu ineh; ngaceku ideh kali' luk pinginud ini bila Yésus kuan bururdeh sebuleng. 20Idi ideh nenganét aceh kareb luk petulu nuap tuda'-tuda' lemulun luk amé' nier, luk siayu mepad kudeng lemulun luk matu, sikal nuuk Yésus, pad ideh miak maré Neneh kuan lun rayeh idi lalud lun luk ngimet ukum. 21Idi keburi'deh Neneh, “O Guru, kai kali' Iko luk mala idi mada' dengan niat luk matu, idi na mili' ayu lemulun, iamo' dalan Allah bida'Mu dengan matu. 22Miakké kai maré pupuk kuan raca' Rum, kian na lek?”
23Iamo' Yésus nekali' ilehdeh, idi Ieh nepebala nedeh, 24“Maré aceh sin sirenKu. Ayu idéké idi ngadan idéké ieh?”
Idi keburi'deh, “Ini raca' kuan.”
25Idi kebala Yésus nedeh, “Kudeng pieh kudeng ineh, do' maré kuan raca' anun-anun luk raca' kuan, idi kuan Allah anun-anun luk Allah kuan.”
26Idi na ideh miak ngesala' Neneh pa kiung lun mula'; idi ideh mawa ratnan orNeh, idi ideh ungeng.
Itun Lun Saduki Ratnan Tui Lun Naté
(Mat 22.23–33; Mrk 12.18–27)
27 #
Kek 23.8
Tuda'-tuda' lun Saduki iné' matun Yésus. (Ideh mala na luk idi tui ratnan até.) Idi ideh nengitun Neneh, 28#Bad 25.5 keburi'deh, “O Guru, Musa pangeh nengayud ukum kuan tau: ‘Kudeng kinanak seburur lemulun maté, idi kudeng ieh inan awan iamo' na luk idi anakneh, do' kinanakneh ngalap awanneh ineh idi nginul anak kuan kinanakneh.’ 29Inan tudu' deléi luk denganak, idi seluk rayeh ineh nengaweh, idi naté dengan na anak. 30Idi luk kedueh, 31idi luk keteluh pana' nengalap decur ineh, idi kudeng ineh teh ideh luk tudu' kinanak ineh pana' naté dengan na anak. 32Pangeh ineh decur ineh pana' naté teh. 33Kareb aco tui, decur ineh mangun ku awan idéké rat arangdeh ineh? Ideh luk tudu' pangeh nengaweh neneh.”
34Idi keburi' Yésus nedeh, “Anak-anak tana' ini ngaweh; 35iamo' muci aco lemulun luk petulu tumui ratnan até idi ngalap ulun luk meruked na ngaweh. 36Ideh mepad kudeng melaikat, idi na maté baruh peh. Ideh ineh anak Allah ngaceku ideh pangeh netumui. 37#Pur 3.6 Musa pangeh nengegala' ratnan lemulun luk naté miak tumui. Bang ayat-ayat ratnan kayuh luk meseb ieh neneten Tuhan ‘Allah Ibrahim, Allah Isak, idi Allah Yakub.’ 38Ilungneh Tuhan ineh baken Allah lemulun luk maté, iamo' Allah lemulun luk mulun; ngaceku amung-amungdeh mulun kuan Allah.”
39Tuda'-tuda' guru Ukum nengor balaNeh, keburi'deh, “O Guru, matu balaMu ineh.” 40Ngaceku na ideh mekuu' ngitun Neneh baruh peh.
Itun Ratnan Keristus
(Mat 22.41–46; Mrk 12.35–37)
41Idi kebala Yésus nedeh, “Kudeng apehké lemulun mala Keristus ineh Anak Daud? 42#Nani 110.1 Ngaceku Daud sebuleng nemala bang surat Nani Ubur,
‘Tuhan nepebala nan Tuhanku:
Tudo Iko pa tinuehKu,
43pad Ui nganau' bunu'Mu mangun ku tapin kukudMu.’
44Kudeng pieh kudeng ineh Daud neneten Neneh, ‘Tuhan,’ idi kudeng apehké Ieh mangun ku anakneh teh?”
Yésus Mada' Pad Matar Burur Ratnan Guru-Guru Ukum
(Mat 23.1–36; Mrk 12.38–40)
45Kareb lun mula' neninger balaNeh, idi Yésus nepebala pa kiung amung-amung pupu ineh nan anak-anak sekola'Neh, 46“Matar burur muyuh ratnan guru-guru Ukum, luk sikal nalan dengan kuyu' buyor, idi teh sikal buren lemulun déi' kadai, idi pian ku kerusi luk meluun do' bang ruma' sembayang, idi su luk meluun do' kareb irau, 47idi luk muyok decur tinula' idi mano ruma'deh, idi luk siayu mekadang sembayang! Ukumdeh ineh meluun dat.”
Tans Gekies:
LUKAS 20: BLD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
BALA LUK DO' Lun Bawang Bible © The Bible Society of Malaysia 1982, Second Edition 1998.
