Milimo 2
2
1Aho lwasikaga lusiku lwa Pentekote, vose vavagi hamohene hanhu hamo. 2Na kisalasala chene kululuma kwafumaga kwilunde kitisi kikungulya kihanya kiliyuma, na kwayokazaja numba yose mwenumo vikalaga, 3na gigelaga kuwavo malulimi kitisi ga moto, hogene gigavulaga na gavikalilaga kila umo mugati 4navo, na vose vokazivagwa na Roho Nsondo, na vavukizaja kuyomba mu fiyombele hekeheke, kitisi Roho wavapaga kuyomba.
5Lelo vikalaga Vayahudi mu Yerusalema, vanhu vasondo ku magongo gose hansilili nilunde. 6Aho kululuma kwenuku kwigelaga, mbuto vikumingaga, na vitilulaga; kwisi kila umo wigagwa, kitisi valiyomba mu kiyombele chakwe. 7Haho vose vitilulaga na vakumaja, navo vayombaga, Kinahe, vose venava 8valiyomba vakavile Vagalilaya? Hokinahe, tuliwigwa valiyomba kila umo mu kiyombele kiswe mwenumo twavyalililwe? 9Vaparti na Vamedi na Vaelamu, 10niswe vazengi va mu Mesopotamia, Uyahudi na Kapadokia, Ponto na Asia, mu Frigia na Pamfilia, Misri na 11magunguli ga Libia na Kirene, niswe Varoma tulikala henaha, Vayahudi na vahemba vavo, Vakreta na Varabu, tuliwigwa valivitanizya milimo mihanya ya Mulungu mugati na fiyombele fiswe. 12Vose vakumaja, na vatavanivagwa, na vivuzaja umo ku ungi, Kinahe genaya? 13Alisi vangi vayeyaga, vuhaya, Vakolilwe mvinyo mpya.
14Haho Petro wimilaga hamohene na vʼikumi na umo wahamukaga muzwi gwakwe na wavawilaga, Inwe vagosya Vayahudi, ninwe vose mulikala mu Yerusalema, mugamaniche genaya, na mutege matwi ku 15mihayo yane! Kwisi venava vakakolilwe kitisi muliganika, 16lelo yili saa tatu ya limi duhu, sumbwa gali 17genaya hogene gayombilwe na mufumbuzi Yoele,
Yilakwile mu nsiku zya mhelo, Mulungu aliyomba,
Haho ndavamwagile vanhu vose
Roho yane, kigele vana vinwe,
Vayanda na vanike, vafumbule, na vasumba vagavone mawigele,
Na vanamhala vinwe valote filoti.
18Ahene, kwigulya na vakumba vane, vagosya na vakima,
Ndamwagwile Roho yane mu nsiku zyenizyo, kigele vafumbule,
19Na ndavezye migaka kwigulya mwilunde na malumeho hasi ku liwelelo,
Magazi na moto na malunde ga lyoki.
20Limi lilagaluke kuvi giti,
Na mwezi kuvi magazi,
Hambele na kwiza kwa lusiku luhanya na lwa lukumo lwa Guku.
21Haho yilakwile, ati kila umo homwene alilitana lina lyamwa Guku alapiziwe.
22Inwe vagosya Visraeli muyidegeleke mihayo iyi: Yesu wa Nazareti, munhu homwene wazumiliziwa na Mulungu hawinwe ha milimo ya nguzu na migaka na malumenho, hogene Mulungu wavezaja hamohene nawe mugati ninwe, kitisi inwe venekili mumanikizye. 23Mwenuyu homwene wafumivagwa hanuma na ndaka hoyene yakindikilwe na Mulungu mugati na kumanicha kwakwe kufuma kale; uyu mwamukomelaga ku musigiti, na mwamuvulagaga na makono ga va wigomu; 24alisi Mulungu wamuhembukaja, aho wagatungulaga mavusatu ga lufu; kwisi wavagi akakovolilwe kutungwa nalo. 25Ahene, Davidi aliyomba kunguno yakwe,
Namuvonaga Guku hanahana hambele na minso gane;
Kwisi aliho ha mulila gwane, kuduhu natinginiwe.
26Kunguno yeniyi moyo gwane gwadehaga, na lulimi lwane lwihalalaga,
Na hangi muvili gwane gukukwila mugati nʼisigizyo;
27Kwisi veve kuyileka ngʼo myuye yane ha vafwile,
Ninga kumutavula ngʼo Musondo wako avole.
28Veve wandagilaga nzila ya vuzuvuku,
Ukunokazya na kudeha ha vusyu wako.
29Vagosya vadugu, mundeke nayombe ninwe welekela kunguno yamwa guku wiswe Davidi. kitisi wagulalile, na wazikilwe, na kivimbi chakwe kiliho hawiswe kusika lelo. 30Kunguno wavagi mufumbuzi, na wamanikaja, kitisi Mulungu wamulahilizya na mulahi ati, ku vuvyalwa wakwe umo akwikala hʼisumbi lyakwe, 31mu kuvona kumbele, wayombaga kunguno ya vuhembuke wamwa Kristo, ati kulekwa ngʼo ha vafwile, ninga muvili 32gwakwe kuvola ngʼo. Uyo Yesu Mulungu wamuhembukaja, niswe vose tuli vasangilwa ku yeniyi.
33Hanuma uyo walinivagwa ku kukono kwa mulila kwa Mulungu wanukulaga ilagano lya Roho Nsondo kumwa Vava, lelo wayimwagilaga kitisi mulivona na muligwa. 34Kwisi Davidi akalinile kwilunde, sumbwa wayombaga mwenekili,
Guku wamuwilaga Guku wane, wikale ha mulila gwane,
35Kusika ndivatula vanisi vako hansilili na magulu gako.
36Kunguno yeniyi va numba yose yʼIsraeli vamaniche loleyene, mwenuyo Yesu, homwene mwamukomelaga ku musigiti, Mulungu wamuvezaja ave Guku na Kristo.
37Aho vigagwa genaya valasagwa mu myoyo yavo, na vamuwilaga Petro na vatume vangi, Vagosya vadugu, 38twiteki? Haho Petro wavitavukaga, Mupiluke moyo, na kila umo ogiwe ku lina lyamwa Yesu Kristo, kigele mupiwe vutondolwa wa mavukenaguzi ginwe, ninwe mukuchanukula kipanwa cha Roho Nsondo. 39Kwisi ilagano liliho kuwinwe na ku vana vinwe na ku vose venavo vatali vali kule, vose vose hovene Guku, Mulungu wiswe, akuvitana. 40Hangi na mihayo yingi mingi wasangilagwa kuwavo, na wavahanaga wayomba, Mukomolwe ku vuvyalwa wenuvu wa vutazi. 41Lelo venavo vagwanukulaga muhayo gwakwe vogivagwa, na ha lusiku lwenulo vongezivagwa vanhu bihi na fihumbi fidatu. 42Na venavo vadimanaga mu vuhembeki wa vatume na mu lusangi na mu kugumegula mugate na mu kulomba.
43Vose vingilagwa na vova; kwisi gakwilaga mamigaka mingi na malumeho ku vatume. 44Vose hovene vasanizaja vadimanaga hamohene, na vavagi na lusangi mu finhu fyose. 45Vaguzaja nsavo zyavo na finhu fyavo, na vavagavanaja vose kila munhu hanuma na mafundo gakwe. 46Nsiku zyose vadilaga na moyo gumo hamohene mwisengelo, na vagumegulaga mugate numba ku numba, na vapivagwa chakulya chavo mu kwihalala na myoyo ya pe. 47Vamugongolaga Mulungu, na vavatogezaja vanhu vose. Na Mulungu wongezaja kuwavo nsiku zyose vamo hovene vapizivagwa.
Tans Gekies:
Milimo 2: Nym51
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nyamwezi New Testament © Bible Society of Tanzania, 1951.
