Mt 15
15
Swihila swa va khale
(Mrk 7:1-13)
1Kutani kutrhindrekela ku Yesu van'we va vafarisi ni vatrali vapfa Yerusalema, vamuvutisa vaku: 2Xana hayini a vadondrisiwa vaku vatlula a swihila swa va khale? Hikusa avahlambi mandla loko vadjula kuda. 3Yesu avavutisa aku: Hayini-ke na n'wine n'witlula nawu wa Xikwembu Nkulukumba, n'wilandra ntsena a swihila swenu xana? 4Hikusa Xikwembu Nkulukumba aleleti aku: Txhava tatana waku ni mamana waku. Na swone: Lweyi arukaka a tatana wakwe kumbe mamana wakwe atayavanyiseliwa lifu. 5Kambe n'wine n'wili loko mhunu aku ku tatana wakwe kumbe ku mamana wakwe: Leswi afaka nifanela kun'wipfuna ha swone swinyiki Xikwembu Nkulukumba; 6lweyo angehena kutxhava tatana wakwe kumbe mamana wakwe. Hikolahu-ke n'wisusi ntamu wa ritu dra Xikwembu Nkulukumba hi swihila swenu. 7Va mandrendre! An'wiprofetile mfuri Ezaya loko aku: 8A tiko ledri drinitxhava hi nomu, kambe a timbilu tavu tile kule na mine. 9#Lavisa Ezy 29:12 hi kulandra a tolokiwo dra khale dra Xigirika. Kambe vanigandrela mahala, hikusa vadondrisa tidondro leti tinga swileleto swa vhanu.
Leswi swinyamisaka vhanu
(Mrk 7:14-23)
10Loko avitani switrungu ate: Yingelani, n'wiyingelisisa! 11Ahi leswi swinhingenaka non'wini swinyamisaka mhunu, kambe leswi swihumaka anon'wini hi swone leswi swinyamisaka mhunu. 12Kutani a vadondrisiwa vatrhindrekela ku Yene vamuvutisa vaku: Xana waswitiva leswaku a vafarisi vakhunguvanyeki ngopfu loko vayingeli leswi uswihlayiki? 13Kambe Yene ayangula aku ku vone: A ximilwa xini ni xini lexi Tatana wanga wa le Matilweni angaxibyalangakiki, xitatruvuliwa. 14Vatrikani, i vakufa-mahlu lava vafambisaka a vakufa-mahlu kulobye. Loko mun'we wakufa-mahlu afambisa mun'wana wakufa-mahlu, vatayawela akheleni hi vubiri byavu.
15Kolahu Petrosi aku ku Yene: Hitlhamuxele a xifaniso lexo. 16Yesu ayangula aku: Kasi na n'wine n'wahapfumala kuyingelisisa? 17Xana an'wiswiyingelisisi leswaku hinkwaswu leswi swinhingenaka hi nomu swiya khurini, akuva ntrhaku swihuma, switxukumetiwa? 18Kambe leswi swihumaka anon'wini, swipfa mbilwini; hi swoleswo swinyamisaka mhunu. 19Hikusa ambilwini kuhuma a miyanakanyu leyi mimfani, a vudlayi, vumbuye, vuwoswi, vuyivi, kufunga madrimi ni swisandru. 20A mintxhumu leyi hi yone minyamisaka mhunu. Kambe akuda na vangahlambanga a mavoko, leswo aswinyamisi mhunu.
Vupfumeli bya wansati wa mu-Kanana
(Mrk 7:24-30)
21Yesu asuki ambangwini lowo aya matlhelweni ya Tiri na Sidoni. 22Kutani mun'we wansati wa mu-Kanana#15:22 A swaku mu-Kanana swikombisa leswaku lweyi wansati afa ali wa vhanu lava vangeke va-Yuda. Kambe, nambi loko ali wa matiko, afa ayingeli va vulavula ha Yesu, ava apfumela ku Yene., wa matiko lawaya, amutrhindrekela, abandlukana aku: HOSI, N'wana Davida, nitwele vurombe! A n'wananga wa wanhwanyana axanisiwa ngopfu hi mademoni. 23Kambe Yene angamuyangulanga ntxhumu. Kutani a vadondrisiwa vakwe vatrhindrekela ku Yene vaku: Mutlhelise, hikusa abandlukana a ntrhaku kweru#15:23 Tolokiwo drin'wana drili: munyike leswi yene adjulaka swone. 24Kambe yene aku: Anirumeliwanga ku van'wana, loko kunge ku tihamba ta kulahleka ta tiko dra Israyele. 25Kambe lweyi wansati ata, akhisama amahlweni kwake, aku: HOSI, nipfune! 26Kambe Yene amuyangula aku: Aswixonganga a kuteka kati dra vana drinyikiwa swimbyanyana. 27Yene aku: Im'na HOSI; kambe na swone swimbyanyana swida vuntlhantlha lebyiwaka atafuleni dra vinyi va swone. 28Kutani Yesu aku ku yene: Wansati, akupfumela kwaku i kukulu! Aswiyentxeki hi laha urandraka ha kone. Akusukela ku nkama lowo, a n'wanakwe wa wanh'wanyana ahanyisiwa.
Yesu ahanyisa timbabyi tinyingi
29Yesu asukiki kone ayatlhasa ankingeni wa lwandle dra Galileya; kutani antlhantukela anhaveni atrhamisa kone. 30A switrhungu leswi swikulu swita na swini swilema, vakufa-mahlu, va kukhuta, timbheveve ni tin'wana timbabyi tinyingi, switatavabeka minengeni yake, yene avahanyisa, 31lakakuva a switrhungu swihlamala ngopfu hi kuvona a timbheveve loko tisungula a kukhanela, a swilema swihanyisiwa, a vakukhuta vasungula kufamba swinene, ni vakufa-mahlu vasungula kuvona. Kutani vatwalisa Xikwembu Nkulukumba wa Israyele.
Yesu aphamela mune wa makume ya madzana (4000) ya vhanu
(Mrk 8:1-10)
32Yesu avitani vadondrisiwa vakwe, aku ku vone: nitwela vurombe a vhanu lava, hikusa kuhundri masiku mararu na vali na hine laha, na vangena ntxhumu wa kuda. Nakone aniswirandri a kuvatlhelisa vaya ma kaya kwavu na vangadanga, vangatxhuka vawutleka andleleni. 33A vadondrisiwa vaku ku yene: Xana lana mananga, hingamakuma kwini makati ya kuxurisa ntalu wa vhanu wanga hi lowu xana? 34Yesu avavutisa aku: N'wina makati mangani xana? Vamuyangula vaku: Hini ntlhanu na mabiri ni tinhlampfinyana. 35Kolahu aleleta xitrhungu kutrhamisa hansi. 36Atekiki a ntlhanu wa makati na mabiri ni tinhlampfi, atlangela, akhemelela amanyika vadondrisiwa, kutani vone vayavela xitrhungu. 37Hinkwavu vada vaxura, vava vatata ntlhanu wa swihundru na swibiri hi swibuvu leswi swisaliki. 38A vavanuna lava vadiki afa vali va mune wa makume ya madzana (4000), na kungahlayiwi vavasati ni vatrongwana.
39Kuti loko aleleli xitrhungu, anhingena abyatrhwini awelela tikweni dra Magadani#15:39 Tikwana ledri dringativiwikiki. Mambeni matralwa mani ritu dra ku Magadala.
Tans Gekies:
Mt 15: NTX2007
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Xironga New Testament with Psalms © Bible Society in Mozambique, 2007.
