Matio 16
16
Ti̍laa nyɔ̍-a pɔ̀n Jusu iě jbaɛdih po̍
(Maɛ 8.11-13; Luu 12.54-56)
1Wɛ̀ Fɛlesii nyɔ̍ ke Sadiusii nyɔ̍ ji̍ dǒ Jusu we̍. Wɛ̀ u̍h tɛ̀n ɔ̍, u̍h la̍a̍, “Ji̍ ìè jbaɛdih po̍ à iě jě pò Nyɔsoa-a gbǐh nɛ dě ìn ja̍a̍ kɔ̌ɔ.”
2Wɛ̀ ɔ̍ la̍a̍, “Pò ɛ̍ nu̍ flìwe̍-ɛ, nɛ̀ mɔ̀ la̍a̍, ‘Dě ja̍i̍-a mu̍ la̍ i̍ che̍ɛ̍ɛn ke̍ o, dɛ̍nu̍ɛ, ja̍u̍n sàni i̍.’ 3Nɛ̀ pò ɛ̍ nu̍ klàɛ̍we̍-ɛ, nɛ̀ mɔ̀ la̍a̍, ‘Nǐ-a mu̍ dba̍ sèàn, dɛ̍nu̍ɛ, dě ja̍i̍ nɛ tùɛ̌ntùɛ̌n.’ Pò mɔ̀ gbɛ̀n ja̍u̍n ja̍-ɛ, nɛ̀ ka ɛ̍ mu̍-a nu̍-ɛ, mɔ̀-a sèàɛ̍ ɛ̍ we̍ i̍. Jɛ dɛ̍ᵻ ìh-a nɛ-a ka da̍a ti̍ la di̍i̍-ɛ, mɔ̀ se̍ i̍h-a dɛ̍ we̍ i̍ sèàɛ̍ bɛ̌ɛ. 4Ti̍laa nyɔ̍ la u̍h nyni gblɛ̍n-ɛ, iě u̍h-a blaɛ Nyɔsoa wɔ̍n. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Jona pùn.”
Wɛ̀ Jusu sɔ dǒ u̍h we̍, ɔ̍ mu̍ ɔ̍ dɛ̍.
Mɔ̀ na-ɛ kɛ̍ dǒ Fɛlesii ke Sadiusii nyɔ̍ we̍
(Maɛ 8.14-21)
5Jɛ ti̍ Jusu ke ɔ̍ kòà tàn-a u̍h gbǎ-a dě pɛ̍nu̍ klaa de̍e̍-ɛ, sɔ ɔ̍ kòà mǎle-e u̍h se̍ blèe̍ gba̍. 6Wɛ̀ Jusu la̍a̍ dě u̍h we̍, “Mɔ̀ tù mɔ̀-a chɛ̀ jlǐhɛ̍, mɔ̀ nu̍ nɛnɛ̌ dǒ Fɛlesii nyɔ̍ ke Sadiusii nyɔ̍-a blèe̍ fù-i dɛ̍ᵻ we̍.”
7Iě u̍h-a sǔh-a pu̍e̍e wlùh i̍, u̍h la̍a̍, “Nɛ̀ à se̍ blèe̍ ja dɛbo ɛ̍ kɔn ɔ̍ bla̍ dɛ̍ la kɔ̌ɔ-a.”
8Sɔ ɔ̍ juo-o dɛ̍ i̍, wɛ̀ ɔ̍ tèle u̍h i̍. Ɔ̍ la̍a̍, “Dɛ̍ kɔn se̍ blèe̍ ja tìh mɔ̀-a sǔh-a pu̍e̍e ɛ? Mɔ̀-a wlùh gbaɛ se̍ i̍ ku̍ gbɛɛ̍. 9Mɔ̀ se̍ dɛ̍ɛ̍ i̍ wɔ̌n ke̍ sǔh ae? Blèe̍ gba̍nᵻ m̀m̌ laa̍ jɔ̍gbauᵻá wlǔ m̀m̌ (5,000) di̍-aɛ, i̍h-a tìh se̍ dǒ mɔ̀ wlì i̍ sǐ ae? Sɔ taaᵻ tìèwe̍ mɔ̀ jǐ-i dǒ i̍h-a chɛblih we̍ ɛ? 10Nɛ̀ mɔ̀ à wɔ̌n dě gba̍nᵻ mɛ̀sɔɔ̌n laa̍ we̍ ke, ìh jɔ̍gbauᵻá wlǔ nyìɛ̍ (4,000) di̍-aɛ, sɔ taaᵻ tìèwe̍ mɔ̀ jǐ-i dɛ ke dǒ i̍h-a chɛblih we̍ ɛ? 11Ti̍ na̍a̍ mɔ̀ nu̍ nɛnɛ̌ dǒ Fɛlesii nyɔ̍ ke Sadiusii nyɔ̍-a blèe̍ fù-i dɛ̍ᵻ we̍-ɛ, nɛ̀ ɛ̍ se̍-a blèe̍ chɛ̀ɛ̌chɛ̀ ǐn se̍-a dǎ-a, mɔ̀ se̍-o dɛ̍ i̍ juo ae?”
12Sɔ u̍h juo-o dɛ̍ i̍ ka ɔ̍ se̍-a u̍h slɛ̌n tù dǒ blèe̍ fù-i dɛ̍ᵻ chɛ̀ɛ̌chɛ̀ we̍-ɛ. Jɛ ka u̍h iě-a Fɛlesii ke Sadiusii nyɔ̍-a nyɔ̍ nǎ po̍-ɛa nɛnɛ̌ nu̍-ɛ, ɛ̍ bo ɔ̍ dǎ.
Pitɛ flɔn-ɛ Jusu-a dɛ we̍i̍
(Maɛ 8.27-30; Luu 9.18-21)
13Ti̍ Jusu ke ɔ̍ kòà mu̍-a dě Sɛsewlia Felepai fɔɔ-ɛ, wɛ̀ ɔ̍ tèle u̍h i̍. Ɔ̍ la̍a̍, “Ɔ̀ nu̍-a Nyi̍ɔ̍-a Jǔ-ɛ, nyɔ̍gbei la̍ ɔ̍-ɔ nyɔ̍we̍ ɛ?”
14Ɔ̍ kòà la̍a̍, “Nyɔ̍ duuh la̍ mɔ̀ Chɔɔn ɔ̀ po̍-a nyɔ̍ nǐ dlǔ-ɛ. Iě duuh la̍ mɔ̀ Ilaɛja, nɛ̀ kǎ duuh-a dǎɛ m̀ Jɛlemaɛa, wɛ̀ duuh la̍ mɔ̀ Nyɔsoa-a tu̍owli po̍ nyɔ̍-a due.”
15Ɔ̍ la̍a̍, “À wɔ̌n dě mɔ̀ we̍ ke, mɔ̀ la̍ mɔ̍ nyɔ̍we̍ ke ɛ?”
16Wɛ̀ Samo Pitɛ la̍a̍, “Mɔ̀ Chèɛ̀ Tba̍ju, ɔ̀ nu̍-a kmɔ̌ nɛ Nyɔsoa-a Jǔ-ɛ.”
17Wɛ̀ Jusu la̍a̍, “Jona-a jǔ Samo, ìn nmɔ i̍, dɛ̍nu̍ɛ, ɛ̍ se̍ wlɔ̀ nyi̍ɔ̍ ùh se̍ ìn nǎ po̍ dǒ tìh-a taǐn la we̍. Jɛ ǐn Baa nɛ-a dě ja̍i̍wlɔ̀-ɛ bo ɔ̀ toe ìn ìh la. 18Jɛ Pitɛ, ǎn sèàɛ̍ ìn wlùh, mɔ̀ bo ɔ̀ nu̍ sɔɔ̌, dǒ sɔɔ̌ la kɛ̍n bo ǎn mu̍ ǎn chɔchi̍h poe. Nɛ̀ mɛ̌ɛ se̍ ɛ̍ klà sà mu̍. 19Nɛ̀ ǎn mu̍ ìn Nyɔsoa-a kmɔ̌ wlu̍ i̍ kɔn-ɛa kɔɛ̍n nyǐ. Dɛ̍ ìn dbǎ-a i̍ nɔ̌ bloɔ̍-ɛ, nɛ̀ ɛ̍ mu̍ i̍ dbǎ-ɛ ke dě ja̍i̍wlɔ̀. Nɛ̀ dɛ̍ ìn pɔ̀ni-a nɔ̌ bloɔ̍-ɛ, nɛ̀ ɛ̍ mu̍ pɔ̀ni-ɛ ke dě ja̍i̍wlɔ̀.”
20Wɛ̀ ɔ̍ nɛ̌ɛ ɔ̍ kòà wlu̍ dounᵻ i̍, u̍h-u je̍e nyɔ̍ dɔɔ wlùh sèàɛ̍ ka ɔ̍ nu̍-a Nyɔsoa-a Chèɛ̀ Tba̍ju-ɛ.
Jusu flɔn-ɛ ɔ̍ mɛ̌ɛ dɛ we̍i̍ dě ɔ̍ kòà we̍
(Maɛ 8.31–9.1; Luu 9.22-27)
21Sɔ dǒ ti̍ laa̍ di̍i̍-ɛ, ka Jusu kɔn ɔ̍ iě-a dǒ Juluslɛn wlɔ̀ di̍i̍ mu̍ wɛ̀ ɔ̍ iě-a jua̍i̍ sàɛ̀ dɛ̍blɔ dě nyɔ̍ klaaᵻ ke, Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kwa̍a̍-ɛ, sɔ ɔ̍ flɔn-ɛ la̍ dě ɔ̍ kòà di̍i̍ i̍ sǔh. Wɛ̀ ka pò u̍h dbǎ ɔ̍ wǐh ta̍a̍n sì-ɛ, nɛ̀ ɔ̍ mu̍-ae wlǔh-ɛ, wɛ̀ ɔ̍ sèàɛ̍ u̍h wlùh.
22Wɛ̀ Pitɛ gbaɛ Jusu fɔ̌ i̍, iě ɔ̍ la̍a̍, “Joi, bɔ̌ à wɔ̌n i̍, Nyɔsoa se̍ ɛ̍ wɔ̌ɛn mu̍, ɛ̍ se̍ ìn pùn nɛ mu̍.”
23Wɛ̀ Jusu fèàɛ̀, iě ɔ̍ la̍a̍, “Pitɛ, mɔ̀ Setɔn, sɔ da̍a ǐn jua̍a̍ i̍. Àn ka̍n ǎn wìè. Ìn se̍ Nyɔsoa wlùh blě, kmɔ̌ nyɔ̍-a wlùh bo ìn blě.”
24Wɛ̀ ɔ̍ la̍a̍ dě ɔ̍ kòà we̍, “Pò nyɔ̍-o-nyɔ̍ ja pɔ̀n ɔ̍ iě dǒ ǐn de̍e̍ gbǎ-ɛ, nɛ̀ ɔ̍ tǎli ɔ̍ chɛ̀-a wlùh gbɛ̍n dɛ̍ᵻ i̍, ɔ̍ iě ɔ̍ naɛ gbàɛ̍ kɛ̍n i̍ tu̍-u dǔ, wɛ̀ ɔ̍ iě dǒ ǐn de̍e̍ gbǎ. 25Dɛ̍nu̍ɛ, nyɔ̍ jɔ pɔ̀n-a ɔ̍ feɛ sèìe-ɛ i̍-ɛ, nɛ̀ ɛ̍ mu̍ ɔ̍ kwa̍ mǎ-ɛ. Jɛ nyɔ̍ jɔ se̍-a ɔ̍ feɛ sèìe mu̍ ǎn tìh-ɛ, nɛ̀ ɔ̍ mu̍ ɛ̍ blě. 26Pò nyɔ̍ blě dɛ̍ᵻ kli̍hgbɛ̍ da̍a kmɔ̌ la we̍ wɛ̀ ɔ̍ iě ɔ̍ feɛ mǎ-ɛɛ, nɛ̀ dɛ̍ ɛ̍ mu̍ ɔ̍-o po̍ ɛ? Nɛ̀ dɛ̍ dɛɛ se̍ dǒ de̍ nɛ ɔ̍ iě to wɛ̀ ɔ̍ iě ɔ̍ feɛ de̍ jě. 27Dɛ̍nu̍ɛ, Nyi̍ɔ̍-a Jǔ-a mu̍ de̍ka ji̍ dě ɔ̍ Baa-a tìh-a i̍ bɛ̌-ɛ di̍i̍, ɔ̍ ke ɔ̍ ǐnchɔ̀ ke. Dǒ ti̍ laa̍ di̍i̍-ɛ, ka jɔ-a nu̍-dɛ̍ nɛ-aɛ, nɛ̀ kǎ ɔ̍ Nyɔsoa kwa̍a̍ jě dɛ̍-a mu̍ nɛ. 28Tìh-a taǐn ǎn sèàɛ̍ mɔ̀ wlùh, nyɔ̍ duuh nyna i̍ da̍a u̍h se̍ mɛ̌ mu̍ te̍e̍ wɛ̀ u̍h iě Nyi̍ɔ̍-a Jǔ jě ɔ̍ iě ɔ̍ kmɔ̌ wlu̍ i̍ kɔn la̍ ji̍.”
Tans Gekies:
Matio 16: KDNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The New Testament in Western Krahn published as KU̍O̍ DELEE © The Bible Society in Liberia, 1999.
