Génesis 7
7
Pa uj tsha'nu
1Pa lhechesh pa Lhcaanvacle yit'esha pa Noê:
“Môjaam lha vatôvjatshi shi' lhacôm'a na ajôôjam, lhayaash ti yiey napuque nivacle ti c'ajulhjatey. 2Pa acum'e pava napu'yama yitsjôy shi' pava napu'yama ôcjeclôy lhacôm'a pava yaquisetes isis. Lhech pavan isjop ti chituj. Vooy pava niysisa yaquisetes ve'lhaa pa yitsuuj shi' ca ve'lhaa lhpa ôcjeclô. 3Acum'e shta pava napu'yama lhtajayas pava nalhjunashvatc'oya ajôclôs secl'esh ca mônlhaaesh pa lhjunash yiey na cotsjaat, 4lhayaash ti napu'yama pava amc'oya nalhus ca jachen pa uj tsha'nu. Pa cuarenta jayu pava nalhus shi' pava tulhis ca nitaaj. ¡Javômjat jayu lhacôm'a nava yiey na cotsjaat navan jasnatesh!” 5Pa Noê yisnatesh lhacôm'a pavan yiyôjiesha pa Lhcaanvacle.
6Pa Noê seiscientos pava lhnincôpes ti caaj pa uj tsha'nu pa tif'apee na cotsjaat. 7Pa yitshaam lhpa vatôvjatshi*xa* shi' papi lhcles, lhpa lhch'acfa shi' papi lhtômtes ca jaspa yiôcjic'oya pa tsha'nu. 8Pava isis yaquisetes shi' pava niysisa, pava yifô'yô shi' pava t'ôta'yesh pa t'oot, 9pa yichelhsham pa Noê lhpa vatôvjatshi pa napu' ts'ivee pa yitsuuj shi' lhpa ôcjeclô, pan t'ônashem pa Dios.
10Ti nôjeshch'e pava napu'yama nalhus pa caaj pa uj tsha'nu pa tif'apee na cotsjaat. 11Lhech pa nalhu ti diecisiete pa napu'eyshi jive'cla. Pa Noê lhechesh ti seiscientos pava lhnincôpes. Lhecheshch'e pa lhech nalhu, camameyc'oya pa yinôôt tôlhshaam na cotsjaat, camamc'oya shta pa tôôlhchishamnee pa uj tsha'nu.*xb* 12Cuarenta pava nalhus pa cuarenta shta pava tulhis ti taj'e' na cotsjaat. 13Lhechesh pa nalhu ti yich'ôcji pa Noê lhpa vatôvjatshi shi' shta papi lhcles pa Sem, pa Cam shi' pa Jafet, pa shi' shta lhpa lhch'acfa shi' shta papi pu'jana lhtômtey. 14Papi lhech yichelh'ôcji lhacôm'a pava nalhjunashvatc'oya yaquisetes pava tôyic shi' pava nitôyecla, nôquee shta pava t'ôta'yesh pa t'oot shi' pava ajô'clôs. 15Lhacôm'a pava yaquisetes ti yichelh'ôcji pa Noê lhpa vatôvjatshi pa napu' ts'ivee. 16Yich'ôcji pa ve'lha yitsuuj lhpa ve'lha shta ôcjeclô pava nalhjunashvatc'oya, nan lhjuanash pavan yiyôjiesha pa Dios pa Noê. Pa lhechesh pa Lhcaanvacle pa yip'oey pa lhashi lhpa vatôvjatshi.
17Pa lhech tsha'nu yicheshch'e pava cuarenta nalhus. C'oya ti tapo'in pa yinôôt pa neeshchisham lhpa vatôvjatshi pa yichesh. 18Pa yinôôt vat'iychisham'in, taj ti lhech lha nashesh'e lhpa vatôvjatshi ti yicheshchisham. 19Caju pa yam'echisham pa yinôôt pa yam'apee pava uschisham uticuy yiey na cotsjaat. 20Ti yam'apee pava uticuy, pa yinôôt pa ve'lheesh vat'iychisham pa napu'yama metros. 21Pa nôque lhjunash pa vafsha'ne lhacôm'a capi nivacle yiey na cotsjaat, lhech lhjunash shta cava ajôclôs, cava yaquisetes nitôyecla shi' cava tôyic, nôqueesh shta cava t'ôta'yesh pa t'oot. 22Vafsha'ne lhacôm'a pava yiey na cotsjaat, pava caajem pa lhamônlhajayash shi' pava tayalhiy. 23Ve'lha pa Noê shi' pava yi'shi' lhpa vatôvjatshi mônlhasha'ne. Vooy pav'elh pa vafsha'ne: pa nivacle, pava yaquisetes nitôyecla shi' pava ajô'clôs shi' shta pava t'ôta'yesh pa t'oot. 24Vooy pa yinôôt ciento cincuenta pava nalhus ti nim yiey na cotsjaat.
Tans Gekies:
Génesis 7: NIVA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nivacle Bible © Sociedades Bíblicas Unidas, 1994.
