Matio 24

Nyɔsoa-a slaǎ sà gbò-a mu̍-u gbɔ̀lɔ

(Maɛ 13.1-2; Luu 21.5-6)

1Ti̍ Jusu sɔ-a dě Nyɔsoa-a slaǎ sà gbò we̍ ɔ̍ mu̍-a la̍-ɛ, wɛ̀ ɔ̍ kòà ji̍, iě u̍h dǎɛ ɔ̍ de̍, u̍h iě ɛ̍ gbòᵻ diih ɔ̍ toe. 2Wɛ̀ ɔ̍ la̍a̍, “Bɔ̌ ǐn sèàɛ̍ mɔ̀ wlùh, ìh kli̍hgbɛ̍ la mɔ̀-a jě i̍h, jɛ sɔɔ̌ᵻ u̍h poe-a gbò la-ɛ, i̍h-a dɛ̍ se̍ dǒ i̍h ba̍ kɛ̍n sie mu̍. I̍h-a mu̍ wlǎ-ɛ kli̍hgbɛ̍.”

Wě ke klě jě-ɛ

(Maɛ 13.3-13; Luu 21.7-19)

3Jusu wɔ̀-a dɛ̍ la wlu-ɛɛ, wɛ̀ ɔ̍ mu̍ dě Ɔle-Tu̍ᵻá Tlu̍h kɛ̍n. Wɛ̀ ɔ̍ kòà chɛn gbɔ̍i̍ u̍h mu̍ dě ɔ̍ we̍. U̍h la̍a̍, “Sèàɛ̍ à wlùh, ti̍we̍ ìh la i̍h-a mu̍ nɛ ɛ? Nɛ̀ ti̍ àn mu̍-a de̍ ji̍-ɛ ke ti̍-a dlǔ i̍ chlà-a ke, dɛ̍ bo ɛ̀ mu̍ juola nu̍ à iě i̍ juo ɛ?”

4Jusu la̍a̍, “Mɔ̀ nu̍ mɔ̀-a chɛ̀-a nɛnɛ̌ wɛ̀ nyɔ̍-ɔ je̍e mɔ̀ i̍ boe. 5Dɛ̍nu̍ɛ, nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka dǎ, ‘Mɔ̍ bo ɔ̀ nu̍ Nyɔsoa-a Chèɛ̀ Tba̍ju.’ Wɛ̀ u̍h iě nyɔ̍ dɔu i̍ boe. 6Mɔ̀-a mu̍ tu̍h-a fɔ̀n-ɔ slɛ̀ wɔ̌n ɛ̍ iě mɔ̀ i̍ kɔǎn-ɛ, wɛ̀ mɔ̀ iě tu̍h-a pɔ̀n wɔ̌n dě tà tɔ̀ɔ̀n. Jɛ ɛ̍ bɔ̌ mɔ̀ sèò nui-ɛ. Ìh kaɛn la i̍h-a mu̍ nɛ, jɛ nɛ̀ ɛ̍ se̍ ti̍-a dlǔ i̍ chlà-a ke̍. 7Bloa̍ ke bloa̍-a mu̍ fɔ̀n, wɛ̀ kɔ̀mla̍ ke kɔ̀mla̍ iě fɔ̀n. Nɛ̀ wlù poɔ-a mu̍ blǔh kli̍hgbɛ̍ i̍ sèke, wɛ̀ mɔ̌ iě gbǎ. 8Ìh kli̍hgbɛ̍ la i̍h wɔ̀ ka nynɔ̌-a kwlǐ-a tɛ̀n gbǐh ɔ̍ iě gbàɔ̀n sà-ɛ.

9“Nɛ̀ mɔ̀-a mu̍ gbɛ̍n-ɛ, u̍h iě mɔ̀ klě jě-e, wɛ̀ mɔ̀ iě ɛ̍ sɔ̀n mɛ̌-ɛ. Nɛ̀ ǎn tìh-ɛ nyɔ̍ kli̍hgbɛ̍-a mu̍ mɔ̀ faɛn. 10Ɛ̍ ti̍ laa̍ nɛ̀ nyɔ̍ dɔu-a mu̍ u̍h-a wlùh gbaɛ i̍ tǎli. Nɛ̀ u̍h-a mu̍ sà ìn ba̍ kwlǎ ìn ba̍ sà ìn kwlǎ nu̍ dě nyɔ̍ duuh we̍. Jɔ-ɛ, nɛ̀ ɔ̍ mu̍ ɔ̍ ba̍ faɛn. 11Nɛ̀ Nyɔsoa-a tu̍owli po̍ nyɔ̍-a si̍h naɛ dɔu-a mu̍ mɔ̀ kɛ̍n wlǔh-i, u̍h iě nyɔ̍ dɔu i̍ boe. 12Ɛ̍ ti̍ laa̍ kà kɔn-ɛa kɛ̍n gbǎ tìh bo ɛ̀ mu̍ nyɔ̍ dɔu-a jbɛɛ seɔn po̍. 13Jɛ nyɔ̍ ɔ̀ mu̍-ae klì i̍ ku̍ wɛ̀ ɛ̍ iě-a dlǔ i̍ chlà-ɛ, nɛ̀ ɔ̍ mu̍ pǔh. 14Nɛ̀ Nyɔsoa-a kmɔ̌ wlu̍ i̍ kɔn-ɛa pɔ̀n chɛ̀ la ɛ̍ tìh-a mu̍ bla̍-ɛ dě kmɔ̌ gbàǐ la we̍, nyɔ̍ kli̍hgbɛ̍ iě i̍h wɔ̌n. Wɛ̀ ti̍-a chlà-a iě ji̍-ɛ dǔ.

Jusu sà bɔ̌ɛ-o wǐh-a tìh i̍

(Maɛ 13.14-23; Luu 21.20-24)

15“Mɔ̀-a mu̍ slèwlì dɛ̍ ɛ̀ sàɛ̀-a nyɔ̍-a dlǔ wìè-eɛ jě. Ɛ̍ kɔn tìh bo Nyɔsoa-a tu̍owli po̍ nyɔ̍ Danio bla̍. Ɔ̍ la̍ ɛ̍ mu̍ i̍ nyna dě slaǎ sà gbò sɔ̀n.” Nyɔ̍ mu̍-a ɛ̀ la slè-ɛ, bɔ̌ ɔ̍ wɔ̌n ɛ̍ we̍i̍ chɛ̀gbɛɛ. 16“Nɛ̀ nyɔ̍ ùh nɛ-a dě Judia fɔɔ-ɛ, u̍h ple̍ u̍h iě dě tlu̍hᵻ kɛ̍n i̍ mu̍. 17Nɛ̀ nyɔ̍ ɔ̀ nɛ-a dě gbò pɛ̍lɛ dlǔ i̍ kɛ̍n-ɛ, dě ɔ̍ iě waɛn la̍ sǔh, jɛ nɛ̀ ɔ̍ bɔ̌ dɛ̍-ɛ dǔ la̍ mu̍-ɛ dɛ dě de̍ gbò. 18Nɛ̀ nyɔ̍ ɔ̀ nɛ-a dě klè-ɛ, ɔ̍ bɔ̌ ɔ̍ dɛ̍wlo̍o̍ bola̍a̍ mu̍-ɛ dě de̍ wlɔ̀. 19Dǒ wǐh laa̍ di̍i̍, nɛ̀ ɛ̍ mu̍ wɔ̍n kma-dɛ̍ nu̍ dǒ kwlǐᵻ nynɔ̌gbaɔᵻ we̍, ɛ̍ ke juh-a nyǎ-ɛa nynuu̍-ɛ ke. 20Mɔ̀ ba̍le wɛ̀ mɔ̀-a ple̍-ɛ je̍e dě wìla̍ di̍i̍ nu̍, ɛ̍ ke dǒ wlè-weɛ̍ di̍i̍ ke. 21Dɛ̍nu̍ɛ, dǒ ti̍ laa̍ di̍i̍ jua̍i̍ sàɛ̀-ɛ ɛ̀ kɔn ba̍-a se̍a nɛ sɔ dě kmɔ̌-a gbɔ̀ tè la̍ wɛ̀ ɛ̍ iě-a ka ti̍ la jɛɛ-ɛ, nɛ̀ ɛ̍ bo ɛ̀ mu̍ nɛ. Sakǒ, ɛ̍ blaiɛ̍ se̍ gba̍ nɛ dɛ. 22Pò wǐh la i̍h se̍ dlǔ i̍ chɛ̍n-ɛ de-ɛ, nɛ̀ nyɔ̍ se̍-o tàn mu̍ de. Jɛ nyɔ̍ ùh Nyɔsoa tba̍-a chèɛ̀-ɛ, u̍h-a tìh bo ɔ̍ mu̍ wǐh la dlǔ i̍ chɛ̍n.

23“Nɛ̀ pò nyɔ̍ la̍a̍ dě mɔ̀ we̍, ‘Mɔ̀ gbɛ̀n-e, Nyɔsoa-a Chèɛ̀ Tba̍ju la da̍a,’ àe̍e̍, ‘Ɔ̍-ɔ nɛ-a dě de̍à,’ nɛ̀ mɔ̀ bɔ̌ i̍h tìh chɛ̀ po̍-ɛ. 24Dɛ̍nu̍ɛ, Nyɔsoa-a Chèɛ̀ Tba̍ju-a si̍h naɛ ke Nyɔsoa-a tu̍owli po̍ nyɔ̍-a si̍h naɛ-a mu̍ mɔ̀ kɛ̍n wlǔh-i, u̍h iě nyɔ̍ wɔ̍n flɔn-ɛ dɛ̍ᵻ ke jbaɛdih po̍, wɛ̀ u̍h iě nyɔ̍ i̍ boe. Nɛ̀ pò ɛ̍ nɛ ɛ̍ ka̍-ɛ, nyɔ̍-a chɛ̀ ùh Nyɔsoa tba̍-a chèɛ̀-ɛ, nɛ̀ u̍h-a mu̍ u̍h i̍ boe ke. 25Gbɛ̀n-e, ǎn si̍e̍ ti̍ nya̍ wɛ̀ ǎn sèàɛ̍ mɔ̀ wlùh duedɛ.

26“Ɛ̍ tìh-ɛ, pò nyɔ̍ la̍a̍ dě mɔ̀ we̍, ‘Ɔ̍ nɛ dě pòɛ̍ɛ̍ kɛ̍n o-ɛ,’ mɔ̀ bɔ̌ deě mu̍-ɛ. Àe̍e̍ pò u̍h la̍a̍, ‘Ɔ̍ nɛ dě gbòju di̍i̍-ɛ,’ mɔ̀ bɔ̌ i̍h tìh chɛ̀ po̍-ɛ. 27Dɛ̍nu̍ɛ, ɛ̀ kɔn ba̍ nǐ-a chlɛ-a jlǐh dě blǔh kwea̍i̍ wɛ̀ ɛ̍ tɛ̀àn-a sǐ-a dě sɔ̀ni̍-ɛ, kǎ Nyi̍ɔ̍-a Jǔ-a mu̍ ji̍-ɛ nu̍.

28“Nɛ̀ɛ̍, tà mɛ̌-ɛ kǔ nɛ-aɛ, nɛ̀ dě-e bo chìsǐᵻá gbòe i̍.”

Nyi̍ɔ̍-a Jǔ-a ji̍-ɛ la

(Maɛ 13.24-27; Luu 21.25-28)

29Jusu la̍a̍, “Dǒ wǐh laa̍ di̍i̍ pò jua̍i̍ sàɛ̀ la ɛ̍ chɛ̍n i̍-ɛ, ɛ̍ se̍-o wlè mu̍, nɛ̀ jlǔh-a mu̍ gbe, nɛ̀ chǔh se̍ fa̍n mu̍ dɛ. Nɛ̀ chǔhtlɛ̀n-a mu̍ dě ja̍u̍n wlì blu̍. Nɛ̀ gbǐh nɛ-a dě ja̍u̍n wlì-ɛ, i̍h-a mu̍ tèla̍ wlǔh. 30Dǒ ti̍ laa̍ di̍i̍ nɛ̀ Nyi̍ɔ̍-a Jǔ-a juola-a mu̍ dě ja̍u̍n wlì wlǔh-i. Nɛ̀ kmɔ̌ nyi̍ɔ̍ kli̍hgbɛ̍-a mu̍ sùàɛ̀n pa̍. Nɛ̀ u̍h-a mu̍ Nyi̍ɔ̍-a Jǔ jě ɔ̍ iě dě nǐgbanᵻ kɛ̍n naɛ dě ja̍u̍n wlì dǒ gbǐh ke tìh-a i̍ bɛ̌-ɛ ɛ̀ ku̍-a wɔ̍n-ɛ we̍. 31Nɛ̀ dɔ̍gbɛ̍-a mu̍ wlu, wɛ̀ ɔ̍ iě ɔ̍ ǐnchɔ̀ blǔh kàɛ̀n nɛ-a nyìɛ̍-ɛ kɛ̍n i̍ dbo̍. Wɛ̀ i̍h iě Nyɔsoa-a chèɛ̀ tba̍ nyɔ̍ i̍ gbòe, sɔ dě blǔh-a siee la ìè dě dɛɛ we̍ mu̍.

Fei-tu̍-a cheǎn-a dɛ̍

(Maɛ 13.28-31; Luu 21.29-33)

32“Tlo-tu̍ u̍h-a dǎɛ-a fei-ɛ, dǒ ɛ̍ pùn bo mɔ̀ iě dɛ̍ cheǎn-ɛ. Pò mɔ̀ jě ɛ̍ wlɔ̍nᵻ i̍h po̍ plɔ̀ᵻ wɛ̀ i̍h iě wa̍ wɛ̀-ɛ, nɛ̀ klǎᵻ wlè nɔɔ-a kɔǎn la̍ we̍. 33Nɛ̀ pò mɔ̀ jě ìh kli̍hgbɛ̍ la i̍h ja la̍ nɛ-ɛ, nɛ̀ mɔ̀ juo-o dɛ̍ i̍ ka ti̍ kɔǎn-a we̍ wɛ̀-ɛ. Ɛ̍ nɛ dǒ mɔ̀-a gbò wɔ̍i̍n wɛ̀. 34Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ la ùh nɛ-a ka kmɔ̌-ɛ, u̍h se̍ mɛ̌ mu̍ te̍e̍ wɛ̀ ìh kli̍hgbɛ̍ la i̍h iě gbǎ. 35Blǔh ke ja̍u̍n-a tìh-a mu̍ i̍ sì, jɛ ǎn wlu̍ nɔ̀ɔ̍, ɛ̍ se̍ i̍ sì mu̍.

Nyɔ̍ se̍ ɛ̍ weɛ̍ ke ɛ̍ ti̍ juo

(Maɛ 13.32-37; Luu 17.26-30, 34-36)

36“Weɛ̍ ke ti̍ Nyi̍ɔ̍-a Jǔ-a mu̍-a de̍ ji̍-ɛ, nyɔ̍ dɔɔ se̍ ɛ̍ juo. Nyɔsoa-a ǐnchɔ̀ nɛ-a dě ja̍i̍wlɔ̀-a chɛ̀-ɛ, i̍h se̍ ɛ̍ juo. Jǔ-a chɛ̀ wɔ̍ se̍ ɛ̍ juo ke. Jɛ Baa nɛ due gbài̍ bo ɔ̀ juo ti̍ ke weɛ̍ laa̍. 37Dɛ̍ ɛ̀ nɛ-a dǒ Nɔa-a ti̍ we̍-ɛ, ɛ̍ kɔn ba̍ bo ɛ̀ mu̍ nɛ ke dǒ Nyi̍ɔ̍-a Jǔ-a ji̍ la̍. 38Dɛ̍nu̍ɛ, ti̍ nǐ laa̍ ɛ̍ iě-a jǐ-ɛ, nɛ̀ nyɔ̍gbei-a di̍-e dɛ̍ i̍, u̍h-a nǎ. Nɛ̀ nynɔ̌gbaɔᵻ ke jɔ̍gbauᵻá tǐn-i blǐ. Ɛ̍ bo u̍h nɛ dǒ nu̍ la̍ wɛ̀ Nɔa pa̍ dě ɔ̍ blǎgbè klaa laa̍ di̍i̍. 39Jɛ dɛ̍ ɛ̀ mu̍-a nɛ-ɛ, u̍h se̍ ɛ̍ juo te̍e̍ wɛ̀ jǐ-nǐ ji̍, iě ɛ̍ gba̍ u̍h kli̍hgbɛ̍. Ɛ̀ laa̍ ɛ̍ kɔn ba̍ bo ɛ̀ mu̍ nɛ ke dǒ Nyi̍ɔ̍-a Jǔ-a ji̍ la̍. 40Nɛ̀ jɔ̍gbauᵻ sɔɔ̌n-a mu̍ dě klè sǐi, wɛ̀ due iě-e dǔ-iɛ, wɛ̀ ɔ̍ ba̍ iě sie. 41Nɛ̀ nynɔ̌gbaɔᵻ sɔɔ̌n-a mu̍ dǒ dɛ̍ du̍ la̍ plɛɛn, wɛ̀ due iě-e dǔ-iɛ, iě due iě-o sie. 42Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌, dɛ̍nu̍ɛ, weɛ̍ mɔ̀-a Joi-a mu̍-a ja-a, mɔ̀ se̍ ɛ̍ juo. 43Jɛ dɛ̍ mɔ̀ iě-a juo-ɛ, ɛ̍ nu̍ pò gbò joi juo dɛ̍ i̍ de ti̍ jlǐ-nyɔ̍-a mu̍-a dě ɔ̍ we̍ gbò ji̍ maɔ̍-ɛ, nɛ̀ ɔ̍ se̍ nyinɔ̍ i̍ gbǎ mu̍ de wɛ̀ jlǐ-nyɔ̍-ɔ je̍e pa̍. 44Nɛ̀ɛ̍, mɔ̀ po̍ mɔ̀-a chɛ̀ gba̍a̍. Dɛ̍nu̍ɛ, ti̍ mɔ̀ se̍-a Nyi̍ɔ̍-a Jǔ-a tìh gbàɛ̀-ɛ, dǒ ɔ̍ mu̍ ji̍-i.

Wlì tè pòi̍ju la

(Luu 12.41-48)

45“Nyɔ̍we̍ bo ɔ̀ nu̍ wlì tè pòi̍ju wɛ̀ ɔ̀ flɔn di̍i̍ ɛ? Ɔ̍ kɔn kwa̍a̍ bo ɔ̍ dlǔtu si̍e̍ ɔ̍ gbò, wɛ̀ ɔ̍ iě ɔ̍ ba̍ᵻ pòi̍nynuu̍ di̍-dɛ̍ nyǐ pò ti̍ blaɛ i̍-ɛ. 46Nɛ̀ ti̍ ɔ̍ dlǔtu-a mu̍-a de̍ ji̍ wɛ̀ ɔ̍ iě ɔ̍ dbo̍ chɛ̀ nu̍ la̍ jɛɛ-ɛ, nɛ̀ pòi̍ju laa̍ ɔ̍ nmɔ i̍. 47Tìh-a taǐn ǎn sèàɛ̍ mɔ̀ wlùh, nɛ̀ ɔ̍ dlǔtu-a mu̍ ɔ̍ dǒ ɔ̍ kɔn-dɛ̍ᵻ kli̍hgbɛ̍ dlǔwèàì po̍. 48Jɛ pò gblɛ̍n-ɛ jii̍ nyni pòi̍ju laa̍ ɔ̍ dǎ ka dě ɔ̍ chɛ̀ we̍, ‘Ǎn dlǔtu la ɔ̍ wlè-o ji̍ la̍-a.’ 49Wɛ̀ ɔ̍ iě ɔ̍ ba̍ᵻ pòi̍nynuu̍ bla̍, ɔ̍ ke nmɔ̍-a nu̍ nyɔ̍ iě dɛ̍ we̍ di̍-i u̍h iě nǎ-ɛ, 50nɛ̀ weɛ̍ ɔ̍ se̍-a gbàɛ̀-ɛ dǒ ɔ̍ dlǔtu-a mu̍ ji̍-i, ɛ̍ ke ti̍ ɔ̍ se̍-a wlùh kɛ̍n tè-ɛ ke. 51Nɛ̀ ɔ̍ dlǔtu-a mu̍ ɔ̍ dě kàn gbèèɛ̀ po̍ dě nyɔ̍ ùh nɛ-a mɛɔ sɔɔ̌n wɔ̍ɔ̍n-ɛ nynɛ̌. Dě ɔ̍ mu̍ nɛ ɔ̍ iě fìn, ɔ̍ iě nynɛ̌ di̍ kìàǎnkìàǎn.”

Tans Gekies:

Matio 24: KDNT

Kleurmerk

Deel

Kopieer