LUKAS 21
21
Baré Decur Tinula'
(Mrk 12.41–44)
1Idi Yésus nenier lun do' uned nipa usin luk baréndeh bang pati' luk ruan usin. 2Idi Ieh nenier teh seburur decur tinula' luk masi' nenipa dueh balad usin bang pati' ineh. 3Idi kebala Yésus, “Ui pebala nemuyuh, decur tinula' luk masi' ini pangeh nenipa meluun ratnan amung-amungdeh. 4Ngaceku lun baken nenipa usin luk baréndeh ratnan eladeh, iamo' decur ini pangeh nenipa ratnan asi'neh amung-amung luk inan neneh, pad na luk ketecan kuanneh.”
Yésus Mada' Ratnan Tabpa Ruma' Allah
(Mat 24.1–2; Mrk 13.1–2)
5Kareb lemulun nepebala ratnan Ruma' Allah ineh inayung ku batu luk meraga idi raput-raput baré, idi Yésus nepebala, 6“Muyuh nier amung-amung ini. Sebuleng batu pana' luk buun-buun ieni na miak ketecan muci. Amungdeh miak musag.”
Susa' Idi Dereh
(Mat 24.3–14; Mrk 13.3–13)
7Idi kebaladeh, “O Guru, idanké susa' ini miak mangun? Idi anunké tanu'neh ratnan dereh ini malé mangun?”
8Kebala Yésus, “Matar do'-do', aleg muyuh saluken. Ngaceku mula' lemulun macing bang ngadanKu, keburi'deh, ‘Ui ini Ieh,’ idi teh, ‘Karebneh pangeh muneng!’ Aleg muyuh maya' nedeh. 9Kareb muyuh ninger ratnan pebunu' idi ria' luk mula', aleg muyuh matot; ngaceku na miak na susa' ini mangun atun, iamo' kekipedneh na macing dengan mesaget.”
10Idi teh kebalaNeh, “Papu sikal metueh ratnan pupu, idi imet sikal metueh ratnan imet baken. 11Idi miak mangun ruyuh tana' luk rayeh, idi iapeh-iapeh pana' inan iru' idi ét. Inan teh luk maré tot idi tanu' luk rayeh rat bang langit. 12Iamo' atun ratnan susa' ineh lemulun sikal ngakem nemuyuh idi ngedereh nemuyuh, pad muyuh barén bang ruma'-ruma' sembayang idi bang tutup, idi iten papu' raca' idi lun luk ngimet ukum ngaceku ngadanKu. 13Kareb ineh muyuh miak mada' Bala luk Do'. 14#Luk 12.11–12 Do' muyuh lutep! Aleg ngerawé atun ratnan kudeng apeh muyuh miak ngor baladeh. 15Ngaceku Ui miak maré bala kuan muyuh idi ileh, luk na miak uen bunu'-bunu' muyuh ngelaya' idi uen ngedaluh. 16Muyuh miak barén taman-tinan muyuh, kinanak-kinanak muyuh, pupu muyuh, idi lun rurum muyuh, idi tuda'-tuda' rat arang muyuh miak pitayen. 17Muyuh miak inan amung-amung lemulun megateh ngaceku ngadanKu. 18Iamo' sengurat abpuk muyuh pana' na miak mebubput. 19Do' muyuh lutep, pad muyuh miak ngalap ulun.
Yésus Mada' Ratnan Tabpa Yerusalim
(Mat 24.15–21; Mrk 13.14–19)
20“Kareb muyuh nier Yerusalim linibut tuda'-tuda' baweh, idi muyuh kali' tabpaneh pangeh muneng. 21Kareb ineh do' lemulun luk bang tana' Yudia buro amé' luun pegkung, idi lun bang bawang ineh do' buro, idi lemulun luk déi' lati' aleg semuet bang bawang. 22#Hos 9.7 Ngaceku ieh ineh Aco Ngukum, pad amung-amung luk inayud bang Surat Allah miak macing. 23Mesusa' kuan decur luk mali' idi luk niti' anak kareb ineh! Ngaceku kareb ineh miak mangun aceh susa' luk rayeh luun tana' ini, idi useh kuan amung-amung pupu ini. 24Sebuang lemulun miak pitayen ku pelapet, idi lun baken miak tebanen amé' bang amung bawang luk baken; idi Yerusalim miak riduen-riduen lun luk na manu, pad macing kareb imetdeh mabud.
Acing Anak Lemulun
(Mat 24.29–31; Mrk 13.24–27)
25 #
Yes 13.10; Yeh 32.7; Yo 2.31; Lin 6.12–13 “Idi miak mangun tuda'-tuda' tanu' luun mateh aco idi bulan idi gituen-gituen pana'. Idi luun tana' inan susa' kuan amung-amung pupu dengan gagau ngaceku beri abpa' rayeh idi ereb teh. 26Lemulun lélé maté ku tot kareb ideh nganét susa' luk miak mangun luun tana' ini; ngaceku lalud-lalud luk déi' langit ineh pana' miak meguyu' peh. 27#Dan 7.13; Lin 1.7 Idi ideh miak nier Anak-Lemulun macing bang laput dengan lalud idi rasat luk rayeh. 28Kareb amung-amung ini pun mangun, do' muyuh tukag idi tengook déi' dita', ngaceku puit kuan muyuh pangeh muneng.”
Bada' Ratnan Lawa Gita'
(Mat 24.32–35; Mrk 13.28–31)
29Idi Yésus nemala kuandeh aceh luk pinginud, “Ngerawé lawa gita' idi lawa amung-amung luk baken teh. 30Kareb muyuh nier lawa ineh ngimun nginulih, muyuh sebuleng kali' idi kareb melau' pangeh muneng. 31Kudeng ineh teh kareb muyuh nier amung-amung ineh mangun, do' muyuh kali' idi Imet Allah pangeh muneng.
32“Ngerawé do'-do'! Amung ini miak mangun kareb nateh inul ini maté. 33Langit idi tana' miak metutu', iamo' balaKu na miak metutu' peh.
Ratnan Matar
34“Matar burur muyuh pad niat muyuh na barén kuan luk manga idi mabuk idi rapang ratnan ulun tana' ini, pad aco ineh macing luun muyuh denak-denak mepad kudeng abpung. 35Ngaceku aco ineh miak macing luun amung-amung lemulun luk tudo bang aput-aput tana' ini. 36Do' muyuh megéi matar idi sembayang, pad muyuh metueh muit burur muyuh ratnan amung-amung luk sikal mangun ineh, idi tuman matun Anak-Lemulun.”
37 #
Luk 19.47
Idi anid-anid aco Yésus nemada' bang Ruma' Allah; iamo' anid-anid alem Ieh neremuat idi rudap luun Pegkung Saitun. 38Idi kareb pekak uka-uka amung-amung pupu ineh pana' nacing sikal ninger balaNeh bang Ruma' Allah.
Tans Gekies:
LUKAS 21: BLD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
BALA LUK DO' Lun Bawang Bible © The Bible Society of Malaysia 1982, Second Edition 1998.
