MATEO 5
5
Pꞌijuteswan ta wits te Jesuse
1Te Jesuse la yil te bayal te genteetike. Mo bael ta wits, teꞌ kꞌo snajkan sba a. Jich te jnopojeletik yuꞌune tijilajik tal ta stojol. 2Te Jesuse lijk snojpeslan, jich a yal to:
Te machꞌatik ben tsaꞌam slekilike
3—Ben me tsaꞌam slekilik te machꞌatik meꞌbaꞌ ya yaꞌiy ta yoꞌtanike, porke jaꞌix te Mukꞌ Ajwalil yuꞌunik te Diose.
4“Ben me tsaꞌam slekilik te machꞌatik ayik ta ajtal-oꞌtane, jaꞌ me ya xmukꞌutesbot yoꞌtan yuꞌun te Diose.
5“Ben me tsaꞌam slekilik te machꞌatik pekꞌ ay sok te yoꞌtane, jich me ya xꞌaꞌbot yuꞌuninik te lum yaloj te Diose.
6“Ben me tsaꞌam slekilik te machꞌatik jun yoꞌtanik ta spasel te tut ya skꞌan te Diose, jich me ya xkoltayot yuꞌun.
7“Ben me tsaꞌam slekilik te machꞌatik ya xkꞌuxutaywane, ya me skꞌuxutayot yuꞌun euk te Diose.
8“Ben me tsaꞌam slekilik te machꞌatik maꞌyuk mulil ta yoꞌtanike, jich me ya xkꞌo yilbeyik sit te Diose.
9“Ben me tsaꞌam slekilik te machꞌatik ya skom te kꞌope, jich yal-xnichꞌan Dios sbiilik ya xkꞌot yuꞌun.
10“Ben me tsaꞌam slekilik te machꞌatik ya xkꞌax swokolik ta ilbajinel yuꞌun ta skꞌaj te yaꞌtelinejik spasel te tut ya skꞌan te Diose, jich jaꞌ mukꞌ Dios yuꞌunik te ay ta chꞌulchane.
11“Ben me tsaꞌam alekilik teme ya sbolkꞌoptayexe, sok teme ya yilbajinelexe, sok teme ma tsaꞌamuk akꞌoplalik ta lot yuꞌun te genteetike teme joꞌon ta jkuentae. 12Junuk me awoꞌtanik, kontentoukex me, yuꞌun ya me awichꞌ amajtanik ta chꞌulchan. Jich me a kꞌax swokolik te jꞌalwanejetik yuꞌun Dios te nail a kꞌax ta balmilal awuꞌunike.
Atsꞌam sok lus kꞌoem skꞌoplal te jnopojeletike
13“Te jaꞌexe yatsꞌamul kꞌoemex te genteetik ta balmilale. Teme chꞌayix xchiꞌil te atsꞌame, ¿me ya wan xchiꞌub xan? Max tuunix a, ya yichꞌ chꞌojel bael ta be te ba ya xtekꞌulanot yuꞌun te genteetike.
14“Te jaꞌexe lusex yuꞌun te genteetik ta balmilale. Jun jtejklum teme ay ta jol witse ma xjuꞌ ta nakꞌel. 15Sok teme ya atsun lampara, ma spas ta mukel ta kaja. Ya atujchꞌanik ta xtuchtajib, jich ya yil kꞌinal spisil te machꞌatik ayik ta nae. 16Jichex ekꞌ te jaꞌexe, ya skꞌan te ya xtilex ta sit te genteetike. Jich teme lek ya yilik te tut ya apasike, jich me lek skꞌoplal ya xkꞌot yuꞌunik te jTatik te ay ta chꞌulchane.
Te Jesuse ya yalbey skꞌoplal te mantaliletike
17“Ma me xꞌakuyik te tal jchꞌaybe skꞌoplal te mantaliletik yaloj jilel te jMoisese sok te tut tsꞌibabil jilel yuꞌun te jꞌalwanejetik yuꞌun te Diose. Ma yuꞌunuk tal jchꞌaybe skꞌoplal; yuꞌun tal kakꞌ chiknajuk ta lek te tut sluwarile. 18Jamal ya kalbeyex: Te jayeb xan kꞌaal te mato xlaj te chꞌulchan sok te balmilale, ni junuk chꞌin letra ni junuk punto ya xchꞌay skꞌoplal yuꞌun te mantaliletike, jaꞌ to teme kꞌot ta pasel spisile. 19Jich yuꞌun te machꞌa ya xchꞌaybe skꞌoplal pꞌaluk te mantaliletike, manchuk me chꞌin nax ay skꞌoplal, sok teme jich ya yaꞌbey snop te genteetike, jich me maꞌyuk skꞌoplal ta ilel ya xkꞌot te ba ay ta mantal te Diose. Pero te machꞌa ya xchꞌuun spasel sok teme jich ya snojpꞌeswane, jaꞌ me aꞌbil ta jkuenta ya xkꞌot te ba ay ta mantal te Diose. 20Ja yuꞌun ya me kalbeyex, teme ma kꞌaxuk jich ya apasik te tut ya skꞌan yoꞌtan te Diose te tutꞌil ya spasik te maestroetik yuꞌun te mantaliletike sok te fariseoetike, ma xjuꞌ ya xꞌochex te ba ay ta mantal te Diose.
Jesus la yalbe skꞌoplal te iliꞌbae
21“Awaꞌiyojbeyik sluwaril te tuti albot jilel te namey te antibo ameꞌ-atatike: “Ma me milawanan, yuꞌun te machꞌa ya xmilawane ya me xꞌaꞌbot kastigo yuꞌun”, xchi me. 22Pero joꞌon ya kalbeyex: Spisil machꞌa ya yilintay te yermanoe, jaꞌ smul ya xkꞌot ta stojol te jmeltsaanwanejetike. Spisil machꞌa ya yixta-kꞌoptay te yermanoe, ya me xmeltsaanot yuꞌun te machꞌa yichꞌoj yaꞌtelike. Sok te machꞌa ya yikꞌtin te yermanoe, ya me xchꞌojot ochel ta kꞌakꞌ te ba ma xtupꞌ sbajtel kꞌinale. 23Jaꞌ yuꞌun, teme awichꞌojbe bael te smajtan Dios yuꞌun ay tut ya awaꞌbe te ba yawile, teme tal ta awoꞌtan te ay tut ma tsaꞌamuk yoꞌtan awuꞌun te awermanoe, 24teꞌ xꞌawakꞌ jilel ba xujk te yawile te smajtan awuꞌune. Baan chapa aba sok jilel nail te awermanoe, patil sujtan bael ta yakꞌel te smajtan Dios awuꞌune.
25“Teme ay machꞌa ya xba slebeyat amul ta stojol te jmeltsaanwanejetike, chapa aba sok ta ora antes ke ma to xkꞌot ta skuenta te alkale. Porke te maꞌuke, te alkale ya me yakꞌat ta skꞌab mayol, ya me yotsesat ta prexo. 26Jamal ya kalbeyat, ma xjuꞌ ya xlokꞌat teꞌa jaꞌto teme la atoj te amultae.
Jesus la yalbe skꞌoplal te antsiwejele
27“Te jaꞌexe awaꞌiyejik sluwaril te jich albil jile: “Ma me antsiwejanik”, xchi me. 28Pero joꞌon ya kalbeyex: Spisil machꞌa ya skꞌupin sok sit jtul ants, antsiwejix sok ta yoꞌtan abi.
29“Jich yuꞌun teme jaꞌ ya syalesat ta mulil te sbatsil asite, lokꞌesa, chꞌoja bael. Jaꞌ lek te ya xchꞌay pꞌejuk asite. Ja ma lek teme skojtol atiꞌbalul te ya xchꞌojat ochel ta kꞌakꞌ te ma xtupꞌ sbajtel kꞌinale. 30Sok teme jaꞌ ya syalesat ta mulil te sbatsꞌil akꞌabe, boja lokꞌel, chꞌoja bael. Jaꞌ lek te ya xchꞌay jchꞌixuk te akꞌabe. Jaꞌ ma lekuk teme skꞌojtol atiꞌbalul ya xchꞌojot ochel ta kꞌakꞌ te ma xtupꞌ sbajtel kꞌinale.
Jesus la yalbe skꞌoplal te machꞌa ya xchꞌoj sba sok yinam
31“Sok jich albil jilel euk: “Spisil machꞌa ya xchꞌoj sba sok te yiname, ya me yichꞌ tsꞌibayel ta jun te smul te antse, ya me xꞌaꞌbot ta skꞌab te june”, xchi me. 32Jaꞌ tsꞌin to, joꞌon ya kalbeyex: Teme ay machꞌa ya xchꞌoj sba sok te yiname, teme ma ta skꞌajuk skreme, ya me yaꞌbe sle skrem kꞌoem abi. Teme ay machꞌa ya xnujpun sok te ants te chꞌojbil yuꞌun te smamlale, antsiwejel me kꞌoem abi.
Jesus la yalbe skꞌoplal machꞌa ya stabe ta alel sbiil te Diose
33“Sok awaꞌiyejik sluwaril te tuti albot jilel te namey antibo ameꞌ-atatike: “Ma me xchꞌay te tut la awal te la awakꞌ ta testigo te Kajwaltike”, xchi me. 34Jaꞌ tsꞌin to, joꞌon ya kalbeyex: “Ma me awakꞌik chꞌinuk ta testigo awuꞌun. Ma me awakꞌik ta testigo te chꞌulchane porke jaꞌ me smukꞌul naktajib te Diose. 35Ni te balmilale porke jaꞌ me skajanibal yok. Ni te Jerusalene, porke jaꞌ mukꞌul jtejklum yuꞌun te mukꞌul Reye. 36Sok ma me awakꞌ ta testigo te ajole yuꞌun ma xjuꞌ awuꞌunik skꞌajtatesel ta sak niuk ta ijkꞌ jlijkuk te stsotsil ajole. 37Teme ay tut ya sjojkꞌobelexe, “Jichuk”, xchaex me teme jiche. Teme ma jichuke, “Maꞌuk”, xchaex me. Yan teme kꞌax jich te tut ya awalike, jaꞌix yuꞌun te pukuje.
Jesus la yal te ma lek te ya jpakbe jbajtike
38“Sok awaꞌiyejik sluwaril te jich albil jile: “Teme ay machꞌa ya smajat ta asit, ta sit ya amajbey euk. Sok teme ay machꞌa ya smajat ta atiꞌe, ta stiꞌ ya amajbe euk”, xchi me. 39Ja tsꞌin to, joꞌon ya kalbeyex: “Teme ay machꞌa ma tsaꞌamuk tut ya spasbeyate, ma me xꞌapakbe. Teme ay machꞌa smajat ta achoe, akꞌa ta majel te jmejch xane. 40Teme ay machꞌa ya slebeyat amul ta stojol te jmeltsaanwanejetike yuꞌun ya spojbeyat te akamixe, jilesa te akotone, aꞌ yichꞌ bael euk. 41Sok teme ay machꞌa ya sujat ta yichꞌel bael ijkatsil junuk lewa, kuchbeya xan bael junuk lewa. 42Teme ay machꞌa ay tut ya skꞌanbeyate, aꞌbeya, sok ma me amak ta kꞌop te machꞌa ay tut ya skꞌan smajanbeyate.
Kꞌuxuk me ta awoꞌtan te akontrae
43“Sok awaꞌiyejik sluwaril te jich albil jilele: “Kꞌux me xꞌawaꞌiy ta awoꞌtan te machꞌa jun awoꞌtan soke. Yan te machꞌa ya skontrainate, ilintaya me stukel”, xchi me. 44Pero joꞌon ya kalbeyex: Kꞌuxuk me ta awoꞌtanik te machꞌatik ya skontrainexe. Lekuk me skꞌoplal ya awalbeyik te machꞌatik ma lekuk akꞌoplalik ya yalbeyexe. Pasbeyaik te tut lek te machꞌatik ya spꞌajexe. Kꞌoponbeyaik Dios ta stojol te machꞌatik ya yixtakꞌoptayexe sok te ya yilbajinexe. 45Jich me yal-xnichꞌanex ya xkꞌoex te jTatik te ay ta chꞌulchane. Jich pajal ya yakꞌ lokꞌuk tal kꞌajkꞌal ta stojol machꞌatik lek yoꞌtanik sok machꞌatik ma lekuk yoꞌtanik. Sok pajal ya yakꞌ tal jaꞌal ta stojol te machꞌatik toj ta genteile y sok machꞌatik ma tojuke. 46Jich te jaꞌexe, teme jip nax kꞌux ya awaꞌiyik te machꞌa kꞌux ya yilexe, ¿tut ya ataik tsꞌin a? Asta te jkꞌan-tojemaletik yuꞌun Roma jich ya spasbe sbaik euk. 47Teme jaꞌ nax ya apatbe yoꞌtan te awermanotake, ¿ba xan wan lek tsꞌin a te jich ya apasike? Asta te machꞌatik ma snaꞌbe sba te Diose, jich ya spasbe sbaik euk. 48Jich te jaꞌexe ya skꞌan te jichuk ay slekil awoꞌtanik te tutꞌil ay slekil yoꞌtan stukel te jTatik te ay ta chꞌulchane.
Tans Gekies:
MATEO 5: AMANNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nuevo Testamento Tzeltal de Amatenango © Sociedad Bíblica de México, 2006.
