Génesis 6
6
Pa sasch'e yi'shi' papi nivacle
1C'oya ti acloj papi nivacle pa tavtsatey'e na cotsjaat pa caaj papi ôcjeclôy lhcles. 2Papin lhclesesh pa Dios ti yi'van papi lhech nivacchey ti lhasnôychey. Pa lhechesh pa t'acum'e lhatam lhacôm'a papi lhech papin yen pa lhjayasesh. 3Pa lhechesh pa yit'esh pa Lhcaanvacle: “Tan jayu ca yin'ate ca cajuach'e ca mônlhaa pa nivacle, lhayaash ti tsi'sheem na t'asjaan atesha ti yen. Pa ciento veinte jayu shta pava lhnincôpes ca mônlhaa.
4Caaj papi pitesch'e*xw* chiyivan'e yiey na cotsjaat, pan t'aplhuqu'e papi Dios lhclesesh, ti lhjayasesh papi lhcles papi nivacle. Papi lhech lhnetônjasesh pa uj t'unaj pava lhech nalhus lhapesh.
5C'oya ti yi'van pa Lhcaanvacle papi nivacle yiey na cotsjaat ti uj ti niysa' pa lhjunash, pa yajatesh ti yaychavalhey ca nasnatesh pava niysisa. 6Pa uj ti cacleclem teya pava yisnatesh pa nivacle, pa uj ti aôytejem shta 7pa yit'esh: “Istaa ca javômjat yiey na cotsjaat ja nivacle jan jasnatesh, shi' lhacôm'a java yaquisites shi' java tosis shi' java ajô'clôs. ¡Caclecyam napi javaclhit!”
8Taj ti vooy ja Noê yajulhjatey pa Dios.*xx*
Pa lhôvjatshi yitsavalhch'e tovôc pa Noê
9Nôque vachayjayasheshch'e pa Noê.
Pa Noê lhavaatsha ve'lha nivacle issha'ne, yajatesh niqu'ishamem pa Dios. Ti yi'shi' papi lhech nivacle, ve'lheey ti yajulhjatey pa Dios.*xy* 10Pa Noê caaj papi pu'jana lhcles capuque pa Sem, pa Cam shi' pa Jafet.
11Ti yie' t'ajuyish pa Dios na cotsjaat ti yam'apee pa niysa' shi' pa vatav'ojiyash, 12lhayaash ti lhacôm'a papi nivacle ti vena lhfanishlhavach. C'oya ti yivan'e pa Dios ti yaash pa niysa' yiey na cotsjaat, 13pa yit'esha pa Noê: “Jaychavalhey ti jatif'e jayu lhacôm'a napi nivacle. Tôlh'ejop nava lhsasch'e yaash na lhav'ojiyash yiey na cotsjaat, pa lhech lhjunash ti jatifch'een jayu napi lhech shi' nan tuc'a'ey na cotsjaat. 14Asnatesh lhpa vatôvjatshi yeclônilh, asnatesh pava lhtôvjasesh, pa ap'aclaneshey ts'ivee lhacôm'a pava lhcaavjuclesh pava yeclôy pa yiyuus, pa tasham shi' pa fach'ee lhpa vatôvjatshi ca jaspa tanca nôcjaam pa yinôôt. 15Ca asnatajesh lhpa vatôvjatshi pa atsjuulhshisha'nejop: ciento treinta y cinco metros pa lhavôôj, veintidós metros y medio pa lhjuc'ach'e, pa trece metros y medio pa t'aplhuquisham. 16Asnatesh pava pu'jana'esh lhtôvjasesh chishamnee, pa ve'lhaa pa vatovalhjavat pa lhch'alhu'eesh metro pa lhavôôj yiey lhatôj'e, pa ve'lhaa pa lhashi nôv'e' lhavôôj. 17Jacheney jayu pa uj tsha'nu ca nitif'apee na cotsjaat pa nitifch'een jayu lhacôm'a pava caajem pa lhamônlhjayash yiey na cotsjaat. Lhacôm'a nava yi'apee na cotsjaat ti vafsha'ne jayu. 18Vooy avaatsha jasnatesh'am jayu pa chivatpeya'esh, vooy lhpa vatôvjatshi lhôqueelhsham jayu napi acles, lha ach'acfa, napi atômtey shi' avaatsha. 19Lhchaajsham jayu shta lhpa vatôvjatshi pa ve'lha yitsuuj shi' lhpa ôcjeclô lhacôm'a pava yaquisetes yiey na cotsjaat, secl'esh ca mônlhaasha'ne nan ajunash. 20Lhôqueelhshamsha'ne jayu lhpa vatôvjatshi pava napu' ts'ivee yaquisetes nalhjunashvatc'oya; lhjunashjulh shta pava ajôclôs, pava yaquisetes isisesh shi' pava t'ôta'yesh pa t'oot, ca jaspa mônlhaasha'ne. 21Pa anayjatemvane shta lhacôm'a pava nalhjunashvatc'oya vatcôs, ca asclan ca ajuyjat'avne shi' nava yaquisetes ca nituj.”
22Pa Noê yisnatesh lhacôm'a pa t'ônashesha pa Dios.*xz*
Tans Gekies:
Génesis 6: NIVA
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nivacle Bible © Sociedades Bíblicas Unidas, 1994.