Matio 17

Jusu-a sàɛ̀-ɛ

(Maɛ 9.2-13; Luu 9.28-36)

1Wǐh mɛ̀o̍ sì-aɛ, wɛ̀ Jusu dǔ Pitɛ ke Chiin ke ɔ̍ de̍di̍i̍ Chɔɔn. Iě ɔ̍ gba̍ u̍h dě tlu̍h tɔ̀ɔ̀n due dlugbɔ̌. U̍h nɛ due ke ɔ̍ nɛ deě. 2U̍h iě-ae gbɛ̀n-ɛ, nɛ̀ ɔ̍ sàɛ̀ wɛ̀ dǒ u̍h jlǐhwai. Nɛ̀ ɔ̍ jua̍a̍-a fa̍n-ɛ ka jlǔh-ɛ, iě ɔ̍ jlii̍ nɛ pɔ̀ɔ̀ ka kǒ gbo̍-ɛ. 3Dǒ u̍h jě-e Mose ke Ilaɛja, nɛ̀ u̍h ke Jusu-a chɛ̍n sɔ̀ìn. 4Wɛ̀ Pitɛ la̍a̍ dě Jusu we̍, “Joi, ɛ̍ nmɔ jii̍ wɛ̀ à nɛ da̍a. Pò ɛ̍ ja ìn gbǐh po̍ mu̍-ɛ, nɛ̀ ǎn mu̍ wɛ̀ɛ̀ sɔ̍n wlù ta̍a̍n po̍, ìn kɔn due, Mose kɔn due, nɛ̀ Ilaɛja kɔn due.”

5Ɔ̍ nɛ dǒ wlu la̍ sǔh wɛ̀ nǐgban ji̍ iě ɛ̍ kaɛn dǒ u̍h dlǔwèàì. Dǒ wlu̍ sɔ-ɛ dě ɛ̍ di̍i̍, ɛ̍ la̍a̍, “Ɔ̀ la ǎn tìh kma Jǔ bo, ǎn wlùh tè i̍ dǒ ɔ̍ we̍. Mɔ̀ tù ɔ̍ wlu̍ dounᵻ.”

6Ti̍ ɔ̍ kòà wɔ̌n-a wlu̍ la-ɛ, sɔ dɛ̍ wa̍ u̍h we̍ sǔh, iě u̍h chlìi i̍ dǒ bloɔ̍. 7Jɛ Jusu ji̍-aɛ, iě ɔ̍ tǔh u̍h i̍, ɔ̍ la̍a̍, “Mɔ̀ bɔ̌ faɔn ple̍-ɛ, mɔ̀ sɔ bloɔ̍.” 8U̍h dǔ-a dlǔ ja̍i̍-ɛ, nɛ̀ Jusu nɛ due bo u̍h-a jě la̍.

9U̍h-a sɔ-a la̍ dě tlu̍h kɛ̍n-ɛ, wɛ̀ Jusu tù u̍h slɛ̌n, ɔ̍ la̍a̍, “Dɛ̍ ɛ̀ mɔ̀ jě-a tiɔ dě tlu̍h dlugbɔ̌-ɛ, mɔ̀ bɔ̌ nyɔ̍ dɔɔ wlùh sèàɛ̍ te̍e̍ wɛ̀ Nyi̍ɔ̍-a Jǔ iě-e wlǔh o.”

10Wɛ̀ ɔ̍ kòà tèle ɔ̍ i̍, u̍h la̍a̍, “Dɛ̍nu̍ u̍h la̍ Ilaɛja bo ɔ̀ kɔn ɔ̀ iě ji̍ sàì ɛ?”

11Ɔ̍ la̍a̍, “I̍i̍n, kǎ ɛ̍ nɛ. Ilaɛja-a mu̍ ji̍ wɛ̀ ɔ̍ iě dɛ̍ᵻ kli̍hgbɛ̍ gba̍a̍ po̍. 12Jɛ ǎn sèàɛ̍ mɔ̀ wlùh, Ilaɛja ji̍ wɛ̀ se̍e̍, iě u̍h se̍ ɔ̍ i̍ juo. Wɛ̀ u̍h nu̍ ɔ̍ kà i̍ ka u̍h-a pɔ̀n-a u̍h iě-a ɔ̍ kà i̍ nu̍-ɛ nu̍-ɛ. Kǎ Nyi̍ɔ̍-a Jǔ-a mu̍ tìh jě-ɛ nu̍ ke dě u̍h kwa̍a̍.”

13Dɛ̍ ɔ̍ bla̍-aɛ, sɔ ɔ̍ kòà juo-o dɛ̍ i̍ ka ɔ̍ se̍-a Ilaɛja dǎ-a, jɛ Chɔɔn ɔ̀ po̍-a nyɔ̍ nǐ dlǔ-ɛ bo ɔ̍ dǎ-aɛ.

Jusu pǔh-i dbaǎdɛ-a nu̍ jǔwɛ

(Maɛ 9.14-29; Luu 9.37-43)

14Ti̍ u̍h ji̍-a dǒ nyɔ̍ tlùgbei̍ we̍-ɛ, jɔ̍gbau due ji̍ dǒ Jusu we̍, wɛ̀ ɔ̍ chlìi i̍ dǒ ɔ̍ jǔ. 15Ɔ̍ la̍a̍, “Nyɔ̍ klaa, jě ǎn jǔ la wɔɛ lě. Dbaǎdɛ-a nu̍ ɔ̍-ɛ, sɔ ɛ̍ sàɛ̀ ɔ̍ jua̍i̍ kaa̍. Ɛ̍ po̍ ɔ̍ jlǐh chɛ̍chɛ̍, ɛ̍ ke dě niɔ̍ ke. 16Ǐn ja ɔ̍ da̍a àn kòà we̍ jɛ u̍h se̍ ɔ̍ pǔh-iɛ bɛ̌ɛ.”

17Wɛ̀ Jusu la̍a̍, “Mɔ̀ɔ̍ ti̍laa nyɔ̍ la, mɔ̀ se̍ wlùh gbaɛ blě. Mɔ̀-a nu̍ tba̍ɛ kɛ̍n i̍. Ti̍ tìèwe̍ iě da̍a mɔ̀ we̍ nu̍ ke̍ gbɔ̀ɔ ɛ? Ka iě mɔ̀-a tìh nu̍ ɛ? Mɔ̀ ja jǔwɛ laa̍ nɔ̌ ǐn we̍.” 18Wɛ̀ ɔ̍ sèàɛ̍ jeědih laa̍ wlùh ɛ̍ iě dǒ jǔwɛ de̍e̍ sɔ, iě ɛ̍ sɔ dǒ ɔ̍ de̍e̍, wɛ̀ ɔ̍ pǔh dǒ tàdùè laa̍.

19Wɛ̀ ɔ̍ kòà chɛn gbɔ̍i̍ u̍h mu̍ dě ɔ̍ we̍, iě u̍h tèle ɔ̍ i̍. U̍h la̍a̍, “Dɛ̍nu̍ wɛ̀ à nɔ̀ɔ̍, à se̍ jeědih dǒ jǔwɛ la de̍e̍ sà-a bɛ̌ɛ ɛ?”

20Iě Jusu la̍a̍ dě u̍h we̍, “Dɛ̍nu̍ɛ, mɔ̀-a Nyɔsoa wlùh gbaɛ bo ɛ̀ se̍ i̍ ku̍ kaa̍ dɛbo. Jɛ tìh-a taǐn ǎn sèàɛ̍ mɔ̀ wlùh, pò mɔ̀ blě wlùh gbaɛ-a chɛ̀ ɛ̍ wàn i̍ ka majlɛkɛ jɔɛ̍-ɛ, nɛ̀ pò mɔ̀ nàa̍ dě tlu̍h la we̍ sɔ da̍a ìè de̍à mu̍-ɛ, nɛ̀ ɛ̍ mu̍ mu̍. Nɛ̀ dɛ̍ se̍ kmu mu̍ dǒ mɔ̀ we̍. [ 21Jeědih kaɛn la dɛ̍ dɛɛ se̍ ɛ̍ klà sà, ba̍le-ɛ ke jlǔh po̍-ɛ due gbài̍ bo ìh sà ɛ̍ klà.]”

Jusu gba̍ ɔ̍ mɛ̌ɛ dɛ kɛ̍n i̍

(Maɛ 9.30-32; Luu 9.43-45)

22Ti̍ Jusu ke ɔ̍ kòà gbǎ-a tàdùè dě Kaladii fɔɔ-ɛ, wɛ̀ ɔ̍ la̍a̍ dě u̍h we̍, “Nyi̍ɔ̍-a Jǔ-a mu̍ kwlǎ sà-ɛ dě nyɔ̍gbei kwa̍a̍. 23Nɛ̀ u̍h-a mu̍ ɔ̍ dbǎ, nɛ̀ pò wǐh ta̍a̍n sì-ɛ, wɛ̀ ɔ̍ iě-e wlǔh dode̍.”

Sɔ ɛ̍ po̍ ɔ̍ kòà-a wlùh dě de̍ i̍ kaa̍.

Jusu bla̍ dɛ̍ dǒ Nyɔsoa-a wɛɛ sà gbò-a taa̍sìh we̍

24Ti̍ Jusu ke ɔ̍ kòà sǐ-a wlɔ̀ i̍ dǒ Kepanium-ɛ, wɛ̀ jɔ̍gbauᵻ ùh-a sà-a Nyɔsoa gbò-a taa̍sìh-ɛ, iě u̍h tèle Pitɛ i̍, u̍h la̍a̍, “Na̍a̍, mɔ̀-a dlǔtu la ɔ̍ pɛ̌ɛ wɛɛ sà gbò-a taa̍sìh ke lě?”

25Pitɛ la̍a̍, “I̍i̍n, kǎ ɛ̍ nɛ.”

Ti̍ Pitɛ mu̍-a dě de̍ gbò-ɛ, Jusu nu̍ sàǐtòò nyɔ̍ ɔ̀ wlu. Ɔ̍ la̍a̍, “Pitɛ, ka ɛ̍ nɛ ke dě ìn wlùh we̍ ɛ? Blǔh baaᵻ nɛ-a da̍a kmɔ̌ la we̍-ɛ, nyɔ̍ kɔn kwa̍a̍ u̍h-a gbɛ̍n-ɛ taa̍sìh ɛ? Dě u̍h-a chɛ̀-a nynuu̍ kwa̍a̍ ɛɛ, àe̍e̍ dě nyɔ̍ duuh kwa̍a̍?”

26Pitɛ la̍a̍, “Dě nyɔ̍ duuh kwa̍a̍ bo.”

Wɛ̀ Jusu la̍a̍, “Nɛ̀ u̍h-a nynuu̍ se̍ kɔn u̍h iě i̍h pɛ̌ɛ. 27Jɛ à-a je̍e dɛ̍ nu̍ ɛ̍-ɛ je̍e nyɔ̍ wɔ̍i̍n nyaɛ. Ɛ̍ tìh-ɛ, mu̍ ìè kɔɛ̍n po̍ dě pɛ̍nu̍ klaa kɛ̍n. Smìɛ̍ àn mu̍-a sà sàǐtòò-ɛ, nɛ̀ ìn gbɛ̀n dě ɛ̍ wɔ̍ɔ̍n wliɛ̍ àn mu̍-ae jě-ɛ, ɛ̍ mu̍ ìn ke ǐn ke à taa̍sìh pɛ̌ɛ wɛ̀. Nɛ̀ ìn gba̍ ɛ̍ u̍h, à nàɛ̀ taa̍sìh bo.”

Tans Gekies:

Matio 17: KDNT

Kleurmerk

Deel

Kopieer