MATEO 6
6
Jesus la yal te tut lek ya skꞌan jpastike
1“Ila me abaik te kꞌalal yipalex ta spasel te tut lek yoꞌtan yuꞌun te Diose, ma me xꞌawal ta awoꞌtanik te ya skꞌupinex ta sit te genteetike. Teme jich ay ta awoꞌtanik, ma me ayuk amajtanik yuꞌun te jTatik te ay ta chꞌulchane.
2“Jich teme ay tut ya akꞌebenbeyik te meꞌbaetike, ma me xꞌapukibe skꞌoplal ta bayuk. Jich tutꞌil ya spasik te machꞌatik chaꞌlam yoꞌtanike ya yalbeyik skꞌoplal ta sinagogaetik sok ta kayaetik yuꞌun ya skꞌanik kꞌupinel yuꞌun te genteetike. Jamal ya kalbeyex, jip me smajtan la staik abi. 3Yan te jaꞌexe, teme ay tut ya akꞌebenbeyik meꞌbaetike, ma me machꞌa xꞌawalbe te kꞌalal ya awakꞌike. 4Mukul nax me xꞌawakꞌik. Y te jTatik ya yil te tutꞌil mukul nax ya apasike, ya me yaꞌbeyex amajtanik.
Jesus ya yakꞌ ta nopel tutꞌil ya skꞌan jkꞌopontik Dios
5“Te kꞌalal tut ora ya akꞌoponik Dios te jaꞌexe, ma me jichuk xꞌapasik te tutꞌil ya spasik te machꞌa chaꞌlam yoꞌtanike. Ya skꞌupinik te ya stejkan sbaik ta skꞌoponel Dios ta sinagogaetik sok ta eskinyailtik yuꞌun te plasae, yuꞌun ya skꞌanik kꞌupinel yuꞌun genteetike. Jamal ya kalbeyex, jip me smajtan la staik abi. 6Yan te kꞌalal ya akꞌoponik te Dios te jaꞌexe, ochan ta yut na, tsꞌusa te puertae. Teꞌ xꞌakꞌoponik a te jTatike te soyinejex stukele. Jich te jTatike ya yil te tutꞌil mukul nax ya apasike ya me yaꞌbeyex amajtanik.
7“Te kꞌalal ya akꞌoponik te Diose ma me jkajuk nax xꞌawalulanbeyik, jich tutꞌil ya spasulanik te machꞌa ma snaꞌbeyik sba te Diose. Yuꞌun ya skuyik te jich ya stsakbot skꞌopik te bayal buelta ya yalulanike. 8Ma me jichukex te jaꞌexe. Jich te jTatike snaꞌoj te tut ya xtuun awuꞌunik te kꞌalal ma to ya akꞌanik ae.
9“Te jaꞌexe, jich me xꞌakꞌoponik te Diose:
“Jtatik Dios te ayat ta chꞌulchane, a me chꞌuunekix ta lek te achꞌul-biile. 10Aꞌ me staix skꞌaalel te ya xꞌochat ta ajwalil. La me pas a tut ya skꞌan awoꞌtan ta balmilal jachik tutꞌil ta chꞌulchane. 11Aꞌbotik me tal te tutik ya jweꞌtik te jujun kꞌaale. 12Aꞌbotik me perdon yuꞌun te jmultike, jachik tutꞌil te ya jpastik perdon yuꞌun te machꞌa ya sta smul kuꞌuntike. 13Y ma me xaꞌwakꞌ mulawukotik. Koltayaotik me te ba tut ma tsaꞌamuke. Yuꞌun jaꞌat me ya xmantalajat, sok ay bayal apoder, sok ay alekilal ta sbajtel kꞌinal. Jichuk”, xaꞌex ta skꞌoponel te Diose.
14“Jich teme ya apasbey perdon te machꞌa ay smul ta atojole, jich te jTatik te ay ta chꞌulchane ya me spasbeyat perdon yuꞌun amul euk. 15Yan teme ma xꞌapasik perdone, jich ma me spasbeyat perdon yuꞌun amul euk te jTatike.
Jesus nojpeswan te tut ay ta komel weꞌelil
16“Te tut ora ya akom aweꞌelike, ma me xꞌawakꞌ chiknajuk te triste ay te asite, jich tutꞌil ya spasik te machꞌa chaꞌlam yoꞌtanike. Jich ya yakꞌik ta ilel ta stojol genteetik te triste ay sitik yuꞌun skꞌomoj sweꞌelike. Jamal ya kalbeyex, jip me smajtan la staik abi.
17“Yan te jaꞌexe te tut ora ya akom aweꞌelike, chapa abaik, tesa ajolik, y poka asitik. 18Jich ma chikanuk ya yil a te genteetike te akomoj aweꞌele. Jaꞌ nax ya snaꞌ stukel te jTatik te soyinejexe. Jaꞌ me ya yaꞌbeyex amajtanik yuꞌun.
Te jkꞌulejaltik ta chꞌulchane
19“Ma meꞌ xꞌatsob akꞌulejalik ta balmilal te ya xjochꞌube sok te ya stsaꞌube, sok te ba ya xꞌoch yelkꞌan te jꞌelekꞌetike. 20Jaꞌ lek tsoba akꞌulejalik ta chꞌulchan te ba makꞌ xjochꞌube sok te ba makꞌ stsaꞌube, sok ba makꞌ xꞌoch jꞌelekꞌetike. 21Jich te ba kꞌejbilix te akꞌulejalike tey me ay ekꞌa te awoꞌtanike.
Te jsitike jaꞌ ya yil kꞌinal a te jtiꞌbalultike
22“Te asitike jachik tut lus ya yil kꞌinal a te atiꞌbalulike. Jaꞌ yuꞌun teme lek ay te asitike, skojtol te atiꞌbalule sakuben kꞌinal yuꞌun. 23Yan teme ma tsaꞌamuk te asite, skojtol te atiꞌbalule ay ta ijkꞌal kꞌinal. Teme ya akuyik ta sakil kꞌinal te ijkꞌal kꞌinale, jmel ayex ta ijkꞌal kꞌinal abi.
Te Dios y te takꞌine
24“Ni jtul maꞌyuk machꞌa ya xjuꞌ yuꞌun ya yakꞌ sba ta abatinel yuꞌun te cheb ajwaliletike. Tem jiche, jaꞌ ya spꞌaj te jtule, yan te jtul xane kꞌux ta yoꞌtan stukel. Te jtule jun yoꞌtan ta stojol, pero ya spꞌaj te yane. Jich te jaꞌexe ma xjuꞌ awuꞌunik te ya awakꞌ abaik ta abatinel yuꞌun Dios teme jaꞌ snitojex te akꞌulejalike.
Dios ya skanantay te yal-xnichꞌane
25“Jaꞌ yuꞌun ya kalbeyex, ma me xꞌawakꞌ yajtal awoꞌtanik yuꞌun te tut ya aweꞌ ya awuchꞌik te kuxulex ta balmilale, sok te ya ata akꞌuꞌ-apakꞌike. Maꞌ jaꞌuk tulan skꞌoplal te aweꞌelike. Jaꞌ tulan skꞌoplal te akuxlejalike. Sok ma jaꞌuk tulan skꞌoplal te akꞌuꞌ-apakꞌike. Jaꞌ tulan skꞌoplal te atiꞌbalulike. 26Ilawilik te tut kuxulik te teꞌtikil mute. Ni makꞌ stsꞌunbajik, ni makꞌ xkꞌajojinik, ni maꞌyuk yawil yiximik. Pero to ya kalbeyex, te jTatik te ay ta chꞌulchane ya smakꞌlin spisil. Te jaꞌexe mas tulan akꞌoplalik ke te teꞌtikil mute. 27Ma xjuꞌ awuꞌunik te ya anajtꞌutes abaik xan teme ay yajtal awoꞌtanik te lom kꞌoxat.
28“Sok ¿tut yuꞌun te ya awakꞌ yajtal awoꞌtanik yuꞌun te akꞌuꞌ-apakꞌike? Naꞌaik te tutꞌil ya xchꞌi te nichimetik ta witse: Ni makꞌ xꞌaꞌtejik ni makꞌ sjal skꞌuꞌ-spakꞌik. 29Pero ya kalbeyex te maꞌ spajbey stsaꞌamul jlikuk nichim te skꞌuꞌ-spakꞌ te rey Salomone, manchuk me ben tsaꞌam te skꞌuꞌ-spakꞌe. 30Jich teme Dios la yakꞌ te ben tsaꞌam te nichimetik ta witse te jun nax kꞌaal kuxule y pajel ya yichꞌix chikꞌel a, ¿me yuꞌun wan ma jichuk ya skꞌuꞌultesex te jaꞌexe? ¿Tuꞌun te ma xchꞌuun awoꞌtanike? 31Ja yuꞌun ma me xꞌawakꞌ yajtal awoꞌtanik: “¿tutꞌil ya jta ta leel jweꞌel sok jkꞌuꞌ-pakꞌ?” ma me xchaukex ta ajtal-oꞌtan. 32Jich te machꞌatik ma snaꞌbeyik sba te Diose, jaꞌ nax baem ta yoꞌtanik sleel sweꞌelik sok skꞌuꞌ-spakꞌik. Yan te jaꞌexe ay aTatik ta chꞌulchan te snaꞌoj spisil te tut ya xtuun awuꞌunike. 33Jaꞌ me xꞌawajwalinik nailuk te Diose sok oꞌtantayaik spasel te tut ya skꞌan yoꞌtan stukele. Ya me yaꞌbelex spisil te tut ya xtuun awuꞌunike. 34Ma me xꞌawakꞌ yajtal awoꞌtanik yuꞌun te tut ayex te pajele. Stukel a me yil sba te pajele. Tey a te jayeꞌ swokolil te jujun kꞌaale.
Tans Gekies:
MATEO 6: AMANNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nuevo Testamento Tzeltal de Amatenango © Sociedad Bíblica de México, 2006.
