JENESIS 10
10
Ki khun ki ksiew na ki khun shynrang u Noah
(1 Khrn. 1:5-23)
1Kine ki long ki khun ki ksiew na u Shem, u Ham, bad u Japheth, ki khun shynrang jong u Noah. Kine lai ngut ki la ïoh khun shynrang hadien kata ka jingshlei um.
2Ki khun shynrang jong u Japheth — u Gomer, u Magog, u Madai, u Jaban, u Tubal, u Meshek, bad u Tiras — ki la long ki kpa tymmen jong ki briew kiba kheiñ jait na ki. 3Ki khun shynrang jong u Gomer ki long ki briew jong ka Ashkenas, ka Riphath, bad ka Togarmah. 4Ki khun shynrang jong u Jaban ki long ki briew jong ka Elishah, ka Spain, ka Sypros, bad ka Rhodes; ki la long ki kpa tymmen jong ki briew kiba shong ha ki rud duriaw bad ha ki dewlynnong. 5Kine ki long ki khun ki ksiew jong u Japheth, kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.
6Ki khun shynrang jong u Ham — u Kush, u Ijipt, u Libya, bad u Kanaan — kiba long ki kpa tymmen jong ki briew kiba kheiñ jait na ki. 7Ki khun ki ksiew jong u Kush ki long ki briew jong ka Seba, ka Habilah, ka Sabtah, ka Raamah, bad ka Sabteka. Ki khun ki ksiew jong u Raamah ki long ki briew jong ka Sheba, bad ka Dedan. 8U Kush u la don u khun uba kyrteng u Nimrod; uba la long u nongjop pyrthei uba khraw banyngkong eh. 9Da ka jingïarap U Trai u la long u nongbeh mrad uba khraw; ba kumta sa mih ka jingong, “Ai ba U Trai un pynlong ïa me u nongbeh mrad uba khraw kat u Nimrod.” 10Ha kaba sdang, ka hima jong u ka kynthup ïa ka Babilon, ka Erek, bad ka Akkad, kiba don baroh ha ka ri Babilonia#10:10 Babilonia: Kane ka dei ka kyrteng jong ka hima, bad ka kyrteng jong ka nongbah jong ka, ka dei Ka Babilon.. 11Na kata ka ri u leit sa sha Assyria, bad u tei hangta ïa ki nongbah ka Ninebeh, ka Rehoboth Ir, ka Kalah, 12bad ka Resen, kaba don hapdeng ka Ninebeh bad ka nongbah bakhraw ka Kalah.
13Ki khun ki ksiew jong u Ijipt ki long ki briew jong ka Lydia, ka Anam, ka Lehab, ka Naphtuh, 14ka Pathrus, ka Kasluh bad ka Krit na kiba la hiarpateng ki Philistia.
15Ki khun shynrang jong u Kanaan — u Sidon, u khun nyngkong jong u, bad u Heth — kiba long ki kpa tymmen jong ki briew kiba kheiñ jait na ki. 16U Kanaan u long ruh u kpa tymmen jong ki Jebus, ki Amor, ki Girgash, 17ki Hib, ki Ark, ki Sin, 18ki Arbad, ki Semar, bad ki Hamath. Ki jait bapher bapher jong ki jait Kanaan ki la saphriang kylleng kylleng, 19haduh ba ki pud ka Kanaan ki la ïar naduh Sidon, beit beit shathie shaphang Gerar hajan Gasa, bad shaphang mihngi shaduh Sodom, Gomorrah, Admah, bad Seboiim hajan Lasha. 20Kine keiñ ki long ki khun ki ksiew jong u Ham kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.
21U Shem, u hynmen jong u Japheth, u la long u kpa tymmen jong ki Hebru baroh. 22Ki khun shynrang jong u Shem — u Elam, u Asshur, u Arpakhshad, u Lud, bad u Aram — kiba long ki kpa tymmen jong ki briew kiba kheiñ jait na ki. 23Ki khun ki ksiew jong u Aram ki long ki briew jong ka Us, ka Hul, ka Gether, bad ka Meshek. 24U Arpakhshad u dei u kpa jong u Shelah, uba dei u kpa jong u Eber. 25U Eber u la ïoh ar ngut ki khun shynrang: ka kyrteng jong uwei ka long u Peleg, namar dei ha ki sngi jong u ba la pynïakhlad ïa ki briew ha ka pyrthei, bad ka kyrteng jong u para jong u pat ka long u Joktan. 26Ki khun ki ksiew jong u Joktan ki dei ki briew jong ka Almodad, ka Sheleph, ka Hasarmabeth, ka Jerah, 27ka Hadoram, ka Usal, ka Diklah, 28ka Obal, ka Abimael, ka Sheba, 29ka Ophir, ka Habilah, bad ka Jobab. Kine baroh ki dei kiba hiarpateng na u Joktan. 30Ka ri ha kaba ki shong ki sah ka ïar naduh Mesha haduh Sephar, kaba don ha ka ri lum kaba shaphang mihngi. 31Kine ki long ki khun ki ksiew na u Shem, kiba shong ha ki ri kiba pher bapher, bad ha la ka jait ka jait kaba kren ïa la ka jong ka jong ka ktien.
32Kine ki briew baroh ki long ki khun ki ksiew jong u Noah, ha la ka jait ka jait, kat kum la ki jingkheiñ jait bapher bapher ha ka jinghiarpateng. Hadien ka jingshlei um, baroh ki jaitbynriew ha ka pyrthei ki hiarpateng na ki khun shynrang jong u Noah.
Tans Gekies:
JENESIS 10: KHACLBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Khasi CL Bible
Copyright © Bible Society of India, 2016.
Used by permission. All rights reserved worldwide.
