OBUCHACHILO 44
44
Eshikombe shia Yosefu shinyoolekha mwikunia lia Benjamini
1Mana Yosefu nalaka omusinjilili wokhuteekha munzuye oyo ari, “Yitsusia eshiokhulia eshinji mumakunia kasasaba, eshia banyala okhuchinga, mana ore amapesa kabuli mundu hamunwa kwelikunialie. 2Ne ore eshikombe shianje shieifetsa hamunwa kwelikunia liomushe nende amapesake keimele.” Mana nakhola shinga olwa Yosefu yamulaka okhukhola. 3Olwa bwashia butswa mumabwibwi, ne abandu abo nibaseebulwa nibarula nibatsia netsisishili tsiabwe. 4Olwa bali nibakhatsiakhwo oluchendo lutuutu okhurula mwitookho, Yosefu yaboolela omusinjilili wokhuteekha oyo ari, “Rula olonde khubandu abo, ne lwobanyoola, obareebe ori, ‘Mbushiina nimurunga amabi khu malayi? Mbushiina mwibile eshikombe shieifetsa shiomwami? 5Shishili eshiomwami wanje anywelangamwo? Khandi shishilishio eshialakulilangamwo? Mukholile obubi obukhongo okhushibukula.’ ”
6Ne lwomusaatsa oyo yaboolakhwo, yabareeba amareebo ako. 7Nabo nibamukalusia nibamureeba bari, “Omwami, mbushiina noboola amakhuwa shinga kano? Ifwe shikhunyala okhukhola likhuwa shinga lino tawe! 8Amapesa kakhwanyoola mumakunia kefwe, khwamukalusilia okhurula mushialo shia Kanani. Kho khwakheeba khurie ifetsa noho itsahabu okhurula munzu yomwami? 9Ouba nanyoolekha nali ninashio khwifwe, lekha afwe, ne nefu khandi khube abakholibo iwe omwami wanje.” 10Omukholi oyo naboola ari, “Lekha kabe shinga lwoboolile. Ounyolekha ninashio okhuula alaba omusumba wanje. Ne abandi boosi shimulaba neshikha tawe.” 11Kho buli mundu niyeshia bwangu likunialie hasi nende okhuliboholola. 12Mana omusinjilili oyo nakonzoola mumakunia ako, nachaachila khwikunia liomusiani wabwe omukhulundu ne namalilishila khumushe mwene. Mana eshikombe eshio nishinyoolekha nishili mwikunia lia Benjamini. 13Mana abasiani abo nibarandula tsingubo tsiabwe mushibeela, ne buli mundu natuukha isishiliye omusiikokwe, nibakalukha mwilitookho.
14Olwa Yuda nende abasiani babwe boola munzu wa Yosefu, bamunyoola nashilimwo, ne nibamwinamila khulwa okhumuhelesia oluyali. 15Naye Yosefu nabareeba ari, “Eshichila nimukhola musrio nishiina? Shimumanyile mbu, omundu shinga isie endi nobunyali bwokhulakula ta?” 16Mana Yuda namukalusia ari, “Khuboole shiina kho mbu, omanye mbu, ifwe shikhuli neshika ta? Nyasaye abisuule obumayanu bwefwe, ifwe nende ounyooleeshe nali nende eshikombeshio mwikunialie, bulaano khuli abasuumbabo.” 17Nebutswa Yosefu yababoolela ari, “Shikali kario ta, Omundu weshikombe shinyoolesheele mwikunialie niye oulaba omusumba wanje, nebutswa inywe abandu bandi mukalushe khu papa wenywe nomulembe.”
Yuda asaaya khulwa Benjamini
18Mana Yuda natsia wa Yosefu yali ne namuboolela ari, “Omwami, ekhusaaya mbu, oleshe isie okhumoonyiliekhwo amakhuwa matiiti, ekhusaaya mbu, oleshe okhusinyishila, okhuba iwe oli shinga omuruchi mwene. 19Omwami, iwe wakhureeba ifwe ori, ‘Mulikhwo nende senywe kata omusiani wenywe undi?’ 20Ninefwe nikhukhukalusia khuri, ‘Khuli nende papa wefwe, naye nomukofu, khandu mbu, khuli nende omusiani wefwe omushe, omwana womubukofu bwa papa wefwe. Omwana uno, omusiani wabwe yafwa, ne niye yenyene owasikala mubaana ba nyina, khandi samwana yamuheela muno.’ 21Omwami, iwe wakhuboolela ifwe abakhalabanibo ori, ‘Mumureere wendi yino emulolekhwo.’ 22Mana nikhukhuboolela khuri, ‘Omuraaka oyo shianyala okhulekha samwana ta, okhuba nalekha samwana, ne samwana afwa.’ 23Nawe nokhuboolela ifwe abakhalabanibo ori, ‘Omusiani wenywe omushe naleetsa ninenywe ta, shimulandoleshelakhwo mumoni mwanje tawe.’ 24Olwa khwakalukha khumukhalabaniwo papa wefwe, khwamuboolela amakhuwako koosi. 25Ne olwa papa wefwe yakhuboolela mbu, khukalushe khandi khukulekhwo eshiokhulia shituutu, khwamukalusia khuri, 26‘Shikhulakholomokhakhwo Misiri ta, khulatsia butswa nikali mbu, omusiani wefwe omushe atsia ninefwe, okhuba shikhunyala okhuloleshelakhwo omundu oyo mumoni nikhulali nomusiani wefwe omushe tawe.’ 27Mana omukhalabaniwo papa wefwe, nakhuboolela ari, ‘Mumanyile mbu, omukhasi wanje Raeli yanzibulila abaana babili. 28Mulala khubo yamala okhundekha. Akhoyile okhuba niyatonywamwo ebitonye ebitonye nende tsisolo nabulimo, ne okhurula olwo eshili okhumulolakhwo khandi tawe. 29Ne nimuba nimubukula uno khandi okhurula khwisie, mana amasila kamunyoole, muba mundeereere eshibeela shiokhunzira mana muyabile.’ 30Khulweshio, iwe omwami, isie nengalukha khu mukhalabaniwo papa wanje, nindilali nomuraaka uno ta, ne obulamu bwa papa bwiletanga khubulamu bwomuraka uno, 31olwa alalola mbu, omuraaka shiali ninefwe ta, alafwa. Nefu abakhakhalabanibo khuba khuleera papa wefwe neshibeela. 32Okhuba toto isie omukhalabaniwo, nisie owasinjila mushilenje shiomuraaka uno khu papa wanje nemusuubisia mbu, ‘Nemba nindilamukalusia khwiwe ta, kho embe neshikha imbeliwo emiyika chianje chiosi.’ 33Khulweshio bulano ekhusaaya iwe omwami wanje mbu, oleshe isie omukhalabaniwo esikale shinga omusumbawo mushilenje shiomuraaka uno, ne oleshe omuraaka uno akalushe nabasiani babwe. 34Okhuba ndalakalukha endie khu papa wanje nindalali nomuraaka uno ta? Eriire okhulola amabi, akanyala okhukwila papa wanje.”
Tans Gekies:
OBUCHACHILO 44: OLUDC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
