Jɛ́nɛ́sì 48
48
Jékɔ̀ po Mànásì kè Ífèɖèìn mana kɔ̃
1Wé ɖòɛ̀ ɓaɖaa, wa cɛ̃ɛ ma Jòsé gbo, ké wa ɖá, “M̀ ɓǎ nì wɛ́ińo.” Púɛɛ, ɔ ɖú ma ɔ dyú-gàà sɔ̃́ ɓě mɔ̀à Mànásì kè Ífèɖèìn kɛɛ dyí, ké wa mu ma ɖé ɔ ɓǎ gbo. 2Ti ɓɛ́ wa cɛ̃ɛ ma Jékɔ̀ gbo kà ɔ dyú Jòsé dyi ma ɔ gboɛɛ, púɛɛ, ɔ po ma ɔ mìɔùn kpéí, ké ɔ sɔ̀ ma ɔ gbɛɔ̀ kɔ̃ dyí, ké ɔ kò dyi. 3Hwɛ̀ ké ɔ cɛ̃ɛ ma Jòsé gbo, ké ɔ ɖá, “Kpé-séín-ɓéɖé-Gèɖèpɔ́ɔ̀ wóɖóìn ma ḿ dyí ɖé Ɖúzì-hwɔ̀ɖɔ̀ nìà ɖé Kénà-ɓòɖòɔ̀ kɔ̃ɛɛ mú, ké ɔ po ma ḿ mana kɔ̃, 4ké ɔ ɖá, ‘Gmɔ̀ nɔ̄, ní muɛ nyuùn ɓɛ́ m̀ ké dúún zaìn, ɓɛ́ m̀ ké dyí vò mìɔ. Ní mu m̀ nyɔ kúɖúú mú nyuùn. Ké ní mu m̀ ɓóɖó nìà kɛ nyíìn, ɓɛ́ ɔ ké m̀ kè nì xwíníín-dyù ɓěɔ̀ kɔ̃̀ɔ̀-ɖɛ̀ jǔ kánáá pū.’
5“Ɔ jèɛɛ, Jòsé, ɓó kàǔn wɛ̃ɛ, nì dyú sɔ̃́ ɓě mɔ̀à Ífèɖèìn kè Mànásì ɓɛ́ m̀ wóɖóàìn nɔ̄ Íjè-ɓòɖòɛ̀ kɔ̃, hwɛ̀ ɓɛ́ ḿ dyià nɔ̄ m̀ gbo dyiɛɛ mɔ̀ ní dyú ɓě ɖekè. Wa mɔ̀ ní dyú ɓě kà Wuɖuɓíín kè Símìɔ̀ nìà kɛ. 6Kɛɛ dyú ɓě nì mu ɓó wóɖóìn ɖeɛɛ mu nììn dyú jǔùn. Wa nììn dúí-sè-ɖɛ̀ wa mu dyéìn nyɛɛ mu ɖé ní dyú ɓě mɔ̀à Ífèɖèìn kè Mànásì kɛɛ mú dyììn. 7Ɖɛ kɔ̃̀ jè ḿ nìà nyuɛń nyɛɛ mɔ̀, ti ɓɛ́ ḿ nì ma ɖé Páɖàùn-Áwàɖàùn-ɓòɖòɔ̀ kɔ̃ sɔ̀ǔn wɛ̃ɛ, púɛɛ, wìì-ɖɛ̀ ɖò kpá ma ḿ gbo. Wìì-ɖɛ̀ɔ̀ mɔ̀ m̀ ɖe Wéɖécà mɛ́ìn ma ɖé Kénà-ɓòɖòɔ̀ kɔ̃, ti ɓɛ́ à nì ma hwìèɔ̀ kɔ̃, ké à séè ma Ɛ́fàɖà-hwɔ̀ɖɔ̀ɔ̀ bũ̌in xwɛ̃́ìn keɛ. Ké ḿ zàìn ma ɔ ɓó Ɛ́fàɖà mɔ̀à Bɛ́fèɖèhɛ̃́ɛ̀ kɛɛ hwìèɔ̀ gbìǐ dyóɖóún.”
8-10Ɓó tia ɓaɖaa, Éézùɖùɛ̀ ní dyé ma dyi ɖe nɔ̀mɔ̀ dyíin, sepóɛɖé ɔ ɖǎ ma nyɛ mìɔ jè. Ti ɓɛ́ Éézùɖùɛ̀ dyé ma Jòséɛ̀ dyú-gàà ɓěɔ̀ bũ̌in nyɛɛ, ɔ diè ma ɖɛi, ké ɔ ɖá, “Nyɛ́ ɓě nìà kɛ́?”
Ké Jòsé ɖá, “Wa mɔ̀ dyú ɓě ɓɛ́ Gèɖèpɔ́ɔ̀ ɖǎ nɔ̄ ḿ nyí kɛ.”
Hwɛ̀ ké Éézùɖùɛ̀ ɖá, “Ní ɓaà m̀ ní, dyà nɔ̄ wa ḿ gbo, ɓɛ́ ḿ ké wa mana kɔ̃ po.” Ɔ jèɛɛ, Jòsé xwɛ̃́ìn ma ɔ dyú ɓěɔ̀ ɔ ɓǎ bũ̌in. Ké ɔ ɓǎ nyá ma wa wɔ̃, ké ɔ gbèɖèìn ma wa hwòɖǒ. 11Ké Éézùɖùɛ̀ cɛ̃ɛ ma Jòsé gbo, ké ɔ ɖá, “Ḿ seɔ́ɔ hwìɖǐi poìn kà ní muɔ́ nì dyúa dyéìn ɖeɛ, kɛɛ dyéɛ, Gèɖèpɔ́ɔ̀ ɖǎa nyu ké ḿ ɖǎ nì dyú ɓě dyé ɖekè.”
12Hwɛ̀ ké Jòsé zà ma dyú ɓěɔ̀ Éézùɖùɛ̀ ɓo kɔ̃, ké ɔ taɓa ma dú hwuɖu ɓó ɔ ɓǎ dyúa. 13Púɛɛ, ɔ ɖú ma wa sɔ̃́ɔ̀ dyí. Ífèɖèìn nì ma ɔ ɖiaún, hwɔà ɖé Éézùɖùɛ̀ kunuaún dyíɛ. Ké Mànásì nì ma ɔ kunuaún, hwɔà ɖé Éézùɖùɛ̀ ɖiaún dyíɛ. Ké ɔ xwɛ̃́ìn ma wa Éézùɖùɛ̀ bũ̌in ɖe. 14Kɛɛ Éézùɖùɛ̀ pɛ́ɛ̀ ma sɔ̃, ké ɔ cɛ̃ìn ma ɔ sɔ̃ɔ̀ kɔ̃in. Ké ɔ dè ma ɔ ɖiaùn-sɔ̃̀ɔ̀ Ífèɖèìn dú, kɛbì ɔ mɛ mɔ̀ ma dyú dyùwèɔ̀ kɛ, ké ɔ dè ma ɔ kunuà-sɔ̃̀ɔ̀ Mànásì dú, kɛbì ɔ mɛ mɔ̀ ma nyíɔ́-dyùɔ̀ kɛ.#48:14 Mana vɛ̀nɛ̀ kéɔ́ kà nyíɔ́-dyùɔ̀ kɔ̃ dyiɛɛ dyììn ɖiaùn-sɔ̃̀ɔ̀ mú. Mànásì mɔ̀ ma nyíɔ́-dyùɔ̀. 15Hwɛ̀ ké ɔ po ma wa mana kɔ̃, ké ɔ ɖá,
“Gèɖèpɔ́ɔ̀ ɓɛ́ ḿ ɓǎ Ééɓòɖòhɛ̃́ɛ̀ kè Áázè sí ma kà kíɖííɛɛ,
Gèɖèpɔ́ɔ̀ mɔ̀à ní dyí-gmɔ̀-nyɔ̀ ɖé ní fɛ̀ɛ̀-wè séín múɛɛ,
16Gèɖèpɔ́ɔ̀ ɓɛ́ ɔ zɛ̃̀àìn ínjà mú, ɓɛ́ ɔ dyià ḿ póìn sɔ̀ìn ɖé ɖɛ gbà séín xwaún wɛ̃ɛ mɛ po gàa-dyù ɓěɛ̀ mana kɔ̃.
Wa mɛ mùìn ḿ kè ḿ ɓǎ Ééɓòɖòhɛ̃́ɛ̀ kè Áázè nyɛ́nɛ́ín.
Ké wa mɛ zaìn dúún, ɓɛ́ wa ké dyí vòɛ̌n zi mìɔ nɔ̄ ɓóɖó-kpàà kɔ̃.”
17Ti ɓɛ́ Jòsé dyé ma ɔ ɓǎà ɖiaùn-sɔ̃̀ɔ̀ Ífèɖèìn dúún dèɛ̀ kɛɛ, ɔ hwòɖǒ se ma dyi dè. Ɔ jèɛɛ, ɔ kpɔ̃ ma ɔ ɓǎà sɔ̃ɔ̀ dyi, ɔ kéɛ ma Ífèɖèìn dúún zà, ɓɛ́ ɔ kéɛ ma Mànásì dúún dè. 18Ké ɔ cɛ̃ɛ ma ɔ ɓǎ gbo, ké ɔ ɖá, “Ɓɔ́ɔ náa nyuɛ, ḿ ɓǎ, sepóɛɖé nyɔ nìà kɛ mɔ̀ nyíɔ́-dyùɔ̀. Dè ɔ nì ɖiaùn-sɔ̃̀ɔ̀ dúún.”
19Kɛɛ ɔ ɓǎ nɔ́ɔ̀ ma, ké ɔ ɖá, “Ḿ dyuòɛ̀ ní, ní dyú. Ḿ dyuòɛ̀ ní. Ɔ mɔ̀ùn mu ɓóɖó-dù ɖò jǔùn ɖekè, ké ɔ mɔ̀ùn mu kpé ɓéɖéìn ɖekè. Kɛɛ wɛ̃́ɛ́ kɛɛ, ɔ ɖíí-gàà dyùwèɔ̀ mu kpé ɓéɖéìn ɓɛ́ ɔ ké ɔ dyí zi, ké ɔ xwíníín-dyù ɓě mu ɓóɖó-dù ɓáún-ɓáún jǔùn.”
20Ké ɔ mu ma dyúa, ké ɔ po ma wa mana kɔ̃ ɓó wéa ɓaɖa, ké ɔ ɖá, “Ɖé ɓěɛ̀ nyɛ́nɛ́ɔ̀ mú, ɖéɛ̀ Éézùɖùɛ̀-nyɔ̀ ɓěɔ̀ mu nyɔǔn ɓě mana kɔ̃ pòìn. Wa muɛ cɛ̃ìn, ɓɛ́ wa ké níiń, ‘Gèɖèpɔ́ɔ̀ mɛ nyu m̀ kà ɔ nyuà Ífèɖèìn kè Mànásì kɛ.’ ” Kǎà ɔ nyu ma Ífèɖèìn Mànásì dyúa zĩ̀ɛ̀n.
21Hwɛ̀ ké Éézùɖùɛ̀ cɛ̃ɛ ma Jòsé gbo, ké ɔ ɖá, “Dyéɛ, ḿ nìǎ mɛ́iń muɛń, kɛɛ Gèɖèpɔ́ɔ̀ mu ɓó ɓě gbo nììn, ɓɛ́ ɔ ké ɓě ɖé ɓě ɓǎ ɓíɖí-ɓòɖòɔ̀ kɔ̃ ɖe kpa. 22Ké ḿ nì m̀ Sɛ́kɛ̃̀ìn-hwɔ̀ɖɔ̀ ɓɛ́ ḿ zà ma kà Ámɔ̀-nyɔ̀ ɓěɔ̀ xwa dyììn ɖé ní gàsíà kè ní pɔnɔɔ̀ múɛɛ nyíɛń. Ḿ seɛ m̀ ɖíí-gàà ɓěɔ̀ ɖò nyí.”
Tans Gekies:
Jɛ́nɛ́sì 48: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
