Marko 4
4
Gipimaniso nya muyali
(Matewu 13:1-9; Luka 8:4-8)
1Jesu na gu hevbudza nyaluphye siwoni a diya khala a randredwa khu gidzemo nya gingi. Khu kharato, a di bela ngalavani yi nga bani yiri matini, gasi gidzemo gi di khala siwoni. 2A di va hevbudza silo nya singi ngudzu khu sipimaniso. Musihevbudzoni gwaye a di va embela, khuye: 3“Nga yingisani! Muyali nya gukari a di hongola aya yala mbewu yaye. 4Na gu yala, yimbe mbewu yi di thegela bambe nya ndzila, si guta sinyoni sita yi rothela. 5Yimbe yi di thegela musiwindrini, umo ma nga bani mari mwalo mafu nya mangi; mbewu yi di vbiredza gu buga, kholu mafu yakone kha ma nga eta ngudzu. 6Aholu, na li vbiside lihani, yi divbya yi banga, khu gumbana mikhamba. 7Yimbe yi di thegela mibani; miba yi di dandra yi gu midza mbewu yeyi. Khu kharato kha ya thela mihandro. 8Gasi yimbe yi di thegela muwulimeni nya wadi, yi thela mihandro nya yadi dzimbe dzimbewu dzi di thela magumararu mihandro, dzimbe, livbandre na limwedo magumi, dzimbe lizana.” 9Khavbo avbo, a di khuye: “Uye a gu ni dzindzeve nya guyingise a napwe.”
Tshamuselo nya sipimaniso
(Matewu 13:10-17; Luka 8:9-10)
10Na va tshade venga, ava va nga bani va mu randrede gumogo ni vale nya likhumi na vavili, va di wudzisa Jesu tshamuselo nya sipimaniso sesi. 11A di va hakha, khuye: Ga enu, mu ngu tiviswa misihalo nya Mufumo waye, gasi vale va guromo khu vbavbandze, satshavbo silo sesi, va gu embedwa khu sipimaniso, 12gasi:
Va khedzisa va wona, aholu va si woni gilo;
va yingisa, aholu va si si mani;
kholu, va nga vbindrugedza mavbanyelo
va gu tsetseledwa sighoho sawe.
Tshamuselo nya gipimaniso nya muyali
(Matewu 13:18-23; Luka 8:11-15)
13Khavbo avbo, Jesu a di va wudzisa, khuye: “Ina kha mu wuti tshamuselo nya gipimaniso gegi, gani? Mu na wuti kharini tshamuselo nya simbe sipimaniso? 14Muyali a gu yala Mahungu. 15Dzimbewu dzi nga thegelago bambe nya ndzila, khu vale va nga hevbudzwa mahungu. Aholu, na va ma pwide, khu gu vbiredza a di vboha Sathane a ta dusa mahungu ma nga yadwago myonyoni gwawe. 16Kharato nugo, mbewu yi thegelago siwindrini, khu vale va pwago mahungu, va vbiredza gu ma hakha khu gutsaka. 17Aholu avo va mwalo mikhamba, khu kharato, kha va tiya. Va gu mana silingo ni sigaradzo khu kotani nya Mahungu, va gu dzegela gu ma diga. 18Mbewu yi thegelago vbakari nya miba khu vale va hakhago mahungu, 19aholu, va gu dzi garadza khu silo nya mafu, va gu padwa khu dzithomba ni gudogorela mafumbo yatshavbo nya silo; satshavbo esi si ngu midza mahungu ma si theli mihandro myonyoni gwawe. 20Mbewu yi thegedego wulimeni nya wadi khu vale va pwago mahungu va gu ma hakha, va gu thela mihandro, yimbe yi gu ninga magumararu, yimbe livbandre na limwedo ni yimbe lizana dzimbewu mweyo khu mweyo.”
Gipimaniso nya kandriya
(Luka 8:16-18)
21A di engedza gambe, khuye: “Ina gu ngu kodzega gu rothwa kandriya yi fenengedzwa khu gitundru, mwendro gu vegwa khwitshini, gani? Khandri ya gu vegwa wulangani yi dzi kodzago gu wenengedza nyumbani gatshavbo, gani? 22Kholu gi mwalo gi sihadego gi na gumba wonegiswa; kha nga gambe gi mwalo gi girwago khu gisihaledza gi na gumba tugudwa. 23Oyu a gu ni dzindzeve nya guyingise a napwe.”
24 # Wona gambe: Mat 7:2; Luk 6:38. A di engedza gambe, khuye: “Gengelani gwadi khu iso mu si pwago: Ndrengo mu na gu pimago khiyo mu na pimedwa nenu khiyo khu Nungungulu bwelo khavbo mu gu tadzisedwa. 25#Wona gambe: Mat 13:12; 25:29; Luk 19:26. Kholu oyu a gu naso a na engedzedwa, gasi uye a gu mwalo gilo, ambari iso nya sidugwana a gu naso, a na dzegedwa.”
26A di ganela gambe, khuye: “Mufumo wa Nungungulu wu ngu fanana ni muthu a yalago mbewu mafuni.” 27Gani lade, gani a ngu wuga, gani wutshigu gani mihani, iyo mbewu ya gu buga yi dandra na si dziti magirelo muni. 28Mafu khayo ma gu ni tshivba nya gu bugise, guhegula ya gu buga litshina, gu handzamedza mahongwe, gu landrela makonva a gu ayo ma thelago dzimbewu. 29Na dzi vidzidwe dzimbewu dza gu vbwerwa, kholu nango nya guvbwere gu bani yi vbohide.
Gipimaniso nya mbewu nya ginapi
(Matewu 13:31-32; Luka 13:18-19)
30A di engedza gambe, khuye: “Hi na wu fananisa ni ginani Mufumo wa Nungungulu? Gipimaniso muni hi na wu fananisago khigyo? 31Wu ngu fanana ni thanga nya ginapi yi yadwago thembweni na yiri yidugwana ga dzimbewu dzatshavbo dza tigoni. 32Aholu, na yi yadwe, yi ngu buga yi gu dandra guvbindra mitongwe yatshavbo, yi gu thela matamo nya makhongolo, ma girago mutsa, sinyoni sa Ndzadzini si dzi kodza guta girela umo sihaga sawe.”
33Khu sipimaniso nya singi nya nga esi, Jesu a di va hevbudza Mahungu ya Nungungulu, kha nga idzo mapimo yawe ma nga bani ma gu kodza gupwa khidzo. 34Vbakari nya vathu a di ganela khu sipimaniso, aholu, khu phuvbo a di tshamusela satshavbo vapizane vaye.
Jesu a ngu rudzisa phuvbo
(Matewu 8:23-27; Luka 8:22-25)
35Khu litshigu lile, na li hwide, a di embela vapizane vaye, khuye: “Hongoleni hi tshatuga hiya khisikheyi.” 36Khavbo avbo, va di tshiya gidzemo, va tshatuga ni Jesu khu ngalava a nga bani nari umo. Dzimbe dzingalava dzi di mu bangaladza. 37Yi di duga phuvbo nya yikhongolo; mavimbi nya mangi ma di bela ngalavani, avbo ngalava yi nga phela gutala khu mati. 38Jesu a di lade gisaloni a gu khighela vbagikhuledzotunu; va di mu wusa, khavo: “Muhevbudzi, ina khu theli kota khu ethu hi mbembago, gani?”
39Khavbo avbo, na wugide, a di kawuka phuvbo, a embela yiphwa, khuye: “Degula! Rula!” Phuvbo yi di dzegela gu degula, gu manega malenga nya makhongolo. 40Khavbo avbo, a di va embela, khuye: “Khu ginani mu thavago ngudzu? Ina mu si gu khodwi, gani?” 41Avo va di ndrendremela ngudzu va gu wudzisana khu gyawe, khavo: “Gasi khu mani oyu nya gu ambari phuvbo ni mavimbi si mu yingela?”
Tans Gekies:
Marko 4: BGG2014
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Gitonga DC Bible © Bible Society in Mozambique, 2014.
