MATIUS 18
18
Couku ma wancu na'e?
(Mrk. 9:33-37, Luk. 9:46-48)
1 #
Luk. 22:24
Aipu wakatu ede anamori-anamori Ruma Isa maina d̄i Sia ro sod̄ina. ”Couku rawi'ikai ma'ipi na'e ade weki ela Karaja'an Saroga?”
2Ou b̄a Ruma Isa sab̄ua ana dou to'i, ro kauna kid̄i d̄i tando siad̄oho. 3#Mrk. 10:15, Luk. 18:17 Edempara nggahi Ruma Isa, ”Imbipu! Nggara nggomid̄oho rungkamu rawimu ro ndad̄imu b̄une d̄ambe-d̄ambe to'i nggomid̄oho d̄imandad̄i ela Karaja'an Saroga. 4Dou ma ka'awa wekina ro ndad̄ina b̄une ana dou to'i ake, sia edeku mandad̄i na'e d̄i ade weki ela Karaja'an Saroga. 5Ro dou ma tarima ana dou to'i b̄une ake, b̄ara Nahu, ede aona natarimaku Nahu.”
Lampa rawi-lampa rawi ma kamaikaina dosa dou
(Mrk. 9:42-48, Luk. 17:1-2)
6”Cou makamaina da'imbi walina sab̄ua dou d̄i ade weki dou-dou ma to'i ake d̄i Nahu, nancewi tahopu nggara wadu nggiru d̄id̄iki d̄i wo'ona ro sia d̄ilo'o tau d̄i ade moti ma d̄ei. 7Nawancuku ihana dunia ake, b̄ara lampa rawi-lampa rawi ma kamaikaina dosa dou. Poda lampa rawi-lampa rawi b̄une ede d̄imawara ncau, pala na'ihara dou ma rakamaina lampa rawi ede!
8 #
Mat. 5:30
Nggara rima atao ed̄imu makamaina dosa, dompo pakipu. Nancewi tahopu nggomi morimu lab̄o Ruma Hatalla konena dawara sab̄ae rima atao sab̄ae ed̄imu, nggara nggomi d̄ipaki d̄i ade afi anaraka ro rima ra ed̄imu b̄ali b̄ae. 9#Mat. 5:29 Ro nggara madamu makamaikaimu dosa, cingga pakipu, ncewi tahopu nggomi morimu lab̄o Ruma Hatalla konena dawara madamu sab̄ae nggara nggomi d̄ipaki d̄i ade afi anaraka lab̄o madamu b̄ali b̄ae.”
Conto ra ibara jimba ma moda
(Luk. 15:3-7)
10”Jaga! Aina kab̄awa ra katunamu sab̄ua dou d̄i ade weki dou-dou ma to'i ake. B̄ara kawarapu; mala'eka-mala'eka siad̄oho ngge'e mpa warana d̄itando Ama-Ku d̄i saroga.
[11#Luk. 19:10 B̄ara Ana Manusia maina d̄imambei salama d̄i dou ma santuda!]
12”B̄uneku kananu b̄a nggomi? Misakai wara dou ma ntau saratu mbua jimba, pala sab̄ua jimba d̄i ade jimba-jimbana ede moda, auku d̄ikarawina b̄a dou ede? Pasti sia natu'u wi'iku jimbana ciwi mpuru ciwi mbua ede ese doro to'i, ro lao ngupana jimba ma moda ede. 13Ro nggara narumpa mbalisi jimbana mamoda ede imbipu Nahu – sia na'ipipu neo adena b̄ara jimbana sab̄ua wa'ura eda mbalina ede ntewi kaisi jimba maciwi mpuru ciwi mbua ma wati moda ede. 14B̄une ede rauku Amamu ma d̄i saroga wati ne'ena sab̄ua dou d̄i ade weki dou-dou ma b̄ou imbi d̄i Nahu ake santudana.”
Nggara cina ra angimu madosa
15 #
Luk. 17:3
”Nggara cina ra angimu madosa d̄i nggomi, lao rakapu sia ro ngoapu au rancarana. Karawipu ede kai nari-nari d̄i weki nggomid̄oho d̄ua mpa. Nggara sia nab̄atusi nggahi ra eli nggomi, ndad̄i nggomi maraka mbaliku cina ra angimu ede. 16#Ul. 19:15 Pala nggara watisi, wa'apu sab̄ua atao d̄ua dou wali. B̄ara ade Alkitab ratunti; ’Sakura-kurana d̄ua atao tolu sakasi ampona loa wi'ikai ncara sab̄ua dou.’
17Nggara sia watisi tarimana ngoa ra tei kataho b̄a dou-dou ede, ngoapu rawi ede d̄i ela Ruma. Ro cumpukaina, nggara sia wati ne'ena tarima ngoa ra tei kataho b̄a ela Ruma, wi'ikaipu sia kai dou mataki tagi bea ro sab̄ua dou ma wati pata Ruma Hatalla.”
Rakantakai ro rakaukai
18 #
Mat. 16:19, Yah. 20:23 ”D̄ib̄ademu! Au rakantakai b̄a nggomid̄oho d̄i ade dunia, rakantakai rau aka saroga. Ro au rakancihi b̄a nggomid̄oho d̄i ade dunia ake, d̄ikancihi rau d̄i saroga.
19Ro d̄i b̄ade raumu: Nggara d̄i ade weki nggomid̄oho d̄i ade dunia ake d̄ua dou mafakana mab̄oha au-au ro nado'a weaku, do'a ede natarimaku b̄a Ama-Ku d̄i saroga. 20B̄ara tab̄e warakai d̄ua atao tolu dou makab̄oro weki b̄ara Nahu, Nahu wara d̄i ade woha siad̄oho.”
Conto ra ibara ada ma wati ngawa kangampu wea ncara dou
21 #
Luk. 17:3-4
Sawa'u b̄a ede la Petrus mai sod̄ina d̄i Ruma Isa, ”Ruma, nggara cina ra angi mada madosa d̄i mada, sampe pila kaliku mada pab̄uaku kangampu wea dosa sia? Sampe pidu kali?”
22Cambe b̄a Ruma Isa, ”Wati, laina sampe pidu kali, pala pidumpuru pidu kali. 23B̄ara Karaja'an Saroga, ka'ada'ana b̄une ade conto ra ibara ake: Sab̄ua dou sangaji mane'e kanggori nconggo-nconggo adad̄ohona. 24Wakatu sia tampu'u paresana, wa'a d̄itando sia sab̄ua dou adana ma nconggo juta-jutana, 25ro wati wa'una cola. Ndad̄i, sangaji ede parentana loakud̄u ada ede d̄i landa sama-sama lab̄o wei ra anana, ro sara'a ntau ra warana d̄i ru'u colakai nconggona ede. 26Adana ede sujuna d̄itando sangaji ede, ro raho poda-podana, ’Ruma, saba to'i wa'upu d̄i adamu ake, adamu ake d̄imacola sara'ana nconggo ede.’ 27Sangaji ede kasi adena d̄i adana ede, edempara fura sara'ana nconggo adana ede.
28Wakatu losa ada ede, sia eda angina lab̄o lengana, sab̄ua dou ada rau, ma nconggo d̄i sia pila-pila riwu. Nentina lengana ede, ke'ena ro nggahina, ’Cola sara'apu nconggomu!’ 29Edempara lenga rake'ena ede sujuna d̄itando sia ro raho poda-podana, ’Kalembo wa'u ade cina, nahu d̄imacola sara'ana!’ 30Pala lengana ada ede wati ne'ena. Sawa'u b̄a ede, sia kalu'una lengana manconggo sato'i ede ade uma bui sampe lengana ede colana nconggona. 31Wakatu eda b̄a ada-ada ma kalai au ramawa'u ndad̄i, siad̄oho ncoki adena ro lao ngoana mandad̄i ede d̄i sangaji. 32Edempara sangaji ede ouna adana ma dab̄ae ede ro nggahina d̄i sia, ’Ada ma dab̄ae! Sara'ana nconggomu wa'ura fura b̄a nahu b̄ara nggomi raho poda-podamu d̄i nahu. 33Sapodakaina nggomi rau pab̄uaku kasi ade d̄i lengamu ede, b̄une nahu mawa'ura kasi ade d̄i nggomi?’ 34Sangaji ede nawancuku mbanina. Adana ma dab̄ae ede tauna ade uma bui sampe cola kanggori sara'ana nconggona ede.”
35Ruma Isa kanggorina carita-Na kai nggahina ake, ”B̄une ede rauku Ama-Ku d̄i saroga nakalampaku d̄i cua-cua ndai nggomid̄oho, nggara nggomid̄oho wati kangampu weamu cina ra angimu kai nira ade.”
Tans Gekies:
MATIUS 18: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
