Акълова 14

14 къаьм

1Аᵸкъилабли ахъа билӀо йо̄с,

аьнтабли гьули гьинила ко̄да̄д йугъолца.

2КӀетӀа гьидкьа̄ эᵸкьецас сукӀо БетӀергьаллихъа гьичӀеш,

чӀикӀ-чӀекӀдийа гьидкьа̄ эᵸкьецала Гьули эᵸлъана оваъас.

3Аьбдаллила сикӀа гьинила михъа̄ъ баькьелал цӀицӀо михъолца,

аькъилаблила сикӀа жу цӀуми о̄с.

4Оᵸсо гаьчча̄с гьиᵸсо йоьчӀчӀо йахъца, оᵸсо йогьдабагулцала̄с –

муькъо-бохас йоцӀийо йахъца.

5БитӀараб нуьъ оᵸтӀола̄ъас,

оᵸтӀолацала нуьъли сидилъ гьоᵸсо йеᵸхенна гьереси нисос.

6Йаьгь-ламус гаьчча сукӀо аᵸкъиллъи йиᵸзца, амма йиᵸхъаъас,

цӀодораблил илмо-лъай бигьазу михъос.

7Аьнтаб сукӀодойс ата̄к,

гьолцола йаьжиъ аᵸкъиллъи йиᵸхъаъцаслъи йикъе дул.

8Суд аᵸкъилла цӀодорабла гей?

СудлӀо нисода гьоллол гьидеш гьино йикъеш.

Суд аьбдалла̄ш аᵸкъло гаьъа?

СудлӀо нисода гьолло гьилла-макролас гьино йиᵸзца.

9Аьбдалла, мунагьла̄дойс бовачоцала аьдамла̄кьа лъоᵸвабас,

кӀетӀа̄ аьдамла̄ла билӀокьа баркат гулца.

10ЙакӀилзу йикъеш гьиниъ гаьгьийо пашманлъи-къарилъи,

йакӀиъ гаьгьийа рохеллиъ сукӀос сукӀо алӀо эᵸкьаъас.

11Лъаькъейа сукӀос билӀо йугъос,

муъмин-сукӀос къай кӀетӀлъис.

12Гей гьино инсаллил йаᵸкъойцӀо̄лӀо гиццас,

амма ахирна гьолълъо хеллиъ бейажеш.

13Лъоᵸваслаъна кӀокӀал йахъца аьдамлис йакӀо,

рохелна пашманлъилаъ йуьᵸхал йахъца.

14Капурабла̄ла ишла̄л тамбигь насиб бахъца,

кӀетӀа̄ сукӀоба̄ла ишла̄л кири бахъца.

15Аᵸкъло-лъай гаьччо сукӀо лъинкьаназу божча,

цӀодорабли сукӀо шибаб хаьба масана багъос.

16Аᵸкъил, кешлъилахъа гьичӀена, гьолълъодойс ата̄ эчеш,

аьбдал сидхъана гьицӀаъас,

гьула̄зу гьоᵸссидихъана йахъаъас гьолцол йогъо йеᵸхенна.

17Симахъоцала сукӀо аьнтаб жо йо̄с,

кешлъилал иᵸгьолдацас халкъилал атӀаъас.

18Кьолла̄ аьдамла̄л аьнтлъи насиб йахъца,

цӀодорабла̄л илмо-лъайлис таж йиᵸхъос.

19Чикейа̄ аьдамла̄, кӀетӀа̄ сукӀоба̄дой аьᵸйда̄ ахирна къаьм йуьᵸкъолча;

лъаькъейа̄ сукӀоба̄на муъмилла̄ла кавлидой къаьм йуьᵸкъолча.

20Мискиллидойс мадугьанна очош,

бечедаблис вацца̄на тели ба̄хъца.

21Мискинаб мадугьал охаъцалал мунагь бахъца,

гьардараб гаьъад мискилла̄кьа йакӀо йугъоцас сукӀо!

22Кешлъилал иᵸгьолдабацас сукӀоба къосси ба̄хъна гаьъад?

Амма кӀетӀослъи йогьцас сукӀо аьдамла̄л ацца,

гьула̄зу гьолцокьа божилъина йо̄с.

23Шибаб гьаьлтӀи-пишалис пайда-хайир бахъца,

наьгьакъда йикълашецала сикӀа гьоᵸс мискинлъи йоᵸкъолца.

24Аᵸкъилабла̄с бечелъи – гьидела къаьмкьа гулцас таж йахъца,

аᵸкъло гаьчча̄ла муьхо-маьхейолъила жуьво̄л гьоᵸс аьнтлъилаъ бейажеш.

25ОᵸтӀолаъца̄ла нуьъли аьдамла хъосар бовагьца,

оᵸтӀолацала нуьъли ми иᵸсос.

26БетӀергьан Аллагьлихъа гьичӀецас инсан эᵸлъейо ахъца тушмаллихъа багъона бахъаъцала хъалалилъ,

гьолцола къованна гьолълъо хъалалиъ гьичӀейолъи гаьъа.

27БетӀергьан Аллагьлихъа гьичӀейолъи – маулхӀаятлис мокӀ гей,

хеллила кӀицлиъисна тиса ба̄гъос.

28Халкъ телилъда – халлис къимат кьодда̄кца,

аьдамла даьгьбалъда – гьули пасад ахъца.

29Сабру букъо гаьгьийо гьинила аᵸкълола кьодда̄кӀца,

симо гьех бигьцала гьинис аьнтлъи гиса йагъос.

30ЙакӀила сабрула магъол чӀаголъи ницца,

сукӀол йахъийа жойлакьа йакӀо йагъола̄лъи лӀоьᵸйш унти гей.

31Мискилла̄л зулмо богьцала̄ гьолло̄л ба̄хъилло Аллагь какзи о̄с,

пакъирла̄кьа йакӀо йугъоцала̄ Гьолцос ца̄ᵸ кьодда̄кӀца.

32Лъаькъейа сукӀоба гьидела кешлъила лӀуьвабахолча,

муъмилла гьидела кӀетӀослъила хъосар бовагьца.

33Аᵸкъиллъи аᵸкъилабла сукӀоба̄ъ гей,

гьоᵸсолаъ гьули аьбдалла̄ъна йиᵸхъос.

34РитӀухълъила халкъ кьоддаба̄кӀца,

мунагьли шибаб къавмалил рогьо-ниц бо̄с.

35ЦӀодорабли лагъли хан рази о̄с,

йаьгь-ламус гаьчча лагъли гьолцос симо бийиллис.

Tans Gekies:

Акълова 14: KapPROLUK

Kleurmerk

Deel

Kopieer

Акълова 14

Gewilde Bybelverse vanaf
Акълова 14

Bybel:

бежкьалас миц

Weergawe: Анкълова, Лука - KapPROLUK