Kejadian 4
4
Ap Kain Habel e’birek en tigisa wene
1Pobuk, at Adam ugwe Hawa e’birek nogo egesarik, hwe ano malik ogola agama re, emalik abat deregei. Asogo deregeitik, at en e,
“Naik ’gain Onuk Logo a’ge en letniesimu nemalik ebe abat deregis o,” oluk onuk Kain tualegei. 2Asogo deregeitik pobuk emalik ap onuk Habel deregeiyat. Asogo dagenebegeimu, at Habel ano wam domba eiye agarik tenakho welaga. Ye, asogo a’geat de, at Kain e, yabuk eiye agarik wasu laga, 3th Asogo toluk welegesarik en, at Kain di a’ge yu a’ge yeregei a’ge e’gen ’balogo wasu lagarik e, Nenaik ’gain Onuk Logo a’ge Allah paget pasu laga. 4#Ibr. 11:4Asogo ebesimu, at Habel ogo re, wam domba mesik emalik naduk deregei a’ge wai lagarik e, wusogo se’gerlak poluk, op a’ge nak Allah paget pesi. Asogo ebesimu, Nenaik ’gain Onuk Logo a’ge en Habel nak e, ebam liok egei. 5Asogo a’geat de, at Kain en ebesi a’ge ukpesi. Asogo tegeimu, at Kain ano olot het agarik, orogole haro modok a’bik aga. 6Asogo tegeimu, at Nenaik ’gain Onuk Logo a’ge ano en Kain disogo mo’gulesi,
“Nopaget, hat holot het egentik, horogole haro a’bik aga. 7Hat op telin holuk, hogola hagai hoat o. A’ge re, wiak tigen holuk, wiak tu a’ge hogola ’gwiogoluk oruak o. Hat wiak tu a’ge ai hogola modok ’betesogo ’guarik anni eigoluk oruak a’geat de, hat en elirat mabenap poat o,” oluk mo’gulesi.
8 #
Mat. 23:35; Luk. 11:51; 1Yoh. 3:12 Asogo mo’gulesimu, at Kain en ot Habel disogo mo’gulesi,
“Nemin yabukmu louwok o,” oluk mo’gulesirik, arat yabukmu legesarik e, Kain en ot Habel ano ebam ’golokho lagarik ebe modok ’be’gi weregei. 9Asogo weregeimu, Nenaik ’gain Onuk Logo a’ge en e, Kain disogo mo’gulesi,
“Hat hot Habel ebe ’geba oruak?” oluk mo’gulesi. Asogo mo’gulesimu, at en e,
“An neperlak o. An en not tenak wolom no? Erlak o,” oluk mo’gulesi.
10 #
Ibr. 12:24
Asogo mo’gulesimu, at Nenaik ’gain Onuk Logo a’ge en e,
“Hat hebabut modok wiak, onogorlok a’ge tigen ai nopaget. Hat hot emep ’gwiangma en a’gulmu tuagoluk iak loksogo nonuk ’baliso ai erlak no? 11Hat he’gik en hot werigenma emep ’gwiangma yema emdema ’gela’ge ’begeimu re, hat pobuk yabuk wasulom erlak, oluk heman hebegi o. 12Asogo heman hebegimu re, yabuk wokho owi yorogunmu ’baktuarik ebe op ema erlak o. ’Gwiang mesik eiye om erlak o da ya yogunat nese lorogun o,” oluk heman pesi.
13Heman asogo pesimu, at Kain en e, Nenaik ’gain Onuk Logo a’ge ano disogo mo’gulesi,
“An asogo nosolom modok mia a’ge heman modok e’gin a’ge asogo nebegen ai mia o. 14An o yema hat horogolema en, o walegat mukho peraknebagun holuk e, an no’gwiang eiye erlak en, o di owi yu owi lei wetil lasukhwe, aphwami mu a’ge enemin sarlok togulat nebe watnobu ai mia o, naik,” oluk mo’gulesi.
15Asogo mo’gulesi a’geat de, Nenaik ’gain Onuk Logo a’ge en e, disogo mo’gulesi,
“Asogo wathobua erlak o. A’geat de, hat wathobua holuk, ha’gulmu re, an en o’go is ap enebe sabirenat warenebik o,” oluk mo’gulesirik, aphwami logon enemin sarlok tuarik, at Kain ebe woruano oluk enede we’gerlogo Kain ebam silo pesi. 16Asogo tegeimu, at Kain ano Nenaik ’gain Onuk Logo a’ge orogolema en lagarik, mo orlu ago hegit yabuk Eden owi yogoma abel o’borl akhit eba ’gwiang mesik onuk,
“Aphwami ’bogulogo lorik no’gulomma,” eba lagarik welaga.
Ap Kain en dogoma a’ge en enebe wiyalegesa wene
17Kain ugwe e’birek enemalik ap mesik derigisarik, onuk Henokh tualigisa. Asogo tualigisarik, at Kain o kota mesik pare ede ’burl weregeitik, o kota ai onuk at omlogo onuk a’geat tualegei. 18At Henokh en ap Irad deregei. Ye, Irad en Mehuyael deregei. Mehuyael en Metusael deregei. Ye, Metusael en Lamekh deregei. 19Lamekh ai ugwami enebe ’biren, hwe mesik onuk e, Ada. Ye, hwe mesik onuk e, Zila. 20At hwe Ada en e, Yabal deregei. At Yabal ai en dogoma a’ge re, onowi sum a’ge werik poluk welat, wam di a’ge yu a’ge dorogwi welegesa. 21Ye, at Yabal ot onuk e, Yubal. At Yubal ai en dogo’gwe a’ge re, gitar emin, di ’bi’gong yu ’bi’gong emin worogwi enaluk modok welegesa. 22Ye, at hwe Zila en emalik onuk Tubal-Kain deregei. At Tubal-Kain ano en dogo’gwe a’ge re, di a’ge yu a’ge ebe tembaga a’ge emin, ’besieme’gen a’ge emin, helo’gogwi enaluk modok welegesa. At Tubal-Kain ot hwe a’ge onuk e, Naama.
23Enebe asogo welat, at Lamekh en ugwami ’biren eriano disogo mo’gulentesi,
“Ada Zila he’birek an wene ik a’ge yu henesa’go hwelit o! Ap souwe a’ge en an watnebegeimu re, at ebe ’be’gi werigis o. 24At Kain ebe worogwi holuk e, a’gulmu enebe sabirenat waronobu holuk e, an watnobu holuk na’gulmu re, ap 77 en waronobuat o,” oluk mo’gulentesi.
Adam omlogo pobuk deregei wene
25Ye, pobuk, Adam ugwe Hawa e’birek malik mesik derigisa. Asogo derigisarik, at Hawa en e, disogo egei,
“Nomlogo Habel Kain en weregei a’ge ano, ebalema Allah en nemalik abat woknesi,” oluk mo’gulesirik e, onuk Set tualegei. 26Ye, at Set omlogo ap deregeitik, onuk Enos tualegei. Eria hegit e, aphwami Nenaik ’gain Onuk Logo a’ge erliktogulat onuk ’balugulom a’ge naduk mo’guligisa.
Tans Gekies:
Kejadian 4: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
