OBUCHACHILO 14
14
Aburamu ahonokosia Loti
1Mutsinyanga tsia Amurafeli yali omuruchi wa Babulonia, Arioko omuruchi wa Elasari, Kedorilaomeri omuruchi wa Elama, nende Tidali omuruchi wa Goimu, 2baseera Bera, omuruchi wa Sodomu, Birisha omuruchi wa Gomora, Shinabu omuruchi wa Adima, Shemeberi omuruchi wa Zeboimu nende omuruchi wa Bela (noho Zoari). 3Abaruchi barano abo, bahambaania abamahe babwe halala mwibanda lia Sidimu, (nilio inyanza eyilangwa mbu, Eyomunyu). 4Khulwa emiyika ekhumi nachibili, bali abakhalabani ba Kedorilaomeri, nebutswa mumuyika kwekhumi nakhataru, bamukalukhanakhwo nibamufukula. 5Omuyika kwekhumi nakhane, Kedorilaomeri nende abamahe babaruchi bashie bahula Abarefahimu mu Ashaterotsi Karinaimu, khandi nibahula Abazuzumu mushialo shia Hamu, Abaemimu mushiangalamwe shia Kiriatsaimu. 6Khandi nibahula Abahori mubikulu bia Edomu, nibabalonda okhuula Eleparani, eyili khundulo khweshitsiimi. 7Kho nibashiukhana niboola Enimishipati (niyo Kadeshi). Nibahula eshialo shia Abamaleki nende Abamori, abamenyanga Hazazoni Tamari.
8Mana abaruchi ba Sodomu, Gomora, Adima, Zeboimu nende Bela (niyo Zoari) nibemanula, nibeetsa mwibanda mwa Sidim. 9Nibakhupana lihe nende Kedorilaomeri omuruchi wa Elamu, Tidali wa Giomu, Amurafeli wa Babulonia nende Arioki wa Elasari. Lihe liabaruchi barano khu banane. 10Libanda lia Sidimu elo liali namatikho amanji akeihula, khulweshio, olwa abaruchi ba Sodomu nende Gomora bali nibelukhanga, abandi khubo bakwamwo, nebutswa abandi beelushila mushikulu okhuhonokokha. 11Kho abasuku abo nibayaaya emiandu chia Sodomu nende Gomora chiosi, nende ebiokhulia ebialimwo biosi ne nibarulaho nibatsia. 12Khandi babukula Loti omwana womusiani wabwe Aburamu, owamenyanga Sodomu, nibabukula halala emianduchie chiosi ne nibatsia.
13Mana omundu mulala, owali nahonokooshe okhurula mumakhono kabaruchi abo, yetsa naboolela Aburamu, Omuheburania wali niyamenya ahambi nende emiruba chia Mamure, khandi naboolela Omuamori, owali omusiani wabwe Eshekoli nende Aneri, abali nibakhola indakano nende Aburamu okhumunga omukhono. 14Olwa Aburamu yahulila mbu, batiilile omwikhowe Loti, yakhung'asia abelihebe ebikhumi bitaru nende ekhumi namunane, ne nabalondachila okhuula Dani. 15Ne mushilo, yakabula abandube belihe mumikanda, nibelukhasia abasuku ne nibabahula. Aburamu nabelukhasia okhuula Hoba, litaala elili emasaba wa Damasiko. 16Mana nabanunula nende okhuchelesia emiandu chiali nichiyayilwe chiosi. Nachelesia Loti nabakhasibe, emianduchie nende abandu bandi boosi abali nibatiililwe.
Melikizedeki amusabila Aburamu ikhabi
17Olwa Aburamu yachelela okhurula mwihe, omwa yali nahulile Kedorilaomeri khandi nahulile abaruchi bandi, omuruchi wa Sodomu yarula natsia okhumwakaanila mwibanda lia Shawe (elilangwa khandi mbu, Libanda elia Omuruchi). 18#Abaheb. 7:1-10Kho Melikizedeki, owali omuruchi wa Salemu khandi omwisaaliisi wa Nyasaye Omukhongo Muno, yareerera Aburamu omukaate nende idivai, 19namulaamila tsikhabi naboola ari, “Nyasaye Omukhongo Muno, owalonga likulu nende eshialo, ahelesie Aburamu tsikhabi! 20Nyasaye Omukhongo Muno, owakhunyalila okhuhula abasukubo, yeetsoomibwe!” Mana Aburamu namuhelesia Melikizedeki eshitonye shielikhumi shiokhubindu biosi ebia yachelesia.
21Mana omuruchi wa Sodomu naboolela Aburamu ari, “Tong'a nemiandu chioyayile echio, nebutswa ungalusilie abandu banje boosi.”
22Nebutswa Aburamu yamukalusia naboola ari, “Nditsuba imbeli ewa OMWAMI Nyasaye, Omukhongo Muno, omulonji welikulu nende eshialo 23mbu, shienyala okhubukula eshindu shiosi shiosi eshishio kata oluusi noho olutsaha lweshilaaro tawe, wakhetsukhana waboola ori, ‘Nisie ouyindihasiye Aburamu.’ 24Shindalabukulakhwo eshindu shiosi shiosi ta, habula ebiokhulia ebiabandu banje barumishiile. Khandi oleshe abetsa banje Aneri, Eshikoli nende Mamure babukule omukabo kwabwe.”
Tans Gekies:
OBUCHACHILO 14: OLUDC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
