Yohanes 2
2
O Kana ap mesik ugwe wogogukhwe Yesus en elalin a’ge mesik tegei wene
1Asogo togu legesarik, nogo agauwa ’biren oluk henaganak a’ge en e, o Galilea o kota mesik onuk Kana ai, ap mesik ugwe wogogukhwe Yesus ia yo’go pegesema eba emin welegesa. 2Eba oruakma, at Yesus osi iak wogu legesa a’ge enemin ogo re, yo’go enebegesema legesarik welegesayat. 3Legesarik oruakhwe, anggur e’gen a’bosu ne’gak a’ge ’berlegat erlak agama re, at Yesus ia enat disogo mo’gulesi,
“Is anggur e’gen a’bosu ne’gak a’ge erlak agama oruak o,” oluk mo’gulesi. 4Asogo mo’gulesimu, at Yesus en e, disogo mo’gulesi,
“Eige. Nia. An en tu a’ge owan hegit lau wom erlak oruakhweat de, hat en an nopaget mo’gulnigen,” oluk mo’gulesi. 5Asogo mo’gulesi a’geat de, at ia en, is hwe wogegisa eiye eneragam a’ge disogo mo’gulentesi,
“At en,
Disogo tit, oso holuk e, at en ua a’ge aiat tit o,” oluk mo’gulentesi. 6Is aphwami Yahudi a’ge en page eba enat tugulat e, di a’ge yu a’ge emin, enebetne emin, emerak poluk nak togwi a’ge paget ik e’be dorom ’gela’ge ebe helep a’ge hele’gik lok a’ge ebe hebarligen eba pegesema welaga. Dorom ’gela’ge ebe lo’bok ogola re, ik 100 liter ’gela’ge na’gu elit a’ge welaga. 7Asogo oruakma re, at Yesus en is eneragam a’ge ebano mo’gulentasulat e, disogo mo’gulentesi,
“Ik e’be dorom ’gela’ge eba pam ik na’gwit o,” oluk mo’gulentesimu, emde lorophegeik na’gwigisa. 8Asogo na’gwigisema re, at Yesus en is ebano disogo mo’gulentesi,
“Yogo. Na’gwigep a’ge ai mesik lu’gweasogo ap ’gain seni seregei eiye a’ge wogesi lit o,” oluk mo’gulentesimu wogesi legesa. 9Is en ik lu’gweasogo wogesi legesarikmu no oluk e, ik e’be dirak a’ge, oluk enaluk welegesa a’geat de, at ’gain ano nak e,
“’Geba en woluk wegesa,” oluk eperlak welat e, ik ano anggur e’gen a’bosuat agama, oduk nekhesi ’gal e, op en ap ugwe wogegisa a’ge ano iak pakhesi. 10Iak pakhesimu wagama re, disogo mo’gulesi,
“Aphwami ’berlek en anggur e’gen a’bosu wogentasulat e, op a’ge naduk wogontogwi holuk, loksogo no’gwiam, pobuk wiak a’ge wogontogwi a’geat de, hat nak e, op a’ge poluk welegentik en pobuk selakma pegen yu, nogorlok o!” oluk mo’gulesi.
11At Yesus ebe pobi tuagoluk elalin a’ge mesik tu erlak welagarik naduk-naduk tegei yu re, o Galilea kota Kana welat tegei ai o. Asogo tegei ai pam, at erliktogwi a’ge enaluksogo mo’gulentesimu, is at osi iak wogu legesa a’ge ebano Yesus ebe pobirak poluk, enede at ebam he’berik pegesa.
12 #
Mat. 4:13
Asogo arat toluk e, at Yesus ebe emin, ia emin, arilak emin, osi iak wogu legesa a’ge emin, enemin o Kapernaum legesa. Legesarik e, agauwa wei nagat welegesa.
Yesus Allah owi werikmu ’goluk degelegei wene
(Matius 21:12-13; Markus 11:15-17; Lukas 19:45-46)
13 #
Kel. 12:1-27
Eba oruakma en, is aphwami Yahudi a’ge en e,
“Nadugat at Allah en delnenebegei o,” oluk, enede eberak welat domba wam wusogo seni onuk Paskah paget no a’ge arat horok lau wagama re, Yesus o Yerusalem ’begei. 14’Begeitik Allah owi werikmu ’gwegei ’gal e, is aphwami o’go ’balogwi a’ge, sapi emin, domba emin, sue ’berl ’gela’ge emin, o’go wogulat, is pema eba hweriogo welat uang agam-pagam hogulat, tugukhwe at il entesi. 15Asogo tugukhwe il ontoluk e, herle ’go’bi a’ge ’go’bu heli’gogo sapi wam emin, domba emin, lagal’bisok ’go’bu wusogo Allah owi werikmu en mukho lebikpoluk, e delak pam en uang agam-pagam hogu legesa a’ge ebano abel edenogo ’boluk-’belaksogo hwikhai lasulat, 16is aphwami sue ’berl ’gela’ge o’go wogu legesa a’ge wene yagentasulat, tegei. Asogo wene yagentasulat e,
“Sue yema horloluk lebemis o. An naik owi werikmu yema, o o’go ’balugumu ’gela’ge ’balugu legep yema re, asogo modok togup o,” oluk mo’gulentesi. 17#Mzm. 69:9Asogo wene yagentesimu, is ap at osi iak wogu legesa a’ge ebano onogola en e,
“Nadugat is ap pema en Allah iak pam pelal wokho pogulat e, disogo egesema oruak ano,
Naik Allah, hat howi werik a’ge nede modok hwedik en nolot modok het ago yo,
oluk pelal wegesema oruak epegi,” oluk enede eberigisa.
18Yesus en is aphwami ebano asogo mo’gulentesimu, is ap ’gaindek Yahudi a’ge en Yesus ebe wene yagugulat e, disogo mo’gulegisa,
“Hat en tigen yu re, eiye welat tu hegirat tigenma oluk, pobi hobul en, elalin a’ge mesik tin da,” oluk wene yagegisa. 19#Mat. 26:61; 27:40; Mrk. 14:58; 15:29Asogo wene yagegisema, at Yesus en e, disogo mo’gulentesi,
“Allah owi yu moluk tit o. Arat moluk togupmu re, an en pobuk agauwa ’birenam werise leiktik henaganak a’ge en arat ologun ’balogo werik o,” oluk mo’gulentesi. 20Asogo mo’gulentesimu re, is ap ’gaindek Yahudi a’ge ebano en e, disogo mo’gulegisa,
“A! Allah owi yu owan worogukhwe 46 tahun welege a’geat de, hat e,
Agauwa ’biren nak werise leiktik en, agauwa henaganak a’ge en arat ologun ’balogo werik, e’gen ai re, elirat werigoluk en e’gen a? Mia o,” oluk mo’gulegisa. 21Asogo mo’gulegisa a’ge re, Yesus en wene Allah owi werik paget egei ai, o werik a’ge paget egei puk. At u’gwarek ebe pagerat egei yo. 22Wene asogo egeitik, pobuk ebe waragarik en elaluk agama, is ap at osi iak wogu legesa a’ge ebano en,
“Wene yu nadugat mo’gulnentasukhwe nenesa’go hwelige a’ge,” oluk enede eberigisarik, Allah iak pelal wogo a’ge ano emin, wene Yesus en mo’gulentesi a’ge ano emin, pobi tigisarik onogola en demat epegesa.
At Yesus en aphwami ’berlegat onogola
aluk welago wene
23Asogo egesarik oruakhwe, o Yerusalem is aphwami Yahudi a’ge domba wam wusogo seni onuk Paskah no’gukhwe, at Yesus eba enemin welat ebe pobi tuagoluk, elalin a’ge til laga ai en e, aphwami a’bik enil hegesarik enede at ebam he’berik pegesa. 24Asogo he’berik pegesa a’geat de, at Yesus u’gwarek nak e, is enebe ’berlegat enebabut alukmu re,
“Demat woknobua,” oluk ede is enebam he’berik po erlakma en welaga. 25Aphwami onogola at aluk modok welago ai en e, is aphwami pema en,
“Is logon enebabut degenik o,” oluk, at mo’gulom modok mia o.
Tans Gekies:
Yohanes 2: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
