OBUCHACHILO 45
45
Yosefu yebuula khubasiani babwe
1 #
Ebikh. 7:13
Mana Yosefu nalanyalilwa okhwisimilisia imbeli wabandu bali ninaye boosi, abali nibasinjiile aha yali tawe. Ne naboola nomwoyo omukhongo ari, “Abandu bandi boosi barule batsie elwanyi.” Kho abulaho omundu yesi yesi khubandu ba Misiri owali ninaye olwa yebuula omwene khubasiani babwe tawe. 2Mana nalila obutinyu, Abamisiri nende abomunzu yomuruchi nibahulila. 3Mana Yosefu naboolela abasiani babwe ari, “Nisie Yosefu, papa wanje ashili mwoyo noho?” Nebutswa abasiani babwe shibanyala okhumukalusia likhuwa ta, shichila bali nibaliilwe ling'ang'a imbeliwe. 4Kho Yosefu naboolela abasiani babwe ari, “Emusaaya mbu, musitekhwo hambi ninasi,” mana abasiani babwe nibasita ahambi. Mana Yosefu nababoolela ari, “Isie nisie omusiani wenywe Yosefu, owa mwakusia Misiri. 5Ne bulano shimulebeelelela abeene mbu shiochila mwangusia yino tawe. Okhuba Nyasaye niye owandeera yino kho mbu, eranjilile okhwitsa mana ehonokosie obulamu bwabandu. 6Okhuba inzala yabeele mushialo emiyika chibili chino, ne khulwa miyika chindi chirano chilondakhwo, okhulima noho kata okhuchesa shikhulabaho tawe. 7Kho Nyasaye yanzimisia isie imbeli wenywe kho mbu, emuhonokosilie inywe omusikalo khushialo, khandi mbu, emuhonokosilie abandu abanji abokhulwibulo lwenywe. 8Kho shimuli inywe abanzimisia yino ta, nebutswa ni Nyasaye. Ne Nyasaye wayakhola okhuba omukhalabani omukhongo womuruchi, khandi omwami khubomunzuye, khandi omulondi womuruchi weshialo shia Misiri shiosi.
9 #
Ebikh. 7:14
“Rulilemwo butswa mutikulushe mukalushe khu papa, ne mumuboolele mbu, omusianiwo Yosefu aboola ari, ‘Nyasaye wayakhola isie okhuba omwami weshialo shia Misiri shiosi, kholomokha witse wendi, ne shiolashinda tawe. 10Olamenya hambi ninasi mushialo shia Gosheni, iwe, abaanabo, abetsukhulubo, ebiayobio nende emianduchio chiosi. 11Olwa olaba noli Gosheni, ndalakhulinda nekhuhelesia ebia wenya, iwe nende abandubo boosi halala nende emirukochio kho mbu, muleshe okhufwa khulwa inzala, okhuba emiyika chindi chieinzala chishiliyo chirano.’ ” 12Mana Yosefu natsiililila okhuboola ari, “Inywe abeene muluutsi netsimoni tsienywe, kandi omusiani wenywe Benjamini yesi alutsi netsimonitsie mbu, nisie Yosefu mwene ouboolanga ninenywe. 13Okhula muboolele papa wanje khukoluyali lwanje mushialo shia Misiri, nende koosi akamulutsi. Khulweshio, khole bwangu, mureere papa wanje hano.” 14Mana Yosefu nakwa mwikosi liomusiani wabwe Benjamini ne nalila khandi Benjamini yesi nakwa Yosefu mwikosi ne nalila. 15Yosefu nafumbeelela abasiani babwe boosi nende okhubalililakhwo. Mana abasiani babwe nibakhupa ninaye imbakha.
16Olwa amakhuwa kahulilikha litookho womuruchi mbu, abasiani babwe Yosefu betsile, omuruchi nende abakhalabanibe bachamisibwa. 17Mana omuruchi naboolela Yosefu ari, “Boolela abasiani benywe batuushe tsisishili tsiabwe emisiko mana bakalushe mushialo shia Kanani. 18Obaboolele babukule papa wenywe nende abomunzu yenywe mana mwitse hano, nasi ndalamuhelesia omukunda omulayi mumikunda chia Misiri chiosi, ne mulalia khubunulu bweshialo shino. 19Obalache khandi babukule amakaari ketsing'ombe okhurula mushialo shia Misiri khulwa okhuchinjilakhwo abaana benywe abatuutu nende abakhaye benywe, ne mwitse nimureera papa wenywe. 20Shimulahendelakhwo emiandu chienywe ta, shichila omukunda omulayi okhushila chiosi mushialo shia Misiri nokwenywe.”
21Kho abasiani ba Yakobo nibakhola bario, mana Yosefu nabahelesia amakaari ketsing'ombe shinga omuruchi yali nalachile. Khandi yamuhelesia ebiokhwikhoonyela muluchendo lwabwe. 22Khandi yahelesia buli mulala khubasiani abo tsingubo tsimbia, nebutswa Benjamini omusiani wabwe yamuhelesia tsishekeli tsieifetsa ebikhumi bitaru nende tsingubo tsirano tsimbia. 23Ne yabahelesia tsisishili ekhumi nitsituushilwe ebindu bia Misiri ebilayi, nende tsisishili tsindi tsikhasi ekhumi nitsituushilwe imele, emikaate nende ebindu bia Samwana yekhoonyela muluchendo ebiokhuyilila samwana. 24Mana Yosefu naseebula abasiani babwe, ne olwa bali nibarulanga, yabalachilisia ari, “Shimulasoolanakhwo khunjila tawe.” 25Kho nibatikulukha okhurula Misiri niboola mushialo shia Kanani, ewa Yakobo sabwe yali. 26Ne nibamuboolela bari, “Yosefu ashili mwoyo, khandi niye omuruchi weshialo shia Misiri shiosi.” Naye niyesundukha omwoyo, shichila shiyasuubila amakhuwa kabwe tawe. 27Nebutswa olwa bamuboolela amakhuwa ka Yosefu yali nababooleele koosi, khandi olwa yalola amakaari ketsing'ombe, aka Yosefu yali nahaanile mbu, kamuchinje, omwoyo kwa Yakobo sabwe kwakalukha. 28Mana Yakobo naboola ari, “Kahelile, Yosefu omusiani wanje naba nashili mwoyo ndalatsia emulolekhwo neshili okhufwa.”
Tans Gekies:
OBUCHACHILO 45: OLUDC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
