Mt 19
19
Ta kudlaya vukati
(Mrk 10:1-12)
1Ntrhaku ka kuhlaya a maritu lawo, Yesu asuki Galileya aya matlhelweni ya le Yudeya, halahaya ka Yordana. 2A switrhungu swinyingi swimulandra, aswihanyisa kone.
3Van'we vafarisi vatrhindrekela ku Yene akuva vamudringa, vamuvutisa vaku: Xana swapfumeleliwa leswaku a wanuna atrika nsati wakwe hi mhaka ya kukari? 4Yene avayangula aku: An'wingihlaya a Matralweni leswaku akusunguleni a Mutumbuluxi avayentxi wanuna ni wansati? 5#Lavisa Gn 1:27; 2:24; 5:2. Kutani aku: Hikola ka leswo a wanuna atasiya a tatana wakwe ni mamana wakwe akuva ayanamarela nsati wakwe, hi vubiri byavu vatava nyama yin'we. 6Xileswo avehe vabiri, kambe i nyama yin'we ntsena. Hileswo-ke leswi Xikwembu Nkulukumba angaswitlhanganisa, a mhunu angatxhuki aswitravukanyisa. 7Vone vamuvutisa vaku: Kutani-ke, hayini Moxe aleleti kunyika a papela dra kudlaya vukati, ni kumuhlongola? 8Yene aku ku vone: Moxe an'wipfumeleli kutrika vasati venu hikola ka kunonon'hwa ka timbilu tenu. Kambe akusunguleni aswivanga tanu. 9Kambe nan'wibyela leswaku: Loko wanuna ahlongolaka a nsati wakwe, na kungavanga na mhaka ya vuwoswi, atekana ni mun'wana ayentxa a vumbuye.
10A vadondrisiwa vaku ku yene: Loko a matrhamela ya wanuna ni nsati wakwe mayimisi xileswo, ahi swa hombe kutekana. 11Kambe Yene aku ku vone: Ahi hinkwavu lava vangakotaka a kuyingelisisa a ritu ledro, kambe ntsena lava vanyikiwiki. 12Hikuva vakone vatrheniwa lava vabelekiwiki na vali swoswo, loko vahuma makhurini ya vamamana vavu; vakone kambe lava vangatrheniwa hi vhanu; na swone vakone lava vangatrheniwa hinkonta ya Mfumu wa Matilo. Lweyi aswikotaka kuswiyamukela, aswiyamukele.
Yesu akatekisa a vatrongwana
(Mrk 10:13-16; Lk 18:15-17)
13Kutani kubuyisiwi ku Yene, a vatrongwana, akuva avatlhanteka mavoko, avakhongotela; kambe a vadondrisiwa afa vavakhwavela. 14Kambe Yesu aku ku vone: Trikani vatrongwana vata ku mine. N'wingavasiveleni hikusa a Mfumu wa Matilo i wa lava vanga ha vone. 15Kutani loko avantlhanteki mavoko, asuka kone.
A djaha dra mufuyi
(Mrk 10:17-31; Lk 18:18-30)
16A djaha drin'we dra mufuyi dritrhindrekeli ku Yene drimuvutisa driku: Mudondrisi, xana nitayentxa yini swa swinene akuva nitakuma a vutomi lebyi byingahelikiki? 17Amuyangula aku ku yene: Hayini univutisa hi leswi swinga swinene? Lweyi Munene i mun'we#19:17 Lweyi Munene i mun'we ntsena, kuhlayiwa Xikwembu Nkulukumba, swanga hi kuhlaya ka Mrk 10:18 na Lk 18:18. ntsena! Loko udjula a kunhingena avutomini, bekisa milawu. 18Kutani yene avutisa aku: Milawu yini? Yesu amuyangula aku: Ungavidlaya, ungaviyentxa vumbuye, ungaviyiva, ungaviyentxa vumboni bya kuhemba, 19#Lavisa Khm 20:12-16; Mlw 5:16-20. vanani xitxhavu ku tatana waku ni mamana waku, randra a wa-le-kwenu swanga hi leswi utirandrisaka xiswone. 20Kolahu a djaha driku: Hinkwaswu leswo niswibekisile nehe ntrongo, xana nahapfumala yini ke? 21Yesu aku ku yene: Loko udjula kuva lweyi ahetisekiki, famba, uyaxavisa hinkwaswu leswi unganaswu, unyika mali a swisiwana. Xiswoswo utavani nhlengwe a Matilweni. Ntrhaku tana unilandra. 22Loko a djaha driyingeli leswo, drisukile drifamba na drivavisekile, hikusa afa drini vukosi byinyingi.
23Kutani Yesu aku ku vadondrisiwa vakwe: Nihlayelamfuri nili ku n'wine: Swinonon'hwa ngopfu ku mufuyi a kunhingena a Mfun'wini wa Matilo. 24Nan'wibyela na kone leswaku swanabyala akuva a kamela drinhingena hi moya wa ximari, kutlula loko a mufuyi anhingena a Mfun'wini wa Xikwembu Nkulukumba. 25A vadondrisiwa vakwe loko vaswiyingela, vahlamala ngopfu, vaku: Loko swili tanu, hi mani angahuluxiwaka? 26Kambe Yesu avalavisa aku ku vone: Leswo ku vhanu aswikoteki, kambe ku Xikwembu Nkulukumba hinkwaswu swakoteka. 27Kolahu Petrosi ayangula aku ku yene: Lavisa hine hitriki hinkwaswu akuva hi kulandra. Xana switava yini ku hine? 28Yesu avayangula aku: Nihlayelamfuri nili ku n'wine: Loko kutlhasa a nkama lowo, hinkwaswu switakapfuxeteliwa; loko a N'wana wa Mhunu atatrhama axiluvelweni xakwe xa kuphatima, n'wine lava vanilandriki, n'witatrhama ku khume dra switrhamu na swibiri, akuva n'wiyavanyisa a tinxaka leti ta khume na tibiri ta Israyele. 29Mun'wana-ni-mun'wana lweyi atrikiki tiyindlu, vamakwavu va xinuna ni va xisati, ni tatana wakwe kumbe mamana wakwe, kumbe nsati ni vana, kumbe masimu hinkonta yanga, atayamukela hi ka dzana (100) ni kuhindra, ava ada pfindla dra vutomi lebyi byingahelikiki. 30Kambe lava vanyingi va kuranga, vatava va vugamu; ni lava va vugamu, vatava va kuranga.
Tans Gekies:
Mt 19: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
