OBUCHACHILO 49
49
Amakhuwa ka Yakobo kokhumalilikha
1Mana Yakobo nalanga abaanabe nababoolela ari, “Mwikhung'asie halala nasi ndalamuboolela akalikholekha khwinywe mutsinyanga tsitsanga.
2“Mwikhung'asie halala mwitse,
murecheresie inywe baana banje.
3“Rubeni, niwe omwana wanje omukhulundu, niwe amaani kanje,
khandi niwe omwana wanje wolusiani lwanje lwambeli,
niwe oweisunga muno khandi owamaani amanji mubasiani banje boosi.
4Oli shinga amarunda kamaatsi komuyembo.
Nebutswa shiolibakhwo neifuma ta, shichila wakona nomukhasi wanje omubiikha,
mana nofwabia eshitali shia papawo.
5“Simeoni nende Lawi nabasiani bomunda ndala,
beeranga abandu netsinganga tsiabwe.
6Isie shindalasanjilana ninabo mumikhung'ano chiabwe chiomumasilisi ta,
kata khandi shindalasanga mumakhuwa kabwe aka baboola tawe.
Shichila muburima bwabwe, beeranga abandu,
ne khandi mubuchiyikhani bwabwe baremakanga emisi chiebilenje bietsing'ombe.
7Oburima bwabwe buli mushilaamo shiobubi, shichila nobululu.
Khandi liruma liabwe lili mushilaamo shiobubi, shichila nelilulu.
Ndalabasalaasia mushialo shia Isiraeli shiosi.
Ndalabasalaasia mubandu beshielo shia Isiraeli.
8“Iwe Yuda, abasiani benywe balikhwitsoomia,
omukhonokwo kulimikanga amakosi kabasukubo.
Abasiani benywe okhuula balikhwinamila.
9 #
Obub. 24:9; Obufw. 5:5 Iwe Yuda mwana wanje, oli shinga italanyi eyihoola,
eyinyoolanga eshioluyitsi shiayo mana yiniina ikulu khumusaala.
Oli shinga italanyi eyinyiilanga niyikalakala hasi,
shinga italanyi yamaani, niwiina ounyala okhuchibuusia?
10Indabushi yoburuchi shiyilirula mumukhono kwa Yuda ta,
khandi abolwibulolwe bakhatsiililile okhuruka.
Amahanga koosi kakhamuhulilenje nikamuhelesia oluyali.
11Abohanga isishiliye khumitsabibuchie,
khandi abohanga eshimoosi shieisishiliye khumitsabibu chianera,
afuuyanga tsingubotsie mudivai,
khandi ebifwalobie mudivai inzakhanyu.
12Tsimonitsie tsiakhanye khulwa okhunywa idivai inyinji,
khandi amenoke kalabile tswe khulwa okhunywa amabeele.
13“Zebuluni alamenyanga khulukuku lweinyanza,
alaba eshimenyo shietsimeeli okhuhulushila,
olwakho lwelihangalie lulalaandaala okhuula Sidoni.
14Isakari ali shinga isishili yamaani,
eyikonile mumakondi hakari.
15Yalola mbu, habundu hokhuhuluushila ni hahalayi,
khandi mbu, eshialo eshio shiali eshilayi shiokhuchamisia.
Khulweshio yenamia amabekake ne niyekhola omusumba khumilimo.
16“Dani alakhalachila abandube eshiina.
Shinga mulala khubetsimbia tsia Isiraeli.
17Dani aliba shinga inzokha yelini khumuhanda,
khandi shinga inzokha yeshiilikoma khunjila,
eyilumanga ebilenje bieifarasi,
naye owilushilangakhwo khufarasi tsana nakwa hasi makalama.
18“Iwe OMWAMI Nyasaye, enindililanga obuhoniabwo,
19Gadi aliseerwa nabanuuli,
nebutswa naye yakhabaloondachile nabaseera.
20Omukunda kwa Asheri kwakhacheswemwo ebiokhulia ebinji,
naye Asheri yakhahelesie omuruchi ebiokhulia ebimukhoyeele.
21Nafutali ali shinga eshitsusu eshilali eshibohe ta,
eshiibulanga abaana abalayi.
22Yosefu ali shinga lisaka liomusaala okwamanga ebiamo,
ali shinga omusaala eliamanga, oluli hasebele.
Amasakake kalaandaala khwisiisi.
23Abalasani bobuyingo bamuseera obutinyu,
nibamulasa nobuyingo khandi nibamunyasia muno.
24Nebutswa obuyingobwe bwatong'a niburaliile,
nako amakhonoke kanyoolile amaani,
khulwa obunyali obwa OMWAMI Nyasaye wa Yakobo,
(muliira elia Omwaayi, khandi Olwanda lwa Isiraeli).
25Nyasaye wa papawo niye oukhukhoonyanga.
Nyasaye Owobunyali Bwosi niye oukhuhelesinjia tsikhabi,
niye oukhuhelesinjia tsikhabi tsieifula okhurula ikulu mwikulu,
khandi niye oukhuhelesinjia amaatsi okhurula mulusiba hasi,
niye oukhuhelesinjia tsikhabi tsiemiruko nende abaana.
26Tsikhabi tsia papawo akhuhelesiye,
tsishila etsiebikulu biali bia khale bieinziayo,
tsikhoya tsiaba khumurwe kwa Yosefu,
tsikhoya tsiaba khumabeka akoyo owahulwa okhurula khubasiani babwe.
27Benjamini ali shinga libwe lihalaba,
mumabwibwi liliitsanga eshioluyitsi shialio,
ne khubwile liliitsanga eshia liyimile.”
Okhufwa khwa Yakobo
28Abo nibo abetsimbia ekhimi natsibili tsia Isiraeli. Nako ako niko aka sabwe yababoolela olwa yali nabalaamilanga tsikhabi, naboolela buli mundu okhulondana shinga olwa kamukwanila.
Okhufwa nende okhuyabilwa khwa Yakobo
29Mana Yakobo nalachilisia abasianibe naboola ari, “Endi ahambi okhufwa. Muyabile halala nende abakuuka banje mumbinga yili mumukunda kwa Efuroni Omuhiti, 30#Obucha. 23:3-20muyabile mumbinga yili mumukunda kwa Makipela, ebukwe wemiruba chia Mamure mushialo shia Kanani, eya Aburahamu yakula halala nende omukunda okhurula khu Efuroni Omuhiti mbu, yibe eya Aburahamu khulwa okhuyabilangamwo abandube abafwile. 31#Obucha. 25:9-10; Obucha. 35:29Ebweneyo newabayabila Aburahamu nende Sara omukhasiwe. Ebweneo newabayabila Isaka nende Rebeka omukhasiwe. Khandi newandayabila Lea. 32Omukunda okwo halala nende imbinga yalimwo eyo biakulwa okhurula khu Abahiti.” 33#Ebikh. 7:15Olwa Yakobo yali namalile okhuhaana amebaalo khubasianibe, yakalusia ebilenjebie khushitali, ne nakwisia omwoyo nafwa, nayabuilwa kalala nende abakuukabe.
Tans Gekies:
OBUCHACHILO 49: OLUDC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
