Marko 5
5
Jesu a ngu vbanyisa muthu nya maphuvbo nya guvivbe
(Matewu 8:28-34; Luka 8:26-39)
1Khavbo avbo, va di tshatugela tigoni ga Vagerazi khisikheyi nya yiphwa. 2Me ni gu duga khu ngalavani, Jesu a di khingwa khu mwama moyo a nga bani na gu dugela marowoni. Mwama yoyu a diri ni maphuvbo nya guvivbe. 3A di vbanyela marowoni. Mwalo a nga bani a gu kodza gu mu mola, ambari maphili a di pandra. 4Dzinyondro dzingi a nga thedwago maphili mawundruni ni gu hungwa mawogo khu makhetshe, a di pandra maphili, a kavila makhetshe. Mwalo muthu a nga bani ari ni tshivba nya gu mu mole. 5Wutshigu ni mihani a di legalega marowoni ni musigomoni, na gu wombedzela dzihuwa, ni gu dzi bayisela khu siwindri.
6Na wonide Jesu khu hwindzo a di mu khinga khu mazambo aya khidzima migondroni gwaye, 7a khusedza lito a ganela khu tshivba, khuye: “Ginani nyi nga gu ghohela, uwe Jesu, Mwamana wa Nungungulu a guromo Ndzadzini? Nyi ngu gu lomba khu lina la Nungungulu gukheni u nga nyi tshanisi!” 8A di ganela kharato kholu Jesu a nga khuye: “Diga muthu yoyo uwe liphuvbo nya guvivbe!” 9Khavbo avbo, Jesu a di mu wudzisa, khuye: “Gasi khuwe mani lina lago?” Uye a di mu hakha, khuye: “Kheni lidhuma, kholu hi vangi.” 10A di mu lomba wuhindzi a si tutumisi maphuvbo yale khu tigoni mule.
11Vbafuvbi vbale dzi diromo dzikhumba nya dzingi na dzi gu haviswa gigomoni. 12Maphuvbo yale nya guvivbe ma di lomba ga Jesu, khayo: “Hi dzumedzise guya bela dzikhumbani mule.” 13Uye a di dzumela. Khavbo avbo, maphuvbo nya guvivbe ma di duga ga muthu wule, ma guya bela dzikhumbani dzi nga bani dzi gu ningana tengo nya magumavili (2.000) mazana. Dzikhumba dzi di tutuma dzi ya bela matini dzi gu mbemba dzatshavbo.
14Vahavisi va di thava, vaya tivisa mahungu yaya dhoropani ni mu dzindrangani. Vathu nya vangi va di ya wona iso si nga dugelelago. 15Na va vbohide avba a nga bani a romo Jesu, va di wona muthu wule a nga bani ari ni maphuvbo nya guvivbe na khade, na ambade dzingandzu dzaye, nari ni mapimo yaye yatshavbo, va di khala hwanga. 16Avo va nga si wonago va di fakaza satshavbo si nga dugelelago ga muthu wule a nga bani ari ni maphuvbo nya guvivbe, niso si nga dugelelago dzikhumba.
17Khavbo avbo, vathu va di mu lomba gu a khuge tigoni gwawe. 18Avbo Jesu a nga belago ngalavani, muthu wule a nga duswago maphuvbo nya guvivbe a di mu lomba gu hongola Naye. 19Gani olu, Jesu kha mu dzumela. A di mu embela, khuye: “Indra gaya gwago, u ya embela valongo vago vatshavbo iso Pfhumu a gu giredego ni wuhindzi u wu manego.” 20Uye a di hongola, a phela gugimbila a ganela dzindrangani gwatshavbo dza Dhekapoli satshavbo iso a nga giredwago khu Jesu. Vatshavbo va di liwuga.
Nyamahegyane wa Jayiro ni nyamayi nya milovba
(Matewu 9:18-26; Luka 8:40-56)
21Gikhati Jesu a nga wuyago khu tshatugo a di randredwa khu vathu nya vangi; a gu khala navo funguni. 22A di vboha moyo nya muthangeli nya nyumba nya nombelo, lina laye nya gupwani khu Jayiro. Na wonide Jesu; adiya khidzima migondroni gwaye. 23A di mu lomba wuhindzi nya wukhongolo, khuye: “Nyamahegyane wangu a ngufa, delu uta mu handzega mandza yago gasi a vbanye.” 24Jesu a di hongola naye, a landrwa khu gidzemo nya gingi gi nga bani gi mu gundra maphuvbo yatshavbo.
25Vbakari gwawe a di romo nyamayi moyo a nga bani a gu dwala khu gu dugelela novba gipimo nya likhumi na mivili myaga. 26A di gimbide mudzinyangani nya dzingi, umo a nga gimbila a phalalegisela thomba yaye yatshavbo, aholu gima kha sa mu phasa gilo, madwali ma diya na ma gu engedzelana. 27Avbo a nga pwago na gu ganedwa khu mahungu ya Jesu. A di hidzimela khu hwane gwaye a gunyula vathuni aya mu kuha guambala gwaye. 28Kholu a di gu pimisa kharati, khuye: “Nya nga kuha guambala gwaye basi nyi na hawuluga.” 29Khu lisine, gikhati gile novba wu di hegisa gu duga, a gu dzipwa milini gwaye nya gukhuye hawulugide madwali yaye. 30Khavbo avbo, Jesu, a na dzipwide gukhuye tshivba yaye yi vbungugide a di thendregedza a wudzisa gidzemo, khuye: “Khu mani a nga kuha guambala gwangu?” 31Khavbo avbo, vapizane vaye va di khavo: “U ngu wona nya gukhuwe vathu vangi va gu gundrago, ni olu u wudzisago gukhuwe khu mani a nga nyi kuha?” 32Aholu Jesu a di simama gu khedza maphuvbo yatshavbo gasi gu wona khu mani a nga mu kuha. 33Nyamayi wule, khu hwanga ni gu ndrendremela khu guti esi si nga mu dugelelago, adiya khidzima migondroni gwaye a mu embela lisine latshavbo. 34Uye a di mu embela, khuye: “Mwanangu, gukhodwa gwago gu gu vbanyiside. Indra khu gurula, madwali yago ma hawulugide.”
35Na nga guganela wu dita mwango khu ndrangani ga muthangeli nya nyumba nya nombelo guta mu tivisa, khavo: “Nyamahegyane wago fude. Khu ginani u nga gu garadzago Muhevbudzi?” 36Aholu, Jesu kha nga thela kota khu mwango wule. A di embela muthangeli nya nyumba nya nombelo, khuye: “U nga thavi gilo, khodwa basi.” 37Kha nga dzumela gu landrwa khu muthu, vbavbandze ga Pedro ni Jakobe ni ndriyaye Johane. 38Na vbohide ndrangani ga muthangeli nya nyumba nya nombelo, a diya mana ligwaha nya vathu va nga bani na va gu lila na va gu womba dzihuwa. 39Avbo a nga bela nyumbani a di khuye “Khu ginani mu wombago dzihuwa ni gu lila kharati? Nyamahegyane khafa, a di lala.” 40Aholu va di mu hega. Uye a di ruma gu duga vatshavbo, gu tshala basi vavelegi, ni vale a ngatago navo, a bela navo umo a nga bani a romo nyamahegyane. 41A di mu phara khu libogo a mu embela, khuye: “Talitha, kumi”- gu tshamusago pwani: “Nyamahegyane, nyi ngu gu ruma, wuga.” 42Nyamahegyane a di dzegela gu khuga a gimbila kholu a diri ni likhumi na mivili myaga. Gidzemo gyatshavbo gi di liwuga ngudzu. 43Aholu Jesu a di va laya va si embeli muthu, a va ruma gu ninga guhodza nyamahegyane wule.
Tans Gekies:
Marko 5: BGG2014
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gitonga DC Bible © Bible Society in Mozambique, 2014.
