Kejadian 3
3
Aphwami eriano en Allah iak sagalogo ukpoluk wiak tigisa wene
1 #
Wah. 12:9; 20:2 At nenaik Allah Onuk Logo a’ge en e, wam, tue, ’baik, di a’ge yu a’ge e’gik erlak oruak walhesi a’ge ai ’berlegat e, we, enebabut weiyat sakhorak a’geat de, at ’gosu ai nak e, ebabut modok lagak-pagaktak o. Ebabut asogo lagak-pagaktakma no oluk e, hwe ano disogo mo’gulesi,
“Hwe yu, Allah en e,
His yabukmu e e’gen owi yogo a’ge eba ’berlegat e’gen nagup no yo, oluk, demat mo’gulhentesi a? Erlak a,” oluk hin wokhesi. 2Asogo hin wokhesimu, at hwe ano en e,
“Yabukmu e e’gen owi yogo a’ge yema edip lo’bok e’gen nis we elit no’gulom nak o. 3Asogo a’geat de, Allah en e,
E e’gen owi ’burl yogo a’ge ai e’gen nak e, his nagup modok erlak o. Ye, his hene’gik ogo tenhagup modok erlagat o, oluk mo’gulnentesi. Nis en asogo tul holuk nis nenebe waromat o,” oluk mo’gulesi.
4Asogo mo’gulesimu, at ’gosu ano en disogo mo’gulesi,
“Asogo e’gen ai erlak o. His nagup holuk e, henebe pobuk warorogup erlak o. 5Allah en asogo mo’gulhentesi ai re, his e ai e’gen ’balogo nagupmu re, henebabut heberlemarik, henede di ’gagal yu ’gagal ema ai aluk welat mo’gulhentesi. His e e’gen ai no’gwiam e, henebe Allah ’gela’geat ’gain oroguptik e, wene op wene wiak wene henaluk modok orogup ani o,” oluk mo’gulesi.
6Asogo mo’gulesimu, at hwe ano en e, e ano il yethesi ’gal e, op modok oruakma yethesi. Asogo yethesirik, ogola en e,
“E ai e’gen enede wo ebelerakma re, aphwami enebabut heberlonobua hegi o,” oluk epesirik, e e’gen ano ’balogo ne’geitik e, ado ogun wogesimu ne’geiyat. 7Asogo no’gukhwe erianoat, enebabut heberlagarik e,
“Nis nenebe nenage’golom welege hegi,” oluk pobi tigisa. Asogo pobi tigisarik e, e ara e’gela a’ge ikho enagap pam ’buktigisa.
8Erlige asogo takpoluk oruakma hopmu akhit enesa’go holhegesa ’gal e, Nenaik ’gain Onuk Logo a’ge Allah ano e owi yogo’gwe nosoma o’borlogouk hweligisarik e,
“Il yetnentasumuno,” oluk is e’biregat e ebano e’gerlakma hisak egesa. 9Asogo hisak egesa a’geat de, at Nenaik ’gain Onuk Logo a’ge Allah en ap ano iak pakhasulat e,
“Hat hebe ’geba welegen o,” oluk iak pakhesi.
10Iak asogo pakhesimu, at ap ano en e,
“Hat hebe e owi yogo’gwe nese legen ano ho’borlogouk nesa’go hwelegistik e, nage’golom a’ge welat e, ne’gerli en yema hisogo welegi o,” oluk mo’gulesi.
11Asogo mo’gulesimu at Allah en e,
“Hat hage’golom welegen, ai sa en mo’gulhesimu. An en,
E yu e’gen nagup, oluk mo’gulhentegis a’ge ano ne’genma ya?” oluk mo’gulesi. 12Asogo mo’gulesimu, at ap ano en e,
“Hwe hat en an nemin welemagoluk woknigen a’ge ano en e’gen ai ’balogo woknesimu ne’gi o,” oluk mo’gulesi.
13 #
2Kor. 11:3; 1Tim. 2:14 Asogo mo’gulesimu, at Nenaik ’gain Onuk Logo a’ge Allah en at hwe ano disogo mo’gulesi,
“Nopaget asogo tigen?” oluk mo’gulesimu, at en e,
“At ’gosu en iak esei lalnebegeimu e’gen ai daganogo ne’gi o,” oluk mo’gulesi.
Allah en wene enebam pesi wene
14Asogo arat mo’gulentesirik en at ’gosu ano disogo mo’gulesi,
“Hat asogo tigen ai en e, wam, tue, ’baik, di a’ge yu a’ge e’gik erlak oruak a’ge ’berlegat heman onobo erlak oruakhwe, hat nak e, wene hebam paiktik e, disogo tinogoluk heman hebegi o. Hwerli yogodak en ’bekhit hebe warorogun hwerli, ebela hogum pam melangtak denagalat, hoso’boru re, ’gwiang aling a’ge nasu lorogun ani o. 15#Wah. 12:17Hat emin, hwe yu emin, hemin hwerlisogo modok wiak oruakhwe, at en dogo’gwe a’ge emin, hat en dogo’gwe a’ge emin, enemin hwerlirak modok wolorogup o. Asogo welat at en dogo’gwe a’ge en e, hat ha’gul sagalogo wathobogwiam, hat hiak en is onoyuk o’gurl lebilenebise lorogunat o,” oluk mo’gulesi.
16Asogo mo’gulesirik, at hwe ano disogo mo’gulesi,
“Malik hogola agalat modok e’gin-pe’ginsogo taga loroguntik, malik ebe deriselat e, nonouk a’bik takpoluk en dakhwerlasu lerinogoluk mo’gulhegis o. Asogo a’geat de, hogun eragam welat, ebe he’birek nogosolom a’ge aga lemayat o,” oluk mo’gulesi.
17 #
Ibr. 6:8
Asogo mo’gulesirik, ap ano disogo mo’gulesi,
“Hat e, hugwe iak hweligentik e,
E e’gen ai nagup, oluk wene ’balegis a’ge ano ne’gen ai o. Asogo tigen ai en, ’gwiang yu arat heman ’garoksogo pegi o. Yabuk set wik-wiaksogo wokho poluk en ’gwiangma a’ge herasogo nasu lorogun ani o. 18Ye, hat hebaget, di agan yu agan orlok a’ge emin, di agan e’gela, yu agan e’gela orlok a’ge emin, ’gwiangma en ’baktagoam, e e’gen a’ge hoso’boru ’gela’ge nasu lorogun ani o. 19Ye, hat hebe ’gwiang a’ge agauwak heli’gogo walhiegirikmu re, ’gwiang di e’gela yu e’gela ’baktaga lemagoluk yabuk herligisak a’bik weriselat, set wik-wiaksogo taga loroguntik, hebe waroroguntik togolik ’gwiangat aga lorogun o,” oluk mo’gulesi.
20Asogo mo’gulesimu, hwe ano aphwami ’berlek eniayat ema ai en e, at Adam en ugwe ano onuk,
“Hawa,” tualegei. 21Asogo tualegeimu, at Nenaik ’gain Onuk Logo a’ge Allah en e, ’baik agap heli’gogo re, Adam ugwe e’birek enagap pam wantagenebesi.
Allah en, Adam Hawa e’birek Eden yabukmu en mukho lebigenebesi wene
22 #
Wah. 22:14
At Nenaik ’gain Onuk Logo a’ge Allah en asogo wantagenebesirik e, disogo egei,
“Aphwami ebano nis nenemin hegit egesarik, wene wiak a’ge emin, op a’ge emin, enaluk aga. Asogo enaluk agarik, e e’gen no’gwiam enebe enelalugap enebiso a’ge yu ’balogo no’gulat, enebe enelaluk modok wolom a’ge ai nenebit o,” oluk egei. 23Asogo egeitik, aphwami ebano Eden yabukmu ebano en mukho lebigenebesirik e, disogo mo’gulentesi,
“His henebe ’gwiang a’geatma re, honu’gwarek en ’gwiang ologun ’balogo yabuk horlogu lomup o,” oluk mukho lebigenebesi. 24Asogo lebigenebesirik, yabuk owi yogoma ano ebela ’gogumu eba o mo orlu ago hegit aphwami e e’gen no’gwiam enebe enelalugap enebiso a’ge ano edipmu ’gwi louwano oluk malaikat ’gela’ge ’garok odouk a’ge e’gat degin hogulat yegin hogulat, enebe eba enebesimu ’gagalak welegesa. Asogo welegesa ai en, aphwami logon en ’gogulat, e ai edipmu horoksogo lo modok mia o.
Tans Gekies:
Kejadian 3: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
