Mt 16
16
Swikombiso swa ntamu wa Yesu
(Mrk 8:11-13; Lk 12:54-56)
1A vafarisi ni vasaduki vatrhindrekeli ku Yene, a kuyamudringa, vamukombela akuva avakomba xikombiso lexi xipfaka Tilweni. 2Kambe Yesu avayangula aku: Akupeleni ka dambu n'wine n'wili: Hitavani nkama wunene, hikusa a tilo drimphumelile! 3Amixweni n'wili: Dritadruma, namuhla, hikusa drizukile, drimphumi ngopfu. Vamandrendre! N'witiva kutrotra mavonekela ya tilo, kambe a swikombiso swa minkama swan'wikohla? #16:3 Man'we matralwa ya khale amanawu a maritu ya tindrimana ta 2-3. 4Lixaka ledri drimfani ni dra vumbuye drikombela xikombiso xin'we xa mahlolana; kambe dringatinyikiwa xikombiso loko xinge xa Yona. Kutani avasiya, atifambela.
Handrelo ya vafarisi ni vasaduki
(Mrk 8:14-21)
5Loko a vadondrisiwa vaweleli halahaya nkingeni wun'wana, vadrivali kuteka makati. 6Yesu aku ku vone: Lavisani, tivonelani ku handrelo ya vafarisi ni vasaduki. 7Kambe a vadondrisiwa vakhanelisana makari kwavu vaku: Ahlaya leswo hikusa hidrivali kuteka makati! 8Yesu aswitiviki, kutani aku ku vone: Hayini n'wikhanelisana n'wiku an'witekanga makati? Swipfumelinyana. 9Xana an'wisanayingelisisa, na kone an'wahadrimuki a ta ntlhanu wa makati lawa mangaphamela vhanu va kutlula ntlhanu wa makume ya madzana (5000) ni leswaku i swihundru swingani n'wingaswiteka? 10Xana na kone an'widrimuki a swa ntlhanu wa makati na mabiri mangaphamela a kutlula mune wa makume ya madzana (4000) ya vhanu ni leswaku i swihundru swingani swingasala? 11Xana an'wiyingelanga leswaku afa ningahlayi swa makati? Kambe tivonelani ku handrelo ya vafarisi ni ya vasaduki! 12Vahangayingela leswaku Yesu afa angakhaneli hi handrelo ya makati, kambe im'na, kuva vativonela ku dondro ya vafarisi ni vasaduki.
Petrosi akombisa leswaku Yesu i Kriste
(Mrk 8:27-30; Lk 9:18-21)
13Loko Yesu atlhasi atikweni dra Khezareya#16:13 I muti wukulu wa le Peneya a N'walungwini ka Palestina. Heroda lwenkulu awuyengetelile, kutani a n'wanakwe Filipe awutxhuli Khezareya hi xihluwa xa mufuminyana wa mu-Roma. wa Filipi, avutisi vadondrisiwa vakwe aku: Xana a vhanu vali a N'wana wa Mhunu i mani? 14Vayangula vaku: Van'we vali i Yohana Mubabatisi; van'wana, vali i Eliya; van'wana, vali i Yeremiya, kumbe mun'wana wa vaprofeta. 15Yene avutisa aku: N'wine ke? N'wili ni mani xana? 16Simoni Petrosi amuyangula aku: Wene u Kriste N'wana wa Xikwembu Nkulukumba lweyi ahanyaka. 17Kutani Yesu aku ku yene: Ukatekile wene Simoni n'wana Yona, hikusa ahi nyama ni ngati leswi swikupfuleteliki leswo, kambe hi Tatana wanga lweyi anga Matilweni. 18Na mine nakubyela leswaku: Wene u Petrosi (ribye). A henhla ka ribye ledri nitayaka a Kereke dranga; nambi tinyangwa ta Hades tingadrihlule. 19Nitakunyika mimpfungulu ya Mfumu wa Matilo. Leswi utakaswitrimba amisaveni switatrimbiwa ni le Tilweni, leswi utakaswintrhuxa laha misaveni switantrhuxiwa ni le Tilweni.
20Kutani alaya a vadondrisiwa akuva vangabyeli mhunu leswaku yene i Kriste.
Yesu ativisa ta kufa ni kupfuka kwake
(Mrk 8:31—9:1; Lk 9:22-27)
21Akusukela nkama lowo Yesu asunguli kutlhamuxela vadondrisiwa vakwe, leswaku swifaneli aya Yerusalema, kambe a vakulu va tiko, a vaprista lava vakulu ni vatrali, vatamuxanisa ngopfu, vamudlaya, kambe hi siku dra vuraru atapfuxiwa akufeni. 22Kolahu Petrosi amutekela tlhelweni asungula kumutshinya aku: Xikwembu Nkulukumba a akuhuluxe ku leswo, we HOSI! A mhaka ya kufana ni leyo yingatxhuki yihumelela ku wene. 23Kambe Yene andruluka aku ku Petrosi: Suka ku mine Sathana, hikusa wene u xikhunguvanyiso ku mine, hikusa awupimisi swa Xikwembu Nkulukumba, kambe swakuva swa vhanu.
24Yesu ahangaku ku vadondrisiwa vakwe: Loko mhunu arandra a kunilandra atiyale, atirwexe xihambano xakwe anilandra. 25Hikusa lweyi arandraka kuhuluxa vutomi byake atabyilahla; kambe lweyi atakalahla vutomi byake hikola kwanga, atabyikuma. 26Switapfuna yini ku mhunu a kufuya misava hinkwayu, kambe alahlekeliwa hi vutomi byake? Kumbe xana a mhunu atahumexa yini kuva axava a vutomi byake? 27A N'wana wa Mhunu atata hi kuphatima ka Tatana wakwe, kun'we ni tintrumi takwe, kutani atatlhelisela mun'wana-ni-mun'wana kuya hi matirela yake.
28Nihlayelamfuri nili ku n'wine, amakari ka lava vayimiki kola, vakone van'we lava vangatikifa na vangavonanga kutlhasa ka N'wana wa Mhunu akuphatimeni ka Mfumu wakwe.
Tans Gekies:
Mt 16: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
