Yohanes 3
3
At Nikodemus Yesus e’bek wagarik e’birek weneane egesa wene
1Aphwami Yahudi a’ge onue ’gain ap Farisi a’ge onowene tenakho welaga a’ge mesik onuk Nikodemus. 2Ye, at ap ai o huba’go agauwa mesik erlige Yesus e’bek wagarik e, disogo mo’gulesi,
“Nue. Ap mesik Allah emin hwedik erlak holuk e, hat en elalin tu puk a’ge til denaga legen ai ’gela’ge, modok tu mia. Ai en e, hat en wene mo’gulnontouwagoluk Allah en perakhobou wagama wegen oluk nenaluk aga o,” oluk mo’gulesi. 3Asogo mo’gulesimu, at Yesus e, disogo mo’gulesi,
“Aphwami Allah en enebe pobuk togolik ’get dagenebiso erlak holuk e, at eragam enebasumu eba enil houwa modok erlak o, oluk, niak demat mo’gulheselegi o,” oluk mo’gulesimu, 4at Nikodemus en e, disogo mo’gulesi,
“A! Aphwami enarluema re, no’gosogo pobuk dagonobu epegen. Enialak onogola ’goluk en pobuk elit dagonobu no? Mia o,” oluk mo’gulesimu, 5at Yesus en e, disogo mo’gulesi,
“Aphwami ik pam emin, Allah Arogun pam emin, dagenebiso erlak holuk e, Allah en eragam enebasumu eba ’gua modok erlak o, oluk, niak demat mo’gulheselegi o. 6Ye, aphwami en dagonobogwi ai re, aphwami at dagagai o. Ye, Allah Arogun en dagenebiso ai re, Allah Arogun a’geat ’get dagagai o. 7His henebe lo’bok pobuk togolik ’get dagom, oluk mo’gulhegis ai en,
“Eige! Nogorlok o, oluk, hede perik togun o. 8Sogwei ai, we, omu yogunat punhasuam e, iak nak hesa’go hwelise legen a’geat de, ebe wago re, ’geba en ’gela’geat wago yo. Ye, lasu re, ’gebane lasu ’gela’geat lasu o. Hat e, heperlak o. Ai ’gela’ge, aphwami Allah Arogun en dagenebiso re, enebe lo’bok asogoat dagenebiso yo,” oluk mo’gulesi. 9Asogo mo’gulesimu, at Nikodemus en e, disogo mo’gulesi,
“Wene e’gen ai re, no’gosogo tagonobo ebele paget en egen,” oluk hin wesimu re, 10at Yesus en e, disogo mo’gulesi,
“Nue. Hat hebe re, aphwami Yahudi a’ge wene mo’gulentasu legen a’geat de, an en wene mo’gulheselegi a’ge yu re, pobi tigen erlakma hegi o. I a? 11Ye, nis en wene nenaluk a’geat mo’gulhontogulat, nenil hege a’geat demat oluk, ’beli’gogo mo’gulhontogulat, togu lege a’geat de, neniak on holu pukmu en e, henebakhenne togu legep ai en, niak demat mo’gulheselegi o. 12An en wene ’gwiangma a’ge paget mo’gulhentasuam e, his en demat oluk pobi togu legep erlak holuk e, an en wene ’bogorl pam a’ge paget mo’gulhontoma pobuk no’gosogo wene ai demat oluk pobi togup epegep. Pobi togup modok erlak o,” oluk mo’gulesi. 13Asogo mo’gulesirik e, disogo mo’gulesi,
“Ap mesik ’gwiangma en ’bogorl pam modok ligom erlak. We, an ’bogorl pam en abat dakla ’bu wegi a’ge ano nagat o.
14-15 #
Bil. 21:9
Ye, at Musa o leimu aphwami erlakma eba welat, ’gosu ’gela’ge heli’gogo e pam edikpesi ai ’gela’ge, is aphwami yema enede an abat daklau wegi a’ge yu nebam he’berik pouwa a’ge enebe lo’bok enelaluk modok welemagoluk, an asogoat ediknobo hegitsogoat ediknobouwayat o. 16Di aphwami yu aphwami at Allah ede hwedik en enede an nebam he’berik pouwa a’ge enebe lo’bok warotluk e, nal ema erlak o. Enelaluk modok welemagoluk, omlogo an nebe mesigat dogo a’ge wogentesi. 17Ye, an Allah omlogo ’gwiangma yema peraknobou waga a’ge ai re, di aphwami yu aphwami wene enebam poluk wiagabonobuagoluk peraknobou waga puk. We, enebe delonobuagoluk peraknobou waga o.
18Holuk e, ap sa en ede an nebam he’berik pasu holuk e, Allah en wene ebam poluk wiagap pouwa erlak a’geat de, ap sa en ede an Allah omlogo mesigat dogo a’ge yu nebam he’berik pasu erlak ai enat, wiagap pouwa a’ge wene arat ebam pesimu oruak o. 19Ye, Allah en wene enebam pasu ai re, ebe disogo. An en o dakharak enebasu legi a’ge nebe arat ’gwiangma ’bu wegi a’geat de, aphwami enebabut wiak togwi ai en e,
At o dakharak ai nenebit o. At e, o hiktak aiat nenagai, oluk onogola opogwi o. 20Ye, is aphwami wiak togwi a’ge enebe lo’bok enede en opogulat e,
Nis o dakharak ai pam lul holuk e, nis wiak togwi a’ge ’baguarik selakma hebarligen emano, oluk, an o dakharak a’ge yu modok enebit en e, ne’bek wagai erlakma en mo ogwi o. 21Asogo enede opogwi a’geat de, is pema enebabut hegitsogo togwi a’ge enebe lo’bok en, enede opogulat e,
Allah emin hwedik welat disogo op togu legema, oluk, selakma emagoluk, an o dakharak a’ge ne’bek wagai o,” oluk mo’gulesi.
At Yohanes en Yesus obok ’baksogo
mo’gulentesi wene
22Asogo arat mo’gulesirik e, pobuk at Yesus ebe emin, osi iak wogu legesa a’ge emin, enemin o Yudea ’bigisarik e, aphwami ik olomu ’belabonobogulat agauwa wei nak welegesa. 23-24#Mat. 14:3; Mrk. 6:17; Luk. 3:19,20Asogo togu legesa eria erlige re, Yohanes e’gik herle wusogo o herle werak onobogumu owan ’gwelabu erlakma en welat e, o onuk Ainon o Salim eragam eba ik a’bikmu no oluk e, aphwami ik olomu ’belabonobuagoluk, Yohanes e’bek wagaiam e, ik olomu ’belabenebise lagayat.
25Asogo ik olomu ’belabenebiso oruakma, at Yohanes osi iak wogu legesa a’ge emin, is ap Yahudi a’ge logon emin, enemin, is ap Yahudi a’ge en di a’ge yu a’ge emesogo nak tugumu no oluk e, wene ai paget wene a’bik ’balugu legesa. 26Wene ’balugu legesarik, Yohanes e’bek legesarik e, disogo mo’gulegisa,
“Nue. Ap mesik hat he’birek ik Yordan etle akhit welat e, at ebaget obok ’beli’gogo mo’gulnentigen a’ge ano en ik olomu ’belabenebisokhwe aphwami enebe ’berlegat at e’bek wagai o,” oluk mo’gulegisa. 27Asogo mo’gulegisema, at en e, disogo mo’gulentesi,
“Malik logwe. Nosi. Ap mesik Allah en mo’gulom erlakma, at u’gwarek ede en nak ’gagalogo elirat til lo mia o. 28#Yoh. 1:20Ap ai en aphwami delonobuagoluk Allah en yo’go poluk perakpou weik egei ano re, an e, erlak a’geat de, at pobuk weriogoluk an naduk peraknobou wagama wegi o, oluk, mo’gulentasumu his arat henesa’go hologu legep epegi o. 29Ye, ap mesik ugwe wasu holuk e, hwe ai ogun e, ap aiat o. Ye, ap ugwe horlo a’ge oruak ai are mesik eragam edik welat, at iak osoam esa’go hwelak welat ogola agai hasu ’gela’ge, an yogodak asogoat nogola nagai hasu legi o. 30Ap ai onuk ligom erlige ligagokhwe re, an nonuk ’buom erlige ’bu agokhwe, tua o,” oluk mo’gulentesi.
’Bogorl pam en ’bu aga a’ge wene
31Ye, aphwami ’berlegat e, ononuk erlak nak o. We, at erabu en ’bu aga a’ge aiat ’gain onuk logo a’ge oruak o. Ap mesik ebe ’gwiangma en dogo a’ge holuk, ebe ’gwiangma a’geatma re, wene ’gwiangma a’geat oso yo. Is aphwami ’berlegat ononuk erlak ’gela’ge oruakhwe re, ap mesik ’bogorl pam en ’bu aga a’ge aiat onuk logo oruak o. 32At il hesi a’ge emin, esa’go hwelegei a’ge emin, ’baksogo mo’gulentasukhweat de, is aphwami ’berlek en e, at en wene ’beli’gogo mo’gulentasu a’ge ai, enebakhennesogo ukpogwi o. 33Asogo ukpogwi a’geat de, is aphwami pema en e,
At en wene ’beli’gogo mo’gulnentasu a’ge ai demat oluk wogwi a’ge en e, Allah iak ai demat oluk wogwi o. 34At Allah en perakpou waga a’ge ai, Allah Arogun hwerli po erlakma en daksogo modok wogesimu Allah iagat mo’gulnentasu o. 35#Mat. 11:27; Luk. 10:22At aik en omlogo ebe ede hwedik welat, di a’ge yu a’ge ’berlegat at eiye welemagoluk wogosi o. 36Holuk e, ap sa en ede Allah omlogo pam he’berik pasu holuk, enelaluk welema a’ge eiye agarik oruak o. A’geat de, ap sa en, at omlogo iak hweliso erlakma en, ebakhenne ukpasu a’ge ogo, elaluk modok welema a’ge ai eiye ema erlak o. We, Allah olot het ebam poluk modok welema o.
Tans Gekies:
Yohanes 3: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
