Mt 18
18
Lweyi nkulu a Mfun'wini wa Matilo
(Mrk 9:33-37; Lk 9:46-48)
1Ankameni wolowo a vadondrisiwa vatrhindrekela ku Yesu vamuvutisa vaku: Xana hi mani lweyi anga lwenkulu a Mfun'wini wa Matilo? 2Yene avitana a ntrongwana amuyimisa amakari kwavu, 3aku: Nihlayelamfuri nili ku n'wine: Loko n'wingandruluki n'wiva swanga hi vatrongwana, n'wingaka n'winganhingeni a Mfun'wini wa Matilo. 4Hileswo-ke lweyi atakatitrongohata swanga hi ntrongwana lweyi, hi yene anga lwenkulu a Mfun'wini wa Matilo. 5Nakone, lweyi ayamukelaka a ntrongwana wanga hi lweyi, hi vito dranga, ayamukela mine.
Swikhunguvanyiso
(Mrk 9:42-48; Lk 17:1-2)
6Lweyi akhunguvanyisaka mun'we ku vatrongwana lava, lava vapfumelaka ku mine, afa swingava swa hombe ku yene loko kutrimbeleliwa a ribye dra kusila anhan'wini yake, atxukumetiwa nsingeni wa likhulu. 7Yowee misava hinkonta ya swikhunguvanyiso! Hikuva a swikhunguvanyiso swifanela kuhumelela; kambe yowee a mhunu lweyi a swikhunguvanyiso swihumelelaka ha yene! 8Hikolahu-ke, loko a voko draku kumbe a nenge waku swikukhunguvanyisa, switreme uswitxukumeta kule na wene! I swa hombe ku wene a kunhingena avutomini na upfumala a voko kumbe na ukhuta, kutlula loko utxukumetiwa andrilweni lowu wungatimekiki na uni mavoko mabiri kumbe minenge mibiri. 9Ni loko drin'we ku mahlu yaku drikukhunguvanyisa, drisuse udritxukumeta kule na wene; i swa hombe ku wene kunhingena vuton'wini, na uni tihlo drin'we, kutlula loko utxukumetiwa akheleni dra ndrilo lowu wungatimekikiki na uni mahlu mabiri.
Xifaniso xa hamba ya kulahleka
(Lk 15:3-7)
10Tivonelani! N'wingadreli ni mun'we ku vatrongwana lava. Hikusa nan'wibyela leswaku a tintrumi tavu a Matilweni, minkama hinkwayu tilavisa liso dra Tatana wanga, lweyi anga Matilweni. [ 11Ha kunene a N'wana wa Mhunu ateli kutahuluxa leswi afaka swilahlekile.#18:11 A ndrimana leyi yifambelana ni leswi switraliwiki ku Lk 19:10.]
12Xana n'wili yini hi leswi? Loko a mhunu ali ni dzana (100) dra tihamba, kulahleka yin'we ku tone, angatrikiki leti ta ntlhanu wa makume na mune ni ntlhanu na mune (99) anhaveni ayadjula leyi ya kulahleka? 13Nihlayelamfuri nili ku n'wine leswaku loko ayikumile atrhava ngopfu hikola ka yone, kutlula kutrhava hi leti ta ntlhanu wa makume na mune ni ntlhanu ni mune (99) leti tingalahlekangakiki. 14Switanu ni le ku Tatana wenu lweyi wa le Matilweni angarandri leswaku ni mun'we wa lava vatrongo alahleka.
Kudrivalela wa-le-kwenu
15Loko makwenu akudohela, famba uyamutshinya na n'wi swenu ntsena. Loko akuyingela, utava ukumi makwenu. 16#Lavisa Mlw 19:15. Kambe loko angakuyingeli, vitana mun'we kumbe vabiri, akuva a mhaka hinkwayu yitatiyisiwa hi milomu ya timboni tibiri kumbe tiraru. 17Loko yene angadjuli kuvayingela, byela a Kereke; loko na kone ayala akuyingela a Kereke, ku wene ave swanga wa matiko ni muhlengisi.
18Nihlayelamfuri nili ku n'wine: Leswi n'wiswitrimbaka la misaveni switatrimbiwa ni le Matilweni, leswi n'wine n'wiswintrhunxaka la misaveni switantrhunxiwa ni le Matilweni. 19Nan'wibyela na kone: Loko vabiri ku n'wine la misaveni vatwanana kukombela xa ntxhumu hi xikhongoto, Tatana wanga lweyi anga Matilweni atavanyika. 20Hikuva lomu vabiri kumbe vararu vatlhanganaka hi vito dranga, na mine nitava kone amakari kwavu.
Xikombiso xa nandra wa kuhluleka kudrivalela
21Petrosi atrhindrikeli ayavutisa Yene aku: HOSI, xana a makweru atanidohela kungani, na mine nimudrivalela; ku ntlhanu na kubiri, xana? 22Yesu amuyangula aku: Anikubyeli ka ntlhanu na kubiri, kambe kutlhasa ku ntlhanu wa makume na mabiri lawa mayandrisiwaka ha ka ntlhanu na kubiri (70x7).
23Hileswo-ke a Mfumu wa Matilo wungafanisiwa ni mufumi lweyi arandraka kukambela malandra yake. 24Loko asungula kukamba, vamutisela mun'we lweyi afaka ani nandru wa dzana dra madzana (10000) ya matalanta. 25Swanga hi leswi lweyi wa nandra afaka angenaswakudriha ha swone, a mufumi aleleti leswaku axavisiwa yene, ni nsati ni vana, ni hinkwaswu leswi afaka enaswu, akuva kudrihiwa a nandru. 26Kolahu a nandra awa hansi amukhisama aku ku yene: Nilehisele mbilu, nitadriha hinkwaswu. 27A mufumi avani vurombe na yene; lakakuva amudrivalela a nandru, amutrhunxa. 28Kambe loko nandra lweyo ahuma ayatlhangana ni nandra-kulobye, lweyi afaka ani nandru ku yene wa dzana (100) dra madenari. Amukhoma, amukama makolo, aku ku yene: Driha nandru waku. 29Hileswo-ke, a nandra-kulobye akhisama aminengeni yake, amukhongota aku: Nilehisele mbilu, nitadriha hinkwaswu. 30Kambe lweyo angapfumelanga, loko kunge kumuyisa abohelweni akondra adriha a nandru wakwe.
31Hi kuvona leswi swihumeleliki, a malandra-kulobye mavaviseka ngopfu, mayabikela mufumi hinkwaswu leswi swihumeleliki. 32Kutani a mufumi aruma vavitana a nandra lweyo aku ku yene: Nandra lweyi mfani! Nikudrivaleli a nandru waku hinkwawu, hikuva unikombeliki. 33Xana afa swingafanelanga leswaku utretrelela a nandra-kuloni swanga ha mine nikutretreleliki? 34Kutani hi kuhlundruka, a mufumi amunyiketa kuvaxanisi, akondra adriha a nandru wakwe hinkwawu.
35Hi swoswi atakan'wiyentxa swone Tatana wanga wa le Matilweni, loko mun'wana-ni-mun'wana wenu angadrivaleli a makwavu hi mbilu.
Tans Gekies:
Mt 18: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
